1, 2. (1) ¿Imatam Jesusqa imamantapas puntapi churarqa, hinaspa imanasqa? (2) ¿Imatataq ruwananchik ‘Diospa allin llamkaqmasin’ kananchikpaq?

JESUSQA carpinterum karqa hinaspapas Diosmanta yachachiqmi karqa (Mar. 6:3; Juan 13:13). Carpintero kaspanmi Jesusqa herramientankunata allinta servichikurqa kullumanta tukuyta ruwananpaq. Runakunaman yachachispanñataqmi Jesusqa Diospa palabranta allinta servichikurqa imam kaqta yachachinanpaq (Mat. 7:28; Luc. 24:32, 45). Jesusqa 30 watanpi kachkaspanmi carpintero llamkayninta saqirurqa, chaynapi Diospa munayninmanta willakunanpaq. Payqa yacharqam Diosmanta willakusqan imamantapas aswan allin kasqanta, chayraykum nirqa taytan chaypaq kay pachaman kachamusqanmanta (Mat. 20:28; Luc. 3:23; 4:43). Jesusqa Diosmanta willakusqantam imamantapas puntapi churarqa, munarqataqmi qatiqninkunapas chayta ruwanankuta (Mat. 9:35-38).

² Manam llapallanchikchu carpintero kanchik, ichaqa llapallanchikmi Diospa munayninmanta allin willakuykunataqa yachachinchik. Chaymi Diosmanta willakusqanchikrayku Diospas  yanapawanchik. Chaymi bibliaqa nin ‘Diospa llamkaqmasin kasqanchikta’ (1 Cor. 3:9; 2 Cor. 6:4). Chaymantapas yachanchikmi Diospa palabranqa chiqap kasqanta (Sal. 119:159, 160). Chayraykum ‘Diospa chiqap palabranta’ allinta servichikunchik Diosmanta runakunaman yachachinanchikpaq (qaway 2 Timoteo 2:15). Chaymi astawan kallpanchakunanchik Diospa palabranta allinta servichikunapaq. Arí, Diospa palabranwanmi Jehova Diosmanta, Jesusmanta hinaspa Diospa munayninmanta imam kaqta yachachinchik. Runakunata allinta yachachinapaqqa Diospa llaqtanqa quwarqanchiktaqmi bibliamanta yachachinapaq yanapakuykuna niqtapas. Chay yanapaykunata imayna servichikunamantam allinta yachananchik.

3. (1) Diospa piñakuynin punchaw manaraq chayamuchkaptin, ¿imata ruwanapaqmi kallpanchakunanchik? (2) Hechos 13:48 nisqanman hinaqa, ¿pikunatam maskananchik?

³ Bibliamanta yachachinapaq yanapakuykunaqa ruwasqam kachkan runakunaman Diosmanta allinta yachachinanchikpaq. Pitapas yachachispaqa allinta entiendinankupaqmi yachachinanchik, chaynapi yachasqankuman hina ruwanankupaq. Chaymi Diospa piñakuynin punchaw manaraq chayamuchkaptin, kallpanchakunanchik bibliamanta imam kaqta runakunaman yachachinanchikpaq. Chaypaqqa tukuytam ruwananchik ‘wiñay kawsayta chaskinankupaq’ kaqkunata maskananchikpaq, chaynapi paykunapas Diosta yupaychanankupaq (qaway Hechos 13:44-48).

4. ¿Imatam ruwananchik ‘wiñay kawsayta chaskinankupaq’ kaqkunata tarinanchikpaqqa?

⁴ ¿Imatam ruwananchik ‘wiñay kawsayta chaskinankupaq’ kaqkunata tarinanchikpaq? Diosmanta willakuspam paykunata maskananchik. Chaypaqmi Jesuspa kayna kamachisqanta kasukunanchik: “May llaqtamanpas utaq llaqtachamanpas chayaspaykichikqa maskaychikyá willasqaykichikta uyariy munaq runakunata”, niqta (Mat. 10:11). Ñuqanchikqa yachanchikmi hatun tukuqkuna hinaspa Diosmanta mana yachay munaqkuna mana uyariwananchikmanta. Chaymi llampu sunquyuqkunata hinaspa Diosmanta yachay munaqkunata maskananchik. Kaypi piensariy: Jesusqa allin kullukunataraqchá puntataqa maskaq punkukunata, yugukunata utaq imatapas ruwananpaqqa. Allin kullukunata tarispanñataqmi chayraq herramientankunata servichikuq ima munasqanta ruwananpaq. Chayta hinam ñuqanchikpas ruwananchik, puntataraqmi llampu sunquyuq runakunata maskananchik, hinaspam Diosmanta yachachinapaq chaskisqanchik yanapakuykunawan yachachinanchik (Mat. 28:19, 20).

5. Carpinteropa herramientankunawan tupachispa, ¿imatam yachananchik bibliamanta yachachinapaq yanapakuykunamanta? (Qaway 9 kaq paginapi fotota).

⁵ Imapipas llamkananchikpaqqa achka herramientakunatam servichikunchik. Piensarisun Jesus carpintero kaspan ima herramientakunata servichikusqanpi. * Wakin herramientankunaqa karqachá kullukunata medinapaq hinaspa maypi señalanapaqpas. Karqataqchá kuchunapaq, uchkunapaq utaq ratanachinapaq kaq herramientakunapas. Sapakama herramientataqa servichikuqku imapaq servikusqanman hinam. Chaynallataqmi ñuqanchikpapas kapuwanchik bibliamanta yachachinapaq achka yanapakuykuna. Chaykunatam yachananchik imayna servichikunapaq. Yachasunyá sapa yanapakuykunata imayna servichikunamanta.

6, 7. (1) ¿Imaynatam servichikunki jw.org tarjetachakunata? (2) ¿Imakunapaqmi servichikunchik huñunakuyman hamunankupaq qillqakunata?

⁶ JW.ORG tarjetachakuna. Chay tarjetachakunaqa uchuycha kaspanpas, allintam yanapawanchik testigo kasqanchikta runakunawan riqsichikunanchikpaq. Yanapawanchiktaqmi jw.org niqman runakuna yaykunankupaq yachachinanchikpaqpas. Chaypiqa Jehova Diospa testigunkunamantam astawan yachayta atinmanku, hinaspapas bibliamanta yachachisqa kanankupaqmi mañakunmanku. Kunankamaqa 400.000 masnin runakunam jw.org niqman yaykuspanku bibliamanta yachachisqa kanankupaq mañakurqaku. Chaytaqa sapa punchawmi pachaknintin runakuna ruwanku. Chaynaqa, kallpanchakunanchikmi chay tarjetachakunata mayman risqanchikman apananchikpaq, chaynapi maypipas kaspanchik runakunaman Jehova Diosmanta yachachinanchikpaq.

⁷ Huñunakuyman hamunankupaq qillqachakuna. Chay qillqapa qallariyninpim nin: “¿Munawaqchu Jehova Diospa testigonkunawan bibliamanta yachayta?”, nispa. Hina chay qillqachapim runakunaman nin huñunakuypi utaq wasinkupi bibliamanta yachayta atinankumanta. Chaynaqa, chay qillqatam servichikuchwan Jehova Diospa testigun kasqanchikta runakunaman ninanchikpaq. Servichikuchwantaqmi ‘Diosta maskaqkunata’ bibliamanta ñuqanchikwan estudianankupaq ninanchikpaqpas (Mat. 5:3). Huñunakuyninchikmanqa pipas hamunmankum bibliamanta manaraq estudiachkaspankupas. Huñunakuyninchikman hamuspankuqa bibliamantam allinta yachanqaku.

8. ¿Imanasqataq allin kanman huñunakuyninchikman runakuna huk kutillapas riyninkuqa? Rimarimuy Ray hinaspa Linda iñiqmasinchikkunamanta.

⁸ Huñunakuyninchikman hamunankupaqmi runakunata hinalla ninanchik, huk kutilla hamunanku kaptinpas. ¿Imanasqa? Huñunakuyninchikman hamuspankuqa, musyakunqakum Jehova Diospa testigunkunaqa wakin religionkuna hina mana kasqanchikta. Musyanqakutaqmi bibliamanta imam kaqta yachachisqanchikta hinaspa Diosta riqsinankupaq runakunata yanapasqanchiktapas (Is. 65:13). Rimarisun casarasqa Ray hinaspa Linda iñiqmasinchikkunamanta. Paykunaqa Diospi iñisqankuraykum ima iglesiamanpas riyta munarqaku Diosta allinta riqsinankupaq. Chaypaqmi tantiarurqaku llaqtankupi sapa iglesiakunaman rinankupaq. Llaqtankupiqa achka iglesiakuna hinaspa religionkunam karqa. Chaymi paykunaqa nirqaku ima iglesiapas allinta yachachiptinkuqa, hinaspa chaypi kaqkuna Diospa munasqanman hina pachakuptinkuqa chaypi qipakunankupaq. Paykunaqa achka watakunam sapa iglesiaman rirqaku, ichaqa chay iglesiakunapiqa manam imatapas Diosmantaqa yacharqakuchu nitaq chaypi kaqkunapas Diospa munasqaman hinaqa pachakurqakuchu. Huk punchawmi iglesiamanta lluqsiruspan Lindaqa llamkayninman pasakurqa, qusan Rayñataqmi wasinman kutichkarqa. Kutichkaspanmi testigukunapa huñunakusqanku wasita rikururqa hinaspa nirqa: “Kayman yaykuykuspayá ima ruwasqankuta qawaykusaq”, nispa. Rayqa kusisqallañam tarikurqa huñunakuy tukuyta. ¿Imanasqa? Chaypi kaqkuna kuyakuqllaña kasqankurayku hinaspa Diospa munasqanman hina pachakusqankurayku. Rayqa huñunakuypiqa puntapim tiyarqa hinaspam tukuy yachasqanwan kusisqa  tarikurqa. Chayqa karqa apostol Pablopa qillqasqanman hinam, payqa qillqarqam chayllaraq huñunakuyman riq runapa kayna nisqanta: “Chiqaptapunim Diosqa qamkunawan kachkan”, nispa (1 Cor. 14:23-25). Chaymantapacham Rayqa sapa domingo huñunakuyman riyta qallaykurqa, hinaspa manapas unaymanta lliw huñunakuykunamanña. Warmichan Lindapas paywan riytam qallaykurqa. Paykunaqa 70 wata masnin kachkaspankupas, bibliamantam estudiayta qallaykurqaku hinaspa bautizakurqaku.

9, 10. (1) ¿Imanasqataq mana sasachu taksa qillqanchikkunata servichikuyqa? (2) Rimarimuy imaynatam servichikuchwan ¿Imataq Diospa Gobiernonqa? niq qillqanchikta.

⁹ Taksa qillqachakuna. Kapuwanchiktaqmi 8 taksa qillqachakunapas. Chay qillqachakunaqa yanapawanchikmi chaylla piwanpas rimayta qallarinanchikpaq. Chay qillqachakunaqa 2013 watapim qillqasqa karqa. Chay watamanta kunankamaqa achkallay-achka qillqachakunañam ruwakurun. Huk taksa qillqanchikta imayna servichikuyta yachaspaqa, llapantañam imayna servichikuyta yachasun, hina kaqlla kasqankurayku. ¿Imaynatam chay qillqanchikkunata allinta servichikuchwan piwanpas chayllaraq rimaspa?

¹⁰ Ichapas ¿Imataq Diospa Gobiernonqa? niq qillqanchikta servichikuspaqa qaranpi kaq tapukuyta qawachispa kaynata tapuykuchwan: “Haykallapipas tapukurqankichu ¿imataq Diospa gobiernonqa? Niwaqchu ¿sunqunchikpi kasqanta? ¿Rikchanachiylla kasqanta? Utaq ¿hanaq pachapi kasqanta?”, nispa. Ima piensasqanta niwaptinchikqa ama nisunchu allin utaq mana allin kasqanmantaqa. Chay qillqachata kichaykuspam qawachichwan “¿Imatam biblia nin?” nisqanta, hinaspam chaypi qillqasqaña kaq Daniel 2:44 chaynataq Isaias 9:6 nisqankunata ñawinchaykapuchwan. Tukunanchikpaqñataqmi qillqanchikpa qipanpi “¿Imaynataq Diospa Gobiernon ukupi kawsakuyqa kanqa?” niqta tapuchwan. Kaqmanta watukuspaqa chaymantam rimachwan. Chaymantapas chay qillqachaqa Diosmanta allin noticiakuna niq qillqapa 7 kaq yachachikuyninta maskananchikpaqmi niwanchik, chay qillqaqa ruwasqam kachkan bibliamanta yachachiyta qallarinanchikpaq.

11. ¿Imapaqtaq Willakuq hinaspa ¡Rikchariy! qillqanchikkunaqa ruwasqa kachkan, hinaspa imatam yachananchik?

¹¹ Qillqanchikkuna. Willakuq hinaspa ¡Rikchariy! qillqanchikkunaqa ima qillqakunamantapas achka rimaykunapim ruwasqa kachkan, hinaspam enterun pachapi achka runakunaman aypukun. Enterun pachapi tukuy rikchaq runakunapaq ruwasqa kasqanraykum, qillqanchikkunapa yachachikuyninkunaqa sumaq-sumaq akllasqa kachkan. Chaynapi runakuna Diosmanta astawan yachayta munanankupaq. Chaymi kay qillqanchikkunataqa allinta servichikunanchik. Chaypaqqa yachananchikmi pi runakunapaq sapa qillqanchikkuna ruwasqa kasqanmanta.

12. ¿Pikunapaqtaq ¡Rikchariy! qillqanchikqa ruwasqa kachkan?

¹² ¡Rikchariy! * qillqanchikqa bibliamanta mana ancha yachaqkunapaqmi ruwasqa kachkan. Wakin runakunaqa ichapas bibliapa yachachikuyninkunata mana yachankuchu, wakinkuñataq religionkunata mana allinpaq  hapinkuchu. Wakinkuñataqmi mana yachankuchu bibliapi yachachikuyninkunaqa allinninkupaq kasqanmanta. Chaymi ¡Rikchariy! qillqanchikqa ruwasqa kachkan runakuna Dios kasqanta yachanankupaq (Rom. 1:20; Heb. 11:6). Chaymantapas runakunatam yanapan bibliaqa Diospa palabran kasqanmanta mana iskayrayanankupaq (1 Tes. 2:13). 2018 watapi castellano rimaypi lluqsimuq ¡Rikchariy! qillqanchikkunapa yachachikuyninkunaqa kaykunam: “El camino de la felicidad”, “12 claves para una familia feliz” hinaspa “Ayuda para quienes están de duelo”.

13. (1) ¿Pikunapaqtaq ruwasqa kachkan Diosmanta willakunapaq Willakuq qillqanchikqa? (2) Willarimuy kay pasaq killakunapi, Willakuq qillqanchikta imayna servichikusqaykimanta.

¹³ Diosmanta willakunapaq Willakuq qillqanchikñataqmi bibliapa yachachikuyninkunata yachachin. Ruwasqam kachkan Diosta hinaspa bibliata respetaq runakunapaq. Ichapas chay runakunaqa bibliapa wakin yachachikuyninkunata yachaspankupas manaraq imam kaqtachu yachanku (Rom. 10:2; 1 Tim. 2:3, 4). 2018 watapaq lluqsimuq Willakuq qillqanchikpa yachachikuyninkunaqa kaykunam: “¿Yanapawanchikraqchu bibliaqa?”, “¿Imaynataq hamuq tiempuqa kanqa?” hinaspa “¿Diosqa qunqarusunkichu?”

14. (1) ¿Imapaqmi Diosmanta willakunapaq videukunata servichikunchik? (2) Willarimuy videukunata runakunaman qawachispayki imayna yanapasqaykimanta.

¹⁴ Videukuna. Jesuspa tiempunpiqa carpinterukunapa herramientankunaqa makillawan servichikunankupaqmi karqa. Kunan tiempupi herramientakunam ichaqa corrientiwanña, servichikunkum motosierrata, taladruta hinaspa huk maquinakunatapas. Chaynallataqmi qillqanchikkuna kapuwaptinchikpas, kapuwanchiktaqmi sumaq videukunapas. Diosmanta willakunapaqqa kanmi tawa videukuna: ¿Imanasqataq Bibliata estudiana?, ¿Imaynatam Bibliamanta yachachiniku?, ¿Imaynataq huñunakuyniykuqa? hinaspa ¿Imaynataq Jehova Diospa testigonkunaqa kaniku? niqkuna. Chayllaraq pitapas Diosmanta rimapayaspanchikqa yaqa iskay minutulla kaq videukunatam qawachichwan. Achka minutuyuq kaq videukunatañataqmi qawachichwan kaqmanta watukuspanchik utaq tiempuyuq kaq runakunamanpas. Chay videukunapa yachachikuyninkunaqa, runakunapa sunqunman yachaspanmi bibliamanta yachanankupaq hinaspa huñunakuyman hamunankupaq kallpanchanqa.

15. ¿Imaynatam runakunata yanapanman rimayninkupi videunchikkunaqa? Willarimuy.

¹⁵ Videukuna imayna runakunata yanapasqanmanta yachasun. Huk iñiqmasinchikmi Micronesia nacionmanta warmiman ¿Imanasqataq Bibliata estudiana? niq videuta yapes rimayninpi qawachirqa. Videuta qawayta qallarichkaspanmi chay warmi nirqa: “¡Kay videuqa rimayniypim kachkasqa! Rimamuqpas llaqtaypi rimasqankuman hinam rimasqa”, nispa. Chay videuta qawayta tukuruspanmi chay warmiqa nirqa jw.org niqpi lliw yachachikuykunata yapes rimayninpi qawananmanta (tupachiy Hechos 2:8, 11). Estados Unidos nacionmanta warmi iñiqmasinchikpas, huk lawpi yachaq sobrinunmanmi internitnintakama ¿Imanasqataq Bibliata estudiana? niq videuta rimayninpi apachirqa. Chay videuta qawaruspanmi subrinunqa iñiqmasinchikman kaynata qillqarqa: “Manam yacharqanichu kay allpa pachaqa satanaspa makinpi kasqanmanta, bibliamanta yachachiwanankupaqpas mañakuruniñam”,  nispa. Iñiqmasinchikpa sobrinunqa Diosmanta willakunanchikta harkakuq nacionpim yachan.

16. Pikunapaqtaq kay qillqakuna ruwasqa kachkan: (1) Diosta uyariy hinaspa wiñaypaq kawsay, niq qillqa. (2) Diosmanta allin noticiakuna, niq qillqa. (3) ¿Pikunataq Jehová Diospa munayninta kay tiempopi rurachkan? niq qillqa.

¹⁶ Huk qillqakuna. Pipas mana leeyta yachaptinqa utaq rimayninpi qillqanchikkuna mana kaptinqa, ¿imaynatam paykunata bibliamanta imam kaqta yachachichwan? Chaypaqqa kapuwanchikmi Diosta uyariy hinaspa wiñaypaq kawsay * niq qillqanchik. Runakunawan bibliamanta estudiayta qallarinapaqpas kapuwanchikmi Diosmanta allin noticiakuna niq qillqanchikpas. Chay qillqapa 14 yachachikuyninkunatam runakunaman qawachichwan, hinaspam mayqinmanta yachayta munasqanmanta tapuykuspa yachachiyta qallaykuchwan. ¿Chaytachu ruwachkanchik runakunata kaqmanta watukuspa? Kapuwanchiktaqmi ¿Pikunataq Jehová Diospa munayninta kay tiempopi rurachkan? niq qillqapas. Chay qillqaqa ruwasqam kachkan bibliamanta yachaqkuna Diospa llaqtanta allinta riqsinankupaq. Chay qillqata imaynata servichikunapaqmi ñawinchachwan, 2017 watapa marzo killanpi lluqsimuq Diospa munayninta ruwananchikpaq huñunakuypi yanapawaqninchik niq qillqata.

17. (1) ¿Imaynatam yachachisqanchik runata yanapanqa bibliamanta yachachiq libronchikkuna? (2) ¿Imatam ruwananku llapallan bautizasqa kaqkuna, hinaspa imanasqa?

¹⁷ Librokuna. Bibliata huk qillqakunawan estudiaspanchikqa ¿Imamantam bibliaqa yachachiwanchik? niq librowanñam yachachichwan. Kay libroqa yachachisqanchik runatam allinta yanapanqa. Kay librota estudiayta tukuruspaqa, hinaspa Diosmanta hinalla yachayta munaptinqa Hinallayá Dioswan kuyachikusun niq librowanñam paywan estudiayta qallaykuchwan. Kay librowanmi yachanqa bibliapa yachachisqanman hina imayna kawsakunanpaq. Chaymantapas, iskaynin librokunatam estudiayta tukunan bautizasqaña kaspanpas. Chaynapim Diosmanta yachayninqa sunqunpi allinta takyanqa (qaway Colosenses 2:6, 7).

18. (1) 1 Timoteo 4:16 nisqanman hinaqa, ¿imatam ruwananchik, hinaspa imapaq? (2) ¿Imapaqmi bibliamanta yachachinapaq yanapakuykunata servichikunanchik?

¹⁸ Jehova Diospa testigunkunaqa bibliamantam imam kaqta runakunaman yachachinanchik, chaynapi paykuna wiñaypaq kawsakunankupaq (Col. 1:5; qaway 1 Timoteo 4:16). Chaypaqmi bibliamanta yachachinapaq yanapakuykunata Diospa llaqtan quwanchik (qaway “ Bibliamanta yachachinapaq yanapakuykunata” niq willakuyta). Chaynaqa chay yanapakuykunapa nisqanman hina ruwanapaqyá kallpanchakusun. Chaypaqqa sapakamam tantiakunanchik mayqinta hinaspa haykapi servichikunanchikpaq. Ichaqa manam qillqanchikkunataqa aypuyllachu-aypunanchik. Manataqmi qunanchikchu Diosmanta yachachisqanchikta mana kaqpaqpas hapiq runakunamanpas. Ñuqanchikqa yachachinanchikmi “wiñay kawsayta chaskinankupaq” kaqkunaman, llampu sunqukunaman hinaspa Diosmanta yachay munaqkunaman. Chaynapi Jesuspa qatiqninña kanankupaq (Hech. 13:48; Mat. 28:19, 20).