1, 2. ¿Imanasqataq Jesuspa wañukusqanta yuyarinchik?

 YAQA 2.000 wata ñawpaqtaraqmi Jesusqa ñuqanchikrayku wañukurqa, chayraykum wiña-wiñaypaq kawsakuyta atisun. Jesusmi manaraq wañukuchkaspan apostolninkunawan santa cenata ruwarqa, chaypim servichikurqa tantatawan vinota. Hinaspam paykunata kamachirqa wañukusqan punchawta hinalla yuyarinankupaq, chaynapi Jesuspa kuyasqanta mana qunqanankupaq (1 Cor. 11:23-26).

² Jehova Diosta serviqkunaqa Jesuspa chay kamachisqantam kasukunchik anchata kuyasqanchikrayku (Juan 14:15). Sapa watam ñuqanchikrayku Jesuspa wañukusqanmanta agradecekuspanchik tukuy imata ruwanchik. Chaymi chay killaqa ñuqanchikrayku Jesuspa wañukusqanmanta mañakunchik hinaspa yuyaymananchik. Chaymantapas astawanmi tiempochakunchik Diosmanta willakunapaq, chaynapi Jesuspa wañukusqanta yuyarinapaq huñunakuyman achka runakunata invitanapaq. Imaña-haykaña kaptinpas chay huñunakuypi kaytam munanchik.

3. ¿Imakunamantam kay yachachikuypi yachasunchik?

³ Jehova Diosta serviqkunaqa llapallanchikmi kallpanchakunchik imaña kaptinpas Jesuspa wañukusqanta yuyarinanchikpaq. Chaymi kay yachachikuypi yachachkasunchik Jesuspa kamachiwasqanchikman hina wañukusqanta yuyarinamanta, Jesuspa wañukusqanta yuyarisqanchik huñunakuyman hamunankupaq runamasinchikkunata invitanamanta hinaspa sasachakuypi tarikuspapas Jesuspa wañukusqanta yuyarinamanta.

4. (1) ¿Imakunamantam yachanchik Jesuspa wañukusqanta yuyarisqanchik huñunakuypi? (Rimarimuytaq Lucas 22:19, 20 nisqanmantapas). (2) ¿Imanasqataq chaykunamanta yachayqa ancha allin?

⁴ Sapa watam Jesuspa wañukusqanta yuyarinapaq huñunakuyman rispaqa uyarinchik chay punchawpaq akllasqa yachachikuyta. Chaypim yachanchik Jesuspa wañukusqan imanasqa ñuqanchikpaq  ancha allin kasqanmanta, chaynataq imaynata chullalla runapa wañukusqan llapallan runakunata huchamanta librasqanmanta. Yuyarichiwanchiktaqmi pikunalla tantata mikusqankumanta chaynataq vinota tomasqankumantapas. Chaymantapas yachanchikmi tantawan vino imawan tupasqanmanta (leey Lucas 22:19, 20). Chay huñunakuypim yachachiwanchik kay allpa pachapi wiña-wiñaypaq kawsakuyta suyaqkuna tukuy imata chaskinankumanta (Is. 35:5, 6; 65:17, 21-23). Tukuy chaykunamanta yachayqa ancha allinmi. Ichaqa millonnintin runakunam mana allintachu entiendenku imanasqa Jesuspa wañukusqanmantaqa, chaymi chay punchawtaqa mana kaqpaqta hina hapinku. Chaymantapas Jesuspa wañukusqantaqa manam paypa kamachisqanman hinachu yuyarinku. ¿Imanasqa?

5. Apostolkunapa wañukusqanku qipamanqa, ¿imaynatañam Jesuspa wañukusqanta yuyariyta qallaykurqaku?

⁵ Apostolkunapa wañukusqan qipallatam pantay yachachikuykunata rikurirachirqaku Jesuspi iñiqtukuq runakuna (Mat. 13:24-27, 37-39). Paykunaqa ‘llullakunatam yachachiyta qallaykurqaku, chaynapi iñiqkuna paykunata qatinankupaq’ (Hech. 20:29, 30). Chayraykum tiempopa risqanman hina nirqaku Jesusqa huk kutillata wañukusqanwanqa runakunapa huchanta mana apasqanmanta. Bibliapi mana kaqkunata rimaspankum nirqaku: “Jesusqa sapa kutim wañunan llapallan runakunapa huchan pampachasqa kananpaqqa”, nispa (Heb. 9:27, 28). Kunanpas allin sunquyuq runakunam chayna llulla yachachikuykunata creenku. Hinaspankum iglesiaman sapa semana utaq sapa punchaw rinku. Chaypim tantata mikunku hinaspa vinota tomanku Jesuspa cuerponwan yawarnin kasqanta piensaspanku, chayta ruwaspankum paykunaqa piensanku Jesus paykunarayku sapa kuti wañusqanta. Wakin religionkunapiñataqmi munaspallanku Jesuspa wañukusqanta yuyarinku. Chaywanpas chay religionpi kaq runakunaqa manam imam kaqtachu yachanku imanasqa Jesuspa wañukusqanmantaqa. Wakin runakunañataqmi ninku: “¿Yaqachu Jesuspa wañukusqallanwan huchaymanta pampachasqa kayman?”, nispa. Chaynataqa ninku “Jesuspa wañukusqanwanqa manam huchamantaqa pampachasqachu kanchik” nispa runakuna nisqankuraykum. ¿Ichaqa chaynatachu ruwarqaku Diospa serviqninkunaqa? Chaymantayá qatiqninpi yachaykusun.

6. ¿Imamantam allinta entienderurqaku 1872 watapi?

⁶ 1870 watapim iñiqmasinchik Charles Russellwan yanapaqninkuna bibliata allinta estudiayta qallaykurqaku. Paykunaqa yachaytam munarqaku Jesuspa wañukusqan ñuqanchikpaq imanasqa ancha allin kasqanmanta. 1872 watapiñataqmi bibliata allinta estudiasqankurayku entienderurqaku Jesusqa llapallan runakunapa huchanrayku wañukusqanmanta. Chay entienderusqankutam librokunapi, periodicokunapi hinaspa hukkunapipas qillqachirqaku. Chaymanta qipallatam apostolkunapa tiemponpi hina, watapi huk kutita Jesuspa wañukusqanta yuyariyta qallaykurqaku.

7. ¿Imaynatataq kunan tiempopipas yanapawanchik iñiqmasinchikkunapa bibliamanta allinta entiendenankupaq kallpanchakusqankuqa?

⁷ ¿Imaynatataq kunan tiempopipas yanapawanchik chay iñiqmasinchikkunapa bibliamanta allinta entiendenankupaq kallpanchakusqankuqa? Jehova Diosninchik paykunata yanapasqanraykum sumaqta yachanchik Jesus imarayku wañukusqanmanta hinaspa wañukusqanrayku imakuna haypanamanta (1 Juan 2:1, 2). Chaymantapas bibliapim yacharunchik Diosta kasukuqkunamanta wakinku hanaq pachapi wiña-wiñaypaq kawsakunankupaq akllasqa kasqankumanta, millonnintin runakunañataq kay allpa pachapi wiña-wiñaypaq kawsakunankumanta. Kusikunchikmi Jehova Diosninchik ancha-anchata kuyawasqanchikmanta yuyaymanaspanchik hinaspa Jesuspa wañukusqan sapakamata imayna yanapawasqanchikmanta (1 Ped. 3:18; 1 Juan 4:9). Chaymi ñawpaq tiempopi iñiqmasinchikkuna hina kunan tiempopas Jesus  kamachiwasqanchikrayku paypa wañukusqanta yuyarinapaq huñunakunchik, chaymanmi runamasinchikkunatapas invitanchik.

8. ¿Imakunatam Diosta serviqkunaqa ruwarqaku Jesuspa wañukusqanta yuyarinapaq huñunakuyman invitanankupaq? (Qaway fotokunata).

⁸ Diosta serviqkunaqa achka watakunañam runamasinchikkunata invitanchik Jesuspa wañukusqanta yuyarinapaq huñunakuyman hamunankupaq. 1881 watapim Willakuq qillqanchik nirqa Estados Unidos nacionpi iñiqmasinchikkunata Pensilvania lawpi huñunakuspa wañukusqanta yuyarinankupaq. Chaymanta qipamanqa maymi huñunakusqankupiñam iñiqmasinchikkunaqa Jesuspa wañukusqanta yuyarirqaku. 1940 watapa marzo killanpiñataqmi punta apaqkuna iñiqmasinchikkunata nirqaku Diosmanta yachay munaq runakunata Jesuspa wañukusqanta yuyarinapaq huñunakuyman invitanankupaq. Chaymantapas 1960 watapim betel wasimanta apachirqaku sapa congregacionkunaman invitacionkunataqa papelchapiña. Chaymantapacham Jehova Diospa testigonkunaqa achkallay-achka invitacionkunata aypurqanchik. ¿Imanasqataq chayta ruwanapaq tiempochakunchik hinaspa kallpanchakunchik?

9, 10. ¿Pikunatataq invitanchik Jesuspa wañukusqanta yuyarinapaq huñunakuypaq? (Rimarimuytaq Juan 3:16 nisqanmantapas).

⁹ Runamasinchikkunataqa Jesuspa wañukusqanta yuyarinapaqqa invitanchik Dioswan Jesus ñuqanchikrayku tukuy ima ruwasqankumanta imam kaqta yachanankupaqmi (leey Juan 3:16). Munanchikmi chay tuta chayllaraq qawasqanku hinaspa uyarisqanku Diosta riqsinankupaq chaynataq payta servinankupaq yanapananta. Ichaqa manam paykunallatachu invitasqanchikqa yanapan.

 ¹⁰ Jesuspa wañukusqanta yuyarinapaqqa invitanchiktaqmi Diosmanta karunchakuruq iñiqmasinchikkunatapas, chaynapi paykunatapas Diosninchik hinalla kuyasqanta yachanankupaq. Anchatam kusikunchik paykunapas ñuqanchikwan kuska Jesuspa wañukusqanta yuyarinankupaq hamuptinku. Chay huñunakuypim yuyarinku Jehova Diosta servispankuqa ancha kusisqallaña kasqankuta. Chaynam tarikurqa iñiqmasinchik Monicapas. b Payqa covid-19 unquy qallaykuruptinñam Diosmanta willakuyta qallaykurqa. 2021 watapi Jesuspa wañukusqanta yuyarisqanchikmantam nirqa: “Chay huñunakuyta uyarisqaywanqa ancha kusisqam tarikuni. 20 watamantam kaqmanta Diosninchikmanta willakuchkani, hinaspapas runamasinchikkunatam invitarqani Jesuspa wañukusqanta yuyarisqanchik huñunakuypi kanankupaq. Chaytaqa tukuy sunqumantam ruwarqani Jehova Diosninchiktawan señorninchik Jesucristota ñuqarayku tukuy ima ruwasqankumanta agradecekuspay”, nispa (Sal. 103:1-4). Ñuqanchikqa runamasinchikkuna mana munaptinpas hinallam invitanchik Jesuspa wañukusqanta yuyarinapaq huñunakuypaqqa. Yachanchikmi chayta ruwanapaq kallpanchakusqanchikwan Jehova Diosninchik ancha kusisqa tarikusqanmanta.

11. ¿Imaynatam Diosqa yanapawarqanchik 2021 watapi churinpa wañukusqanta yuyarinapaq tukuy imata ruwasqanchikpi? (Rimarimuytaq Ageo 2:7 nisqanmantapas).

¹¹ Jehova Diosqa churinpa wañukusqanta yuyarinapaq tukuy imata ruwasqanchikpim anchata yanapawarqanchik. 8.000.000 masnillanmi Jehova Diospa testigonkunaqa enteron allpa pachapi kanchik. Chaywanpas 2021 watapim covid-19 unquy kachkaptinpas Jesuspa wañukusqanta yuyarirqanchik 21.367.603 runakuna. Jehova Diosninchikqa maynatachá kusikun chayna achkallay-achka runakuna churinpa wañukusqanta yuyarinapaq huñunakusqankuwanqa (Luc. 15:7; 1 Tim. 2:3, 4). Jehova Diosqa churinpa wañukusqanta yuyarinapaq invitasqanchikpim paymanta yachay munaq runakunata tarinapaq yanapawanchik (leey Ageo 2:7).

12. ¿Imakunaraykum mana atichwanchu Jesuspa wañukusqanta yuyariytaqa?

¹² Jesusqa nirqañam kay tukupay punchawkunapi achka sasachakuykunapi tarikunanchikmanta. Paymi nirqa ayllunchikkuna Diosta servinanchikta mana munanankumanta, autoridadkunapas chiqniwaspanchik ñakarichiwananchikmanta chaynataq guerrakunawan unquykuna kananmantapas (Mat. 10:36; Mar. 13:9; Luc. 21:10, 11). Chayna sasachakuykunapi tarikuspam wakinpiqa mana atichwanchu Jesuspa wañukusqanta yuyarinapaq huñunakuyman riytaqa. Ichaqa, ¿imatam ruwarqaku chayna sasachakuypi tarikuq iñiqmasinchikkunaqa? ¿Imaynatam Jehova Diosninchik paykunata yanapaykurqa?

13. ¿Imaynatam Diosqa yanaparqa iñiqmasinchik Artiomta preso kachkaspanpas Jesuspa wañukusqanta yuyarinanpaq?

¹³ Presochasqa kaspa. Jehova Diosta servisqankurayku presochasqa iñiqmasinchikkunaqa anchatam kallpanchakunku Jesuspa wañukusqanta yuyarinankupaq. Rimarisunchik iñiqmasinchik Artionmanta, paymi 2020 watapi Jesuspa wañukusqanta yuyarinapaq killapi presochasqa karqa, paytam taksachalla cuartochaman hinarurqaku. Chay cuartochapiqa wakinpim pichqa presokuna kaqku, chaywanpas Jesuspa wañukusqanta yuyarinanpaqmi imapas necesitasqankunata tarinanpaq kallpanchakurqa, chaymantapas Jesuspa wañukusqanmanta yachachikuyta ruwananpaqmi tantiakururqa, chaynapi kallpanchasqa kananpaq. Ichaqa sasam karqa chay cuartopi kaq presomasinkuna cigarrota llumpayta pitasqankurayku chaynataq tukuy punchaw millay rimaykunata rimasqankurayku, chaymi iñiqmasinchik Artiomqa paykunata nirqa cigarrota ama pitanankupaq chaynataq  millay rimaykunatapas ama rimanankupaq. Hinaptinmi paykuna nirqaku “allinmi” nispa. Chaywanqa Artiomqa anchatachá kusikurqa. Paymi willakun: “Paykunatam nirqani Jesuspa wañukusqanta imayna yuyarisqanchikmanta willanaypaq”, nispa. Qallariypi mana kaqpaq hapispankupas iñiqmasinchik Artiompa yachachisqanta uyariruspankum Jesuspa wañukusqanmanta astawan yachayta munarqaku.

14. Covid-19 unquy kachkaptinpas, ¿imakunatam iñiqmasinchikkunaqa ruwarqaku Jesuspa wañukusqanta yuyarinankupaq?

¹⁴ Covid-19 unquy kaptin. Jehova Diospa testigonkunaqa chay unquy kasqanraykum Jesuspa wañukusqanta yuyarinapaqqa huñunakuna wasimanqa manaña rirqanchikchu. Chayna kaptinpas Jesuspa wañukusqantaqa hinallam yuyarirqanchik. c ¿Imaynata? Internetniyuq kaq iñiqmasinchikkunam zoomnintakama Jesuspa wañukusqanmanta yachachikuyta uyarirqaku, internetninku mana kaptinñataqmi wakin nacionkunapiqa chay yachachikuytaqa uyarirqaku televisionnintakama utaq radiontakama. Chaymantapas betel wasikunapim grabarurqaku 500 masnin rimaypi Jesuspa wañukusqanmanta yachachikuytaqa, chaynapi karu llaqtachakunapi  yachaq iñiqmasinchikkunapas qawanankupaq utaq uyarinankupaq, chaypaqmi huñunakusqanku lawpi iñiqmasinchikkuna chay grabasqankuta aparqaku.

15. ¿Imatam yachanchik Soniapa pasasqanmanta?

¹⁵ Diosta servinanchikta ayllunchik mana munaptin. Wakin iñiqmasinchikkunaqa Diosta servinankuta ayllunku mana munasqanraykum llumpayta sasachakunku Jesuspa wañukusqanta yuyarinankupaq. Chaynapim tarikurqa bibliamanta chayllaraq yachaq Sonia sutiyuq warmi. 2021 watapim Jesuspa wañukusqanta yuyarinapaq huk punchawllaña faltachkaptin bibliamanta yachachiqninman willakurqa Diosta servinanta ayllun mana munasqanrayku Jesuspa wañukusqanmanta yachachikuytaqa mana uyariyta atinanmanta. Chay nisqanta uyariykuspanmi yachachiqninqa leeykapurqa Lucas 22:44 nisqanta, hinaspam nirqa: “Ima sasachakuypipas tarikuspaqa señorninchik Jesucristotam qatipakunanchik, hinaspapas Jehova Diosninchiktam mañakunanchik yanapaykuwananchikmanta mana iskayrayaspa”, nispa. Chay punchaw chayaramuptinmi Soniaqa tantatawan vinota alistakururqa, hinaspanmi internetpi jw.org nisqanpi chay madrugawpaq Jesusmanta yachachikuyta qawarqa, tutaykuqtañataqmi cuartochanpi wichqakuykuspan celularnintakama Jesuspa wañukusqanmanta yachachikuyta uyarirqa. Chay huñunakuy tukuyllatam Soniaqa yachachiqnin iñiqmasinchikman kaynata nispan qillqarqa: “Qayna punchawmi ancha-anchata kallpanchaykuwarqanki, tukuytam ruwarqani Jesuspa wañukusqanmanta yachachikuyta uyarinaypaq, Jehova Diosninchikmá yanapaykuwarqa, chayna yanapaykuwasqanmantam anchata kusikuni hinaspa agradecekuni”, nispa. Sonia hina sasachakuypi tarikuptikiqa, ¿yaqachu qamtapas Jehova Diosninchikqa yanapaykusunkiman?

16. ¿Imaynataq Jehova Diosqa tarikun Jesuspa wañukusqanta yuyarinapaq kallpanchakuptinchik? (Rimarimuytaq Romanos 8:31, 32 nisqanmantapas).

¹⁶ Jehova Diosqa anchatam kusikun imaña kaptinpas Jesuspa wañukusqanta yuyarinapaq kallpanchakuptinchikqa, manamá iskayrayananchikchu ñuqanchikrayku Jesuspa wañukusqanmanta agradecekuptinchik bendeciykuwananchikmantaqa (leey Romanos 8:31, 32). Kuyasqa iñiqmasillaykuna, kunan watapas kallpanchakusunyá ima sasachakuyña kaptinpas Jesuspa wañukusqanta yuyarinapaq huñunakuypi kanapaq. Kallpanchakusuntaqyá chay killapi Jehova Diospaq kaqkunata astawan ruwanapaqpas.