1. ¿Imaynanpitaq ancha allin testigo kayman imaynata chayasqanchikmanta parlariyqa?

 “¿IMAYNATATAQ testigo kayman chayarqanki?” nispam achkaq iñiqmasinchikkuna tapuwanchik. Wakinpiñataqmi ñuqanchik tapuptinchik willawanchik imaynata testigo kayman chayasqankumanta chaynataq Jehova Diosta kuyasqankumanta. Ñuqanchikpas willakunchiktaqmi Diosmanta imam kaqta yachasqanchikwan imayna tarikusqanchikmanta (Rom. 1:11). Tukuy chaykunawanqa ancha kusisqamá tarikunchik Jehova Diospa testigon kasqanchikmanta. Chayqa kallpanchawanchiktaqmi hinalla “chiqap yachachikuyman hina” kawsakunanchikpaq utaq Diospa munasqanman hina kawsakuspa paypa yanapasqan kananchikpaq (3 Juan 4).

2. ¿Imakunamantam kay yachachikuypi yachasun?

² Kunanmi yachasunchik imakunarayku chiqap yachachikuyman hina kawsakusqanchikwan kusisqa kasqanchikmanta hinaspa chay chiqap yachachikuymanta imakunata ruwaspa agradecekunanchikmanta. Chaykunamanta yacharuspaqa ancha-ancha kusisqam tarikusunchik chiqap kaqta yachananchikpaq Diosninchik pusamuwasqanchikmanta (Juan 6:44). Kallpanchasqataqmi tarikusunchik kay chiqap kaqmanta hukkunamanpas willakunanchikpaq.

3. ¿Imaraykutaq kusikunchik chiqap yachachikuyman hina kawsakusqanchikmanta?

³ Chiqap kaqta yachasqanchikmantaqa kusikunchik Jehova Diosninchikta kuyasqanchikraykum. Paymantamriki imapas chiqap  kaqqa paqarimun. Palabranpi qillqasqa kasqanraykum ñuqanchikqa yacharunchik payqa tukuy atiyniyuq kasqanta chaynataq hanaq pachatawan kay pachata unanchaq kasqanta. Yacharunchiktaqmi payqa hanaq pacha taytanchik kasqanta chaynataq kuyawasqanchikrayku ñuqanchikmanta nanachikusqanta (1 Ped. 5:7). Ñuqanchikqariki yachanchikmi Diosqa llakipayakuq, kuyapayakuq kasqanta, mana chaylla piñakuruq kasqanta, maynataña pantaptinchikpas hinalla kuyakuq kasqanta, chiqap rimaq kasqanta (Ex. 34:6). Chaymantapas payqariki allin ruwaqmi (Is. 61:8). Jehova Diosqa anchatam llakikun ñakarisqanchikta qawaspan, chayraykum payqa tukuy ima mana allinkunata tukunqa tantiasqan punchawpi (Jer. 29:11). ¡Ñuqanchikpas munachkanchikñamá chay punchaw chayamunantaqa! Tukuy chaykunaraykumá taytanchiktaqa kuyanchik.

4, 5. ¿Imaynanpitaq apostol Pabloqa nirqa suyasqanchikqa boteta sayachiq llasaq fierro hina kasqanta?

⁴ Chiqap kaqta yachasqanchikmantaqa kusikunchiktaqmi vidanchikpi yanapawasqanchikrayku. Bibliawanmi ñuqanchikqa tukuy imamanta yacharunchik, hukkaqninmi hamuq tiempopi tukuy ima allinña kananmanta yachasqanchik. Ñuqanchikqa chaytam suyachkanchik. Chaymanta rimaspam apostol Pablopas nirqa: “Suyasqanchikqa ñuqanchikpaqmi yaqa buqueta sayachiq llasaq fierro hina”, nispa (Heb. 6:19). Imaynam llasaq fierropas boteta hina kaqllapi sayachin, chaynam hamuq tiempopaq suyasqanchikpas sasachakuykuna kaptin sunita sayanapaq yanapawanchik.

⁵ “Suyasqanchikqa” nispanqa Pabloqa rimachkarqa hanaq pachapaq akllasqakunamantam. Paykunaqariki hanaq pachaman riytam suyachkarqaku, ichaqa chay nisqanqa karqa manam hanaq pachaman riqkunallapaqchu. Kay pachapi kawsakuqkunapasriki suyachkanchikmi suma-sumaq allpa pachapi kawsakuyta (Juan 3:16). Chiqaptapunipas wiñay kawsayta suyasqanchikmantaqa kusikunchikmi.

6, 7. ¿Imaynatam Yvonneta yanapaykurqa hamuq tiempomanta bibliapi nisqan?

⁶ Rimarisunchik iñiqmasinchik Yvonnemanta. Payqa manam warmacha kasqanmantachu chiqap kaqtaqa yacharqa, chayraykum wañuytaqa ancha-anchata manchakuq. Payqa huk kutipim libropi kayna niqta leerurqa: “Tutapas punchawpas qunqayllatam wañuyqa apawanchik”, niqta. Chaymantam pay willakun: “Chay leesqaywanqa manam tutankunapas puñuyta atirqanichu. Hamuq tiempopim piensaq kani, nikuqmi kani: ‘¿Runakunaqa wañuqllachu kanchik? ¿Imaraykutaq kaypi kachkanchik?’, nispay. Ñuqaqa manamá wañuytaqa munarqanichu”, nispa.

⁷ Yvonneqa hatunchaña kachkaspam testigokunata riqsirurqa. Chaymantam willakun: “Chayllamá allinpaq hapirurqani suma-sumaq allpa pachapi wiña-wiñaypaq kawsakuymanta yachasqaytaqa”, nispa. Chiqap kaqmanta yachasqanmi ancha-anchata yanaparqa. Hina kikinmi nin: “Kunanqa miskitañam puñuni. Manañam ñawpaqta hinañachu hamuq tiempomanta piensani nitaq wañuytapas manchakuni”, nispa. Yvonneqa anchatam kusikun chiqap kaqta yachasqanmanta, chayraykum wakin runakunawanpas riman imata suyasqanmanta (1 Tim. 4:16).

8, 9. (1) ¿Imatataq Jesuspa willakusqanpi runa ruwarqa pakata tariruspan? (2) ¿Imaynataq tarikunki chiqap kaqta yachasqaykimanta?

⁸ Bibliapi Diosña tukuy imata kamachinanmanta nisqanqa chiqapmi. Jesusmi chayta tupachirqa pakawan, nirqam: “Hanaq pacha Diospa munaychakuyninqa rikchakunmi chakrapi kaq pakaman, chaytam huk runa rantiruspan pakapaykun, hinaspanmi ancha kusisqallaña kasqanrayku tukuy imanta rantikuruspan chay chakrata rantirun”, nispa (Mat. 13:44). Kay nisqanpi hinapas chay runaqa manam pakata maskastinchu purirqa, ichaqa tariruspanmi tukuyta ruwarqa chay paka makinpi kananpaq. Tukuy imanta rantikuruspanmi chay pakapa kasqan chakrata rantirurqa. ¿Imaynanpitaq chaytaqa ruwarqa?  Payqariki yacharqam chay pakaqa imapas kapuqninmantaqa aswan chaninniyuq kasqanta.

⁹ ¿Qampas chay pakata hinachu chiqap kaqta yachasqaykita qawanki? Yaqachá chaynata qawanki. Ñuqanchikqariki yachanchikmi kay pachapi tukuy imaña kaqpas Diosta servispa kusisqa kasqanchikmanqa mana haypasqanta. Manataqmi chayllachu, ñuqanchikqariki wiña-wiñaypaqmi kawsakusunchik kay pacha Diospa makinpiña kaptin. Atistin mana atistinpas Diosninchikta servinapaq imatapas ruwasqanchikqa manam yanqachu kanqa. Jehova Dioswan kuyachikuyqa imamantapas aswan allinmiriki. Manam imapas kusichiwanchikchu Diosta serviy hinaqa (Col. 1:10).

10, 11. ¿Imataq Michaelta yanaparqa vidanta cambiananpaq?

¹⁰ Achkaq iñiqmasinchikkunam tukuyta ruwarqaku Jehova Diosta kusichinankupaq. Wakinkuqa allin estudioyuq kaytam saqirqaku, wakinñataqmi tukuy imayuq kayta saqirqaku, wakinñataqmi imayna kawsakusqankuta saqirqaku. Chaytamá ruwarqa Michaelpas, payqa manam taksanmantachu Diosmantaqa yacharqa. Michaelqa hatunyaruspanmi runakunawan imaynata peleananpaq yachayta qallaykurqa. Chaymantam hina kikin willakun: “Ñuqaqa kusisqam tarikurqani allin cuerpoyuq kasqaywan. Mana pipapas maqananpaq hinam rikchakurqani”, nispa. Ichaqa bibliamanta yachayta qallaykuspanmi maqanakuyqa mana allin kasqanta yacharurqa (Sal. 11:5). Bibliamanta yachachiqnin casado testigota yuyarispanmi nin: “Paykunaqa manam haykaqllapas niwarqachu maqanakuyta saqinaypaqqa, aswanqa chiqap kaqllatam yachachiwarqaku”, nispa.

¹¹ Michaelqa Jehova Diosmanta astawan yachasqanraykum payta astawan kuyarqa. Diosqa runankunamanta anchata llakikusqanta yacharuspanmi maqanakuyta saqinanpaq tantiakururqa. Paymi willakun: “Yacharqanim maqanakuyta saqiyqa sasa kananmanta, yacharqanitaqmi chayta saqiruptiyqa Jehova Dios anchata kusikunanmantapas. Chayraykum Diosta servinaypaq tantiakurqani”, nispa. Michaelqa chiqap kaqta allinpaq hapisqanraykum tukuy imata ruwarqa, chayraykumá vidanta cambiarqa (Sant. 1:25).

12, 13. ¿Imaynatataq Maylita yanaparqa chiqap kaqta yachasqanqa?

¹² Chiqap kaqtam bibliapi tupachin achkiwan (Sal. 119:105; Efes. 5:8). Azerbaiyan nacionpi yachaq Maylipas ancha-anchatam agradecekun bibliamanta yachasqan achki hina allin ñanpi purinanpaq yanapasqanmanta. Paypa tayta-mamanqa huk religionniyuqkamam kanku. Chaymantam hina kikin Mayli willakun: “Dios kasqanmantaqa manam iskayrayarqanichu, ichaqa karqam mana yachasqay kaqkuna. Chayraykum nikuq kani: ‘¿Imapaqtaq unanchawarqanchik kayna ñakarinapaqqa chaynataq infiernopi ñakarichiwananchikpaqqa?’, nispay. Runakunaqariki ninkum imapas pasaruwaptinchikqa ‘hinapaqchá karqanki’ nispa. Chayraykum niq kani: ‘¿Diosqa tukuyta ruwawananchikpaqchu unanchawarqanchik? ¿Payqa kusikunchu ñakarisqanchikwan?’”, nispay.

¹³ Mayliqa hinallamá chaykunamanta yachayta munarqa. Chaymanta tiempopa pasasqanman hinam bibliamanta yachayta qallaykuspan testigoña rikurirurqa. Paymi willakun: “Bibliamanta sumaqta yachasqayraykum kunanqa yachaniña Dios imapaq unanchawasqanchikmanta, chaymantapas kunanqa hawkañam tarikuni”, nispa. Mayli hinamá Jehova Diosninchikta hatunchanchik, paymiriki tutayaymanta hurquykuwarqanchik achkipiña kananchikpaq (1 Ped. 2:9).

14. ¿Imatawantaq ruwachwan chiqap kaqta yachasqanchikmanta astawanraq kusikunapaq? (Qawaytaq “ Tupachintaqmi kaykunawanpas” niqta).

¹⁴ Yachamusqanchikman hinaqa bibliapiqa chiqap kaqtam tukuy imawan tupachin. Chaynataqa tupachin chiqap kaq tukuy imamanta aswan allin kasqanraykum. Chaymantapas chiqap kaqtaqa tukuy imawanraqmi tupachin. ¿Manachu  kallpanchakuchwan chaykunamanta yachanapaq? Chaykunamanta yachaspaqa chiqap kaqta tarisqanchikmantam anchata kusikusun, kusisqa kasqanchikqa sutillataqmi kanqa imapas ruwasqanchikpi.

15. ¿Imapitaq qawakun chiqap kaqta yachasqanchikmanta kusikusqanchik?

¹⁵ Chiqap kaqta yachasqanchikmanta kusisqa kasqanchikqa qawakun sapa punchaw bibliatawan qillqanchikkunata estudiasqanchikpim. Una-unayña testigo kaspanchikpas bibliamantaqa manam lliwtachu yachanchik. Ingles rimaypi punta kaq Willakuq qillqapim nirqa : “Chiqap kaq yachasqanchikqa chaki allpapi kuyayllapaq waytacha hinam, mana allin qurakunapa iqusqan waytacha hinam. Chay waytachata tarinaykipaqqa tukuytam ruwanayki, chay waytacha makikipi kananpaqqa kurkuykuspaykim pallanayki. Amayá huk waytachallatachu maskayqa, aswanqa achkatayá maskay, tarinaykikamayá hinalla maskay”, nispa. Chaynaqa, bibliamanta yachanapaqqa kallpanchakunanchikmi. Tukuy imata ruwasqanchikqa manam yanqapaqchu kanqa.

16. ¿Imaynatataq bibliata estudianki chiqap kaqmanta astawan yachanaykipaq? (Rimarimuytaq Proverbios 2:4-6 nisqanmantapas).

¹⁶ Wakiqninchiktaqa manam gustawanchikchu leeyqa chaynataq estudiayqa. Chaywanpas  Jehova Diosqa munanmi hinalla yachayninta maskananchikta, chaynapi chiqap kaqmanta astawan yachananchikpaq (leey Proverbios 2:4-6). Chiqap kaqmanta astawan yachananchikpaq kallpanchakusqanchikqa manam yanqapaqchu kanqa. Iñiqmasinchik Coreymanta rimarisun, payqa bibliata leespansi huk versiculollapi yuyaymanan. Paymi willakun: “Uray patanpi willakuykunatam leeni, hinaspaymi wakin textokunawan tupachini. Chaymantañataqmi wakin qillqanchikkunapi chay textomanta ima nisqanta maskani, chaynatam ruwani bibliamanta allinta yachanaypaq”, nispa. Iñiqmasinchik hina bibliamanta yachaspapas utaq hukmanpata yachaspapas bibliata estudianapaq kallpanchakuptinchikqa chaynataq tiempota hurquptinchikqa chaypim qawakunqa chiqap kaqta yachasqanchikmanta kusikusqanchik (Sal. 1:1-3).

17. ¿Estudiayllachu-estudiananchik chiqap kaqta yachasqanchikmanta kusisqa kanapaqqa? (Rimarimuytaq Santiago 1:25 nisqanmantapas).

¹⁷ Chiqap kaqta yachasqanchikmanta kusisqa kanapaqqa manam estudiayllachu-estudiananchik, aswanqa chiqap kaqmanta yachasqanchikman hinam kawsakunanchik. Chaypaq kallpanchakuspaqa ancha kusisqam tarikusunchik (leey Santiago 1:25). ¿Imaynatataq yachachwan chiqap yachachikuyman hina kawsakusqanchiktaqa? Hukkaqnin iñiqmasinchikmi nin imayna kawsakusqanchikta qawarikunanchikpaq, chaynatas yachasunchik imata allinta ruwasqanchikta chaynataq imata mana allinta ruwasqanchikta. Apostol Pablopas nirqam: “Maykama ñawparisqanchikman hinayá chaynallata ñawparisunchik”, nispa (Filip. 3:16).

18. ¿Imaynanpitaq “chiqap yachachikuyman hina” kawsakunanchikpaq kallpanchakunchik?

¹⁸ “Chiqap yachachikuyman hina” kawsakuspanchikqa allinmi kawsakusunchik. Chaymantapas Diosninchikpa sunquntawan iñiqmasinchikkunapa sunquntam kusichisunchik (Prov. 27:11; 3 Juan 4). ¡Chaykunaraykumá anchata kusikunchik chiqap yachachikuyta yachasqanchikmantaqa chaynataq “chiqap yachachikuyman hina” kawsakusqanchikmantaqa!