1. ¿Imatam achka musu-sipaskuna sapa wata ruwanku?

 SAPA watam waranqantin musu-sipaskuna bautizakunku. ¿Paykunamanta hukkaqninchu kanki? Paykunamanta hukkaqnin kaptikiqa anchatam kusikuniku, Jehova Diospas anchatam kusikun (Prov. 27:11). Qamqariki suma-sumaqtam bibliamanta yacharunki. Ichapas unay wata estudiarqanki, chayraykum qamqa bibliaqa Diospa palabran kasqanmantaqa manaña iskayrayankiñachu, aswanqa Diosninchikmanta sumaqta yacharusqaykiraykum payta kuyanki, chayraykum payllapaqña kawsakunaykipaq tantiakuspa bautizakurqanki. ¡Chayqa suma-sumaqmi!

2. ¿Imamantam yachasun kay yachachikuypi?

 ² Musu-sipas, manaraq bautizakuchkaspaykiqa ichapas sasachakuykunapi karqanki. Ichaqa aswan sasachakuykunapiraqmi kanki. Satanasmi tukuyta ruwanqa Jehova Diosmanta karunchakunaykipaq (Efes. 4:14). Amayá saqiychu chayta ruwasunaykitaqa. ¿Imataq yanapasunki Diosman sunqu kanaykipaq chaynataq “Diosllapaqñam kawsakusaq” nisqaykiman hina ruwanaykipaq? Chaypaqqa tukuyta ruwaspaykim “yuyayniyuqña” kanaykipaq kallpanchakunayki (Heb. 6:1). Chaymi kay yachachikuypi yachasun imaynata chayta ruwanaykimanta.

3. ¿Imatam ruwananku Diosta serviqkunaqa bautizakurusqanku qipamanpas?

³ Pipas bautizakuqqa apostol Pablopa nisqanman hinam ruwanan. Paymi nirqa “allin yuyayniyuq runaña kananchikpaq” kallpanchakunamanta (Efes. 4:13). Chaywanqa nichkarqa: “Hinallayá ñawpaqman riychik”, nispam. Hinalla ñawpaqman  riytam Pabloqa tupachirqa warmachapa wiñasqanwan. Warmachaqa tayta-mamanpa ancha kuyasqanmi, ichaqa tiempopa pasasqanman hinam “manaña warma hinañachu” kanqa (1 Cor. 13:11). Diosta serviqkunawanpas yaqa chaynam, bautizakuruspankuqa hinallam kallpanchakunanku ñawpaqman rinankupaq. Chaynaqa chaymantayá yachaykusun.

4. ¿Imam yanapasunkiman hinalla ñawpaqman rinaykipaq, imaynatataq chayqa yanapasunkiman? (Rimarimuytaq Filipenses 1:9 nisqanmantapas).

⁴ Jehova Diosninchikta aswan-aswan kuyanaykipaqyá kallpanchakuy. Yachanikum Diosta kuyasqaykitaqa. Ichaqa astawanraqmi payta kuyaytaqa atiwaq. ¿Imaynatataq chaytaqa ruwawaq? Apostol Pablom imaynata chayta ruwanamanta nirqa, chaytam tarinchik Filipenses 1:9 (leey). Pabloqa Jehova Diostam mañakurqa Filipos llaqtayuq iñiqmasinkunapa kuyakuyninku “aswan-aswanraq wiñananpaq”. Chaynaqa, atichwanmi Diosninchikta aswan-aswan kuyaytaqa. Chaypaqqa kallpanchakunanchikmi yachayniyuq kanapaq chaynataq yuyayniyuq kanapaq. Jehova Diosmanta astawan yachaspanchikqa astawanmi kuyasunchik, sumaqtam yachasun imayna kasqanta, imatapas imaynata ruwasqanta. Manataqmi imatapas ruwasunchu llakikunanpaq hinaqa, kallpanchakusuntaqmi munasqanman hina imatapas ruwanapaq.

5, 6. ¿Imaynatawanmi Diosta astawan kuyachwan?

⁵ Taytanchik Jehova Diostaqa astawantaqmi kuyawaq churin Jesusmanta astawan yachaspayki. Payqariki taytanpa imayna kasqantam qatipakurqa (Heb. 1:3). Jesusmanta allinta yachanaykipaqqa kay qillqakunatam allinta estudianayki: Mateota, Marcosta, Lucasta hinaspa Juanta. ¿Yaqachu sapa punchaw bibliaykita leechkanki? Manaraq leespaykiqa kallpanchakuwaqmi kunanmanta sapa punchaw leenaykipaq. Leespaykiqa yuyaymanayá Jesuspa imakuna ruwasqanpi, imakuna nisqanpi, imayna kasqanpi. Payqariki llampu sunqum karqa, chayraykum warmachakunatapas kuyaq (Mar. 10:13-16). Qatiqninkunapas paywanqa allinllam tarikuqku, chaymi imapas piensasqankumanta chaylla rimariqku (Mat. 16:22). Jesusqa chaynaqa karqa taytanpas chayna kasqanraykum. Diosninchikqariki llampu sunqum, chayraykum mañakuspanchikqa tukuy imamanta willakuyta atinchik. Payqariki imataña willakuptinchikpas manam mana allin runapaqqa hapiwasunchu. Payqa kuyawanchikmi, hinaspapas ñuqanchikmantam llakikun (1 Ped. 5:7).

⁶ Jesusqa runakunamantam llakipayarikun. Apostol Mateopas chayna kasqanmantam nirqa: “Runakunata qawaykuspanmi llakipayarikurqa wischusqa hinaspa mana michiqniyuq chiqisqa ovejakuna hina kasqankumanta”, nispa (Mat. 9:36). ¿Imaynatataq Diosqa runakunata qawan? Taytanmanta rimaspanmi hina kikin Jesus nirqa: ‘Hanaq pachapi taytaypas manam munanchu kay uchuychakunamanta hukllanpas chinkarunantaqa’, nispa (Mat. 18:14). ¡Chayta yachayqa anchatam kusichiwanchik! Jesusmanta astawan yachaspanchikqa Diosninchiktam astawan kuyasunchik.

7. ¿Imaynanpitaq ancha allin yuyayniyuq iñiqmasinchikkunawan amistadta armaynikiqa?

⁷ ¿Imatawanraqtaq ruwawaq Jehova Diosta astawan kuyanaykipaq chaynataq hinalla ñawpaqman rinaykipaq? Chaypaqqa yuyayniyuq iñiqmasinchikkunawanmi amistadta armanayki. Paykunaqariki kusisqam kawsakunku, manataqmi ñakakunkuchu Diosta servisqankumantapas. Paykunataqa tapuwaqtaqmi vidankumanta willarisunaykipaq, imatapas tantiaspaykiqa niwaqtaqmi yanapaykusunaykipaq. Bibliapipasriki ninmi imatapas tantianapaq tapukuyqa allin kasqanmanta (Prov. 11:14).

8. ¿Imatam ruwawaq bibliapi yachachikuykunamanta iskayrayaspaykiqa?

 ⁸ Imamantapas mana iskayrayanaykipaqyá kallpanchakuy.  Iskay kaqpi yachamusqanchikman hinapas satanasmi imamantapas iskayrayachisunkiman. Payqa munachkanmi bibliapi yachachikuykunamanta iskayrayanaykita. Kunan mana uyarispaykipas tiempopa pasasqanman hinam uyarinki tukuy imapas kikillanmanta rikurimusqanta nisqankuta. Ichapas kunanqa chaykunapiqa manaraq piensankichu. Ichaqa escuelaykipim profesornikikuna chaykunamanta rimanqaku, ichapas chay nisqankuqa allinpaq rikchakusunkiman. Ichaqa paykunaqa chaynataqa ninku Diosmanta mana allinta yachasqankuraykum. Chayna pasasuptikiqa amayá qunqaychu Proverbios 18:17 nisqanta, chaypim nin: “Puntata quejakuq runaqa mana huchayuqpaqmi rikchakun, contraparten hamuruspan llullakusqanta niykunankama”, nispa. ¿Imatam yachawaq chaymanta? Manam escuelapi tukuy ima nisusqaykitachu allinpaqqa hapinayki, aswanqa bibliatam allinta estudianayki, qillqanchikkunatam estudianayki. Chaymantapas, ñawpaqta kikillanmanta imapas rikurimusqanta allinpaq hapiq iñiqmasinchikkunawanmi rimanayki. Hinaspaykim tapuwaq Jehova Dios kasqanmanta imaynanpi mana iskayrayasqankuta. * Chaykunaqa yanapasunkim Dios kasqanmanta mana iskayrayanaykipaq.

9. ¿Imatam yacharunki Melissapa willakusqanmanta?

⁹ Iñiqmasinchik Melissatapas anchatam yanaparqa unanchasqa kaqkunamanta qillqanchikkunapi astawan yachaynin. * Paymi nin: “Profesorkunapas tukuy ima kikillanmanta rikurimusqantam chiqapta hina yachachinku. Qallariyllanpiqa manchakurqanim chaykunamanta sumaqta mana yachasqayrayku, manchakurqanitaqmi Diosmanta karuncharuwanantapas. Chayraykum chaykunamanta astawan yachaytaqa mana munarqanichu. Ichaqa Jehova Diosninchikqa manam munanchu mana sumaqta yachachkaspa payta yupaychananchiktaqa. Chayraykum chaykunamanta mana iskayrayanaypaq ¿Existe un Creador que se interese por nosotros? niq librota leerqani, leerqanitaqmi ¿Es la vida obra de un Creador? chaynataq El origen de la vida. Cinco cuestiones dignas de análisis niq qillqakunatapas. Chaykunamanta  yachaymi Diosmanta mana iskayrayanaypaq yanapawarqa”, nispa.

10, 11. ¿Imataq yanapasunki mana allinkunaman mana wichiykunaykipaq? (Rimarimuytaq 1 Tesalonicenses 4:3, 4 nisqanmantapas).

¹⁰ Aychaykipa munapayasqankunawan mana aysachikunaykipaqyá kallpanchakuy. Wiñasqaykiman hinam warmiwan utaq qariwan puñuy munapayay hamusunki. Ichapas wakinqa hikutasunki manaraq casarakuchkaspayki warmiwan utaq qariwan puñunaykipaq. Satanasqa chayta ruwanaykitamá munan. Ichaqa, ¿imataq yanapasunkiman chayman mana wichiykunaykipaq? (Leey 1 Tesalonicenses 4:3, 4). Jehova Diosta mañakuspaykiyá willakuy imayna tarikusqaykimanta, hinaspaykiyá mañakuy kallpata qusunaykipaq (Mat. 6:13). Diosninchikqariki yanapasunaykipaqmi kachkan, manam imamantapas juzgasunaykipaqchu (Sal. 103:13, 14). Bibliapi yachachikuykunapas yanapasunkimanmi. Rimamusqanchik iñiqmasinchik Melissapas mana allin munapayaykunawanmi aysachikurqa. Paymi willakun: “Sapa punchaw bibliata leesqayraykum chaykunamanqa mana wichiykurqanichu. Bibliata leesqayqa yanapawarqam Jehova Diospaq hina kawsakunaypaq chaynataq paypa hichpallanpi kanaypaq”, nispa (Sal. 119:9).

¹¹ Sasachakuynikikunataqa amayá kikillaykiqa allichaychu, aswanqa tayta-mamaykimanyá willakuy. Sasamá chaykunamanta willakuyqa, ichaqa allinnikipaqmi kanqa. Melissapas ninmi: “Jehova Diosta mañakuykuspaymi kallpata hapispay taytaywan rimarqani, taytaywan rimaruspayqa hawkañam tarikurqani. Yacharqanitaqmi Diosninchikpas ñuqamanta kusikusqanta”, nispa.

12. ¿Imataq yanapasunki imapaqpas allinta tantianaykipaq?

¹² Bibliapi yachachikuykunawanyá yanapachikuy. Watakunapa pasasqanman hinam kikikiña imapaqpas tantiakunki. Warmaraq kasqaykiraykum wakinpiqa sasachakuykunamanpas chayawaq. Ichaqa, ¿imataq yanapasunkiman Jehova Dioswan hinalla kuyachikunaykipaq? (Prov. 22:3). Iñiqmasinchik Karim willakun payta ima yanapasqanmanta. Payqa cuentatas qukurusqa yuyayniyuq iñiqmasinchikkunaqa Diospa munasqanman hina imatapas ruwasqankuta. Chaymantam pay willakun: “Imatapas niwaptillanchik ruwaymantaqa allinqa kasqa Jehova Diospa munasqanman hina ruwaymi”, nispa. Chaynaqa, bibliata leespaykiqa qampas nikuyá: “¿Imaynatataq Jehova Diosqa piensan kay leesqayman hinaqa? ¿Yaqachu kayqa yanapawanman allin kaqta ruwanaypaq? ¿Imaynataq tarikusaq kaypi nisqanman hina ruwaspayqa?”, nispa (Sal. 19:7; Is. 48:17, 18). Bibliata leespaykiqa chaynataq leesqaykipi yuyaymanaspaykiqa allintam imapaqpas tantiakunki, hinaspapas Jehova Diostam kusichinki. Sapa kuti astawan entiendesqaykiraykum kikikimanta imatapas ruwanki, manañam pipas nisuptillaykichu. Chayta ruwaspaykiqa yuyayta hapispam ñawpaqman rinki.

13. ¿Imaynatam yanapasunkiman allin amistadkunaqa? (Rimarimuytaq Proverbios 13:20 nisqanmantapas).

¹³ Diosta kuyaqkunawanyá amistadta armay. Qanchis kaqpi yachamusqanchikman hinapas ñawpaqman hinalla rinaykipaqqa amistadnikikunam yanapasunkiman (leey Proverbios 13:20). Rimarisun iñiqmasinchik Saramanta. Payqa manañas kusisqañachu Diosta servisqa, ichaqa chayna kachkaptinsi yanapaykusqaku. Chaymantam hina kikin willakun: “Allin amistadkunatam tarirurqani. Hukkaqnin amistadniywanmi Willakuq qillqanchikta sapa semana estudiaq kaniku, hukkaqnin amistadniyñataqmi huñunakuykunapi rimarinaypaq kallpanchawarqa. Paykuna yanapawasqanraykumá kunanqa kallpanchakuniña sapallaypi  bibliata estudianaypaq, Diosta mañakunaypaq. Pisi-pisimantamá Jehova Diosta astawan kuyayta qallaykurqani. Chaymantapas kusisqañam kunanqa tarikuni”, nispa.

14. ¿Imaynatataq Julienqa allin amistadkunata tarirurqa?

¹⁴ ¿Imatam ruwawaq allin amistadkunata tarinaykipaq? Punta apaq iñiqmasinchik Julienmi willakun: “Diosmanta willakuspaymi allin amistadkunata armarqani. Paykunaqa anchatam kallpanchawarqaku Diosmanta kusisqa willakunaypaq, chayraykum tantiakurqani tukuy tiempoywan Diosta servinaypaq. Chaymantapas cuentatam qukururqani wiñaymasiykunallata amistadniy kananpaq maskasqayqa mana anchata yanapawasqanta. Betelpiña kaspaypas achka amistadkunataraqmi armarqani. Paykunawanmi astawan yacharurqani imawan kusirikuyta, imawan mana kusirikuyta. Chayqa yanapawarqam Diosninchikta astawan kuyanaypaq”, nispa.

15. ¿Imatam nirqa Timoteota apostol Pablo? (Rimarimuytaq 2 Timoteo 2:20-22 nisqanmantapas).

¹⁵ Iñiqmasinchikkunamanta hukkaqnin mana allinpi puriptinqa paymantam karunchakunayki. Apostol Pablopas nirqam tiemponpi iñiqkunamanta wakinqa mana allin ñankunapi kasqankumanta. Chayraykum Timoteotapas paykunamanta karunchakunanpaq nirqa (leey 2 Timoteo 2:20-22). Hanaq pacha taytanchikwanqa tukuyta ruwaspam kuyachikurqanchik, chayraykum mana saqinanchikchu imapas paymanta karunchawananchiktaqa (Sal. 26:4).

16. ¿Imapaqmi tantiakuwaq?

¹⁶ Imapipas kallpanchakunaykipaqyá tantiakuy. ¿Imakunataq chayqa kanman? Diosman astawan hapipakunaykipaq yanapasuqniki kaqkunam chaynataq aswan-aswan allin runa kanaykipaq yanapasuqniki kaqkunam (Efes. 3:16). Chaypaqqa ichapas sapallaykipi bibliata estudianaykipaq chaynataq sapa punchaw bibliaykita leenaykipaq kallpanchakuwaq (Sal. 1:2, 3). Chaymantapas ichapas tukuy tiempo Jehova Diosta sunqumanta mañakuwaq. Ichapas allinta tantiakuwaq imawan kusirikunaykipaq chaynataq tiempoykita mana usuchinaykipaq (Efes. 5:15, 16). Diosninchikqa ancha-anchatam kusikun ñawpaqman rinaykipaq kallpanchakusqaykiwanqa.

17. ¿Imaynam tarikunki hukkunata yanapaspayki?

 ¹⁷ Hukkunata yanapaspaykiqa astawanmi yuyayta hapinki. Jesuspas nirqam: “Imapas quqmi aswan kusisqaqa imapas chaskiqmantaqa”, nispa (Hech. 20:35). Tiempota hurquspa hukkunata tukuy imapi yanapaspaykiqa allinmi tarikunki. ¿Imakunatataq ruwawaq iñiqmasinchikkunapaq? Tantiakuwaqmi yuyaqkunatawan unquqkunata yanapanaykipaq utaq imapas necesitasqankuta rantipakapamunaykipaq, utaqmi celularwan imapas ruwayta yachachiwaq. Bautizasqaña musu kaspaykiqa kallpanchakuwaqmi punta apaqkunapa yanapaqnin kanaykipaq, chaynapi iñiqmasinchikkunata astawanraq yanapanaykipaq (Filip. 2:4). Wakin runamasinchikkunatapas yanapawaqtaqmi Diosmanta yachanankupaq (Mat. 9:36, 37). Atispaykiqa tantiakuwaqtaqmi tukuy tiempoykiwan ima ruwaypipas Diosninchikta servinaykipaq.

18. ¿Imaynatam tukuy tiempoykiwan Diosta servisqaykiqa yanapasunkiman hinalla ñawpaqman rinaykipaq?

¹⁸ Tukuy tiempoykiwan Jehova Diosta servisqaykiqa yanapasunkim ñawpaqman rinaykipaq. Precursorña kaspaykiqa riwaqmi Diospa munaychakuyninmanta willakuqkunapaq escuelaman utaq betelman. Yanapakuwaqtaqmi huñunakuna wasikunata ruwaypipas. Warmallaraq iñiqmasinchik Kaitlynpas ninmi: “Yuyayniyuq iñiqmasinchikkunawan Diosmanta willakusqaymi yanapawarqa bautizakuruspaypas hinalla ñawpaqman rinaypaq. Imayna kasqankum yanapawarqa bibliata allinta estudianaypaq chaynataq allin yachachiq kanaypaq”, nispa.

19. ¿Imaynam tarikunki hinalla ñawpaqman rinaykipaq kallpanchakuspaykiqa?

¹⁹ Hinalla ñawpaqman rinaykipaq kallpanchakuptikiqa Jehova Diosmi tukuy imapi yanapasunki. Manamá ñakakunkichu tukuy imata Diospaq ruwasqaykimantaqa (1 Juan 2:17). Mana allin ñankunamanqa manamá chayankichu, aswanqa kusisqamá kawsakunki. Tukuy ima ruwasqaykipas allinmi kanqa (Prov. 16:3). Imayna kasqaykiqa yanapanqataqmi musu-sipaskunatawan yuyaq iñiqmasinchikkunatapas (1 Tim. 4:12). Chaymantapas hawkam hinaspa kusisqam tarikunki Diosninchik chaskisusqaykirayku chaynataq paywan kuyachikusqaykirayku (Prov. 23:15, 16).