¿Sumaq huertapi kawsakunapaq hinañachu kachkanchik?
LLAPALLANCHIKMI munanchik Jesuspa nisqan cumplikunanta. Paymi nirqa: “Mayna kusisqam llampu sunquyuqkunaqa, paykunapaqmiki kay allpa pachaqa kanqa”, nispa (Mat. 5:5). Hanaq pachapaq akllasqakunapas allpa pachata chaskichkaq hinam kay pachata kamachimunqaku (Apoc. 5:10; 20:6). Diosta serviqkunaqa yaqa llapanchikmi kay allpa pachapi wiñaypaq kawsakusun. Hamuq tiempopiqa mana pantaqñam kasun, kusisqañam kawsakusun, hinaspapas hawkañam kasun. Chay cumplikunanpaqqa tukuytam ruwananchik kanqa. Chayraykum kunan yachasun kay allpa pacha huerta kananpaq imaynata yanapakunamanta, kawsarimuqkunata imakunapi yanapanamanta chaynataq paykunaman imaynata yachachinamanta. Yachasuntaqmi kunanmanta imakunata ruwaspa chaypi kanapaq listo kananchikmantapas.
SUMAQ HUERTAPI KAWSAKUNAPAQ LISTO KASUN
Jehova Diosmi Adantawan Evata nirqa: “Miraspayá allpa pachaman huntaychik, makikichikpiyá kachun allpa pachaqa”, nispa (Gen. 1:28). Chayna nisqanwanmi yachanchik Jehova Diosqa kay allpa pacha sumaq huerta kananta munasqanmanta. Chaymi wiñaypaq kawsakuq runakuna kay allpa pachata sumaqta huertayachinqaku. Diospa piñakuynin punchaw tukuytaqa achka llamkaymi kanqa tukuy imata allichana kasqanrayku. Manam chayllachu huertaqa kanqa, chayraykum enterollan kay allpa pachapiqa achka llamkay kanqa.
Israel runakunapas Babilonia nacionpi preso kasqankumanta 70 wata pasayta llaqtankuman kutispankuqa achka llamkayniyuqmi karqaku. Ichaqa Jehova Dios yanapaptinmi llaqtanku sumaq kananpaq tukuyta ruwarqaku. Isaiasmi nirqa: “Chunniq sitiotapas Edenta hinam ruwanqa, chaki pampatapas Jehova Diospa huertanta hinam ruwanqa”, nispa (Is. 51:3). Chayna nisqanman hinam Israel runakunaqa llamkarqaku, chaymi llaqtankuqa sumaq rikurirurqa. Chaynapunim ñuqanchikpas Jehova Dios yanapawaptinchik llamkasun allpa pachanchik sumaq huerta kananpaq. Chaymi kunanmantapuni imapas ruwana kaqkunapi yanapakunanchik, chaynapi hamuq punchawpi allinta yanapakunapaq.
Wasinchik pichasqa hinaspa allichasqa kananpaqqa tukuytam ruwananchik. Vecinonchikkuna mana pichakuptinkupas ñuqanchikqa pichakunanchikmi. Diosta yupaychanapaq huñunakunanchik wasitapas pichanam hinaspa allichanam. Yanapaykunataqmi imapas karuptin sasachakuypi tarikuq iñiqmasinchikkunata, chaynata ruwaptinchikqa sutillam kanqa yanapakuqllaña kasqanchik. Nikusunyá: “Hamuq punchawpi kawsakunayta Jehova Dios munachkaptinqa, ¿atiymanchu kunanmantapuni imallatapas yachayta hamuq punchawpi yanapakunaypaq?”, nispa.
KAWSARIMUQKUNATA YANAPANAPAQ LISTO KASUN
Jairopa churinta kawsarirachispanmi Jesusqa nirqa mikuykachinankupaq (Mar. 5:42, 43). 12 watanpi sipaschaman mikuchiyqa manachá sasachu karqa. Hamuq punchawpi achkallaña kawsarimuqkunapaqmi ichaqa achka ruwana kanqa. Jesusmi nirqa: “Tiempom chayamuchkanña haykam sepulturapi kaqkuna paypa qayasqanta uyarispa kawsarimunankupaq”, nispa (Juan 5:28, 29). Bibliapi manaña willakuptinpas kawsarimuqkunaqa necesitanqakuchá mikuyta, pachata hinaspa wasita. ¿Chaypi yanapakunanchikpaq hinañachu kunan kawsakuchkanchik?
¿Imatam kunanmantapuni ruwananchik sumaq huertapi kawsakunapaq listo kasqanchik sutilla kananpaq?
Huñunakusqanchik lawman llaqtan-llaqtan watukuq iñiqmasinchik chayamuptinqa, ¿wasinchikmanchu qayaykunchik imallatapas mikuykunanchikpaq? Betelpi manaña yanapakuq iñiqmasinchik chaynataq manaña llaqtan-llaqtan watukuq iñiqmasinchik ripukamuspan ñuqanchikwanña huñunakuptinqa, ¿yanapaykunchikchu maypi yachananpaq wasita maskaypi? Hatun huñunakuy yachasqanchik lawpi kaptinqa, ¿imallapipas yanapakunanchikpaqchu kallpanchakunchik? ¿Chay huñunakuyman hamuq huklaw nacionniyuqkunatachu yanapaykunchik?
KAWSARIMUQKUNATA YACHACHINAPAQ LISTO KASUN
Hechos 24:15 nisqanman hinaqa achkallay-achka runakunam kawsarimunqaku. Paykunamantaqa achkam Jehova Diosmanta mana imatapas yachaspa wañukurqaku, kawsarimuspankum ichaqa yachayta atinqaku. a Unay wataña Jehova Diosta servikuqkunam paykunamanqa yachachinqaku (Is. 11:9). Chay punchaw chayamunantam anchata munan iñiqmasinchik Charlotte. Payqa Europa lawpim, Sudamerica lawpim hinaspa Africa lawpim Diosmanta willakurqa. Paymi kusisqallaña nin: “Kawsarimuqkunata yachachiytañam munachkani. Ñawpaq tiempopi kawsakuq runakunamanta qillqakunapi leespaymi nini: ‘Jehova Diosta riqsispankuqa, ¡imaynaraq kawsakunmanku karqa!’, nispay. Kawsarimuqkunamanmi Jehova Diosmanta anchallataña willayta munachkani”, nispa.
Manaraq kay pachaman Jesus hamuchkaptin Diosta servikuqkunapas mayraqya yachanankuqa kanqa. ¡Mayna sumaqya kanqa Danielman qipa punchawkunapaq qillqasqankuna imayna cumplikusqanmanta willayqa! Payqa manamriki qillqasqantaqa entienderqachu (Dan. 12:8). ¡Mayna sumaqya kanqa Noemiymanpas hinaspa Rutmanpas mirayninkumanta Jesucristo kasqanta willayqa! ¡Mayna-mayna sumaqya kanqa kawsarimuqkunaman Jehova Diosmanta yachachiyqa! Manañam satanaspa munaychakusqan runakunaqa kanqañachu, manañataqmi imapas harkawasunchu tukuy sunquwan Jehova Diosta yupaychanapaqqa.
¿Imakunatam kunanmanta ruwananchik? Allin yachachiq kanapaqmi kallpanchakunanchik, hinaspapas Diosmanta hinalla willakunapaqmi kallpanchakunanchik (Mat. 24:14). Yuyaqña kaspapas utaq imawan sasachakuspapas atisqanchikman hina kallpanchakuptinchikqa kawsarimuqkunaman yachachinapaq listo kasqanchikmi sutilla kanqa.
Chaywanpas, ¿sunqumantapunichu hamuq punchawpi kay allpa pachapi kawsakuyta munanki? ¿Munachkankiñachu kay allpa pacha sumaq huerta kananpaq yanapakuyta, kawsarimuqkuna yanapayta hinaspa paykunaman Jehova Diosmanta yachachiyta? Listo kasqanchikqa sutillam kanqa hamuq punchawpi ruwana kaqkunata kunanmanta ruwanapaq kallpanchakuptinchik.
a Qaway 2022 watapi septiembre killapaq Willakuq qillqapi “Achkaqtam yanapanqaku allin ruwaq kanankupaq” niqta.
