1, 2. ¿Imaynatataq Jesus huchamantawan wañuymanta librawarqanchik?

ADANQA mana pantaq kachkaspanpas Diosta mana kasukusqanwanmi manaña wiñaypaqchu kawsakurqa. Pay huchallikuruptinmi churinkunapas manaña wiñaypaqchu kawsakurqaku. Adanqa yachachkaspanña Diosta mana kasukusqanraykum wañunan karqa. Mirayninkunam ichaqa paypa huchallikusqanmantaqa mana huchayuqchu karqaku (Rom. 5:12, 14). Chaymi Adanpa huchallikusqan qipallaman Diosqa pisi-pisimanta nirqaña Adanpa lliw mirayninkunata imayna librananmanta (Gen. 3:15). Chaypaqmi hanaq pachamanta churinta kachamurqa, chaynapi vidanta quspan achka runakunata librananpaq (Mar. 10:45; Juan 6:51).

² Jesusmi huchamantawan wañuymanta rantiwachkachwanpas hina wañukusqanwan librawarqanchik (1 Cor. 15:22). Moisespa chaskisqan Diospa kamachikuyninpim nirqa vidamanta vidawan pagasqa kananpaq (Ex. 21:23, 24). Adanqa chuyam karqa. Chaymantam Diosta mana kasukuspan huchallikururqa, hinaspanmi wañurqa. Chaymi paypa rantinpi mana pantaq runa wañunan karqa, payqa karqa Jesusmi (Rom. 5:17). Chaynapim Jesusqa wañukusqanpi iñiqkunapaqqa ‘wiña-wiñaypaq taytan’ (Is. 9:6; Rom. 3:23, 24).

3. Juan 14:31; 15:13 nisqanman hinaqa, ¿pikunata kuyaspanmi Jesusqa wañukurqa?

³ Jesusqa wañukurqa taytantawan ñuqanchikta anchata kuyawaspanchikmi (qaway Juan 14:31; 15:13). Taytanta anchata kuyaspantaqmi munayninta ruwaspan wañukunankama payman sunqu karqa. Jesus wañukusqanraykutaqmi  Diospa munasqanman hina kay allpa pachapi wiñaypaq kawsakusunchik. Kay yachachikuypim yachasun ñakarispan Jesus wañukunanta imanasqa taytan mana harkakusqanmanta. Yachasuntaqmi apostol Juan hina ñuqanchikpas Jesuspa wañukusqanmanta Jehova Diostawan Jesusta imayna agradecekunamanta.

4. Willarimuy Jesuspa imayna wañukusqanmanta.

⁴ Jesusta chiqniqkuna Roma soldadokunaman entregaykuptinkum maqaparqaku. Jesusqa taytantam mañakunman karqa angelninkunawan yanapaykunanpaq, ichaqa manam imatapas ruwarqachu (Mat. 26:52-54; Juan 18:3; 19:1). Aycha qarapas llikiq azotewan wasanpas yawarllaña kanankama waqtaparuspankum qiruta qipichirqaku. Manaña apayta atiptinmi soldadokunaqa hukwanña apachirqaku (Mat. 27:32). Wañuchinanku sitioman chayarachispankum Jesustaqa qiruman clavowan takarurqaku. Sayariykachiptinkuqa clavopa yaykusqan makinwan chakinqa astawanraqchá llikikurqa. Chayna ñakarisqanta qawaspanmi mamanwan qatiqninkunaqa waqarqaku, chiqniqninkunañataqmi Jesusmanta asikurqaku (Luc. 23:32-38; Juan 19:25). Payqa unaymi ñakarillarqa. Manaña kallpan kaptinmi samatyaytapas manaña atirqachu. Chayna tarikuspanmi taytanta mañakuykuspan wañukurqa (Mar. 15:37; Luc. 23:46; Juan 10:17, 18; 19:30).

5. ¿Imataq Jesustaqa astawan llakichirqa?

⁵ Jesusmantam nirqaku “Diospa contranpim mana allinkunata rimarun” nispanku. Chayna nisqankum Jesustaqa anchata llakichirqa imayna wañukunanmantapas astawanqa (Mat. 26:64-66). Jesusqa manamá munarqachu mana allinkunata nisqankuwan taytan pinqaypi kanantaqa (Mat. 26:38, 39, 42). ¿Imanasqataq taytanqa mana harkakurqachu ñakarichispanku wañuchinankuta? Chaymantayá yachaykusun.

6. ¿Imanasqataq Jesusqa qirupi wañuchisqa kanan karqa?

⁶ Jesusqa qirupiqa wañukurqa ñakasqa kasqankumanta judiokunata librananpaqmi (Gal. 3:10, 13). Ñakasqaqa karqaku “Diospa kamachikuynintaqa kasukusaqkum” nichkaspanku mana kasukusqankuraykum. Chaymantapas, Adanpa miraynin kasqankuraykum huchayuq karqaku (Rom. 5:12). Israel runakunaman kamachikuy qusqanpim Dios nirqa pipas wañuchisqa kananpaq hina ima huchatapas ruwaruspanqa wañuchisqapuni kananpaq. Wakinpiqa wañurachispankum qirupi warkuqku. * Diosqa nirqataqmi qirupi wañuqqa paypa ñakasqan kasqanta (Deut. 21:22, 23; 27:26). Chaymi Jesuspa qirupi wañukusqanwan judiokunaqa Jesusta chiqnichkaspankupas ñakasqa kasqankumanta hinaspa Adanpa huchanmanta librasqa kanmanku karqa.

7. ¿Imanasqataq Jesusqa ñakarispan wañukurqa?

⁷ Chaymantapas, Jehova Diosqa Jesus ñakarinantaqa manaqa harkakurqachu sacerdotekunapa kamachiqnin kaspan runakunata yanapananpaqmi. Jesusqa sasachakuykunapi kaspanmi yacharqa Diosta kasukuyqa sasa kasqanta. Chayna sasachakuypi kaspanmi Dios yanapaykunanpaq kallpawan waqaspan mañakurqa. Bibliam Jesusmanta nin: “Tukuy imapim ñakarichisqa karqa, chayraykum sasachakuypi kaqkunatapas  chaylla yanapaykunman”, nispa. ¡Anchatamá kusikunchik allinta riqsiwaqninchik Jesusta yanapawananchikpaq Dios churasqanmantaqa! Payqa pantaq kasqanchikmanta llakipayawaqninchikmi (Heb. 2:17, 18; 4:14-16; 5:7-10).

8. ¿Imanasqaraqtaq Jehova Diosqa churin ñakarinanta mana harkakurqachu?

⁸ ¿Imaraykuraqtaq Diosqa churin ñakarinanta mana harkakurqachu? Satanas llulla kasqanta Jesus qawachinanpaqmi. Satanasmi nin sasachakuypi kaspanchikqa Diosman sunqu kayta mana atinanchikta. Nintaqmi imatapas quwaptillanchik Diosman sunqu kasqanchikta hinaspa Adan hina Diosta sunqumanta mana kuyasqanchikta (Job 1:9-11; 2:4, 5). Jehova Diosqa manam iskayrayarqachu ñakarispanpas churin payman sunqu kananmantaqa, chaymi ñakarichisqa kanantapas mana harkakurqachu.

9. ¿Apostol Juanpa imayna kasqantataq qatipakuchwan?

⁹ Jesuspa wañukusqanmanta yachachikuyqa achka iñiqmasinchikkunatam kallpancharqa sasachakuyña kaptinpas Diosmanta hinalla willakunankupaq hinaspa imaña-haykaña kaptinpas wañukunankukama Diosman sunqu kanankupaq. Chaynam Juanpas Jehova Diosmanta hinaspa Jesuspa wañukusqanmanta 60 wata masnin willakurqa. Chaymi yaqa 100 watanpiña kachkaptin Patmos sutiyuq islaman presota aparachirqaku (Apoc. 1:9). Juanpa chayna kasqanqa qatipakunapaqmi.

10. ¿Imaynatam yachanchik Jesuspa wañukusqanmanta Juanpa agradecekusqanta?

¹⁰ Juanmi pachak kuti masta qillqarqa Jesusmanta hinaspa wañukusqan imayna yanapawasqanchikmanta. Chaywanmi yachanchik Jesusta anchata kuyasqanta hinaspa wañukusqanmanta anchata agradecekusqanta. Huknin qillqasqanmi kaynata nin: “Pipas huchallikuruptinqa Dios taytanchikpa qayllanpim kachkan yanapawaqninchik, payqa allin ruwaq Jesucristom”, nispa (1 Juan 2:1, 2). Juanpa qillqasqanwantaqmi yachanchik Jesusmanta willakuy ancha allin kasqanta (Apoc. 19:10). ¿Imaynatam Juan hina sunqumanta agradecekuchwan?

11. ¿Imataq yanapawasun huchaman mana wichiykunapaq?

¹¹ Amayá huchallikusunchu. Jesuspa wañukusqanmanta anchata agradecekuspaqa manam nisunchu: “Ima mana allintapas ruwaruspay pampachaykuwananpaq niptiyqa Diosqa pampachaykuwanqam”, nispaqa. Chaynata ninamantaqa kaynatam ninanchik: “Jehova Dioswan Jesusqa ñuqaraykum tukuyta ruwarqa. Chaynaqa, ¿imaynamá kay mana allintaqa ruwayman?”, nispa. Chaymantapas, Jehova Diostam mañakunanchik mana huchaman wichiykunapaq (Mat. 6:13).

12. ¿Iñiqmasinchikkunawan imayna kanapaqmi 1 Juan 3:16-18 niwanchik?

¹² Iñiqmasinchikkunatayá kuyasun. Chaynatam Jesuspa wañukusqanmanta agradecekuchkanchik. Payqa manam ñuqallanchikpaqchu wañukurqa, aswanqa iñiqmasinchikkunatapas anchata kuyaspanmi wañukurqa (qaway 1 Juan 3:16-18). Chaymi paykuna unquruptinkupas utaq ima sasachakuypi kaptinkupas yanapanapaq tukuyta ruwanchik (Efes. 4:29, 31–5:2).

13. ¿Imanasqataq pampachakuq kananchik?

 ¹³ ¿Piñasqallañachu kanchik mayqin iñiqmasinchikpas sientirachiwaptinchik? (Lev. 19:18). Chayna kaptinqa pampachakuq kanapaqyá kallpanchakusun. Bibliam nin: “Piñanakunaykichikpaq razon kaptinpas hinallayá aguantanakuychik hinaspa tukuy sunqumanta pampachanakuychik. Imaynam Jehova Diospas tukuy sunqunmanta pampachaykusunkichik, chaynayá qamkunapas pampachanakuychik”, nispa (Col. 3:13). Iñiqmasinchikkunata pampachaspaqa Diostam agradecekuchkanchik ñuqanchikrayku wañunanpaq churin Jesusta kachamusqanmanta.

14. ¿Imatam ruwananchik Jesuspa wañukusqanmanta agradecekunapaq?

¹⁴ Jesuspa wañukusqanmantam Jehova Diosta agradecekunanchik. 83 watanpi iñiqmasinchik Yoanam nin: “Jehova Diostam sapa punchaw agradecekuni churin Jesus wañukusqanmanta”, nispa. Diosta mañakuspayá chay punchaw imapi pantasqanchikmanta pampachaykuwananchikpaq nisun. Huchallikuruspaqa iñiqkunapi punta apaqkunamanpas willakunanchikmi, paykunaqa uyariykuwaspanchikmi bibliawan yanapaykuwasun. Chaymantapas, ñuqanchikwanmi Diosta mañakunqaku, chaynapi Jesus wañukusqanrayku huchanchikmanta pampachaykuwananchikpaq (Sant. 5:14-16).

15. ¿Imanasqataq tiempochakunanchik Jesuspa wañukusqanmanta leenapaq hinaspa chaypi yuyaymananapaq?

¹⁵ Jesuspa wañukusqanpim yuyaymanananchik. 73 watanpi iñiqmasinchik Rayamanim nin: “Jesuspa ñakarisqanmanta leeptiymi waqanayawanraq”, nispa. Ñuqanchikpas Jesuspa ñakarisqanmanta leespaqa pay hinapaschá tarikunchik. Jesuspa wañukusqanpi astawan yuyaymanaspaqa paytawan taytantam astawan kuyasun. Chaypaqqa ancha allinmi kanman sapanchikpi chaymanta yachayninchik.

16. ¿Imamantam hukkunamanpas yachachinanchik? (Qaway qaranpi kaq dibujota).

¹⁶ Jesuspa wañukusqanmantam hukkunaman yachachinanchik. Chayta ruwaspaqa Jesuspa wañukusqanmantam astawan agradecekusun. Paypa wañukusqanmanta  hukkunaman yachachinapaqmi kachkan qillqanchikkuna hinaspa videonchikkuna. Hukninmi Diosmanta allin noticiakuna sutiyuq qillqanchik. Chaypim 4 kaq yachachikuypi nichkan: “¿Pitaq Jesucristoqa?”, nispa. Kachkantaqmi ¿Imamantam bibliaqa yachachiwanchik? sutiyuq qillqanchikpas. Chaypim 5 kaq yachachikuypi nichkan: “Diosmi churinpa yawarninwan rantiwarqanchik”, nispa. Jesuspa wañukusqanmantaqa astawantaqmi agradecekunchik paypa wañukusqanta yuyarinapaq huñunakuyman sapa wata rispanchik hinaspa chay huñunakuyman rinankupaq hukkunata nispanchikpas. ¡Mayna kusikunapaqmi Jesusmanta hukkunamanpas yachachinapaq Jehova Diospa niwasqanchikqa!

17. ¿Imakunaraykutaq Jesuspa wañukusqanmanta anchata agradecekunchik?

¹⁷ ¿Imakunaraykutaq Jesuspa wañukusqanmanta anchata agradecekunchik? Jesus wañukusqanraykum pantaq kaspanchikpas Jehova Diosman asuykuyta atinchik. Pay wañukusqanraykutaqmi satanaspa tukuy mana allin ruwasqankunapas chinkachisqa kanqa (1 Juan 3:8). Chaymantapas, Jesus wañukusqanraykum qallariypi Jehova Diospa munasqanman hina kay allpa pachanchik sumaq huerta kanqa. Chaypiqa Diosta kuyaqkunallañam hinaspa kasukuqkunallañam kasunchik. Chaynaqa, sapa punchawyá Jesuspa wañukusqanmanta agradecekusun.