1. ¿Imakunatam ruwananchik Diosta astawan riqsinapaq?

 LLAPALLANCHIKMI munanchik pi kuyasqanchikwanpas kayta. Casarasqakunaqa esposanchikwan utaq qusanchikwan kuska imatapas ruwaytam munanchik. Musu-sipaskunañataqmi amistadninchikkunawan kusirikuyta munanchik. Chaywanpas, astawanqa munanchik Diosta riqsinapaq tiempochakuytam. Chaypaqqa Diostam mañakunanchik, palabrantam estudiananchik hinaspapas imakuna ruwananpiwan imayna kasqanpim yuyaymanananchik. Chaykunata ruwaspaqa kusisqam kasun (Sal. 139:17).

2. ¿Imanasqataq wakinpiqa tiempo mana haypawanchikchu Diosmanta yachanapaq?

² Ayllunchikpaq llamkasqanchikraykum utaq tukuy ima ruwayniyuq kasqanchikraykum wakinpiqa tiempo mana haypawanchikchu Diosta mañakunapaq, bibliata leenapaq, yuyaymananapaq chaynataq Diosmanta willakunapaqpas.

3. ¿Imanasqaraqtaq mana tiempo haypawachwanchu Diosmanta yachanapaq?

³ Wakinpiqa mana cuentata qukuspallam kusirikuykunapi utaq ima ruwaypipas tiemponchikta usuchichkachwan. Chayllamanña qukuruptinchikqa manañam tiempo haypawasunchu Diosmanta yachananchikpaq. Chaymi allinta tantiananchik hayka tiempo kusirikunanchikpaq (Prov. 25:27; 1 Tim. 4:8).

4. ¿Imamantam kay yachachikuypi yachasun?

 ⁴ Kay yachachikuypim yachasun imakunata puntapi churanamanta. Yachasuntaqmi Diosmanta yachananchikpaq tiempochakuyninchik ancha allin kasqanmantapas chaynataq chay ruwayninchik imayna yanapawananchikmantapas.

5. ¿Imaynatam Efesios 5:15-17 nisqan musu-sipaskunata yanapanman allinta tantianankupaq?

⁵ Diosta servinapaqyá tantiasun. Diosta serviq familiakunaqa wawa-churinku Diosta servinankutam munanku. Ichaqa profesorninku hinaspa Diosta mana serviq ayllunkum kallpanchanku profesionniyuq kanankupaq. Chaynapi tarikuptinku, ¿imataq yanapanman allinta tantianankupaq? Chaypaqqa Efesios 5:15-17 (leey) nisqanta leespankum chaypi yuyaymananmanku. Chaymantapas sunqunkupim tapukunanku: “¿Ima ruwanaytam Jehova Dios munan? ¿Ima tantiasqaytaq anchata kusichinman? ¿Imam yanapawanman tiempoyta mana usuchinaypaq?”, nispa. Musu-sipaskunaqa yuyarinankutaqmi kay allpa pachanchik diablopa makinpi kasqantapas. Chaymi kallpanchakunanku imaña kaptinpas Jehova Diospa sunqunta kusichinankupaq.

6. ¿Imapaqtaq Maria tantiakurqa? ¿Imanasqataq chayqa ancha allin karqa?

⁶ Imata puntata ruwananchikpaqyá allinta tantiasun. Tiemponchikta mana usuchinapaqmi wakinpiqa tantiananchik kanqa ima ruwayninchikta puntata ruwanapaq. Mariawan Martapas allintam tantiananku karqa tiemponkuwan imata ruwanankupaq. Jesus visitaruptinmi Martaqa yanukuypi afanakurqa, Mariañataqmi Jesuspa yachachisqanta uyarinanpaq tiyaykurqa. Martaqa allintam ruwachkarqa, chaywanpas Jesusmi nirqa: “Mariaqa allinnin kaqtam akllakurun”, nispa (Luc. 10:38-42). Mariaqa qunqarurqachá chay punchaw Martapa ima yanukusqantaqa. Ichaqa manachá qunqarqachu Jesuspa yachachisqantaqa. Chaywanmi yachanchik Mariapaqqa Diosmanta yachaynin puntapi kasqanta. Ñuqanchikpas pay hinam Diosmanta yachayninchikta puntapi churananchik.

7. ¿Imanasqataq ancha allin Diosta mañakuy, palabranta estudiay hinaspa yuyaymanay?

⁷ Mañakuspanchikqa, bibliata estudiaspanchikqa hinaspa yuyaymanaspanchikqa Diostam yupaychachkanchik. Diosta mañakuyqa sumaqmi, payqa anchatam kuyawanchik (Sal. 5:7). Bibliata estudiaspañataqmi Diospa nisqankunata yachanchik (Prov. 2:1-5). Estudiasqanchikkunapi yuyaymanaspañataqmi yachanchik imakunata Jehova Dios ruwananmanta hinaspa imayna kasqanmanta. Chaykunata ruwaspanchikqa allintam tiemponchikta servichikuchkanchik. Ichaqa, ¿imatam ruwananchik tiempo haypawananchikpaq?

8. ¿Jesuspa ima ruwasqantam qatipakuchwan?

⁸ Atikuptinqa mana pipa kasqanmanyá risun. Piensarisun señorninchik Jesucristopi. Payqa kay allpa pachapi Diosmanta willakuyta qallaykuspanmi 40 punchaw chunniqpi karqa (Luc. 4:1, 2). Chaypim taytanta mañakurqa hinaspa yuyaymanarqa. Chay ruwasqanmi yanaparqa tukuy ima sasachakuyta aguantananpaq. Ñuqanchikpas Jesustam qatipakuchwan. Wasipi achkallaña yachaspanchikqa mana pipa kasqanmanmi richwan Diosta mañakunapaq hinaspa  yuyaymananapaq. Chaytam Julia sutiyuq iñiqmasinchikpas ruwan. Paymi qusanwan Francia nacionpi uchuy cuartochapi yachan. Juliam nin: “Sapa punchawmi parqueman rini, chaypim Jehova Diosta mañakuni hinaspa yuyaymanani”, nispa.

9. ¿Imatam Jesus ruwarqa achka ruwayniyuq kaspanpas?

⁹ Señorninchik Jesucristoqa achka ruwayniyuqmi karqa. Mayta riptinpas runakunaqa manam saqiqkuchu. Bibliam niwanchik huk kutipi ‘llaqtapi llapallan runakuna punkupi huñunakurusqankumanta’. Chaywanpas Jesusqa Jehova Diosta mañakunanpaqmi tiempochakurqa. Payqa manaraq achikyamuchkaptinmi mana runakunapa kasqan sitioman rirqa Diosta mañakunanpaq (Mar. 1:32-35).

10, 11. Mateo 26:40, 41 nisqanman hinaqa, ¿imata ruwanankupaqmi Jesusqa apostolninkunata nirqa? ¿Ichaqa imam pasarurqa?

¹⁰ Wañuchinankupaq huk tutallaña faltachkaptinpas Jesusqa taytan mañakuyta hinaspa yuyaymanayta munasqanraykum mana runakunapa kasqan Getsemani huertaman rirqa (Mat. 26:36). Chaypim apostolninkunata nirqa astawanraq Diosta mañakunankupaq.

¹¹ Yaqapaschá chawpi tuta pasaytaña Getsemani huertamanqa chayarurqaku. Chaypim Jesusqa apostolninkunata nirqa rikchan-rikchanlla kaspanku Diosta mañakunankupaq, hinaspam taytan mañakuq pasarqa (Mat. 26:37-39). Kutiramuspanñataqmi apostolninkunata puñuchkaqta tariruspan nirqa: “Qawan-qawanllayá kaychik hinaspayá Diosta tukuy tiempo mañakuychik”, nispa (leey Mateo 26:40, 41). Jesusqa yacharqam llumpay pisipasqa kasqankuta, chaymi llakipayaspan nirqa: “Cuerpoqa mana kallpayuqmi”, nispan. Huktawan mañakusqanmanta kutimuptinpas hinallam puñuchkarqaku (Mat. 26:42-45).

12. ¿Imatam ruwachwan llumpay llakisqa kaspa Dios mañakuyta mana atispaqa?

¹² Maypi hinaspa imay hora mañakunapaqyá allinta tantiasun. Wakinpiqa hukmanyasqa utaq pisipasqam tarikunchik. ¿Imatam ruwachwan chayna tarikuspanchikqa? Wakin iñiqmasinchikkunam mañakunku mana llumpay pisipasqa kasqanku horapi. Wakinkuñataqmi mañakunku tiyaykuspa utaq qunquranpa. Ichaqa, ¿imatam ruwachwan llumpay llakisqa kaspa Diosta mañakuyta mana atispaqa? Imayna tarikusqanchikta Diosman willanapaqmi kallpanchakunanchik. Payqa kuyawasqanchikraykum imayna tarikusqanchikta entiendewasun (Sal. 139:4).

13. ¿Imatam ruwananchik estudiasqanchikkunata allinta entiendenapaq?

 ¹³ Mana bullapa kasqanpiyá estudiasun. Bibliata estudiaspanchikpas chaynataq huñunakuykunaman rispanchikpas allin iñiyniyuqmi kasun. ¿Imatam ruwachwan huñunakuypi yachachikuykunata hinaspa estudiasqanchikta allinta entiendenapaq? Chaypaqqa estudiasqanchik horam celularta, televisionta hinaspa radiota apagananchik. Chaytam wakin yachayniyuq runakunapas ninku. Huk profesormi nin: “Ima bullapas kaptinqa manam atinkichu estudiasqaykikunata allinta entiendeytaqa”, nispa. Asambleanchikkunapim niwanchik yachachikuykunata hukkuna allinta uyarinankupaq celularninchikta apaganapaq. ¿Manachu sapallanchikpi kaspapas chayta ruwachwan?

14. ¿Imapaqmi Filipenses 4:6, 7 nisqan yanapawanchik?

¹⁴ Ama imakunapipas piensanapaqyá Diosta mañakusun. Huñunakuypi kachkaspa utaq sapallanchikpi estudiachkaspa imapipas piensaspaqa utaq llakinchikkuna umanchikman chayamuptinqa Jehova Diostam mañakunanchik. Chayta ruwaspaqa huñunakuypi uyarisqanchiktawan sapallanchikpi estudiasqanchiktam allinta entiendesun. Tukuy tiempoyá Jehova Diosta mañakusun sunqunchiktawan yuyayninchikta cuidananpaq (leey Filipenses 4:6, 7).

15. ¿Imapaqmi yanapawasun Diosmanta allinta yachayninchik?

¹⁵ Jehova Diosta mañakuyninchikqa hinaspa paymanta yachayninchikqa imatapas allinta tantianapaqmi yanapawasun. Bibliapa nisqanman hinaqa, ‘yachayniyuq runakunawan juntanakuspaqa yachayniyuqmi kasun’ (Prov. 13:20). Jehova Diosqa tukuy yachayniyuq Diosmi, chaymi paymanta astawan yachaspaqa aswan yachayniyuq kasun.

16. ¿Imatam ruwananchik runamasinchikkunaman allinta yachachinapaq?

¹⁶ Jehova Diosta mañakuyninchikqa hinaspa paymanta yachayninchikqa yanapawasuntaqmi allin yachachiq kanapaqpas.  Bibliamantaqa yachachinchik runakuna Jehova Diosman asuykunankupaqmi. Chaypaqqa ñuqanchikraqmi puntata allinta yachananchik. Chayta ruwaspaqa runamasinchikkunatam yachachisun Diosta kuyanankupaq. Señorninchik Jesucristopas ancha kuyakuywanmi taytanmanta qatiqninkunaman yachachirqa, chaymi qatiqninkunaqa Jehova Diosta anchata kuyarqaku (Juan 17:25, 26).

17. ¿Imakunataq yanapawasun allin iñiyniyuq kanapaq?

¹⁷ Jehova Diosta mañakuyninchikqa hinaspa paymanta yachayninchikqa yanapawasuntaqmi allin iñiyniyuq kanapaqpas. Mañakusqanchikta Jehova Dios uyariykuwaptinchikqa paypim astawan hapipakunchik, hinaspapas kallpanchasqam tarikunchik (1 Juan 5:15). Chaymantapas, allin iñiyniyuq kanapaqqa bibliata hinaspa qillqanchikkunatam estudiananchik. Chayta ruwaspaqa Diostam uyarichkanchik (Rom. 10:17). Chaynaqa, manam estudiayllachu-estudiananchik. Imatawanraq ruwanamantayá qatiqninpi yachaykusun.

18. ¿Imanasqataq yuyaymanayninchikqa ancha allin?

¹⁸ Yachasqanchikkunapim yuyaymanananchik. Piensarisun Salmos 77 capitulota qillqaqpi. Paymi ancha llakisqa tarikurqa Israel runakunata Jehova Dios qipancharusqanta piensaspan. Ancha llakisqa tarikusqanraykum puñuytapas mana atiqchu (versiculo 2-8). Chayna tarikuspanmi Diosta mañakuspan nirqa: ‘Qampa tukuy ruwasqaykimantam rimallasaq. Atiynikiwan ruwasqaykimantam yuyaymanasaq’, nispa (versiculo 12). Payqa yacharqam ñawpaq tiempopi serviqninkunapaq Jehova Dios tukuy ima ruwasqanta, chaywanpas kaynatam nirqa: ‘¿Diosqa qunqarunchu kuyapayakuyninta? ¿Piñakuspachu qunqarun llakipayakuyninta?’, nispa (versiculo 9). Paytaqa yanaparqa serviqninkunata Jehova Dios imayna yanapasqanpi yuyaymanaymi (versiculo 11). Chayna yuyaymanasqanraykum manaña iskayrayarqachu serviqninkunata Jehova Dios yanapananmantaqa (versiculo 15). Ñuqanchikpas Salmos qillqaq hinam allin iñiyniyuq kanapaqqa yuyaymanananchik serviqninkunata Jehova Dios imayna yanapasqanpi.

19. ¿Imapaqmi Jehova Diosta kuyayninchik yanapawasun?

¹⁹ Diosta mañakuspaqa hinaspa paymanta yachaspaqa Jehova Diostam astawan kuyasun. Payta kuyaymi yanapawasun hinalla kasukunapaq hinaspa ima sasachakuyña kaptinpas aguantanapaq (Mat. 22:37-39; 1 Cor. 13:4, 7; 1 Juan 5:3). Arí, Jehova  Dioswan kuyachikuymi imamantapas aswan allinqa (Sal. 63:1-8).

20. ¿Imakunatam qam ruwawaq Diosmanta astawan yachanaykipaq?

²⁰ Amayá qunqasunchu: Diosta mañakuspaqa, paymanta yachaspaqa hinaspa yachasqanchikkunapi yuyaymanaspaqa paytam yupaychachkanchik. Jesus hinayá mana bullapa kasqanpi Diosta mañakunanchikpaq hinaspa estudiananchikpaq kallpanchakusun. Kallpanchakusuntaq estudiaspanchik ama imakunapi piensanapaqpas. Chaypaqqa Jehova Diostam yanapaykuwananchikpaq mañakunanchik. Diosmanta yachanapaq tiempochakuspanchikqa hamuq tiempopim wiñaypaq kawsakusun (Mar. 4:24).