¿Imanasqataq Jesusqa manaraq wañukuchkaspan nirqa Salmos 22:1 nisqanpi Davidpa qillqasqanta?

Mateo 27:46 nisqanman hinaqa manaraq wañukuchkaspanmi Jesus nirqa: “Diosnilláy, Diosnilláy, ¿imanasqataq saqirullawanki?”, nispa. Chaynata nisqanwanmi Salmos 22:1 nisqanpi Davidpa qillqasqanta cumplichkarqa (Mar. 15:34). Jesusqa chaynataqa nirqa manam taytan qunqarusqanta piensasqanraykuchu utaq mana iñiyniyuq kasqanraykuchu. Jesusqa allintam yacharqa imanasqa wañunantaqa (Mat. 16:21; 20:28). Yacharqataqmi ñakarispa wañunanta taytan mana harkakunantapas (Job 1:10). Chaynapi payman sunqu kaspan satanas llulla kasqanta qawachinanpaq (Mar. 14:35, 36).

Chaynaqa, ¿imanasqataq Jesusqa nirqa: “Diosnilláy, Diosnilláy, ¿imanasqataq saqirullawanki?”, nispan? Manamá allintaqa yachanchikchu. * Ichapas kaykunarayku nirqa:

Salmos 22:1 nisqantaqa ichapas Jesusqa nichkarqa wañuchisqa kananta taytan mana harkakunanta yachanankupaq. Huchamantawan wañuymanta llapallanchikta librawananchikpaqmi Jesusqa taytanpa mana harkakusqan wañunan karqa (Heb. 2:9).

Salmos 22 qallariynintaqa ichapas rimarirqa lliw chaypi nisqanta runakuna yuyarinankupaq. Jesuspa tiemponpi runakunaqa umallamantam yachaqku Salmos qillqapa  nisqankunataqa. Chaymi wakinta uyarispankuqa llapanta yuyariqku. Chayna kaptinqa judiokunatachá Jesusqa yuyarichichkarqa wañukunanmanta Salmos 22 rimasqanta (Sal. 22:7, 8, 15, 16, 18, 24). Yuyarichirqataqchá chaypi nisqanman hina Jehova Dioslla kamachiq kasqantapas (Sal. 22:27-31).

Salmos 22:1 nisqantaqa ichapas Jesusqa rimarirqa mana huchayuq kasqanta qawachinanpaq. Jesustaqa manaraq wañuchichkaspankum “Diospa contranpim mana allinkunata rimarun” nispanku tumparqaku (Mat. 26:65, 66). Kikinkupa kamachikuyninkuta mana kasukuspankum tutalla juzgarqakupas (Mat. 26:59; Mar. 14:56-59). “Diosnilláy, Diosnilláy, ¿imanasqataq saqirullawanki?” nisqanwanqa “manam ima mana allintapas ruwarqanichu saqiruwanaykipaqqa” nichkanmanpas hinam karqa.

Salmos 22:1 nisqantaqa ichapas Jesusqa rimarirqa mana Dios qipancharusqanrayku ñakarinanta yachanankupaq. Davidpas sasachakuypiqa karqa manam Dios qipancharusqanraykuchu. Payqa Jehova Diospim hinalla hapipakurqa, chaymi “¿imanasqataq saqirullawanki?” niruspan nirqa Diosqa serviqninkunata yanapaykuq kasqanta. Arí, Jehova Diosqa hinallamá Davidtaqa yanaparqa (Sal. 22:23, 24, 27). Jesuspas ñakarirqaqa manam taytan qipancharusqanraykuchu utaq mana allinta ruwasqanraykuchu (Mat. 21:9).

Salmos 22:1 nisqantaqa ichapas Jesusqa rimarirqa ñakarinanta taytan mana harkakusqanwan llakisqa kasqanrayku. Adantawan Evata Dios unanchaspanqa manam munarqachu pipas wañunantaqa. Ichaqa paykuna huchallikurusqankuraykum Jesusqa mana huchayuq kachkaspanpas wañunan karqa. Chaynapi satanas llulla kasqanta qawachinanpaq hinaspa huchamantawan wañuymanta librawananchikpaq (Mar. 8:31; 1 Ped. 2:21-24). Tukuy chaykunaraykum Jehova Diosqa churin ñakarispa wañunanta saqiykurqa.

Salmos 22:1 nisqantaqa ichapas Jesusqa rimarirqa imanasqa chayna wañukusqanpi qatiqninkuna piensanankupaq. * Jesusqa yacharqam wañukusqanwan achka runakuna hukmanyarunankuta (1 Cor. 1:23). Imanasqa qirupi wañukusqanta qatiqninkuna allinta yachaspankuqa manam mana allin runapaqchu hapinanku karqa, aswanqa paykunarayku wañusqantam riqsikunanku karqa (Gal. 3:13, 14).

“Diosnilláy, Diosnilláy, ¿imanasqataq saqirullawanki?” nisqanwan ima niy munasqanta mana sumaqta yachaptinchikpas, Jesusqa yacharqam taytanta kasukuspan wañukunanta. Chaymi manaraq wañukuchkaspan nirqa: “¡Ñam ruwasqaña!”, nispa (Juan 19:30; Luc. 22:37). Arí, Jehova Diosqa churin ñakarispa wañukunantaqa manaqa harkakurqachu kay pachapi kaspan lliw ruwananta cumplinanpaqmi. Jesuspa wañukusqanwantaqmi cumplikurqa paymanta lliw willakuykunapas (Luc. 24:44).