1, 2. (1) ¿Imaynam tarikunchik qunqayllamanta imapas pasawaptinchik? (Qaway kay paginapi kaq fotota). (2) Salmo 131 nisqanman hinaqa, ¿imataq yanapawasun hawkalla kananchikpaq?

CASARASQA Loid hinaspa Alexandra iñiqmasinchikkunam 25 masnin watakuna betelpi yanapakurqaku. Chaymi betelpi manaña yanapakunankupaq niptinku llakisqa tarikurqaku. Loid iñiqmasinchikmi nin: “Ñuqaqa ancha kusisqam karqani betelpi yachaspay hinaspa chaypi yanapakuspay. Huk lawpi yanapakunaykupaq imanasqa niwasqankutaqa allintam entiendirqani, chayta entiendispaypas achka killakunam hukmanyasqa tarikurqani. Wakin punchawkunapiqa kallpanchasqam tarikuq kani, ichaqa qunqayllamantam hukmanyaruq kani”, nispa.

 ² Qunqayllamanta imapas pasawaptinchikmi llakisqa hinaspa hukmanyasqa tarikunchik (Prov. 12:25). Chayna sasachakuypi tarikuptinchikqa, ¿imataq yanapawasun hawkalla kananchikpaq? (qaway Salmo 131:1-3). Chaypaqqa yachasunyá ñawpaq tiempupi Jehova Diosta serviqkuna, hinaspa kunan tiempupi iñiqmasinchikkuna hawkalla kanankupaq ima ruwasqankumanta.

3. ¿Ima sasachakuykunapim Joseyqa tarikurqa?

³ Jacobpaqa Joseyqa ancha kuyasqan churinmi karqa. Chayraykum wawqinkunaqa Joseyta chiqnirqaku, hinaspa 17 watanpi kachkaptin sirviente kananpaq rantikururqaku (Gen. 37:2-4, 23-28). Egipto nacionpi kachkaspanmi 13 wata sirviente karqa, hinaspam carcelpi kaspan ñakarirqa. Kuyasqan taytanmantapas karu-karupiraqmi karqa. ¿Imataq Joseytaqa yanaparqa llumpayta mana hukmanyarunanpaq hinaspa mana piñakurunanpaq?

4. (1) ¿Imakunapim Joseyqa yuyaymanarqa carcelpi kachkaspan? (2) ¿Imaynatam Jehova Diosqa Joseypa mañakusqanta uyariykurqa?

⁴ Joseyqa carcelpi kachkaspanqa yuyaymanarqachá Jehova Dios paypaq tukuyta ruwasqanpi (Gen. 39:21; Sal. 105:17-19). Chaymantapas Joseyqa yuyaymanarqachá warmallaraq kachkaptin Jehova Dios musquchisqanpi. Chayna yuyaymanasqanqa yanaparqam Diospi astawan hapipakunanpaq (Gen. 37:5-11). Arí, payqa achka kutikamam llakinkunata Diosman willarkurqa (Sal. 145:18). Diosmi Joseypa mañakusqanta uyariykurqa, chaymi paymanta mana iskayrayananpaq yanapaykurqa (Hech. 7:9, 10). *

5. ¿Imaynatam yanapawanchik Diospa hawkayayninqa?

⁵ Kunan tiempupipas wakinninchikqa ichapas imawanpas ñakarichkanchik. Chayna tarikuspaqa ‘Diospa hawkayaynin’ imayna yanapawasqanchikmantam musyakusun (qaway Filipenses 4:6, 7). Chaynaqa, imapas sunqunchikta llakichiptinqa Jehova Diostam mañakunanchik. Chaynapim payqa hawkayayninta quwaspanchik kallpanchawasun mana iskayrayaspa payta hinalla servinanchikpaq. Yachasunyá kunan tiempupi iñiqmasinchikkunata imayna Dios yanapasqanmanta.

6, 7. ¿Imaynatam Diosta mañakuyqa yanapawanchik hawka kananchikpaq? Rimarimuy iñiqmasinchikkunamanta.

⁶ Rayan hinaspa Julieta iñiqmasinchikkunata manaña precursor especial kanankupaq niptinkum, llumpay hukmanyasqallaña tarikurqaku. Rayan iñiqmasinchikmi willakun chayta yacharuspanku chaylla Diosta mañakusqankumanta. Paymi nin: “Chaynapi tarikusqaykuwanmi qawachinayku karqa Diospi hapipakusqaykuta. Huñunakusqayku lawpi achka iñiqmasinchikkunam chayllaraq bautizasqa karqaku, chayraykum Diosta mañakurqaniku iñiyniykupi yanapawanankupaq hinaspa qatipakunapaq hina kanaykupaqpas”, nispa.

⁷ ¿Imaynatam Jehova Diosqa paykunata  yanapaykurqa? Rayan iñiqmasinchikmi nin: “Diosta mañakuyta tukuruspaykum manaña llakisqañachu nitaq hukmanyasqañachu tarikurqaniku. Diospa yanapakuyninwanmi sunquykupi hinaspa yuyayniykupi hawkaña tarikurqaniku. Chaymantapas musyakurqanikum Diosta hinalla servinaykupaqqa imaña kaptinpas kusisqa kanaykumanta”, nispa.

8-10. (1) ¿Imaynatam Diosqa chuya espiritunwan yanapawachwan sunqunchikpi hawka kananchikpaq? (2) ¿Imaynatam Jehova Diosqa yanapawanchikman payta yupaychanapaq hinalla kallpanchakuptinchikqa?

⁸ Diospa chuya espiritunqa hawkayachiwachwanmi, chaymantapas bibliapa nisqankunata yuyarinapaqmi yanapawachwan, chaynapi imam aswan allin kaqta mana qunqananchikpaq (qaway Juan 14:26, 27). Rimarisun Filip hinaspa Mary casarasqa iñiqmasinchikkunamanta, paykunam betelpi yanapakurqaku yaqa 25 watakuna. Tawa killakunallapim iskayninkupa mamankuna wañukurqaku, wañukurqataqmi qusan Filip iñiqmasinchikpa huk ayllunpas. Chaymantañataqmi warmichan Mary iñiqmasinchikpa unquq taytanta atiendinanku karqa.

⁹ Filip iñiqmasinchikmi nin: “Tukuy chaykuna kaptinpas piensarqanim allinta kallpanchakusqaykuta. Huk kutipim Willakuq qillqata ñawinchachkaspay Colosenses 1:11 niqta tarirurqani. Chaywanmi musyakurqani pacienciakuspa hinaspa kusikuspa tukuy imata aguantanaymanta. Yuyarirqanitaqmi kusisqa kanaypaqqa mana imapas allin kanallanmantachu kasqanta, aswanqa chuya espiritunwan Dios kawsakuyniypi yanapawananmanta kasqanmanta”, nispa.

¹⁰ Diospa kaqkunata Filip hinaspa Mary iñiqmasinchikkuna imamantapas puntapi churasqanraykum bendecisqa karqaku. Betelmanta lluqsirusqanku qipallamanmi bibliamanta yachay munaq runakunata iskayninku tarirurqaku. Semanapim iskay kutikama yachachiqku. Manapas unaymantam bibliamanta yachachisqanku runakunaqa Dios yupaychaytaña qallaykurqaku. Mary iñiqmasinchikmi nin: “Kusisqam tarikurqaniku, tukuy chaykunawanmi Jehova Diosqa niwachkarqaku imapas allinlla kananmanta”, nispa.

11, 12. (1) ¿Imatam Joseyqa ruwarqa Jehova Dios bendeciykunanpaq? (2) ¿Imaynatam Jehova Diosqa Joseyta bendeciykurqa?

¹¹ Kawsakuyninchikpi imapas qunqayllamanta kaptinmi llumpayta hukmanyaruspa  chayllapi umayuq kachkachwan. Chaynatam Joseypas tarikunman karqa, ichaqa manam chaykunawanqa aysachikurqachu. Payqa anchatam imapipas kallpanchakurqa Jehova Dios bendeciykunanpaq. Chaymi Potifarpa sirvientin kaspan tukuy imapi kasukuq karqa, carcelpi kaspanpas chaypi kamachikuqpa nisqantam tukuy imapi kasukurqa (Gen. 39:21-23).

¹² Huk kutipim Faraonta vino serviq runata hinaspa panaderuta carcelman aparurqaku. Joseytam kamachirqaku paykunamanta nanachikunanpaq. Josey kuyakuq kasqanraykum chay runakunaqa llakiyninkunata payman willakuyta qallaykurqaku, willakurqakutaqmi chay tuta ima musqukusqankutapas (Gen. 40:5-8). Joseyqa manam yacharqachu chay runakunawan rimasqanrayku libre kananpaq yanapasqa kananmanta. Iskay watamantam Joseyqa carcelmanta hurqusqa karqa, chay punchawllataqmi Egipto nacionpi kamachikuq kananpaq churasqa karqa. Faraonllam paymantaqa aswan autoridadniyuq karqa (Gen. 41:1, 14-16, 39-41).

13. Imapiña tarikuspanchikpas, ¿imatam ruwananchik Jehova Dios bendeciwananchikpaq?

¹³ Wakinpiqa ichapas Josey hina sasachakuypi tarikuchwan hinaspa chayta allichanapaq mana imatapas ruwayta atichwanchu. Ichaqa pacienciakuptinchikqa hinaspa atisqanchikman hina chayta allichanapaq kallpanchakuptinchikqa Jehova Diosmi bendeciwasun (Sal. 37:5). Wakinpiqa ichapas llakisqa tarikusun, ichaqa Pablopa nisqanman hinaqa manam haykapipas ‘pasaypaqtaqa hukmanyarusunchu’ (2 Cor. 4:8). Jehova Diosmi yanapawasun, astawanraqmi yanapawasun paymanta willakunapaq kallpanchakuptinchikqa.

14-16. ¿Imatataq Felipeqa ruwarqa qunqayllamanta imapas karuptin?

¹⁴ Rimarisun apostulkunapa tiempunpi Diosmanta willakuq Felipemanta. Payqa Diospaq ruwasqantam imamantapas puntapi churarqa qunqayllamanta imaña kaptinpas. Felipeqa manaraq imapas kachkaptinmi Jerusalenpi iñiqkunata kusisqa yanapachkarqa (Hech. 6:1-6). Hinaptinmi Estebanta wañurachisqanku qipata Jesuspa qatiqninkunata chiqniqninkuna qatikachayta qallaykurqaku. Qatikachasqa kasqankuraykum Jesuspa qatiqninkunaqa Jerusalenmanta lluptikurqaku. Felipem ichaqa Diospaq hinalla ruwayta munasqanrayku Samaria lawman rirqa, chaypi runakunata yachachinanpaq (Mat. 10:5; Hech. 8:1, 5).

¹⁵ Felipeqa Jehova Diostam kasukuq maymanpas rinanpaq. Chayraykum Jehova Diosqa payta yanaparqa manaraq willakusqa llaqtakunaman rinanpaq hinaspa chaypi Diosmanta willakunanpaq. Chay tiempupiqa judiokunaqa Samaria llaqtayuq runakunatam chiqniqku. Felipem ichaqa mana chaynachu karqa, chaymi Samaria runakunaqa allinpaq hapirqaku. Chayraykuchá runakunaqa Felipepa willakusqantapas sumaqta uyarirqaku (Hech. 8:6-8).

¹⁶ Jehova Diosta kasukuspanmi Felipeqa rirqa Asdod hinaspa Cesarea llaqtakunaman. Chay llaqtakunapiqa judiokunaqa manam anchachu karqa (Hech. 8:39, 40). Felipeqa Samaria lawpim yaqa  20 wata Diosmanta willakurqa. Hinaspapas manam sapallanñachu karqa, aswanqa churiyuqñam karqa, chaynataq Diosmanta willakusqan llaqtapipas aylluntinñam yacharqaku. Felipeqa aylluyuqña kachkaspanpas puntapim churarqa Diosmanta willakuyninta. Chayraykum payqa ayllunwan Diosmanta achka bendicionkunata chaskirqaku (Hech. 21:8, 9).

17, 18. Imapas qunqayllamanta kaptinqa, ¿imaynatam hinalla Diosmanta willakuyqa yanapawanchik?

¹⁷ Tukuy tiempunkuwan Diospaq llamkaq achka iñiqmasinchikkunapas ninkum, Diosmanta willakuyninkuta imamantapas puntapi churasqankurayku allin tarikusqankumanta. Rimarisun Osborne hinaspa Polit sutiyuq casarasqa iñiqmasinchikkunamanta, paykunaqa Sudafrica lawmantam. Paykunaqa betel wasimanta lluqsiruspankum piensarqaku chaylla llamkayta hinaspa maypi yachanankupaq wasita tarirunankumanta. ¿Imam pasarqa? Osborne iñiqmasinchikmi nin: “Manam chayllaqa llamkaytaqa tarirqanikuchu”, nispa. Warmichanpas ninmi: “Kimsa killam mana llamkayniyuq, mana qullqiyuq karqaniku. Chay killakunaqa llumpay sasam karqa”, nispa.

¹⁸ ¿Imataq iñiqmasinchikkunata yanaparqa chayna tarikuptinku? Osborne iñiqmasinchikmi nin: “Diosmanta willakusqaykum yanapawarqaku allin tarikunaykupaq. Chaymi llakisqa hinaspa hukmanyasqa kanaykumantaqa, warmichaywan tantiarurqaniku Diosmanta willakunaykupaq. Chay ruwasqaykum anchata kusichiwarqaku. Llamkayta maskasqaykumantam huk llamkayta tarirurqaniku”, nispa.

19-21. (1) ¿Imataq yanapawasun sunqunchikpi hawka tarikunanchikpaq? (2) ¿Imaynatam yanapawasun imapas kaptin atisqallanchikman hina ruwayqa?

¹⁹ Rimamusqanchik iñiqmasinchikkunaqa hinallam kallpanchakurqaku hinaspa Diospi hapipakurqaku. Ñuqanchikpas paykuna  hina kaspanchikqa hawkam tarikusunchik (qaway Miqueas 7:7). Chaymantapas musyakusunchá imapas kaptin atisqallanchikman hina ruwayqa Jehova Diosta astawan kuyananchikpaq yanapawasqanchikta. Polit iñiqmasinchikmi nin: “Manaña betelpi kaspa huk ruwaykunapiña yanapakuyqa, yanapawarqam Jehova Diosllapi hapipakunaypaq, ima sasachakuyña kaptinpas. Kunanqa astawanmi Diosta kuyani”, nispa.

²⁰ Pusaq kaq parrafupi rimasqanchik Mary iñiqmasinchikqa hinallam taytanta atiendichkan hinaspapas precursoram. Paymi nin: “Yacharunim llakisqa hinaspa hukmanyasqa tarikuspayqa, Diosta chaylla mañakunaymanta hinaspa hawka kanaypaq tukuyta ruwanaymanta. Astawanqa yacharurqanim tukuy imata Diospa makinpi saqinaymanta hinaspa paypi hapipakunaymanta. Chaytam hamuq tiempupiqa astawanraq ruwananchik kanqa”, nispa.

²¹ Qallariypi rimamusqanchik Loid hinaspa Alexandra iñiqmasinchikkunaqa ninkum, imapas qunqayllamanta karuptinña Dios kuyasqanchik imayna kasqanta yachasqanchikmanta. Paykunaqa musyakurqakum sasachakuykuna kaptinpas Diospi astawan hapipakusqankuta. Ninkutaqmi kunanqa aswan allin runa kasqankumanta.

22. Imapas kaptin atisqanchikta ruwananchikpaq kallpanchakuspanchikpas, ¿imatam mana qunqananchikchu?

²² Chaynaqa, Diospa llaqtanpi ima ruwaymanña churasqa kaspanchikpas, utaq imawanpas unquspanchikpas utaq ayllunchikta atiendina kaptinpas, manam qunqananchikchu Jehova Dios kuyawasqanchikmanta hinaspa tiempullanpi yanapawananchikmantapas (Heb. 4:16; 1 Ped. 5:6, 7). Chaywanpas kallpanchakunanchikmi atisqanchikta ruwananchikpaq. Jehova Diosta mañakuspam payman asuykunanchik hinaspa payllapi hapipakunanchik. Chayta ruwaspaqa hawkam tarikusun imapas qunqayllamanta karuptinpas.