Ñawpaqnin versiculokunata ñawinchaspam musyakunchik Pablopa rimasqan “Diospa palabranqa” munayninmanta Diospa willakusqan kasqanta, chaytam bibliapi tarinchik.

Qillqanchikkunapim Hebreos 4:12 nisqanta servichikunchik runakunapa kawsakuyninta cambiachinanpaq biblia atiyniyuq kasqanmanta yachachinapaq. Chayqa chiqapmi. Ichaqa entiendenanchikmi kay versiculota qillqaspan imamanta Pablopa rimasqanta. Hebreo rimaq iñiqmasinkunatam kallpanchachkarqa Diospa munaynin ruwaypi yanapakunankupaq. Diospa munayninmantaqa qillqasqañam karqa Diospa palabranpiqa. Chay kutipi Pablo qillqaspanqa, rimachkarqam Egiptomanta Israel runakunata Dios librasqanmanta. Paykunaqa Diospa nisqanman hinam suyachkarqaku ‘tukuy imakunapapas kasqan allpaman’ yaykunankupaq. Chaypim samarinanku karqa (Ex. 3:8; Deut. 12:9, 10).

Chaymi Diospa munayninqa karqa. Ichaqa Israel runakunam mana Diospiqa iñirqakuchu nitaq kasukurqakuchu, chayraykum yaqa llapanku mana yaykurqakuchu Diospa samanan punchawmanqa (Num. 14:30; Jos. 14:6-10). Chayna kaptinpas, Pabloqa nirqam “Diospa samanan punchawman yaykunapaq promesa” kasqanmantaraq (Heb. 3:16-19; 4:1). Chay ‘promesaqa’ munayninmanta Diospa willasqankunapim kachkan. Hebreo rimaq iñiqkuna hinam, ñuqanchikpas Diospa munayninmanta ñawinchayta hinaspa yanapakuyta atichwan. Chay promesa Diospa palabranpi kasqanta qawachinanpaqmi, Pablo rimarqa Genesis 2:2 hinaspa Salmo 95:11 nisqankunamanta.

Kusikunchikmi “Diospa samanan punchawman yaykunapaq promesa” kunankamapas hinallaraq kasqanmanta. Chaymi ñuqanchikpas Diospa samanan punchawman yaykuytaqa atichwan. Chayraykum anchata kallpanchakunchik. Ichaqa manañam Moisespa chaskisqan kamachikuytaqa kasukunchikchu nitaqmi Dios chaskiwanallanchikpaqchu allin kaqkunatapas ruwanchik. Aswanqa Diospi iñisqanchikraykum paypa munayninta ruwanapaq yanapakuchkanchik. Enteron pachapi waranqantin runakunam biblia estudiayta qallaykuspanku Diospa munayninmanta yachachkanku. Chayraykum paykunaqa Diospa munasqanman hinaña kawsachkanku, iñiyninkuta qawachichkanku hinaspa bautizakuchkanku. Kaykunam qawachin ‘Diospa palabran kawsasqanta hinaspa atiyniyuq’ kasqanta. Munayninmanta palabranpi Diospa willakusqanqa, ñam kawsakuyninchikpi yanaparuwanchikña hinaspapas hinallam yanapawasun.