1, 2. (1) ¿Haykapitaq astawanraq yuyarinchik pi familianchikpas wañukuptin? (2) ¿Imatam Jesus kamachirqa huk tutallaña wañukunanpaq faltachkaptin?

 KUYASQA familianchik wañukuptinqa manam qunqanchikchu hayka wataña pasaptinpas. Astawanraqmi yuyarinchik wañukusqan punchaw sapa wata chayamuptinqa.

² Sapa watam millonnintin runakuna ancha kuyasqanchik Jesuspa wañukusqanta yuyarinapaq huñunakunchik (1 Ped. 1:8). Chay punchawmá yuyarinchik huchamantawan wañuymanta salvawananchikpaq wañukusqanta (Mat. 20:28). Jesusqa qatiqninkuna wañukusqanta yuyarinankutam munarqa. Chaymi wañukunanpaq huk tutallaña faltachkaptin qatiqninkunawan cenasqanpi kaynata kamachirqa: “Hinallayá kayta ruwaychik ñuqata yuyariwaspa”, nispa (Luc. 22:19).

3. ¿Imamantam kay yachachikuypi yachasun?

³ Jesuspa wañukusqanta yuyarinapaq huñunakuymanqa millonnintin runakunam rinku. Paykunamanta wakillanmi hanaq pachapi kawsakunankupaq akllasqa kanku. Yaqa llapallanchikñataqmi kay pachapi kawsakunapaq kanchik. Chaymi kay yachachikuypi yachasun hanaq pachapaq utaq kay pachapaq kaspanchikpas imakunarayku chay huñunakuyman risqanchikmanta. Yachasuntaqmi chaypi kayninchik imayna yanapawananchikmantapas. Puntatayá yachaykusun imakunarayku hanaq pachapaq kaqkuna chay huñunakuyman risqankumanta.

4. ¿Imanasqataq hanaq pachapaq kaqkuna tantata mikunku hinaspa vinota tomanku?

⁴ Hanaq pachapaq kaqkunaqa sapa watam Jesuspa wañukusqanta yuyarinapaq huñunakuyman rispanku vinota tomanku  hinaspa tantata mikunku. ¿Imanasqataq vinota tomanku hinaspa tantata mikunku? Chaymanta yachanapaqyá yuyariykusun wañukunanpaq huk tutallaña faltachkaptin Jesuspa ima ruwasqanta. Qatiqninkunawan pascua mikuyta mikuruptinkum Jesusqa wañukusqanta yuyarinankupaq huñunakuyta qallarichirqa. Jesusmi tantatawan vinota chunka hukniyuq apostolninkunaman qurqa mikunankupaq hinaspa tomanankupaq. Chaypim willarqa musuq acuerdomanta hinaspa hanaq pachamanta Jesuswan kuska kamachimunankupaq acuerdomanta (Luc. 22:19, 20, 28-30). * Chay iskay acuerdoraykum Jesuspa apostolninkunaqa chaynataq wakin akllasqakunaqa hanaq pachapi kamachiqkuna hinaspa sacerdotekuna kanqaku (Apoc. 5:10; 14:1). Chay iskay acuerdokunaqa hanaq pachapaq akllasqa wakin iñiqkunapaqwanmi, * chaymi paykunalla Jesuspa wañukusqanta yuyarinapaq huñunakuypiqa tantata mikunku hinaspa vinota tomanku.

5. ¿Imatam yachankuña hanaq pachapaq akllasqa kaqkunaqa?

⁵ ¿Imaraykuraqtaq hanaq pachapaq akllasqa kaqkunaqa Jesuspa wañukusqanta yuyarinapaq huñunakuyman rinku? Hanaq pachapi kawsakuyninku imayna kananpi yuyaymananankuraykum. Jehova Diosmi paykunataqa akllarun mana haykapipas wañunankupaq, Jesuswan hinaspa hanaq pachapaq wakin akllasqakunawan kuska kanankupaq chaynataq kikin Jehova Diospa qayllanpi kanankupaq (1 Cor. 15:51-53; 1 Juan 3:2). Chayna kawsakunankutaqa yachankum. Ichaqa wañukunankukamam Diosman sunqu kananku (2 Tim. 4:7, 8). Paykunaqa imayna kawsakunankupi yuyaymanaspankum ancha kusisqa tarikunku (Tito 2:13). ¿Imanasqataq ‘sapaq ovejakunaqa’ utaq kay pachapaq kaqkunaqa Jesuspa wañukusqanta yuyarinapaq huñunakuyman rinku? (Juan 10:16). Chaymantayá yachaykusun.

6. ¿Imanasqataq Jesuspa wañukusqanta yuyarinapaq huñunakuyman sapaq ovejakuna rinku?

⁶ Sapaq ovejakunaqa Jesuspa wañukusqanta yuyarinapaq huñunakuymanqa rinku manam tantata mikunankupaqchu nitaq vinota tomanankupaqchu, aswanqa qawanallankupaqmi. 1938 watapim kay pachapaq kaqkunataqa Jesuspa wañukusqanta yuyarinapaq huñunakuyman invitayta qallaykurqaku. 1938 watapi lluqsimuq La Torre del Vigía sutiyuq revistapim nirqa kay pachapaq kaqkuna chay huñunakuyman riyninku ancha allin kasqanta. Nirqataqmi chay huñunakuyqa sapaq ovejakunapaqpas ancha kusikunankupaq kasqanta. Imaynam casarakuyman invitawaptinchik rinchik noviokunata kusisqa qawanapaq, chaynam kay pachapaq kaqkunapas Jesuspa wañukusqanta yuyarinapaq huñunakuyman rinchik hanaq pachapaq kaqkunawan kusisqa chay huñunakuyta yuyarinapaq.

7. ¿Imanasqataq Jesuspa wañukusqanta yuyarinapaq huñunakuypi yachachikuyta uyariyta munanchik?

⁷ Sapaq ovejakunapas hamuq tiempopi kawsakuyninchikpim yuyaymananchik. Chayraykum Jesuspa wañukusqanta yuyarinapaq huñunakuypi yachachikuyta uyariyta munanchik. Chaypim uyarinchik Jesuswan 144.000 akllasqa kaqkuna kay allpa pachata waranqa wata kamachimuspanku imakuna  ruwanankumanta. Hanaq pachapaq akllasqakunaqa kamachiqninku Jesuspiwanmi kay allpa pachata huertayachinqaku. Manaña pantaq kanankupaqtaqmi runakunatapas yanapanqaku. Jesuspa wañukusqanta yuyarinapaq huñunakuyman riq millonnintin runakunapaqqa mayna kusikuypaqraq kanqa Isaias 35:5, 6; 65:21-23 hinaspa Apocalipsis 21:3, 4 nisqanpa cumplikusqanqa. Kay pachapaq kaqkunaqa hamuq tiempopi kawsakuyninchikpi yuyaymanaspam hinalla Jehova Diosta tukuy sunquwan servinchik (Mat. 24:13; Gal. 6:9).

8. ¿Imaraykuraqtaq sapaq ovejakunaqa Jesuspa wañukusqanta yuyarinapaq huñunakuyman rinchik?

⁸ Sapaq ovejakunaqa hanaq pachapaq akllasqakunata kuyasqanchikraykum hinaspa yanapayta munasqanchikraykum Jesuspa wañukusqanta yuyarinapaq huñunakuymanqa rinchik. Bibliaqa nirqañam hanaq pachapaq kaqkunawan kay pachapaq kaqkuna huk sunqulla kanankumanta. Yachaykusun chayna kananmanta bibliapa nisqankunata.

9. Zacarias 8:23 nisqanman hinaqa, ¿imaynam kay pachapaq kaqkuna kanku hanaq pachapaq akllasqakunawan?

⁹ (Leey Zacarias 8:23). Zacarias libropim willawanchik kay pachapi kawsakunankupaq suyaqkuna hanaq pachapaq akllasqakunamanta imayna tarikusqankuta. ‘Juda kasta runa’ hinaspa “qamkunawan” nisqanqa rimachkan hanaq pachapaq akllasqakuna kay pachapiraq kaqkunamantam (Rom. 2:28, 29). ‘Sapaq idiomakuna rimaq chunka runakunañataqmi’ kay pachapaq kaqkuna. Paykunaqa hanaq pachapaq kaqkunatam yanapanku pachankumanta hapipakuchkaq hina. Hinaspapas paykunawan kuskam huk sunqulla Diosta yupaychanku. Chayraykum Jesuspa wañukusqanta yuyarinapaq huñunakuyman rispankuqa hanaq pachapaq kaqkunawan huk sunqulla kasqankuta qawachinku.

10. ¿Imatam Jehova Dios ruwarqa Ezequiel 37:15-19, 24, 25 nisqan cumplikunanpaq?

¹⁰ (Leey Ezequiel 37:15-19, 24, 25). Bibliapa chayna willakusqanman hinam hanaq pachapaq kaqkunaqa kay pachapaq kaqkunawan huk sunqulla kachkanku. Bibliam willawanchik iskay kaspimanta. Hanaq pachapi kawsakunankupaq akllasqa kaqkunam ‘Juda kastapaq’ kaspiwan tupan. Ñawpaq tiempopiqa Juda llaqtamantam Israel nacionta kamachinanpaq akllaqku. Kay pachapaq kawsakuqkunañataqmi tupan ‘Efrain kastapaq’ kaspiwan. * Jehova Diosmi nirqaña hanaq pachapaq kaqkunatawan kay pachapaq kaqkunata hukllawananmanta, chaynapi huk kaspi hinallaña kanankupaq. Chaywanqa nichkarqa reyninku Jesuspa kamachisqan huk sunqulla Diosta yupaychanankumantam. Sapa watam hanaq pachapaq kaqkunaqa kay pachapaq kaqkunapiwan Jesuspa wañukusqanta yuyarinapaq huñunakuyman rinku ‘huk kanchalla chaynataq huk michiqniyuqlla’ hina (Juan 10:16).

11. Mateo 25:31-36, 40 nisqanpi ovejakunaqa, ¿imapim Jesuspa wawqinkunata astawanraq yanapachkanku?

¹¹ (Leey Mateo 25:31-36, 40). Rikchanachisqanpi Jesuspa rimasqan ‘ovejakunaqa’ tupan kay pachapi wiñaypaq kawsakunankupaq Diosman sunqu kaqkunawanmi. Paykunam Jesuspa wawqinkunata kunan tiempopi astawanraq yanapachkanku enteron allpa pachapi Diosmanta willakuypi hinaspa yachachiypi (Mat. 24:14; 28:19, 20).

12, 13. ¿Imakunata ruwaspankuraqmi sapaq ovejakunaqa Jesuspa wawqinkunata yanapanku?

¹² Sapa watam Jesuspa wañukusqanta yuyarinapaq huñunakuy hichpaykamuchkaptin Jesuspa wawqinkunata yanapanchik chay huñunakuyman rinankupaq runamasinchikkunata  invitaypi. (Qaway “ ¿Imakunatam ruwawaq Jesuspa wañukusqanta yuyarinapaq killapi?” niqta). Enteron allpa pachapim sapaq ovejakunaqa Jesuspa wañukusqanta yuyarinapaq huñunakuyta ruwanankupaq tantianku hanaq pachapaq kaqkuna huñunakusqankupi mana kaptinpas. Chaynata ruwaspanku Jesuspa wawqinkunata yanapasqankuwanmi sapaq ovejakunaqa anchata kusikunku. Yachankutaqmi Jesuspa wawqinkunata yanapasqankuqa kikin Jesusta yanapachkanmankupas hina kasqanta (Mat. 25:37-40).

¹³ Chaynaqa, ¿imakunaraykutaq Jesuspa wañukusqanta yuyarinapaq huñunakuyman rinchik hanaq pachapaq utaq kay pachapaq kaspapas?

14. ¿Imatam Jehova Dioswan Jesus ruwarqaku anchata kuyawasqanchikrayku?

¹⁴ Jehova Diospa hinaspa Jesuspa kuyawasqanchikmanta agradecekusqanchikraykum. Tukuy imawanmi Jehova Diosqa kuyawasqanchikta qawachiwanchik. Astawan kuyawasqanchiktaqa qawachiwarqanchik churin Jesusta ñuqanchikrayku wañunanpaq kachamusqanwanmi (Juan 3:16). Jesuspas anchata kuyawasqanchikraykum huchanchikmanta wañupuwarqanchik (Juan 15:13). Tukuy ima ruwasqankumantaqa manamá imawanpas pagayta atichwanchu. Chaywanpas, imayna kawsakusqanchikwanmi agradecekusqanchikta qawachichwan (Col 3:15). Jesuspa wañukusqanta yuyarinapaq huñunakuyman rispapas paykunata ancha kuyasqanchiktam qawachinchik.

15. ¿Imanasqataq hanaq pachapaq kaqkunapas chaynataq kay pachapaq kaqkunapas Jesuspa wañukusqanmanta anchata agradecekunchik?

¹⁵ Jesuspa wañukusqanmanta anchata agradecekusqanchikraykum (Mat. 20:28). Hanaq pachapaq akllasqa kaqkunaqa Jesuspa wañukusqanpi iñisqankuraykum Jehova Diospaqqa mana huchayuqña hinaspa churinkunaña kanku. Chayraykum paykunaqa Jesuspa wañukusqanta anchata valoranku (Rom. 5:1; 8:15-17, 23). Sapaq ovejakunapas utaq kay pachapaq kaqkunapas Jesuspa wañukusqanpi iñisqanchikraykum Diospa chaskisqan kanchik, hinaspapas llumpa-llumpay ñakariy punchawpim mana wañusunchu. Chayraykum Jesuspa wañukusqantaqa anchata valoranchik (Apoc. 7:13-15). Hanaq pachapaq kaqkunapas chaynataq kay pachapaq kaqkunapas Jesuspa wañukusqanta yuyarinapaq huñunakuyman sapa wata rispam qawachinchik wañukusqanmanta agradecekusqanchikta.

16. ¿Imanasqaraqtaq Jesuspa wañukusqanta yuyarinapaq huñunakuyman rinchik?

¹⁶ Jesusta kasukuyta munasqanchikraykum. Hanaq pachapaq utaq kay pachapaq kaspanchikpas llapallanchikmi wañukusqanta yuyarinapaq Jesuspa kamachisqanta kasukuytaqa munanchik, paymi nirqa: “Hinallayá kayta ruwaychik ñuqata yuyariwaspa”, nispa (1 Cor. 11:23, 24).

17. ¿Imanasqam Jesuspa wañukusqanta yuyarinapaq huñunakuyman riyqa Diosman astawan asuykachiwanchik?

¹⁷ Jehova Diosmanmi astawan asuykachiwanchik (Sant. 4:8). Yachamusqanchikman hinam Jesuspa wañukusqanta yuyarinapaq huñunakuyman riyqa yanapawanchik hamuq tiempopi kawsakuyninchikpi yuyaymananapaq hinaspa kuyawasqanchikmanta Jehova Diosta anchata agradecekunapaq (Jer. 29:11; 1 Juan 4:8-10). Manapunim iskayrayanchikchu prometewasqanchikkunata cumplinanmantaqa hinaspa hinalla kuyawananchikmantaqa. Tukuy  chaykunapi yuyaymanaspam Jehova Diostaqa astawanraq kuyanchik, hinaspapas manam paymantaqa haykapipas karunchakusunchu (Rom. 8:38, 39).

18. ¿Imapaqmi kallpanchawanchik Jesuspa tukuy ima ruwasqanpi yuyaymanay?

¹⁸ Jesusta qatipakunapaqmi kallpanchawanchik (1 Ped. 2:21). Jesuspa wañukusqanta yuyarinapaq huñunakuy manaraq chayamuchkaptinmi bibliapi leenchik wañukunan semana Jesuspa ima ruwasqanmanta, wañukusqanmanta hinaspa kawsarimusqanmanta. Huñunakuypi yachachikuyñataqmi yuyarichiwanchik Jesuspa ancha kuyawasqanchikta (Efes. 5:2; 1 Juan 3:16). Ñuqanchikrayku Jesuspa tukuy ima ruwasqanmanta leeymi hinaspa paypi yuyaymanaymi yanapawanchik Jesuspa ‘kawsasqanman hina tukuy tiempo kawsakunapaq’ (1 Juan 2:6).

19. ¿Imatam ruwananchik hinalla Diospa kuyasqan kanapaq?

¹⁹ Hinalla Diospa kuyasqan kanapaqmi kallpanchawanchik (Jud. 20, 21). Chaypaqqa tukuypim kasukunanchik, sutintam hatunchananchik hinaspapas sunquntam kusichinanchik (Prov. 27:11; Mat. 6:9; 1 Juan 5:3). Chaynaqa, Jesuspa wañukusqanta yuyarinapaq huñunakuyman rispanchikmi Jehova Diosta nichkanchik: “¡Wiñaypaqmi qampa kuyasqayki kayta munani!”, nispa.

20. ¿Imakunaraykum Jesuspa wañukusqanta yuyarinapaq huñunakuypi kayta munanchik?

²⁰ Hanaq pachapi utaq kay pachapi kawsakunanchik kaptinpas achka razonmi kan Jesuspa wañukusqanta yuyarinapaq huñunakuyman sapa wata rinapaqqa. Chay huñunakuyman rispanchikmi ancha kuyasqanchik Jesuspa wañukusqanta yuyarinchik. Chaywanpas astawanqa yuyarinchik Jehova Dios anchata kuyawaspanchik churin Jesusta ñuqanchikrayku wañunanpaq kachamusqantam. Chay huñunakuymi apakunqa kay 2022 watapiqa abril killapi 15 viernes tardeta. Jehova Diostawan churin Jesusta anchata kuyasqanchikraykum chay huñunakuypi kayta munanchik.