1, 2. (1) ¿Imaynam tarikunchik Jesuspa vidanpi hinaspa willakusqanpi yuyaymanaspaqa? (2) ¿Imamantam kay yachachikuypi yachasun?

 PIYNINCHIKPAS wañukuptinqa ancha-anchatam llakikunchik, aswanraqmi llakikunchik manaraq wañukuchkaspan tukuy ima pasasqanta yuyarispaqa utaq ñakarisqanta yuyarispaqa. Wakinpim ichaqa kusisqa tarikunchik imapas yachachiwasqanchikta utaq imapas ruwasqanta yuyarispanchik utaq kallpanchawananchikpaq imapas niwasqanchikta yuyarispanchik utaq asichiwasqanchikta yuyarispanchik.

² Jesuspa wañukusqanpi yuyaymanaspapas llakisqam tarikunchik anchata ñakarispa wañukusqanrayku. Anchatamá llakikunchik Jesuspa wañukusqanta yuyarisqanchik killapi Jesuspa vidanmanta textokunata leespaqa (1 Cor. 11:24, 25). Chayna llakisqa kaspapas Jesuspa ruwasqankunapi hinaspa imapas nisqankunapi yuyaymanaspaqa kusisqam tarikunchik. Kunan ruwasqankunapi chaynataq hamuq tiempopi ruwanankunapi yuyaymanaspañataqmi kallpanchasqa tarikunchik. Chaymi kay yachachikuypi yachasunchik tukuy chaykunapi yuyaymanayqa chaynataq Jesuspa kuyawasqanchikpi yuyaymanayqa tukuy imata ruwaspa agradecekunapaq yanapawasqanchikmanta.

3. ¿Imakunaraykutaq agradecekunanchik Jesuspa wañukusqanmanta?

³ Agradecekuq kananchikpaqmi yanapawanchik Jesuspa vidanpi yuyaymanayqa chaynataq wañukusqanpi yuyaymanayqa. Jesusqa kay allpa pachapi kachkaspanmi runakunata yachachirqa Diospa gobiernon imakunata ruwananmanta. Ñuqanchikqariki anchatam kusikunchik tukuy imata ruwananmanta Diospa niwasqanchikwanqa.  Anchatam agradecekunchik Jesuspa wañukusqanmanta, chayraykumriki atinchik Jehova Dioswanpas chaynataq Jesuswanpas kuyachikuytaqa. Jesuspa wañukusqanpi hapipakuspaqa wiñay kawsaytam chaskisun, hinaspapas wañukuq ayllunchikkunawanmi kaqmanta tupasunchik (Juan 5:28, 29; Rom. 6:23). Ñuqanchikqa manam tukuy chaykunataqa chaskinapaq hinachu kanchik, manataqmi pagapuytaqa atichwanchu Diosninchikmanpas nitaq Jesusmanpas ñuqanchikrayku tukuy ima ruwasqankumantaqa (Rom. 5:8, 20, 21). Chaywanpas atichwanmi paykunata agradecekuytaqa, ¿imaynata? Chaymantayá yachaykusun.

4. ¿Imatam Maria Magdalenaqa ruwarqa payrayku Jesuspa tukuy ima ruwasqanmanta agradecekusqanrayku? (Qaway dibujota).

⁴ Rimarisun Maria Magdalena judia warmimanta. Payqa llumpaytam ñakarillarqa qanchis demoniokuna ukunman yaykuruspan tukuyta ruwaptin. Ichapas payqa piensarqa mana pipas yanapayta atisqanta. Ichaqa, ¿imaynaya tarikullarqa paymanta qanchis demoniokunata Jesus qarquruptinqa? Anchatachá agradecekurqa. Agradecekusqanrayku Jesusta qatikurqa, hinaspam tiempota hurquspan tukuy imata ruwaspa chaynataq tukuy ima kapuqninwan Jesusta yanaparqa (Luc. 8:1-3). Mariaqa payrayku Jesus ruwasqanmantaqa anchatachá agradecekurqa, ichaqa manapaschá yacharqachu tukuyta ruwanantaqa. Jesusqariki vidantam qurqa “haykam paypi iñiqqa” wiñay kawsayta chaskinanpaq (Juan 3:16). Chaymi Mariaqa agradecekusqanrayku Jesusta tukuy sunqunmanta qatikurqa, chaymi Jesus qirupiña warkurayaptinpas Mariaqa chaypi karqa Jesustawan chaypi kaqkunata compañaspan (Juan 19:25). Jesus pampasqaña kachkaptinpas Mariaqa iskay warmikunawan kuskam miski asnaq qurakunata rantirqaku Jesuspa cuerponman hinanankupaq (Mar. 16:1, 2). Jehova Diosqa Maria tukuy imapi yanapasqanraykum saqirqa Jesus kawsariramuptin tupaykunanta chaynataq paywan parlaykunanta. Manam lliw qatiqninkunachuriki kawsariramusqan qipamanqa  Jesuswanqa tuparqaku nitaq parlarqaku (Juan 20:11-18).

5. ¿Imatam ruwachwan ñuqanchikrayku Diospawan Jesuspa tukuy ima ruwasqankumanta agradecekunapaq?

⁵ Ñuqanchikpas Jehova Diospawan Jesuspa tukuy ima ruwasqankumanta agradecekuytaqa atichwanmi. ¿Imaynata? Diospa gobiernonmanta willakunapaq tiempota hurquspam, imapipas yanapakuspam chaynataq qullqinchikta quspam. Yanapakuchwanmi Diosta yupaychanapaq wasikunata ruwaypi chaynataq allichaypi.

6. ¿Imaynanpitaq nichwan sapakamapa huchanchikrayku Jesus wañusqanta?

⁶ Jehova Diospawan Jesuspa kuyawasqanchikpi yuyaymanayqa yanapawanchikmi paykunata kuyanapaq (1 Juan 4:10, 19). Sapakamapa huchanchikmanta Jesus wañukusqanta yacharuspaqa astawanraqmi paykunataqa kuyanchik. Apostol Pablopas anchatam chaymantaqa agradecekurqa, chaymi Galacia llaqtayuqkunaman qillqaspan nirqa: “Kunan kawsaspayqa Diospa churinpi iñisqayraykum kawsachkani, paymi kuyawaspan ñuqarayku wañurqa”, nispa (Gal. 2:20). Jesus wañukusqanraykum qamtapas Diosqa serviqnin kanaykipaq pusamusurqanki (Juan 6:44). ¿Manachu kusikunki sunquykita qawasqanrayku kayman pusamususqaykimanta chaynataq kuyasusqaykirayku churinpa vidanta qusqanmanta? ¿Manachu chaykunarayku Jehova Diostawan Jesusta kuyawaq? Chaynaqa llapallanchikyá nikusun: “Jehova Diostawan Jesusta kuyasqayrayku, ¿imakunatataq ruwayman?”, nispa.

7. Fotopi qawasqanchikman hinaqa, ¿imata ruwaspam Diostawan Jesusta kuyanchik? (Rimarimuytaq 2 Corintios 5:14, 15; 6:1, 2 nisqanmantapas).

⁷ Jehova Diostawan Jesusta kuyasqanchikraykum hukkunatapas kuyanchik (leey 2 Corintios 5:14, 15; 6:1, 2). Chaymi llapallan runakunaman Diosmanta willanchik. Willanchikmi  imaymana kasta runakunaman, imaymana costumbreyuq runakunaman, qullqiyuq utaq mana qullqiyuq runakunaman. Chaynatam Diosninchikta yanapanchik. Awriki, “Diosninchikqa munachkan tukuy rikchaq runakuna salvakunankutam hinaspa chiqap kaq yachachikuyta imam kaqta yachanankutam” (1 Tim. 2:4).

8. ¿Imakunata ruwaspataq iñiqmasinchikkunata kuyanchik?

⁸ Jehova Diostawan Jesustaqa kuyanchiktaqmi iñiqmasinchikkunata kuyaspa (1 Juan 4:21). Ñuqanchikqariki iñiqmasinchikkuna sapakama allinlla kanankutam munanchik, imapas sasachakuypi kaptinkuñataqmi yanapaykunchik. Ayllunku wañukuptinñataqmi sunqunkuta tiyaykachinchik, unquptinkuñataqmi watukuykunchik. Llakipa intusqan kaptinkuñataqmi atisqanchikta ruwanchik kallpanchaykunapaq (2 Cor. 1:3-7; 1 Tes. 5:11, 14). Bibliapim nin: “Allin ruwaq runapa tukuy sunquwan Diosta mañakusqanqa anchatam pitapas yanapan”, nispa. Chayraykum ñuqanchikqa iñiqmasinchikkunapaq mañakunchik (Sant. 5:16).

9. ¿Imaynatawantaq iñiqmasinchikkunata kuyanchik?

⁹ Iñiqmasinchikkunataqa kuyanchiktaqmi paykunawan allinlla kanapaq kallpanchakuspa. Chaypaqqa Jehova Dios hinam pampachaykunanchik. Huchanchikkunarayku churin Jesus wañunanta Diosninchik saqichkaptinqa, ¿manachu ñuqanchikpas imapas ruwawasqanchikmanta iñiqmasinchikkunata chaylla pampachaykuchwan? Ñuqanchikqa manam munanchikchu Jesuspa willakusqanpi mana allin sirviente hina kaytaqa. Chay sirvientetam patronninqa llakipayarispan nirqa achka qullqi debesqantaqa manaña pagananpaq. Paymi ichaqa aslla debekuqnin sirvientemasintaqa mana llakipayarispan carcelman hinarachirqa (Mat. 18:23-35). Chaynaqa, qampas mayqin iñiqmasinchikwanpas piñanakuruspaqa, ¿manachu kallpanchakuwaq Jesuspa wañukusqanta yuyarinapaq huñunakuyman manaraq richkaspa chay iñiqmasinchikwan pampachanakunaykipaq? (Mat. 5:23, 24). Chay iñiqmasinchikwan pampachanakuspaykiqa Jehova Diostawan Jesustam kuyachkanki.

10, 11. ¿Imata ruwaspankutaq punta apaqkunaqa Diostawan Jesusta kuyanku? (Rimarimuytaq 1 Pedro 5:1, 2 nisqanmantapas).

¹⁰ Punta apaqkunaqa Jehova Diostawan Jesustam kuyanku Jesuspa ovejankunata allinta michispanku (leey 1 Pedro 5:1, 2). Jesusqa kawsarimusqanmanta qipamanmi apostol Pedrota nirqa: “Juanpa churin Simon, ¿kuyawankichu?”, nispa. Pedroqa Jesusta kimsa kutikama negarusqanraykuchá payta kuyasqan sutilla kananpaq tukuy imata ruwayta munarqa. Chaymi payqa “arí” nirqa. Chaynata niptinmi Jesus nirqa: “Ovejachaykunatayá michiy”, nispa (Juan 21:15-17). Chaymanta qipamanqa Pedroqa Jesuspa ovejankunatam kuyakuywan michirqa, chaytaqa ruwarqa Jesusta kuyasqanraykum.

¹¹ ¿Imaynatataq punta apaqkunaqa kasukunku Pedroman Jesuspa nisqanta Jesuspa wañukusqanta yuyarinapaq killapi? Iñiqkunata yanapaspankum chaynataq chiriyasqakunata yanapanankupaq kallpanchakuspankum. Chayta ruwaspankuqa Jehova Diostawan Jesustam kuyachkanku (Ezeq. 34:11, 12). Pedroman Jesuspa nisqantaqa kasukunkutaqmi bibliamanta yachaqkunawan chaynataq huñunakuyman chayllaraq hamuqkunawan parlarispanku. Paykunataqa iñiqmasinkuta hinañam qawanku hinaspapas kusisqa kanankutam munanku.

12. ¿Imaynanpitaq Jesuspa nisqanqa yanapawanchik mana manchakuq kanapaq? (Rimarimuytaq Juan 16:32, 33 nisqanmantapas).

¹² Wañukunanpaq huk tutallaña kachkaptinmi qatiqninkunata Jesus nirqa: “Kay pachapiqa  ñakarinkichikmi. Ichaqa, ¡kallpanchakuychikyá! Kay pachapi mana allinkunataqa venceruniñam”, nispa (leey Juan 16:32, 33). ¿Imataq Jesusta yanaparqa runakuna chiqniptinpas mana manchakuq kananpaq chaynataq wañukunankama Diosman sunqu kananpaq? Jehova Diospi hapipakusqanmi. Chayna sasachakuykunapi qatiqninkuna tarikunankuta yachasqanraykum Jesusqa Diosta mañakurqa qatiqninkunata waqaychaykunanpaq (Juan 17:11). Jehova Diosqa aswan atiyniyuqmi chiqniwaqninchikkunamantaqa, chaymi mana manchakunanchikchu (1 Juan 4:4). Payqa tukuy imatam qawamuchkan. Manamá iskayrayanchikchu Jehova Diospi hapipakuptinchikqa mana manchakuq kanapaq pay yanapawananchikmantaqa.

13. ¿Imatataq Arimatea llaqtayuq Joseyqa ruwarqa mana manchakuq kasqanrayku?

¹³ Rimarisun Arimatea llaqtayuq Joseymanta. Payqa judio runakuna ukupim ancha riqsisqa karqa. Chaymantapas judiokunapa cortenpi autoridadmi karqa. Ichaqa “judiokunata manchakusqanraykum mana piwanpas riqsichikurqachu Jesuspa qatiqnin kasqantaqa” (Juan 19:38). Jesuspa willakusqanmanta yachayta munaspanpas Jesuspi iñikusqanmantaqa manam pimanpas willakurqachu, ichapas chaytaqa ruwarqa runakuna manaña respetanankuta piensasqanrayku. Ichaqa Jesuspa wañukusqanmanta qipamanqa payqa valorchakuspanmi yaykurqa Pilatopa kasqanman Jesuspa cuerponta mañaq (Mar. 15:42, 43). Chaywanmi runakuna yacharqaku Jesuspa qatiqnin kasqanta.

14. ¿Imatataq ruwananchik runakunata manchakuspaqa?

¹⁴ Qampas Arimatea llaqtayuq Josey hinachu ninki: “¿Imataraq ninqaku?”, nispa. ¿Pinqakunkichu escuelaykipi utaq llamkaynikipi Jehova Diospa testigon hina riqsichikuyta? ¿Manchakusqaykiraykuchu Diosmanta manaraq willakunki utaq bautizakunki? Amayá hukkunata manchakusqaykiraykuqa Jehova Diosta serviytaqa saqiruychu, aswanqa Diostayá mañakuy mana manchakuspa munayninta ruwanaykipaq. Mañakusqaykiman hina yanapasuptikiqa mana manchakuqmi kanki (Is. 41:10, 13).

15. ¿Imatataq Jesuspa qatiqninkunaqa ruwarqaku kawsarirusqanta yacharuspanku kusisqa kasqankurayku? (Rimarimuytaq Lucas 24:52, 53 nisqanmantapas).

¹⁵ Jesus wañukuptinqa qatiqninkunaqa llumpay llakisqam karqaku. Paykunapaqqa ancha kuyasqanku runam wañukullarqa, chaymi llaki uyantin karqaku (Luc. 24:17-21). Ichaqa Jesusqa kawsariruspanmi paykunaman rikuriykurqa, hinaspanmi nirqa bibliapi willakuykunaqa  paypi cumplikusqanta. Chaymantapas Diosmanta hinalla willakunankupaqmi nirqa (Luc. 24:26, 27, 45-48). 40 punchaw pasayta hanaq pachaman Jesus kutikuptinqa qatiqninkunaqa manañam llakisqañachu karqaku, aswanqa ancha kusisqañam. Kusikurqakuqa Jesusqa kaqmanta kawsasqanta yachasqankuraykum chaynataq Diosmanta willakuptinku yanapasqanmanta yachasqankuraykum. Chay kusikuymi paykunataqa yanaparqa Jehova Diosta hatunchanankupaq (leey Lucas 24:52, 53; Hech. 5:42).

16. ¿Imaynatam Jesuspa qatiqninkunata qatipakuchwan?

¹⁶ ¿Imaynatataq qatipakuchwan Jesuspa qatiqninkunata? Kusikuywan Jehova Diosta sapa punchaw servispam. Manam Jesuspa wañukusqanta yuyarinapaq killallapichu kusisqaqa servinanchik. Chaypaqqa Diospa munaynintam puntata ruwananchik. Chayta ruwanankupaqmi wakinkuqa chawpi punchawkamalla utaq wakin punchawkunalla llamkanku, chaynapi Diosmanta astawan willakunankupaq, huñunakuykunapi kanankupaq hinaspa sapa semana ayllunkuwan Diosta yupaychanankupaq. Tukuy imayuq kayta hukkuna allinpaq hapiptinkupas wakinkuqa tukuy chaykunata saqispam astawan yanapakunku utaq mana testigokunapa kasqanpi astawan Diosmanta willakunku. Jehova Diostaqa imaña kaptinpas mana hukmanyaspam servinanchik. Chayta ruwaspa munayninta imamantapas puntata ruwaptinchikqa paymi bendeciwasun (Prov. 10:22; Mat. 6:32, 33).

17. ¿Imatam ruwananchik Jesuspa wañukusqanta yuyarinanchik killapi? (Qaway fotota).

¹⁷ Anchatamá munachkanchik 4 punchaw abril killapi Jesuspa wañukusqanta yuyariytaqa. Ichaqa manam chay punchawtaraqchu suyananchik Jesuspa vidanpi, wañukusqanpi chaynataq paypawan Diospa kuyawasqanchikpi yuyaymananapaqqa, aswanqa chay punchaw manaraq chayamuchkaptinyá chaytaqa ruwasunchik. Tiempochakuchwanmi Musuq allpa pachapi kawsaqkunapaq bibliapi B12 yachachikuypi “Jesus wañukunanpaq semanallaña faltasqan” niqmanta astawan yachanapaq. Maskachwantaqmi agradecekuq, kuyakuq, mana manchakuq chaynataq kusikuq kanapaq yanapawaqninchik textokunatapas, hinaspapas yuyaymanachwanmi imaynata agradecekuq kanapaq. Wañukusqanta yuyarinapaq tukuyta ruwaptinchikqa Jesusqa anchatam kusikunqa (Apoc. 2:19).