Manam. Davidpa nisqanqa allinllam karqa.

Salmos 61:8 versiculopi qillqasqanman hinam wakin versiculokunapipas Davidqa qillqarqa, nirqam: “Hinaptinmi takispay sutikita wiñaypaq hatunchasaq. Chaytaqa ruwasaq imapas nisqayta sapa punchaw ruwastinmi”, nispa. Nirqataqmi: “Jehova Dioslláy, qamqa Diosniymi kanki, tukuy sunquywanmi hatunchayki. Sutillaykitam wiñaypaq hatunchasaq”, nispa. Hinaspapas nirqam: “Wiña-wiñaypaqmi sutikita hatunchasaq”, nispa (Sal. 61:8; 86:12; 145:1, 2).

Davidqariki yacharqam huchayuq kasqanrayku wañunanta. Huchawanmiriki wañuyqa yaykuramurqa (Gen. 3:3, 17-19; Sal. 51:4, 5). Payqa yacharqam Diosman sunqu Abrahanpas, Isaacpas, Jobpas wañusqanta. Yacharqataqmi kikinpas wañunanta (Sal. 37:25; 39:4). Ichaqa wañunanta yachaspanpas Salmos 61:8 nisqanman hinaqa Diostam wiñaypaq yupaychayta munarqa, huk rimaypiqa wañukunan punchawkama (2 Sam. 7:12).

Davidqa wakinpiqa kikinpa vidanmantam qillqarqa, chaytam yachanchik Salmos 18, 51 hinaspa 52 capitulota qillqasqanwan. Salmos 23 capitulota qillqasqanpiñataqmi nin Jehova Diosqa michiq hina ovejankunata pusasqanta, yakuta tomachisqanta hinaspa imamantapas harkasqanta. Davidpas chaynam ovejankunawanqa karqa, chaymi payqa wañukunan punchawkama Jehova Diosta yupaychayta munarqa (Sal. 23:6).

Davidpa tukuy ima qillqasqanqa Dios yanapaptinmi qillqasqa karqa. Wakin qillqasqankunaqa tiempopa risqanman hinam cumplikunan karqa. Salmos 110 capitulopim nirqa Diospa akllasqan runaqa Diospa alliqninpi kananmanta hinaspa atiyniyuq kananmanta. Atiyniyuq kaspam chiqniqninkunata munaychakuspan juzganan karqa. Chaymantapas hanaq pachamantam kamachimunan karqa, hinaspam “wiña-wiñaypaq sacerdote” kanan karqa. Chay akllasqa runaqa Davidpa mirayninmi karqa, payqa Jesusmi (Sal. 110:1-6). Jesusmi nirqa Salmos 110 capitulopi Davidpa willakusqanqa kikinmanta rimasqanta chaynataq hamuq tiempopi cumplikunanmanta (Mat. 22:41-45).

Dios yanapaptinmi Davidqa kawsakusqan tiempomanta hinaspa hamuq tiempomanta qillqarqa. Hamuq tiempopi kawsarimuspanqa atinqam Jehova Diosta wiñaypaq yupaychaytaqa. Hinaptinqa, ¿ima nichwantaq Davidpa qillqasqan Salmos 37:10, 11 chaynataq 29 nisqanmanta? Chaypiqa rimachkan Israel runakuna imayna kawsakusqankumantam chaynataq Diospa nisqankuna qipa punchawkunata cumplikuptin imaynaña kawsakunanchikmantam (qaway “Sumaq huertapim ñuqawan kanki” niqpi 8 kaq parrafota).

Chaynaqa Salmos 61:8 versiculopi hinaspa wakin versiculokunapipas Davidpa qillqasqanwanmi yachanchik wañukunan punchawkama Jehova Diosta hatunchayta munasqanta chaynataq hamuq punchawpi kawsarimuspan Jehova Diosta wiñaypaq hatunchayta munasqanta.