1. ¿Imamantam anchata kusikunchik?

ANCHATAM kusikunchik Jehova Diospa yupaychaqninkuna kasqanchikwan. Llapallanchikmi hawka hinaspa kusisqa tarikunchik iñiqmasinchikkunawan kuska taytanchik Jehovata yupaychaspanchik.

2. ¿Iñiqkuna imayna kasqanchikmantam apostol Pablo qillqarqa achka kutipi?

² Apostol Pablom Diospa yanapakuyninwan qillqarqa llapallan iñiqkuna cuerpopa partenkuna hina kasqanchikmanta. Chaynataqa achka kutipim qillqarqa (Rom. 12:4-8; 1 Cor. 12:12-27; Efes. 4:16).

3. ¿Imakunamantam kay yachachikuypi yachasunchik?

³ ¿Imatam yachachwan apostol Pablo iñiqkunata imawan tupanachisqanmanta? Chaypaqmi puntataqa yachasunchik maymantaña kaspapas, apuña utaq wakchaña kaspapas utaq ima rimayniyuqña kaspapas, llapallanchik yanapakuy atinanchikmanta. Yachasuntaqmi mana yanapakuy atisqanchikpaq hapikuspaqa ima ruwanamanta. Chaymantapas yachasunchikmi iñiqmasinchikkunata yanapanapaq kallpanchakunamanta.

4. Romanos 12:4, 5 nisqanwanqa, ¿imatam apostol Pablo niyta munachkarqa?

⁴ Apostol Pablom kaynata nirqa: “Cuerponchikqa achka parteyuqmi ichaqa chay partenkunaqa sapakamam ruwayniyuq  kanku, chaynam ñuqanchikpas achkallaña kaspapas Cristowan kuska huk cuerpolla kanchik, cuerpopa partenkuna kaspam yanapanakunanchik”, nispa (Rom. 12:4, 5). Chayna nisqanwanmi Pabloqa niyta munachkarqa llapallanchik huk sunqulla kananchikpaq sapakama imapipas yanapakuy atisqanchikmanta. Sapakama imapi yanapakuptinchikpas llapallanchiktam taytanchik Jehovaqa kuyawanchik.

5. ¿Pikunatataq Jehova Diosqa churarqa yanapawananchikpaq?

⁵ Yachasqanchikman hinaqa, achka ruwayniyuqmi kanku qari iñiqmasinchikkunaqa (1 Tes. 5:12; Heb. 13:17). Paykunatam Jehova Diosqa regalota hina churarqa Jesusnintakama (Efes. 4:8). Paykunam kanku: Diospa llaqtanpi punta apaqkuna hinaspa yanapaqninkuna, betel wasipi cuentallikuqkuna, llaqtan-llaqtan watukuqkuna, iñiqkunapi punta apaqkuna hinaspa yanapaqninkuna. Paykunatamá Jehova Diosqa atiyninwan churarqa yanapawananchikpaq hinaspa kallpanchawananchikpaq (1 Ped. 5:2, 3).

6. 1 Tesalonicenses 2 nisqanman hinaqa, ¿imapaqmi kallpanchakunku Diospa atiyninwan akllasqa iñiqmasinchikkunaqa?

⁶ Jehova Diosqa atiyninwanmi akllan qari iñiqmasinchikkunata imapipas yanapakunankupaq. Imaynam makinchikpas chaynataq chakinchikpas cuerponchik allin kananpaq yanapakun, chaynam akllasqa iñiqmasinchikkunapas yanapakunku llapallanchik allin kananchikpaq. Paykunaqa hukkunapa alabasqan kanankumantaqa iñiqmasinchikkunata yanapanankupaqmi kallpanchakunku (qaway 1 Tesalonicenses 2:6-8). Hinaspapas kikinkupa allinninta maskanankumantaqa hukkunapa allinnintam maskanku. Chayna iñiqmasinchikkuna kasqankumantam Jehova Diosninchikta anchata agradecekunchik.

7. ¿Imaynam tarikunku tukuy tiemponkuwan Diosmanta willakuq iñiqmasinchikkunaqa?

⁷ Ichapas ñuqanchikwan huñunakuchkanku tukuy tiemponkuwan Diosmanta willakuq hinaspa 70 horata Diosmanta willakuq iñiqmasinchikkuna. Arí, maypiñapas kachkankum tukuy tiemponkuwan Diosmanta willakuq iñiqmasinchikkunaqa. Paykunaqa achka runakunatam yanapachkanku Jesuspa qatiqnin kanankupaq. Mana ancha kapuqniyuq kaspankupas Jehova Diospa yanapakuyninwanmi ancha kusisqa kawsakunku (Mar. 10:29, 30). Kusisqamá tarikunchik chayna iñiqmasinchikkunawan kaspaqa.

8. ¿Imapitaq llapallanchik yanapakuyta atichwan?

⁸ ¿Jehova Diospa atiyninwan akllasqa iñiqmasinchikkuna hinaspa tukuy tiemponkuwan Diosmanta willakuq iñiqmasinchikkunallachu astawan yanapakuyta atinmanku? Manam. Llapallanchikmi yanapakuytaqa atichwan (Rom. 10:15; 1 Cor. 3:6-9). Llapallanchikpa ruwayninchikmá Jesuspa qatiqninkuna kanankupaq runamasinchikta yanapayqa (Mat. 28:19, 20; 1 Tim. 2:4). Bautizasqa utaq mana bautizasqa kaspanchikpas llapallanchikmi kallpanchakunchik kawsakuyninchikpi chay ruwayta puntapi churanapaq (Mat. 24:14).

9. ¿Imanasqataq warmi iñiqmasinchikkunata anchata kuyanchik?

⁹ Warmi iñiqmasinchikkunapas yanapakuytam atinmanku. Paykunataqa taytanchik Jehovaqa anchatam kuyan tukuy sunqunkuwan yupaychasqankurayku. Diosman sunqu achka warmikunamantam bibliapas willawanchik. Paykunaqa imatapas yachaywan ruwaq, iñiyniyuq, mana manchakuq hinaspa allinkunata ruwaq kasqankuwanmi Jehova Diosta kusichirqaku (Luc. 8:2, 3; Hech. 16:14, 15; Rom. 16:3, 6; Filip. 4:3; Heb. 11:11, 31, 35). Kunanpas chaynamá kanku warmi  iñiqmasinchikkunaqa. Paykunawan kuska Jehova Diosta yupaychaspanchikmi anchata kusikunchik.

10. ¿Imanasqataq anchata kuyanchik yuyaq iñiqmasinchikkunata?

¹⁰ Anchatataqmi kusikunchik yuyaq iñiqmasinchikkunawan kuska taytanchik Jehovata yupaychaspanchikpas. Wakinkuqa warma kasqankumantam Diosta yupaychanku, wakinkum ichaqa manaraq unayraqchu. Paykunaqa yuyaq kasqankuwanmi llumpayta sasachakunku, hinaspapas manañam musu-sipas hinañachu iñiqmasinku yanapayta hinaspa Diosmanta willakuyta atinku. Chaywanpas tukuytam ruwanku Diosmanta willakunankupaq hinaspa iñiqmasinkuta kallpanchanankupaq. Chayna kasqankum ñuqanchiktapas kallpanchawanchik. Paykunataqa anchatam taytanchik Jehovaqa kuyan, ñuqanchikpas paykunataqa anchatam kuyanchik (Prov. 16:31).

11, 12. ¿Ñuqanchikwan huñunakuq musu-sipaskunapa imayna kasqankum anchata kallpanchawanchik?

¹¹ Musu-sipas iñiqmasinchikkunapaqpas sasam satanaspa munaychakusqan kay pachapi Diospa munasqanman hina kawsakuyqa (1 Juan 5:19). Chaywanpas hinallam kallpanchakuchkanku huñunakuykunapi rimarinankupaq hinaspa Diosmanta willakunankupaq. Hinaspapas Diospa yupaychaqninkuna kasqankutam mana manchakuspa riqsichikunku maypiña kaspankupas. Chayna kasqankuqa anchatamá kallpanchawanchik. Musu-sipaskuna, Jehova Diospaq imapipas ruwaypimá anchata kallpanchakunkichik (Sal. 8:2).

¹² Wakiqninchikmi ichaqa mana imapipas yanapakunapaq hina hapikunchik. Chayna kaptinchikqa, ¿imam yanapawasun? Qatiqninpiyá chaymanta yachaykusun.

13, 14. ¿Imanasqataq wakiqninchikqa mana yanapakuy atisqanchikpaq hina hapikuyta qallaykuchwan?

¹³ Wakiqninchikqa mana yanapakuy atisqanchikpaqmi hapikuchwan. Chaymanta rimaspanmi Pablo kaynata nirqa: “Sichu chaki  ninman: ‘Ñuqaqa manam makichu kani chaymi mana cuerpopa partenchu kani’, nispa. Hinaspaqa manamá chayraykuchu cuerpopa parten kasqanmantaqa rakikurun. Sichu rinri ninman: ‘Ñuqaqa manam ñawichu kani chaymi mana cuerpopa partenchu kani’, nispa. Hinaspaqa manamá chayraykuchu cuerpopa parten kasqanmantaqa rakikurun”, nispa (1 Cor. 12:15, 16). ¿Imatam yachachwan Pablopa chayna nisqanmanta?

¹⁴ Hukkunawan tupachikuspaqa mana valeqpaq hina kasqanchiktam piensayta qallaykuchwan. Wakin iñiqmasinchikkunaqa allin yachachiq hinaspa imapipas allin ruwaqmi kanku. Paykuna hina mana kasqanchikmantam wakinpiqa piensachwan. Chayna kasqanchikqa qawachin mana hatun tukuq kasqanchiktam (Filip. 2:3). Ichaqa sapa kutilla hukkunawan tupachikuspaqa kikillanchikmi hukmanyaruchwan. Pablopa nisqanman hinam mana valeqpaq hina hapikuyta qallaykuchwan. ¿Imataq yanapawasun chayna mana tarikunanchikpaq?

15. 1 Corintios 12 nisqanman hinaqa, ¿imatam yuyarinanchik ima ruwayniyuq kaspanchikpas?

¹⁵ Ñawpaq tiempopi Jesuspa qatiqninkunam Jehova Diospa yanapakuyninwan tukuyta ruwaqku. Wakinkum unquqkunata sanoyachiqku, wakinñataqmi hamuq tiempomanta willakuqku, wakinkuñataqmi hukkunata ruwaqku. Manamá llapallankuchu huk ruwayllata ruwaqku (qaway 1 Corintios 12:4-11). Chayna sapakama ruwayniyuq kaptinkupas llapallankutam Jehova Diosqa anchata kuyarqa. Paykuna hinam ñuqanchikpas sapakama ruwayniyuq kanchik. Chaywanpas llapallanchiktamá Jehova Diosqa kuyawanchik.

16. ¿Apostol Pablopa ima nisqantam kasukunanchik?

¹⁶ Iñiqmasinchikkunawan tupachikunamantaqa apostol Pablopa nisqantam kasukunanchik, paymi nirqa: “Chaynaqa, sapakamayá qawakuchun imapas ruwasqan imayna kasqanta, chaynapi ama hukwan tupachikuspa kusikunanpaq aswanqa kikinpa ruwasqallanwan kusikunanpaq”, nispa (Gal. 6:4).

17. ¿Imapim Pablopa nisqanta kasukuyqa yanapawasun?

 ¹⁷ Pablopa nisqanta kasukuspanchik ima ruwasqanchikta qawakuspaqa yachasunmi sapakama imapas ruway atiq kasqanchikta. Iñiqkunapi punta apaq wakin iñiqmasinchikkunam ñawpaqmanta yachachiyta sasachakunku. Runakunaman Diosmanta willakuspankum ichaqa suma-sumaqta yachachinku. Wakinkunañataqmi ancha kuyakuqllaña kanku, chaymi iñiqmasinchikkunaqa asuykunku. Wakin punta apaq iñiqmasinchikkunañataqmi qukuykuqllaña hinaspa samaykachikuqllaña kanku (Heb. 13:2, 16). Sapakama imapipas yanapakuyta atisqanchikta yachaspaqa kusisqam tarikusun, hinaspapas manam hukkunawanqa tupachikusunchu.

18. ¿Imataq yanapawasun Diosmanta allin yachachiq kananchikpaq?

¹⁸ Llapallanchikmi kallpanchakunanchik Diosmanta sumaqta willakunapaq hinaspa allinta yachachinapaq. Chaypaqmi Jehova Diosninchikqa huñunakuykunapi yachachiwanchik. ¿Chaypi yachasqanchikman hinachu ruwachkanchik?

19. ¿Imatam ruwananchik Diospa munaychakuyninmanta willakuqkunapaq escuelaman rinanchikpaq?

¹⁹ Diospa munaychakuyninmanta willakuqkunapaq escuelapipas yachachiwanchikmi Diosmanta allinta willakunapaqqa. Chay escuelamanmi rinmanku 23 watankumanta 65 watankukama tukuy tiemponkuwan Diosmanta willakuqkuna. Chaywanpas nikuchwanpaschá: “Imancha chay escuelaman riyta atiyman”, nispa. Chaynata nikunamantaqa imarayku chay escuelaman riy munasqanchikmantam yuyaymanananchik. Hinaspapas chay escuelaman rinapaq imakuna ruwaypiyá kallpanchakusun. Jehova Dios yanapawaptinchikqa hinaspa kikinchik kallpanchakuspanchikqa, chay escuelaman riytaqa atisunmi.

20. ¿Imatam yachachwan Romanos 12 nisqanmanta?

²⁰ Apostol Pabloqa niwarqanchikmá sapakama ruwayniyuq kasqanchikta (qaway Romanos 12:6-8). Chay imapas ruway yachaq kasqanchiktam servichikunanchik iñiqmasinchikkunata yanapananchikpaq hinaspa kallpanchananchikpaq.

21, 22. ¿Imatam yachachwan Robertomanta hinaspa Felicemanta?

²¹ Rimarisun Roberto * sutiyuq punta apaq iñiqmasinchikmanta. Payqa huk law nacionpim Jehova Diosta yupaychaspan yanapakuchkarqa, ichaqa nacionninman kutimuspan betel wasipi yanapananpaqmi niykurqaku. Nacionninmanqa kutichimurqaku manamá imapas mana allinta ruwasqanraykuchu. Chaywanpas Robertoqa hukmanyasqam tarikurqa, paymi nin: “Killantinmi hukmanyasqa tarikurqani, mana valeqpaq hinam hapikurqani. Wakinpiqa betelmantapas pasakuytam munarqani”, nispa. ¿Imataq Robertota yanaparqa mana chayna tarikunanpaq? Punta apaq huk iñiqmasinchikmi kaynata nirqa: “Ñawpaqta imatapas ruwaypi Jehova Diospa yanapasusqaykitaqa, kunan betelpi kaspaykim astawan servichikuwaq”, nispa. Chayna nisqanwanmi Robertoqa astawanraq kallpanchakurqa iñiqmasinchikkunata yanapaypi hinaspa imapas ruwayninpi.

²² Rimarisuntaq Felice Episcopo sutiyuq iñiqmasinchikmantapas. Payqa warmichantinmi 1956 watapi galaad escuelaman rirqaku. Chaymantam Bolivia nacionpi llaqtan-llaqtan watukuq kananpaq nirqaku. Pusaq wataña chayna yanapakuchkaptinkum warmichan wiksayuq rikurirurqa. Felicem nin: “Manamá  munarqanikuchu chay ruwayniykuta saqiytaqa, watapunim ñakakuspay karqani. Ichaqa Jehova Dios yanapawaptinmi manaña chaynachu tarikurqani, hinaspaymi warmayta imayna uywanaypaq kallpanchakurqani”, nispa. ¿Roberto utaq Felice hinachu tarikunchik? ¿Ñawpaqpi imapas ruwayninchikpi manaña yanapakuspachu hukmanyasqa tarikunchik? Chay ruwaypi imanasqa manaña yanapakusqanchikpi yuyaymananamantaqa, astawanyá kallpanchakusunchik Jehova Diosta yupaychananchikpaq hinaspa iñiqmasinchikkunata yanapananchikpaq. Chaynata ruwaspaqa kusisqam tarikusun. Imapas ruway yachasqanchiktaqa hukkunata yanapanapaqyá servichikusun. Chaywan iñiqmasinchikkunata kallpanchaspaqa kusisqam tarikusun.

23. (1) ¿Imapim yuyaymanananchik? (2) ¿Imamantam qatiqninpi yachasunchik?

²³ Jehova Diosqa llapallanchiktam kuyawanchik. Chaymi yuyaymanananchik iñiqmasinchikkunata imaynata yanapananchikpaq hinaspa kallpanchananchikpaq. Chayta ruwaspaqa imapas ruwasqanchikwanmi allin tarikusun. Qatiqnin yachachikuypim yachasunchik iñiqmasinchikkuna kuyasqa tarikunankupaq ima ruwanamanta.