1-3. (1) ¿Imataq Diosta yupaychaqkunapaqqa aswan allin? (2) ¿Ima sasachakuypim tarikunku musuq rimayta yachaqkunaqa hinaspa ima tapukuykunam rikurin? (Qaway kay paginapi kaq fotota).

JEHOVA DIOSPA testigonkunaqa Apocalipsis 14:6 nisqanman hinam ‘llapallan nacionkunaman, castakunaman, tukuy rikchaq rimayniyuqkunaman hinaspa lliw llaqtakunaman’ Diosmanta willakunankupaq anchata kallpanchakuchkanku. Ichapas qamqa huk rimayta yachachkanki utaq chay rimaypi huñunakuykunaman richkanki. Wakin iñiqmasinchikkunañataqmi misionero kanku utaq huk lawman astakunku Diosmanta astawan willakunankupaq.

² Diosta yupaychaqkunaqa imamantapas puntatam iñiyninchiktawan ayllunchikpa iñiyninta waqaychananchik (Mat. 5:3). Wakinpiqa imapas ruwayninchikkunam bibliata  estudiananchikpaq harkawachwan. Huk rimayta yachaq iñiqmasinchikkunapaqqa kantaqmi huk sasachakuyninkupas.

³ Kay iñiqmasinchikkunaqa manam musuq rimayllatachu yachananku, aswanqa iñiyninkupi allin kanankupaqmi sapa kuti bibliata estudiananku (1 Cor. 2:10). ¿Imaynatam chayta ruwanmanku musuq rimayta manaraq yachaspankupas? ¿Imanasqam tayta-mamakuna kallpanchakunanku churi-wawankupa sunqunkuman Diospa palabran chayananpaq?

4. ¿Imam iñiyninchikpi chiriyarachiwachwan? Willamuy Nehemiaspa tiemponmanta.

⁴ Bibliapa yachachikuyninkunata huk rimaypi mana entiendespanchikqa iñiyninchikpim chiriyaruchwan. Jerusalen llaqtaman Nehemias kutispanmi chaypi wakin warmakuna hebreo rimayta mana yachasqankumanta musyarurqa (leey Nehemias 13:23, 24). Chay warmakunaqa Diospa palabranta mana entiendesqankuraykum, Diosmanta karunchakuchkarqaku (Neh. 8:2, 8).

5, 6. ¿Imamantam musyakurqaku huk rimaypi yanapakuq tayta-mamakunaqa hinaspa imam chay sasachakuyqa?

⁵ Wakin tayta-mamakunam warmankuwan kuska huk rimayta yachachkanku, chaymi musyakurqaku warmankupa iñiynin chiriyasqanta. Huñunakuypi uyarisqankuta mana allinta entiendesqankuraykum, chay yachachikuykunaqa warmakunapa sunqunmanqa mana chayanchu. Australia nacionpi ayllunpiwan kuska yanapakuq Pedro iñiqmasinchikmi nin: “Bibliamanta rimaspanchikqa yuyaymanananchikmi sunqunchikman chayananpaq”, nispa  ^[1] (Luc. 24:32).

⁶ Rimayninchikpi qillqanchikkunata ñawinchaptinchikqa chay yachachikuykunam sunqunchikman chayan, huk rimaypim ichaqa sunqunchikman mana chayanmanchu. Chaymantapas huk rimayniyuq runakunawan parlanapaq sasachakusqanchikraykum, anchata pisiparuchwan chaynapim Jehova Diosta manaña ñawpaqpi hinachu kusisqa yupaychachwan. Chaymi huk rimaypi astawan yanapakuyta munaspanchikqa iñiyninchikpi mana chiriyarunapaq kallpanchakunanchik (Mat. 4:4).

7. Babilonia nacionniyuq runakunaqa, ¿imaynatam Danielta hikutarqaku paykuna hina kawsananpaq hinaspa taytachankutapas yupaychananpaq?

⁷ Danieltawan amistadninkunata Babilonia nacionniyuq runakuna aparuspankum, paykuna hina kawsanankupaq hinaspa taytachankutapas yupaychanankupaq yachachirqaku. ¿Imaynata? ‘Caldea lawpi rimayta’ yachachispankum hinaspa babilonio sutikunawan sutichaspankum (Dan. 1:3-7). Danieltam suticharqaku Bel sutiyuq taytachankupa sutinwan, chayqa Babilonia nacionpi ancha riqsisqa taytachankum karqa. Kamachiq Nabucodonosorqa munarqachá chay taytachanku Jehova Diosmantapas aswan atiyniyuq kasqanta Daniel piensananta (Dan. 4:8).

8. ¿Imam Danielta yanaparqa huk law nacionpi kaspanpas iñiyninpi mana chiriyarunanpaq?

⁸ Babilonia nacionpim Danielta kamachirqaku reypa mikunanta paypas mikunanpaq. Danielmi ichaqa ‘tukuy sunqunwan  tantearurqa’ Diospa kamachikuyninta kasukunanpaq (Dan. 1:8). Kikinpa rimayninpi Diosmanta willakuqkunapa libronkunata ñawinchasqanraykum, iñiyninpiqa mana chiriyarqachu huk law nacionpi yachaspanpas (Dan. 9:2). Chaymi Babilonia nacionpi qanchis chunka wata kawsakuspanpas, hebreo rimaypi sutinwan hinalla riqsichikurqa (Dan. 5:13).

9. ¿Imaynam Diospa palabranqa Salmo 119 qillqaqta yanaparqa?

⁹ Salmo 119 qillqaqpas sasachakuypim tarikurqa reypaq llamkaqkunamanta wakinku paypa contranpi rimaptinku. Ichaqa Diospa palabranpi yuyaymanasqanmi kallpancharqa hukkuna hina mana kananpaq (Sal. 119:23, 61). Payqa Diospa yachachikuyninkuna sunqunman chayananpaqmi yanapachikurqa (leey Salmo 119:11, 46).

10, 11. (1) Diospa palabranta estudiaspanchikqa, ¿imatam munanchik? (2) ¿Imaynatam chayta ruwachwan? Tupanachiywan willamuy.

¹⁰ Iñiqmasinchikkunata yanapaptinchik utaq llamkayninchikpi achka ruwayninchik kaptinpas, llapallanchikmi tiempochakunanchik sapallanchikpi bibliata estudiananchikpaq hinaspa ayllunchikwan kuska Diosta yupaychananchikpaqpas (Efes. 5:15, 16). Estudiananchikqa manam achka paginakunata ñawinchanallanchikpaqchu nitaq huñunakuykunapi rimarinallanchikpaqchu. Aswanqa Diospa palabran sunqunchikman chayaspan iñiyninchikta wiñachinantam munanchikqa.

¹¹ Bibliata estudiaspanchikqa manam hukkunata imayna yanapanallanpichu piensananchik, aswanqa ñuqanchiktapas imayna yanapawananchikpim piensananchik. Chaynata ruwaptinchikqa iñiyninchikmi wiñanqa (Filip. 1:9, 10). Diosmanta willakunanchikpaq, huñunakuykunapi rimarinanchikpaq utaq ñawpaqmanta yachachimunanchikpaq preparakuspanchikqa, manam sapa kutichu yuyaymananchik chay yachachikuykuna ñuqanchikta imayna yanapawasqanchikpiqa. Kaypi piensariy: Yanukuyta yachaq runaqa manaraq hukkunaman qarakuchkaspanmi yanukusqanta kikinraq mallinan, ichaqa manam chayllawanchu kawsanqa. Sano kayta munaspanqa, sapa kutim kikinpaq allin mikuyta yanukunan. Yaqa chaynallam iñiyninchikpi allin takyasqa kananchikpaqpas sapa kuti bibliata estudiananchik hinaspa yuyaymanananchik ñuqanchikta imayna yanapawasqanchikpi.

12, 13. ¿Imanasqam huk rimaypi yanapakuq iñiqmasinchikkunaqa kikinkupa rimayninkupi sapa kuti estudiananku?

¹² Huk rimaypi yanapakuq achka iñiqmasinchikkunam ninku rimayninkupi  Diospa palabranta estudiayninkuqa paykunapaq ancha allin kasqanta (Hech. 2:8). Huk law nacionpi misionero iñiqmasinchikkunapas ninkum huñunakuykunapi uyarisqallankuwan iñiyninkupi allinta takyanankupaq mana yanapachikusqankumanta.

¹³ Alain sutiyuq iñiqmasinchikqa yaqa pusaq watañam persa rimayta yachachkan. Paymi nin: “Huñunakuykunapaq persa rimaypi preparakuspayqa, chay rimaypim astawan piensani. Allinta rimanaypaq astawan kallpanchakusqayraykum, chay yachachikuykunaqa sunquymanqa mana chayawanchu. Chayraykum sapa kuti tiempochakuni bibliatawan qillqanchikkunata kikiypa rimayniypi estudianaypaq”, nispa.

14. ¿Imapaqmi tayta mamakunaqa astawan kallpanchakunanku hinaspa imanasqa?

¹⁴ Diosta yupaychaq tayta-mamakunam kallpanchakunanku Diospa palabran warmankunapa yuyayninkuman chaynataq sunqunkuman chayananpaq. Sergio iñiqmasinchikmi Muriel sutiyuq warmichanwan kimsa wata masninña huk rimaypi yanapakurqaku. Ichaqa musyakururqakum warmanku 17 watanpi kachkaspan huñunakuykunapi hinaspa Diosmanta willakuyninpipas hukmanyasqa tarikusqanmanta. Murielmi nin: “Manam munarqachu huk rimaypi Diosmanta willakuyta”, nispa. Sergiopas ninmi: “Chayna tarikusqan iñiyninpi ñawparinanpaq mana yanapananmanta  musyakuruspaykum, tanteakururqaniku warmaykupa rimayninpi kaqmanta huñunakunaykupaq”, nispa.

15. (1) ¿Imakunapim tayta-mamakunaqa yuyaymananku warmankupa rimayninman manaraq kutichkaspanku? (2) ¿Imatam Deuteronomio 6:5-7 nin tayta-mamakunata?

¹⁵ Wakin tayta-mamakunaqa ichapas kutiyta munachkanku warmankunapa rimayninkupi huñunakuyman. ¿Imatam ruwananku manaraq chayta tanteachkaspanku? Puntataqa yuyaymananankum sichu Jehova Diosmanta warmankuman yachachinankupaq hinaspa huk rimaytapas yachachinankupaq tiempochakuy atinankumanta hinaspa kallpayuqraq kanankumanta. Chaymantapas warmankutam qawananku sichu Diosmanta willakuy munasqankuta, huñunakuykunaman riyta munasqankuta utaq huk rimaypi yanapakuy munasqankutapas. Kaykunapi yuyaymanaspankum wakin tayta-mamakunaqa ichapas tanteanmanku warmankupa rimayninkupi huñunakunankupaq. Warmankupa iñiynin wiñaruptinqa ichapas tayta-mamakunaqa tanteanmanku kaqmanta huk rimaypi yanapakunankupaq (leey Deuteronomio 6:5-7).

16, 17. ¿Imatam wakin tayta-mamakuna ruwarqaku warmankuman Jehova Diosmanta yachachinankupaq?

¹⁶ Wakin tayta-mamakunaqa warmankupa rimayninkupim Jehova Diosmanta yachachinku huk rimaypi yanapakuspankupas. Carlos sutiyuq iñiqmasinchikmanta  rimarisun. Paypam kan kimsa warmi churinkuna sullka kaqmi 9 watayuq piwi kaqñataqmi 13. Paykunaqa lingala rimaypim yanapakuchkanku. Carlosmi nin: “Warmachaykunapa rimayninpi bibliata estudianaykupaq hinaspa aylluywan Diosta yupaychanaykupaqmi tantearurqaniku. Ichaqa lingala rimayta kusikuywan yachanankupaqmi pukllaspayku yachachirqaniku hinaspa huñunakuypaqwan Diosmanta willakunaykupaq preparakuspayku”, nispa.

¹⁷ Rimarisuntaq Kevin sutiyuq iñiqmasinchikmantapas. Paypam kan iskay warmi churinkuna hukninmi 5 watachayuq hukninñataqmi 8 watachayuq. Paykunapas huk rimaypim yanapakuchkanku, ichaqa warmankunam chay rimayta manaraq yachankuchu. Chaymi warmachankuman bibliamanta yachachinankupaq anchata kallpanchakun. Paymi nin: “Warmichaywanmi warmaykuman frances rimayniykupi bibliamanta yachachiniku. Kallpanchakunikutaqmi sapa killa huk kutita frances rimaypi huñunakuyman rinaykupaq. Sapa watataqmi frances rimaypi kimsa punchaw hatun huñunakuyninchikman rinaykupaq tiempochakuniku”, nispa.

18. (1) ¿Imaynatam Romanos 15:1, 2 nisqanpi yachachikuy tayta-mamakunata yanapanman warmankupa allinninpaq tanteanankupaq? (2) ¿Imatam wakin tayta-mamakuna ninku? (Qaway kay paginapi kaq willakuyta).

¹⁸ Sapakamam tayta-mamakunaqa warmankupa iñiynin allin kananpaq tanteananku ^[2] (qaway kay paginapi kaq willakuyta) (Gal. 6:5). 14 kaq parrafopim rimamurqanchik Muriel hinaspa Sergio sutiyuq iñiqmasinchikkunamanta. Paykunam huk rimaypi hinalla yanapakuyta munarqaku. Chayna kaptinpas, warmankupa rimayninpi huñunakunankupaqmi tantearurqaku, warmankupa iñiynin allin kanankama (leey Romanos 15:1, 2). Sergiom nin: “Chay ruwasqaykuqa allinmi karqa. Frances rimayniykupi kaqmanta huñunakuptiykum churiypa iñiyninqa astawan wiñarqa hinaspam bautizakururqa. Kunanqa 70 horatam sapa killa Diosmanta willakun hinaspapas huk rimaypi yanapakuytam munachkan”, nispa.

19, 20. ¿Imam yanapawasun Diospa palabranta kuyananchikpaq?

¹⁹ Jehova Diosqa lliw runakunatam kuyawanchik. Chaymi pachaknintin rimaykunapi palabranqa kachkan, chaynapi “tukuy rikchaq runakuna” chiqap kaq yachachikuymanta imam kaqta yachanankupaq (1 Tim. 2:4). Jehova Diosqa yachanmi iñiyninchikpi allin takyasqa kananchikpaq kikinchikpa rimayninchikpi bibliata ñawinchay ancha allin kasqanmanta.

²⁰ Llapanchikmi kallpanchakunanchik iñiyninchikpi allin kananchikpaq. Chaypaqqa kikinchikpa rimayninchikpim sapa kuti bibliata estudiananchik. Chaynata ruwaspanchikqa ayllunchiktam iñiyninpi yanapasunchik hinaspapas Diospa palabrantam astawan kuyasunchik (Sal. 119:11).