1. Apostol Pablo nisqanman hinaqa, ¿imapaqmi kallpanchakunanchik?

IMAWANPAS llumpayta unquqkunaqa, ¿atinmankuchu llallinakuypi kallpayta? Manamá, ¿aw? Apostol Pablom ichaqa nirqa llallinakuypi hina llapallanchik kasqanchikmanta (Heb. 12:1). Nirqataqmi imaña-haykaña kaptinpas wañunanchikkama Diosman sunqu kanapaq kallpanchakunamanta, chaynapi hamuq punchawpi wiñaypaq kawsakunapaq (Mat. 24:13).

2. ¿Imatam apostol Pablo nirqa 2 Timoteo 4:7, 8 nisqanpi?

² Llallinakuypi kallpaqkunawan tupachikuspanmi apostol Pablo nirqa: “Mayman kallpasqaymanmi chayaruniña”, nispa (qaway 2 Timoteo 4:7, 8). Ichaqa, ¿imaynanpitaq chaynata nirqa? Qatiqninpiyá chaymanta yachaykusun.

3. ¿Pikunawantaq apostol Pablo tupachirqa Dios yupaychaqkunata?

³ Apostol Pablom iñiqmasinkunata allinta yanapananpaq rikchanachiykunawan yachachiq (1 Cor. 9:25-27; 2 Tim. 2:5). Chaymi Jehova Diosta yupaychaqkunata tupachirqa llallinakuypi kallpaqkunawan (1 Cor. 9:24; Gal. 2:2; Filip. 2:16). Ñuqanchikqa kallpaytam qallarinchik bautizakusqanchikmantapacha (1 Ped. 3:21). Tukusunñataqmi wiñay kawsayta chaskispanchik (Mat. 25:31-34, 46; 2 Tim. 4:8).

4. ¿Imamantam kay yachachikuypi yachaykusun?

⁴ Llallinakuypi kallpaqkunaqa maymi rinallankutam kallpanku. Imapas chaskiy munasqankuta chaskiyta munasqankuraykutaqmi tukuy kallpankuwan kallpanku. Manataqmi paykunaqa yanqapas-yanqaqa sayankuchu, aswanmi hinalla maymi chayanankukama kallpanku. Llallinakuypi kallpaqkuna hinam ñuqanchikpas kananchik. Chaymantayá kay yachachikuypi yachaykusun.

5. ¿Pipa munasqanman hinam kawsakunanchik, hinaspa imanasqa?

⁵ Llallinakuypi kallpaqkunaqa maymi rinallankutam kallpanku, paykunaqa manam ninmankuchu “kayllantaña kallparusaq” nispaqa. Chayta ruwaspankuqa manañachá chaskinmankuchu imapas chaskiy munasqankutaqa. Chaynallataqmi ñuqanchikpas wiñaypaq kawsakuyta munaspaqa Jehova Diospa ñannillantam purinanchik utaq paypa munasqanman hinam kawsakunanchik (Hech. 20:24; 1 Ped. 2:21). Satanasmi ichaqa mana munanchu chayna kawsakunanchiktaqa. Payqa munan hawa runakuna hina kawsananchiktam (1 Ped. 4:4). Chaymi runakunaqa Diosta yupaychaptinchik asikuwanchik hinaspapas ninkum: “Yanqam chayqa, mana Diosta yupaychaspallam aswan kusisqaqa kawsakunchik”, nispa. Ichaqa chayna rimayqa satanasmantam hamun (2 Ped. 2:19).

6. ¿Imatam yachanchik iñiqmasinchik Brianmanta?

⁶ Satanaspa ñanninta puriyqa utaq paypa munasqanman hina kawsakuyqa manam allinchu. Chayqa wañuymanmi apawanchik (Rom. 6:16). Rimarisun iñiqmasinchik Brianmanta. Paytaqa taksachanmantam tayta-maman Jehova Diosmanta sumaqta yachachirqa. Ichaqa wiñasqanman hinam hawa runakuna hina kawsayta qallaykurqa. Paymi nin: “Ñuqaqa nirqanim munasqayman hina kawsakuspay kusisqa kanaymanta, ichaqa manam chaynachu karqa. Punchawkuna pasasqanman hinam sinkakuyta, drogakuyta hinaspa huchapakuyta qallaykurqani. Chaymantañataqmi drogakuna rantikuyta qallaykurqani, chaynapi hinalla drogakunaypaq”, nispa. Brianqa cuentatam qukururqa munasqanchikman hina kawsakuspaqa mana kusisqa kasqanchikmanta. Chaymi tukuy mana allin ruwasqanmanta wanakuspan 2001 watapi bautizakururqa. Kunanmi ichaqa taytanchik Jehova Diospa munasqanman hina kawsakuspan kusisqa tarikun. *

7. Mateo 7:13, 14 nisqanman hinaqa, ¿mayqin ñanninta puriytam munanchik?

⁷ Sapakamam tantiakunanchik mayqin ñanninta purinanchikpaq utaq pipa munasqanman hina kawsakunapaqqa. Bibliam nin iskay ñankuna kasqanmanta. Hukninmi kichki ñan, hukninñataqmi hatun ñan. Satanasqa manam munanchu kichki ñanninta purispa wiñay kawsayta haypananchiktaqa. Payqa munan achka runakuna hina munasqanchikta ruwaspa hatun ñanninta purinanchiktam. Chay ñanqa wañuywanmi apakun (qaway Mateo 7:13, 14). Chaynaqa wiñaypaq  kawsakuyta munaspaqa kichki ñannintam purinanchik utaq Diospa munasqanman hinam kawsakunanchik. Chaypaqqa Jehova Diospi tukuy sunqunchikwan hapipakuspam paypa nisqankunata kasukunanchik.

8. Llallinakuypi kallpaqkunaqa, ¿imatam ruwanku urmaruspanku?

⁸ Llallinakuypi kallpaqkunaqa mana urmarunankupaqmi ñawpaqllankuta qawanku. Wakinpim ichaqa imawanpas qunqaymanta urmarunmanku utaq kallpaqmasinwanpas wichiykachinakunmanku. Chaywanpas paykunaqa chaylla hatarispankum maymi chayanankukama hinalla kallpanku, chaynapi haypay munasqankuta chaskinankupaq.

9. Llallinakuypi kallpaqkuna hina urmaruspaqa, ¿imatam ruwananchik?

⁹ Wakinpiqa ñuqanchikpas llallinakuypi kallpaqkuna hinam imawanpas urmaruchwan utaq imapipas pantaruchwan. Wakinpiñataqmi pi iñiqmasinchikpas imapas niykuwasqanchikwan sientirachiwachwan. Chaywanqa amayá hukmanyarusunchu. Llapanchikmiriki pantaq kanchik, llapanchiktaqmi kallpanchakuchkanchik kichki ñanninta purinapaq. Pablopas nirqam wakinpi piñanakunamanta utaq sientichinakunamanta (Col. 3:13). Chaywanpas, llallinakuypi kallpaqkuna hinayá urmaruspapas chaylla hatarispanchik hinalla kallpasun maymi chayananchik kaqkama, chaynapi wiñay kawsayta haypananchikpaq. Urmasqanchikmanta mana hatarispaqa utaq Diosmanta karunchakuspaqa sasachakuypichá tarikusun, hukkunatapas llakichichwanmi. Chayqa manam allinchu kanman.

10. Iñiqmasinchikkuna mana imawanpas urmarunankupaqqa, ¿imatam mana ruwanchikchu?

¹⁰ Ñuqanchikqa iñiqmasinchikkuna mana imawanpas urmarunankuta utaq Diosmanta mana karunchakunankuta munaspanchikqa, manam kikillanchikpa munasqanchiktaqa ruwananchikchu (Rom. 14:13, 19-21; 1 Cor. 8:9, 13). LLallinakuypi kallpaqkunam ichaqa mana chaynachu kanku. Paykunaqa iskay utaq kimsalla imapas munasqankuta chaskinankuraykum kallpaqmasin urmaptinpas mana yanapankuchu (Gal. 5:26; 6:4). Ñuqanchikqa llapallanchik wiñaypaq kawsakuyta munasqanchikraykum ima sasachakuypi  tarikuspapas yanapanakuykunchik. Hinaspapas apostol Pablopa nisqantam kasukunchik. Paymi nirqa: “Amayá kikillaykichikpa allinnikichiktachu maskaychikqa, aswanqa wakinnikichikpa allinnintayá”, nispa (Filip. 2: 4).

11. Llallinakuypi kallpaqkunataqa, ¿imam yanapan tukuy kallpankuwan kallpanankupaq?

¹¹ Llallinakuypi kallpaqkunaqa ñawpaqllankuta qawaspankum kallpanku. Chaymantapas maymi chayananku kaqkama chayayta munasqanku hinaspa imapas chaskiyta munasqankum paykunataqa yanapan tukuy kallpankuwan kallpanankupaq.

12. ¿Imatam Jehova Diosqa quwasun tukupaykama payman sunqu kaptinchikqa?

¹² Jehova Diosqa anchatam kuyawanchik. Chaymi tukupaykama payman sunqu hinalla kaptinchikqa wiñay kawsayta quwasun hanaq pachapi utaq kay allpa pachapi kaspapas. Bibliam willawanchik chay punchawkuna chayaramuptin imayna kawsakunamanta. Chaykunapi yuyaymanayqa anchatam kusichiwanchik. Kallpanchawanchiktaqmi urmaruspapas utaq imaña-haykaña kaptinpas tukupaykama Diosman sunqu kanapaq.

13. Wiñay kawsayta haypanapaqqa, ¿pillapim hapipakunanchik?

¹³ Llallinakuypi kallpaqkunaqa pisipasqa utaq nanapasqa kaspankupas hinallam kallpanku maymi chayananku kaqman yachanankukama. Chaytaqa ruwanku puntamantaraq preparakusqankurayku hinaspa kikinkupa kallpankupi hapipakusqankuraykum. Ñuqanchikpas kallpaqkuna hinam kallpachkanchik wiñaypaq kawsakuyta munasqanchikrayku. Chaypaqqa kikin Jehova Diosmi yanapawanchik. Kallpatapas quwanchiktaqmi imaña-haykaña kaptinpas payman sunqu kananchikpaq. Chaynaqa llallinakuypi kallpaqkuna hinaqa amayá kallpallanchikpichu hapipakusun, aswanqa Jehova Diosllapiyá (1 Ped. 5:10).

14. 2 Corintios 12:9, 10 nisqanqa, ¿imaynatam yanapawanchik sasachakuypi tarikuptinchik?

¹⁴ Apostol Pablom sasachakuykunapi tarikullarqa. Paytaqa chiqniqninkunam maqapaspanku wañuchiyta munarqaku. Chaymi wakinpi mana kallpayuq hina tarikullarqa. Chaymantapas ‘aychanpi tipaqnin kichkawan’ hina unquywanpaschá ñakarillarqa (2 Cor. 12:7). Chaykunawan llumpayta hukmanyarunanmantaqa astawanmi Jehova Diospi hapipakurqa (qaway 2 Corintios 12:9, 10). Chaymi Jehova Diosqa hinalla payman sunqu kananpaq yanapaykurqa.

15. Ima sasachakuypi tarikuspapas, ¿imatam ruwananchik Pablo hina?

¹⁵ Ñuqanchiktapas apostol Pablota hinapaschá, runakunaqa Diosta yupaychasqanchikrayku chiqniwanchik hinaspa carcelmanpas apayta munawachwan. Wakinpiñataqmi unqusqanchikrayku hukmayasqa tarikuchwan. Ichaqa ñuqanchikpas Pablo hinam ima sasachakuypi tarikuspapas Jehova Diosllapi hapipakunanchik. Hinaptinqa payqa yanapaykuwasunmi.

16. ¿Imatam ruwanku imawanpas sasachakuq iñiqmasinchikkunaqa?

¹⁶ Unqusqankurayku camallapi kaqkunapas, mana puriy atiqkunapas utaq machu-payayasqankurayku antallataña qawakuq iñiqmasinchikkunapas hinallam kallpanchakuchkanku Diosman sunqu kanankupaq. Paykunaqa kikinkupa kallpallankupi hapipakunankumantaqa Jehova Diospim hapipakunku. Chaymi huñunakuykunaman mana riyta atispankupas huñunakuykunataqa uyarinku telefonontakama utaq grabasqa kaqtaña. Diosmantapas hinallataqmi willakunku  ayllunkunaman, doctorkunaman hinaspa pi watukuqninkunamanpas.

17. ¿Jehova Diosqa qunqanmanchu unquqkunatawan imawanpas sasachakuqkunata?

¹⁷ Imawanña unquspapas utaq ima sasachakuypiña tarikuspapas amayá Diosmantaqa karunchakusunchu. Payqa anchatam kuyawanchik. Payrayku tukuy ima ruwasqanchiktapas manam haykaqpas qunqanqachu. Ñuqanchikwantaqmi kanqa ñakariptinchik utaq ima sasachakuypiña tarikuptinchikpas. Arí, Jehova Diosqa manam haykaqpas saqiwasunchu (Sal. 9:10). Rimarisunchik huk iñiqmasinchikmanta. Payqa mana hampiy atina unquywanmi unqullachkan. Paymi willakun: “Punchawkuna pasasqanman hinam kay unquyqa llumpayta ñakarichiwachkan. Chaymi manaña Diosmantapas anchatañachu willakuni. Ichaqa Diosta kusichiyta munasqayraykum atisqayman hina Diosmanta willakunaypaq kallpanchakuni”, nispa. Imawanpas hukmanyasqa tarikuspaqa amayá iskayrayasunchu Jehova Dios yanapawananchikmantaqa. Yuyarisuntaqyá apostol Pablopa nisqantapas. Paymi nirqa: ‘Kusisqam kani mana kallpayuq kaspaypas, kamisqa kaspaypas, imay pisipuwaptinpas, qatikachasqa kaspaypas hinaspa sasachakuykunapi kaspaypas. Ñuqaqa mana kallpayuq kaspaymi atiyniyuq rikuriruni’, nispa (2 Cor. 12:10).

18. Wakin iñiqmasinchikkunaqa, ¿imaynam tarikunku?

¹⁸ Wakin iñiqmasinchikkunañataqmi sunqunkupi imawanpas llumpayta llakikuy unquywan kallanku. Paykunaqa sunqunkupim nikunku: “Manam ñuqataqa pipas kuyawanchu, iñiqmasiykunapas mana kaqpaqta hinam qawawan”, nispa. Paykunata yanapayqa wakinpim sasa kanman. ¿Imanasqa? Sunqullankupi chayna tarikusqankuraykum. Kaypi yuyaymanasun: Pipas chakinta utaq makinta pakikuruptinqa llapanchikmi yachanchik, chaymi yanapaykuytapas atinchik. Sunqullankupi imawanpas llumpayta llakikuqkunata yanapaykuymi ichaqa sasa kanman imayna tarikusqan mana musyaylla kasqanrayku.

19. ¿Imatam yacharunchik Mefi-bosetmanta?

¹⁹ Imawanpas unquspaqa utaq sunqullanchikpi imawanpas llumpayta llakikuspaqa, ñawpaq tiempopi Diosta yupaychaq Mefi-bosetmanta yachayninchikmi yanapawasun Diosman sunqu hinalla kanapaq (2 Sam. 4:4). Payqa pichqa watachanmantam wistu kallarqa. Chaymantapas kamachiq Davidmi yanqakunata uyarispan abuelonpa chaskisqan chakrankunata qichururqa. Chaykunawanqa manam Mefi-bosetqa llumpaytaqa hukmanyarurqachu, aswanmi imapas chaskisqanwan kusisqa tarikurqa (2 Sam. 9:6-10). Kamachiq Davidtapas hinallataqmi tukuy imapi yanaparqa. Payqa manam yuyarayaqchu Davidpa  mana allin ruwasqantaqa. Manataqmi Diosmanpas tumparqachu sasachakuyninkunamantaqa (2 Sam. 16:1-4; 19:24-30). Chayraykum Jehova Diosqa ñuqanchikta yanapawananchikpaq Mefi-bosetmanta bibliapi qillqachirqa (Rom. 15:4).

20. Llumpayta llakikuy unquywan kaqkunaqa, ¿imaynam tarikunku, ichaqa imamantam mana iskayrayananchikchu?

²⁰ Sunqullankupi imawanpas llumpayta llakikuy unquywan kaq iñiqmasinchikkunaqa hukkunawan parlaytam manchapakunku. Pinqapakunkutaqmi achka runakunapa chawpinpi kaytapas. Chaywanpas paykunaqa kallpanchakunkum hatun huñunakuykunaman hinaspa sapa huñunakuykunaman rinankupaq. Kallpanchakunkutaqmi Diosmanta willakuq lluqsinankupaqpas. Ñuqanchikpas chayna tarikuspaqa paykuna hinayá kallpanchakusun hinalla Diosta yupaychananchikpaq, hinaspapas amayá haykaqpas iskayrayasunchu Jehova Dios kuyawasqanchikmantaqa. Payqa anchatam kuyawanchik, hinaspapas kusikunmi sunqumanta kallpanchakuptinchikqa. Chaymantapas payqa manamá saqiwasunchu, aswanmi atiyninwan yanapawasun sunqunchik tiyaykunanpaq * (Filip. 4:6, 7; 1 Ped. 5:7). Chaynaqa imawanña-haykawanña unquspapas hinallayá kallpanchakusun Jehova Diosta yupaychananchikpaq. Hinaptinqa Jehova Diosqa kusisqam tarikunqa.

21. Jehova Diospa yanapakuyninwan, ¿imatam haypasun?

²¹ Kaypi yachamusqanchikman hinam llallinakuypiqa iskay-kimsa kallpaqkunalla imapas chaskiy munasqankutaqa chaskinku. Ñuqanchikpas llallinakuypi kallpaqkuna hinam Diospa ñanninta richkanchik. Ichaqa llapallan Diosman sunqu kaqkunam wiñay kawsaytaqa haypasunchik, manam iskay-kimsallachu (Juan 3:16). Chaymantapas llallinakuypi kallpaqkunaqa yaqa llapankum kallpankupi kaqkunalla kanku, mana chayqa manach chayanmankuchu may chayanankumanqa, manataqchá chaskinmankuchu chaskiy munasqankutapas. Ñuqanchikmi ichaqa imawanña unquspapas Diospa ñanninta puriyta atinchik. Tukupaykama hinalla Diosman sunqu kaspanchikqa wiña-wiñaypaqmi kawsakusun (2 Cor. 4:16). Arí, Jehova Diospa yanapakuyllanwanmi wiñay kawsaytaqa haypasun.