1. Jesus manaraq wañukuchkaspanqa, ¿imamantam qatiqninkunawan rimarqa?

MANARAQ wañukuchkaspanmi, Jesusqa qatiqninkunawan kachkaspan yaqa 30 kutikama kuyakuymanta rimarqa. Paykunatam nirqa kuyanakunankupaq (Juan 15:12, 17). Chayna kuyanakusqankuwanmi, runakunaqa yachanmanku karqa Jesuspa chiqap qatiqninkuna kasqankuta (Juan 13:34, 35). Jesus kuyakuymanta rimaspanqa manam rimarqachu simillamanta kuyaymantachu, aswanqa tukuy sunqunchikmanta kuyanamantam, chaytaqa qawachichwanmi ruwasqanchikkunawan. Paymi kaynata nirqa: “Amistadninkunarayku vidanta quqmi ancha kuyakuyniyuqqa, manam pipas kanchu chayna kuyakuqmanta aswan kuyakuyniyuqqa. Kamachisqaykunata kasukuspaykichikqa amistadniykunam kankichik”, nispa (Juan 15:13, 14).

2. (1) ¿Imayna kasqanchikwantaq Jehova Diospa serviqninkunaqa riqsichikunchik? (2) ¿Ima tapukuykunamantam kay yachachikuypi rimasun?

² Kunan tiempupipas Jehova Diospa serviqninkunaqa, riqsichikunchikmi sunqumanta kuyanakusqanchikwan hinaspa huk  sunqulla kasqanchikwan (1 Juan 3:10, 11). Kuyanakunchikmi may llaqtamanta, ima castamanta hinaspa ima rimayniyuq kaspanchikpas. Chaywanpas tapukuchwanmi: “¿Imanasqataq kuyanakunanchik? ¿Imaynatam Jehova Dioswan Jesusqa kallpanchawanchik? ¿Imaynatam Jesusta qatipakuchwan kuyakuywan hukkunata kallpanchananchikpaq?”, nispa (1 Cor. 8:1).

3. ¿Imaynam runakunaqa tarikunku kay sasallaña tiempukunapi?

³ Sasallaña punchawkunapi kawsasqanchikraykum achka runakuna llumpay hukmanyasqa tarikunku (2 Tim. 3:1-5; Sal. 90:10). Wakinkuqa wañuytañam munankupas. Chaymi sapa wata 800.000 masnin runakuna wañuchikunku. Huk rimaypiqa, manapas huk minutollapim huk runa wañuchikun. Wakin iñiqmasinchikkunapas llumpay hukmanyasqa tarikusqankuraykum wañuchikunku. ¡Mayna llakikuypaqmi chayqa!

4. Ñawpaq tiempupi Diosta serviqkunamantaqa, ¿pikunam wañuyta munarqaku?

⁴ Ñawpaq tiempupi Diosta serviqkunapas llumpay hukmanyasqam tarikurqaku, chaymi paykunapas wañuytaña munarqaku. Hukninmi karqa Job, payqa ñakarisqanraykum wañuytaña munarqa (Job 7:16; 14:13). Jonasñataqmi hukmanyasqa tarikusqanrayku nirqa: ‘Dios taytalláy, ama hina kaspa wañurachiwayña, ñuqapaqqa wañukuymi aswan allinqa kanman kawsanaymantaqa’, nispa (Jon. 4:3). Eliaspas sunqunpi hukmanyasqa tarikuspanmi Diosta wañuchinanpaq mañakurqa. Paymi nirqa: ‘Dioslláy, kaykamallañayá kawsasaq, wañurachiwayña, manam ñawpaq taytaykunamanta aswan allinninchu kani’, nispa (1 Rey. 19:4). Jehova Diosmi ichaqa paykunata kuyaspan, hinalla kawsakunankuta munarqa. Payqa manam chayna tarikusqankuraykuchu paykunataqa qipancharqa. Aswanmi kuyakuywan yanaparqa kawsakuyta hinalla munanankupaq, chaynapi tukuy sunqunkuwan payta servinankupaq.

5. ¿Imanasqataq iñiqmasinchikkunata kuyakuywan astawanraq yanapaykunanchik?

⁵ Achka iñiqmasinchikkunam sasachakuykunata atipanankupaq kallpanchakuchkanku. Chayraykum paykunataqa kuyakuywan yanapaykunanchik. Wakinkuqa Diospi iñisqankuraykum chiqnisqa kanku hinaspa asipayasqa. Wakin iñiqmasinchikkunatañataqmi wakin llamkaqmasinkuna paykunamanta mana allinkunata rimanku. Wakinkuñataqmi llumpay pisipasqa tarikunku sasa llamkaykunapi llamkasqankurayku. Wakinkunapaqqa ayllunkupim ima sasachakuykunapas kan, ichapas huk kaqnin mana Diospi iñisqankurayku paykunataqa sasachan. Chayraykum iñiqmasinchikkunaqa pisipasqa hinaspa hukmanyasqa tarikunku. ¿Pitaq paykunata yanapanman?

6. ¿Imaynatam Jehova Diosqa kallpanchawanchik?

⁶ ¿Imaynatam Jehova Diosqa kallpanchawanchik? Kallpanchawanchikmi wiña-wiñaypaq kuyawananchikmanta niwaspanchik. Israel runakunapas kallpanchasqachá tarikurqaku Jehova Dios kaynata niptin: ‘Qamtaqa allinpaqmi qawayki, ancha kuyasqaymi kanki [...]. Ama manchakuychu, ñuqam qanwan kachkani’, nispa (Is. 43:4, 5). Ñuqanchikpas yachanchikmi Jehova Diosqa  anchata kuyawasqanchikta. * Bibliam Jehova Diosmanta kaynata niwanchik: ‘[Jehova] Diosmi chawpikipi tarikun, payqa tukuy atiyniyuqmi, salvaykusunkim. Señorqa anchatam qamrayku kusikunqa’, nispa (Sof. 3:16, 17).

7. ¿Imawanmi tupachichwan Jehova Diospa kuyawasqanchiktaqa? (Qaway 8 kaq paginapi dibujuta).

⁷ Jehova Diosqa niwanchikmi ima sasachakuypiña tarikuptinchikpas pay yanapawananchikmanta. Jehova Diosmi paymanta Isaiasta kaynata qillqachirqa: ‘Qamkunatam mikuchisqaykichik, marqayniypi apakachasqam kankichik, wawanta muqunpi tusuchichkaq mama hinam kuyasqaykichik. Imaynam wawanta maman consuelan chaynatam qamkunata consuelasqaykichik’, nispa (Is. 66:12, 13). Mamakunaqa kuyakuywanmi wawankuta marqanku, wawankuñataqmi kusisqa tarikunku. Chaynam Jehova Diospas anchata kuyawanchik hinaspa kusisqa tarikunanchikta munan. Amayá iskayrayasunchu pay anchata kuyawasqanchikmantaqa (Jer. 31:3).

8, 9. ¿Imaynatam kallpanchawanchik Jesuspa kuyawasqanchikqa?

⁸ Jehova Dios anchata kuyawasqanchiktaqa yachanchiktaqmi Juan 3:16 nisqanta qawaspanchik, chaypim nin: “Diosqa ancha-anchatam runakunata kuyarqa chaymi sapallan churinta qumurqa haykam paypi iñiqqa mana wañuchisqa kanankupaq, aswanqa wiñay kawsayniyuq kanankupaq”, nispa. Jesus anchata kuyawasqanchikraykum ñuqanchikrayku wañurqa. Bibliaqa ninmi ‘Cristopa kuyakuyninmantaqa’ ima sasachakuyñapas mana rakiwananchikmanta (Rom. 8:35, 38, 39). Chayqa anchatam kallpanchawanchik ¿aw?

⁹ Wakinpiqa sasachakuykunapi kaspanchikmi pisipasqa, hukmanyasqa hinaspa manaña kusisqachu Diosta servichwan. Ichaqa  Jesuspa kuyawasqanchikta yuyariymi anchata kallpanchawasun (qaway 2 Corintios 5:14, 15). Jesuspa kuyawasqanchikqa kallpanchawanchikmi hinalla kawsakuyta munanapaq, hinaspa hinalla Diosta servinapaqpas. Yanapawasuntaqmi hatun sasachakuykuna kaptin mana hukmanyanapaq, qatikachasqa kaptinchikpas utaq hukkuna llakichiwaptinchikpas.

10, 11. ¿Pikunataq hukmanyasqa iñiqmasinchikkunata kallpanchananku?

¹⁰ Jehova Diosqa kallpanchawanchiktaqmi iñiqmasinchikkunawan. Iñiqmasinchikkunata kuyaspaqa Jehova Diostam kuyachkanchik. Chaymi iñiqmasinchikkunata kallpanchananchik, chaynapi paykunata Jehova Dios hinaspa Jesus anchata kuyasqankuta yachanankupaq (1 Juan 4:19-21). Pablom iñiqmasinkunata nirqa: “Hinallayá kallpanchanakuychik hinaspa yanapanakuychik kunan chayna ruwasqaykichikman hina”, nispa (1 Tes. 5:11). Chaynaqa, manam punta apaqkunallachu iñiqmasinchikkunataqa kallpanchananku hinaspa yanapananku. Llapallanchikmi Jehova Diosta hinaspa Jesusta qatipakuspa chay ruwaytaqa atichwan (qaway Romanos 15:1, 2).

¹¹ Wakin iñiqmasinchikkunaqa ichapas llumpay llakisqa utaq hukmanyasqa kasqankurayku doctorkunawan yanapachikunanku kanqa (Luc. 5:31). Wakin punta apaqkunaqa hinaspa iñiqmasinchikkunaqa, yachankum doctor hina paykunata mana yanapayta atinankumanta. Ichaqa kallpanchakunkum kay kamachikuyta kasukunankupaq: “Wawqi-panillaykuna ruegakamuykikutaqmi [...] hukmanyasqakunatapas kallpanchanaykichikpaq, mana kallpayuqkunatapas yanapaykunaykichikpaq hinaspa llapallanwanpas pacienciakunaykichikpaq”, niqta (1 Tes. 5:14). Ñuqanchikqa kallpanchakunanchikmi  hukmanyasqa iñiqmasinchikkunawan kuyakuq, pacienciakuq kananchikpaq, hinaspa sunqunkuta sumaq rimaykunawan tiyaykachinapaq. Chaymi tapukunanchik: “¿Kallpanchanichu iñiqmasiykunata? ¿Imataq yanapawanqa iñiqmasiykunata astawan yanapanaypaq?”, nispa.

12. ¿Imaynatam iñiqmasinchikkunapa kuyakuq kasqankuqa huk iñiqmasinchikta yanaparqa?

¹² ¿Imaynam iñiqmasinchikkunaqa tarikunqaku kuyakuywan kallpanchaptinchikqa? Europa lawmanta huk iñiqmasinchikmi nin: “Wakinpiqa wañuchikunaypaqmi piensani. Ichaqa ñuqawanmi kachkanku achka iñiqmasiykuna, paykuna yanapawasqankuraykum hinalla kawsachkani. Sapa kutim kallpanchawanku hinaspa kuyawanku. Wakillankum yachanku kayna llaki unquywan kasqaytaqa, ichaqa llapallankum yanapawanankupaq kallpanchakunku. Casarasqa iñiqmasiykunam tayta-mamay hina anchata yanapaykuwanku. Paykunaqa imay horapas yanapawankum”, nispa. Wakiqninchikqa ichapas wakin iñiqmasinchikkuna hinaqa mana yanapayta atisunchu. Ichaqa llakiwan unquq iñiqmasinchikkunam kuyakuywan kallpanchasqanchikta musyakuspanku kallpanchasqa tarikunqaku. *

13. ¿Imatam ruwananchik iñiqmasinchikkunata kallpanchanapaqqa?

¹³ Paykunatam uyariykunanchik (Sant. 1:19). Iñiqmasinchikkunata uyarispaqa kuyasqanchiktam qawachinchik. Hukmanyasqa iñiqmasinchikkunata uyarispaqa piensananchikmi paykuna hina ñakarispaqa imayna tarikunanchikmanta. Imayna sientikusqanta yachananchikpaqmi sumaqta tapurinanchik. Paykunawan rimaspaqa, paykunata yanapay munasqanchiktam uyanchikpas qawachinan. Imayna sientikusqanta willakuyta munaptinkuqa mana rimarispam uyariykunanchik. Pacienciakuspa uyarispanchikqa imayna sientikusqantam yachasun. Chayta ruwaptinchikqa mana manchakuspam imamantapas willawasunchik, hinaspapas imapas nisqanchiktam uyariwasunchik. Kuyasqanchikrayku yanapayta munasqanchikta musyaspankuqa, kusisqa hinaspa hawkam tarikunqaku.

14. ¿Imanasqataq kallpanchayta munaspaqa qaqchachkaq hinaqa mana rimananchikchu?

¹⁴ Ama qaqchachkaq hinaqa rimasunchu. Llumpay hukmanyasqa kaqkunata qaqchachkaq hina rimaptinchikqa, paykunaqa aswan hukmanyasqam tarikunqaku. Bibliam kaynata nin: ‘Nanay simikunapa rimayninqa espada hinam kuchukun, yachayniyuq runapa rimayninmi ichaqa hampi hina’, nispa (Prov. 12:18). Manamá rimasqanchikwanqa pitapas hukmanyachiytaqa munanchikchu. Ichaqa chaytam ruwaruchwan mana allinta piensarispa rimaspanchikqa. Hukmanyasqakunata kuyakuywan kallpanchanapaqqa paykunata entiendinapaqmi kallpanchakunanchik (Mat. 7:12).

15. ¿Imatam servichikuchwan iñiqmasinchikkunata kuyakuywan kallpanchanapaq?

¹⁵ Diospa palabranwan kallpanchasun (qaway Romanos 15:4, 5). Bibliaqa anchatam kallpanchawanchik hinaspam sunqunchiktapas tiyaykachiwanchik. ¿Imanasqa?  “Sunquta tiyaykachiq hinaspa aguantanapaq kallpa qukuq” Diosmanta hamusqanraykum. Bibliata allinta servichikunapaqmi kapuwachkanchik Índice de las publicaciones Watch Tower hinaspa Jehova Diospa testigonkunapa qillqankunapi maskanapaq qillqanchikkuna. Chaypim tarichwan iñiqmasinchikkunata kallpanchanapaq yachachikuykunata hinaspa bibliapa nisqanta.

16. ¿Imaynam kananchik hukmanyasqa iñiqmasinchikkunata yanapananchikpaq?

¹⁶ Kuyapayakuq hinaspa llakipayakuq kasun. Jehova Diosqa “llumpay llakipayakuq taytam hinaspa tukuy imapi sunqu tiyaykachiq Diosmi” hinaspapas serviqninkunatam anchata kuyan (qaway 2 Corintios 1:3-6; Luc. 1:78; Rom. 15:13). Pabloqa kuyapayakuqmi karqa Jehova Diosta qatipakusqanrayku. Chaymi nirqa: “Wawankunata kuyakuywan uywaq mama hina llampu sunqulla qamkunawan karqaniku. Qamkunataqa llumpaytam kuyarqaykiku, manam ñuqaykuqa Diosmanta sumaq willakuyta willayllatachu munarqaniku, aswanqa kikiykupa vidayku quytapas munarqanikum. Chaynataqa munarqaniku llumpayta kuyasqaykuraykum”, nispa (1 Tes. 2:7, 8). Jehova Dios hina kuyapayakuq kaptinchikqa, hukmanyasqa iñiqmasinchikkunam musyakunqaku Jehova Dios mañakusqankuta uyariykusqanta.

17. Hukmanyasqa iñiqmasinchikkunata kuyakuywan yanapananchikpaqqa, ¿imayna kanankutam mana suyananchikchu?

¹⁷ Ama piensasunchu mana imapipas pantanankutaqa. Iñiqmasinchikkuna mana imapipas pantanankuta suyaspanchikqa manam allinchu kasun (Ecl. 7:21, 22). Jehova Diosqa yachanmi imapipas pantaq kasqanchiktaqa. Payta qatipakuspaqa, iñiqmasinchikkunapa pantasqankuwanqa manam hukmanyarusunchu (Efes. 4:2, 32). Hukmanyasqa iñiqmasinchikkunataqa manam piensachinanchikchu mana ancha kallpanchakusqankutaqa manataqmi hukkunawanpas tupachinanchikchu, manachayqa astawanmi hukmanyarunmanku. Aswanqa allin ruwasqankumantam kallpanchaykunanchik. Chaywanqa aswan kallpanchasqam kanqaku hinaspam Diosta kusisqa servinqaku (Gal. 6:4).

18. ¿Imanasqataq iñiqmasinchikkunata kuyakuywan kallpanchananchik?

¹⁸ Jehova Dioswan Jesusqa anchatam kuyawanchik (Gal. 2:20). Ñuqanchikpas iñiqmasinchikkunatam tukuy sunqunchikwan kuyanchik, hinaspa imapipas kuyakuywan yanapayta munanchik. Chaypaqqa hinallam ruwananchik “hawkalla kanapaq imapas yanapawaqninchik kaqkunata hinaspa kikinchikpura kallpanchanakunapaq kaqkunata” (Rom. 14:19). Maynatam munachkanchik musuq pachapiña kawsakuyta. Chaypiqa manañan hukmanyasqaqa tarikusunchu. Manañam kanqañachu wañuy chaynataq unquykuna hinaspa guerrakuna, chiqninakuykuna, ayllupi sasachakuykuna nitaq sunqunchikta imapas llakichiwaqninchikkuna. Waranqa wata Jesus kamachiyta tukuruptinmi runakunaqa mana pantaqña kasunchik. Chaymanta qipallatam, Jehova Diosman sunqu hinalla kaqkunaqa ‘Diospa churinkuna hina libreña kanqaku, chayna librasqa kasqankuqa suma-sumaqmi kanqa’ (Rom. 8:21). Chaynaqa, hinallayá kuyakuywan kallpanchanakusun hinaspa yanapanakusun musuq pachaman yaykunanchikpaq.