1. (1) ¿Atiyniyuqchu Diospa palabran? (2) ¿Imanasqam chaynata ninchik? (Qaway kay paginapi fotota).

JEHOVA DIOSTA yupaychaqkunaqa manam iskayrayanchikchu Diospa palabran ‘kawsasqanmanta hinaspa atiyniyuq kasqanmantaqa’ (Heb. 4:12). Qawarqanchikmi kawsakuyninchikta hinaspa wakinkunapa imayna kawsakusqankuta cambiananpaq atiyniyuq kasqanta. Wakiqninchikmi Diosta manaraq riqsichkaspa suwakuq, drogakuq utaq huchapakuq karqanchik. Wakiqninchikñataqmi ancha riqsisqa utaq qullqisapa karqanchik, ichaqa manam kusisqachu tarikurqanchik (Ecl. 2:3-11). Kunanmi ichaqa bibliawan yanapachikusqanchikrayku aswan kusisqa tarikunchik. Yaqapaschá ñawincharqanchikña Willakuq qillqapi “Bibliam imayna kawsasqanta cambiarqa” niq yachachikuyta, chaypim iñiqmasinchikkuna bibliawan yanapachikusqankumanta willakun. Jehova Diosta riqsispapas hinallam kallpanchakunanchik bibliawan yanapachikuspa  Jehova Dioswan astawan kuyachikunanchikpaq.

2. Apostolkunapa tiemponpi runakunaqa ¿imayna kawsakusqankutam saqirqaku Diospa palabranmanta yacharuspanku?

² Achka runakunam bibliamanta yachaspanku mana allin ruwasqankuta saqirqaku. Chaytam ruwarqaku apostolkunapa tiemponpi hanaq pachapaq akllasqakunapas Diospa palabranmanta yacharuspanku (qaway 1 Corintios 6:9-11). Apostol Pablom nirqa mana allin ruwaq runakuna Diospa munaychakuyninman mana yaykunankumanta, hinaspam hanaq pachaman rinankupaq iñiqmasinkunata nirqa: “Chaynam wakinnikichikqa karqankichik”, nispa. Paykunaqa Diospa palabranwan hinaspa chuya espiritupa yanapakuyninwanmi mana allin ruwasqankuta saqirqaku. Chaywanpas, Diosta riqsirusqanku qipatam wakinkuqa mana allin kaqkunata ruwayta qallaykurqaku hinaspam Jehova Dioswan kuyachikusqankuta yanqacharurqaku. Bibliam nin hanaq pachapaq akllasqa huk iñiqmasinchik mana allinta ruwarusqanrayku Diospa llaqtanmanta qarqurachikusqanmanta, ichaqa wanakuspanmi kaqlla Diospa llaqtanman kutiykurqa (1 Cor. 5:1-5; 2 Cor. 2:5-8). Ancha kusisqam tarikunchik bibliapa yanapakuyninwan mana allinkuna ruwasqankuta iñiqmasinchikkunapa saqisqankuta qawaspanchik.

3. ¿Imakunamantam kay yachachikuypi yachasunchik?

³ Jehova Diospa palabranqa ancha atiyniyuqmi. Ñuqanchikman quwasqanchikraykum allinta servichikunanchik (2 Tim. 2:15). Chaymi kay yachachikuypi yachasunchik imaynatam Diospa palabranta allinta servichikuchwan kawsakuyninchikpi, Diosmanta willakuyninchikpi hinaspa huñunakuykunapi yachachispa. Kaykunamanta yachaymi yanapawasun Jehova Diosta astawan kuyanapaq hinaspa agradecekunapaq, payqariki allinninchikpaq yachachiwaqninchikmi (Is. 48:17).

4. (1) ¿Imatam ruwananchik Diospa palabran kawsakuyninchikpi yanapawananchikta munaspaqa? (2) ¿Imaynatam tiempochakunki Diospa palabranta ñawinchanaykipaq?

⁴ Diospa palabran kawsakuyninchikpi yanapawananchikta munaspaqa, kallpanchakunanchikmi sapa punchaw ñawinchananchikpaq (Jos. 1:8). Yaqa llapallanchikmi tukuy ima ruwayniyuq kanchik, ichaqa manam imawanpas harkachikunanchikchu Diospa palabranta ñawinchananchikpaqqa (qaway Efesios 5:15, 16). Diospa palabrantaqa ñawinchachwanmi chayllaraq hatariykuspanchik, chawpi punchawta, tutankunapi utaq tiempochanchik kasqanpi. Ñuqanchikqa Salmo qillqaq hinam tarikunanchik, paymi nirqa: “¡Maynatam yachachikuynikita kuyallani! Chaypim tukuy punchaw yuyaymanani”, nispa (Sal. 119:97).

5, 6. (1) ¿Imapaqtaq ñawinchasqanchikpi yuyaymanananchik? (2) ¿Imaynatam aswan allinta yuyaymanachwan? (3) ¿Imaynatam Diospa palabranta ñawinchayqa hinaspa yuyaymanayqa yanapasurqanki?

⁵ Bibliataqa manam ñawinchayllachu-ñawinchananchik, aswanqa ñawinchasqanchikpim yuyaymanananchik utaq piensananchik (Sal. 1:1-3). Chayta ruwaspallanchikmi Diospa palabranpiqa yachayta tarisunchik. Papelpi utaq celularpiwan tabletpi ñawinchaspanchikpas kallpanchakunanchikmi sunqunchikman chayananpaq.

 ⁶ ¿Imaynatam aswan allinta yuyaymanachwan? Bibliata ñawinchaspankum, wakinkuqa ñawinchasqankuta saqiykuspanku kaynata tapukunku: “¿Imatam kayqa Jehova Diosmanta yachachiwan? ¿Kaypi yachasqayman hinañachu kawsakuchkani? ¿Imakunapiraqmi astawan kallpanchakunay?”, nispa. Diospa palabranpi yuyaymanaspanchikqa hinaspa Jehova Diosta mañakuspanchikqa, kallpanchasqam tarikusun yachasqanchikman hina kawsakunanchikpaq. Chaynata ruwaspam Diospa palabrantaqa allinta servichikusunchik (2 Cor. 10:4, 5).

7. ¿Imaynatam Diospa palabranta allinta servichikuchwan Diosmanta willakuspanchik?

⁷ ¿Imaynatam Diospa palabranta allinta servichikuchwan Diosmanta willakuspanchik hinaspa runamasinchikkunaman yachachispanchik? Sapa kuti servichikuspanchikmi. Huk iñiqmasinchikmi nirqa: “Jehova Dioswan wasin-wasin willakuq rispaykiqa, ¿qamllachu rimawaq icha saqiwaqchu paypas rimananta?”, nispa. ¿Imatam chaywanqa nichkarqa? Bibliapa nisqanta runakunaman qawachispanchikqa Jehova Diostam saqichkanchik rimananpaq. Bibliapa huk kaqnin versiculonta qawachisqanchikmi aswan atiyniyuqqa imapas nisqanchikmantaqa (1 Tes. 2:13). Chaymi tapukunanchik: “Diosmanta willakuspay, ¿kallpanchakunichu bibliata runakunaman qawachinaypaq?”, nispa.

8. ¿Imanasqam runakunapaqqa mana ñawinchayllachu-ñawinchapunanchik bibliataqa?

⁸ Ichaqa, runakunapaqqa manam bibliataqa ñawinchayllachu-ñawinchapunanchik. Jesuspa tiemponpi hinam, runakunaqa kunanpas mana entiendenkuchu bibliapa ima niy munasqantaqa (Rom. 10:2). Chaymi mana piensananchikchu runakunaman bibliata qawachiptillanchik chaylla entiendenankutaqa. Ñawinchaspanchikqa wakin palabrakunatam kuti-kutirispa rimananchik hinaspa entiendenankukama sumaqta yachachinanchik. Chaynata ruwaptinchikmi Diospa palabranqa runakunapa umanman hinaspa sunqunman chayanqa (qaway Lucas 24:32).

9. ¿Imakunatam ninanchik runakuna Diospa palabranta respetanankupaq?

⁹ Runakunaman bibliapa huk kaqnin versiculonta qawachispanchikqa, Diospa palabranta respetanankupaq hinam rimananchik. Nichwanmi: “Qawasun imatam Dios niwanchik”, nispa. Diospi pipas mana iñiq kaptinqa nichwanmi: “Qawasun imatam kay suma-sumaq qillqa nin”, nispa. Utaq religionmanta yachayta mana munaptinqa nichwanmi: “¿Yaqachu haykapipas uyarirqanki kayna nisqankuta?”, nispa. Sapa runakunam mana chaynallachu kanchik, chaymi imayna kasqankuman hina willakunanchik (1 Cor. 9:22, 23).

10. (1) ¿Imatam huk iñiqmasinchik ruwarqa? (2) ¿Qawarqankichu Diospa palabran runakunapa sunqunman imayna chayasqanta? Willarimuy.

¹⁰ Achka iñiqmasinchikkunam ninku Diosmanta willakuspa bibliata servichikuyqa ancha allinpuni kasqanta. Huk iñiqmasinchikmi huk runaman qillqanchikkunata achka watakunaña aparqa. Ichaqa huk punchawmi iñiqmasinchik tantearurqa Willakuq qillqata saqispanpas bibliata ñawinchapunanpaq. Qawachirqam 2 Corintios 1:3, 4 nisqanta, ninmi: “[Jehova  Diosqa] llumpay llakipayakuq taytam hinaspa tukuy imapi sunqu tiyaykachiq Diosmi, paymi tukuy sasachakuyninchikpi sunqunchikta tiyaykachin”, nispa. Bibliapa nisqan chay runapa sunqunman chayaruptinmi, iñiqmasinchikta nirqa kaqmanta ñawinchapunanpaq. Chaymantapas nirqam warmichanwan llakisqa kasqankurayku bibliamanta astawan yachayta munasqankuta. Yachasqanchikman hinam, Diosmanta willakuspa bibliata servichikuyqa runakunapa sunqunman chayan (Hech. 19:20).

11. ¿Imapaqmi kallpanchakunanku ñawpaqmanta yachachimuq iñiqmasinchikkunaqa?

¹¹ Llapanchikmi huñunakuyninchikman hinaspa hatun huñunakuyninchikmanpas kusisqa rinchik. ¿Imanasqa? Jehova Diosta yupaychayta munasqanchikraykum. Ichaqa munanchiktaqmi chaypi yachachikuykuna yanapawananchikta. Ñawpaqmanta yachachiy ancha kusikunapaq kaptinpas, qari iñiqmasinchikkunaqa allintapunim chayta ruwananku (Sant. 3:1). Chaymi bibliapa nisqanman hina yachachinankupaq kallpanchakunanku. Huk kaqnin yachachiq kaspaykiqa, ¿imatam ruwanayki Diospa palabran uyariqkunapa sunqunman chayananpaq?

12. ¿Imapaqmi kallpanchakunanku huñunakuypi yachachiqkunaqa?

¹² Huñunakuypi yachachispaykiqa bibliapa nisqanman hina yachachinaykipaqmi  kallpanchakunayki (Juan 7:16). Imapas willasqayki utaq tupanachiykuna servichikusqaykiqa ama llumpayqa kachunchu bibliapa yachachisqanmantaqa. Chaymantapas, bibliata ñawinchayqa manam chaynallachu bibliamanta yachachiywanqa. Yachachispayki bibliapi achka versiculokunata ñawinchaptikiqa manam uyarisuqnikikunaqa yuyanqakuchu. Chaymi allinta akllanayki mayqanta ñawinchanaykipaq hinaspa tiempochakuy ñawinchasqaykimanta allinta yachachinaykipaq, rikchanachinaykipaq hinaspa imayna yanapawasqanchikta qawachinaykipaq (Neh. 8:8). Yachachinaykipaq qillqasqataña qusuptikiqa, allinta estudiay bibliapa ima nisqanta hinaspa chaypi qillqasqa kaqkunatapas. Chaymanta wakin versiculokunata sumaqta akllay yachachinaykipaq (sumaq yanapakuykunatam tarinki Diosmanta Yachachinapaq Escuelawan Yanapachikuy sutiyuq qillqapa 21-23 yachachiyninpi). Ichaqa imamantapas puntataqa Jehova Diospa yanapakuyninta mañakuy palabranmanta allinta yachachinaykipaq (qaway Esdras 7:10; Proverbios 3:13, 14).

13. (1) ¿Imaynatam huñunakuypi bibliawan yachachisqanku huk iñiqmasinchikta yanaparqa? (2) ¿Imaynatam huñunakuypi bibliawan yachachisqanku qamta yanapasurqanki? Willarimuy.

¹³ Huñunakuypi bibliawan yachachisqanku Australia nacionniyuq warmi iñiqmasinchikta imayna yanapasqanmanta yachasunchik. Payqa warmachallaraq kaspanmi llumpayta ñakarirqa. Jehova Diosta riqsiruspan  hinaspa payta yupaychaspanpas, piensarqam Jehova Diosqa payta mana kuyasqanta. Huk kutipim huñunakuypi kachkaptin bibliapa ima nisqan sunqunman chayarurqa. Chaymi chaypi anchata yuyaymanaruspan hinaspa bibliapa nisqankunata ñawincharuspan musyakururqa Jehova Diosqa chiqaptapuni payta kuyasqanmanta. * ¿Haykallapipas sunquykiman chayarqachu huñunakuypi utaq hatun huñunakuykunapi bibliapa nisqankunata uyarisqayki? (Neh. 8:12).

14. ¿Imakunata ruwaspam Diospa palabranta kuyasqanchikta qawachisun?

¹⁴ Ancha kusisqam tarikunchik taytanchik Jehova Dios palabranta quykuwasqanchikmanta hinaspa mana chinkachisqa kananpaq tukuy imata ruwasqanmantapas (1 Ped. 1:24, 25). Chaynaqa sapa punchawmi bibliata ñawinchananchik, nisqanman hina kawsananchik hinaspa hukkunata yanapananchikpaqpas kallpanchakunanchik. Chayta ruwaspanchikqa Diospa palabranta kuyasqanchikta hinaspa Jehova Diosta astawanraq kuyasqanchiktam qawachisun.