1. ¿Imanasqataq agradecekunchik bibliata Dios quwasqanchikmanta?

 JEHOVA DIOSTAM ancha-anchata agradecekunchik bibliata quwasqanchikmanta. Chaypim sumaq consejokunata quwanchik sasachakuykunapi kaspa imata ruwananchikpaq. Chaymantapas, bibliapim niwanchik hamuq tiempopi kusisqa kawsakunamanta. Bibliapitaqmi willawanchik imayna Dios kasqanmanta. Chaymanta yachayqa imamantapas aswan allinmi. Diosninchikpa imayna kasqankunapi yuyaymanaspanchikqa paytam astawan kuyasun, chaymi payman astawan asuykuspa amistadnin kayta munasun (Sal. 25:14).

2. ¿Imakunatam Diosqa ruwarqa lliw runakuna paymanta yachananchikpaq?

² Jehova Diosqa munan lliw runakuna paymanta yachananchiktam. Chaymi ñawpaqpi sueñoynintakama, musquynintakama hinaspa angelninkunawan paymanta willachirqa (Num. 12:6; Hech. 10:3, 4). Ichaqa chay willachisqankunata mana qillqachiptinqa manam kunanqa yachayta atichwanchu karqa. Chaymi payqa runakunawan qillqachirqa imakuna yachananchikta munasqanta (Jer. 30:2). Imayna qillqachisqan allinpuni kasqanmantaqa manamá iskayrayachwanchu. Arí, “Diospa ñanninkunaqa mana pantayniyuqmi” (Sal. 18:30).

3. ¿Imakunatam Diosqa ruwarqa kunankama biblia kananpaq? (Rimarimuytaq Isaias 40:8 nisqanmantapas).

³ (Leey Isaias 40:8). Bibliaqa ñawpaq tiempopiraqmi qillqasqa karqa mana ancha duraq kaqkunapi. Chaymi qallariypi qillqasqankuqa kunankamaqa manaña kanchu. Chaywanpas bibliaqa waranqantin watañam Diospa serviqninkunata yanapawachkanchik. ¿Imaynanpim hinalla yanapawachkanchik? Jehova Diosmi qallariypi qillqasqankumanta copiakunata ruwachirqa. Copiaqkunaqa pantaq kaspankupas anchatam kallpanchakurqaku imam kaqta copianankupaq. Hebreo idiomapi  qillqaqkunamanta allinta yachaq runam nirqa: “Ñawpaq tiempopi qillqasqa huk librokunaqa manamá biblia hina imam kaq alli-allin copiasqaqa kanchu”, nispa. Pantaq runakuna ñawpaq tiempopiraq chaynataq mana ancha duraq kaqkunapi qillqaptinkupas sutillamá kachkan Jehova Diospa nisqankuna bibliapi kasqanqa.

4. ¿Imamantam kay yachachikuypi yachasun?

⁴ “Tukuy imapas allin kaqkunaqa hinaspa allinkuna chaskisqanchikqa” Jehova Diosmantam (Sant. 1:17). Tukuy imapas quwasqanchikmanta aswan valorniyuq regaloqa bibliam. Pipas regalota quwaptinchikqa chay quwasqanchikwanmi yachanchik imayna sunquyuq kasqanta. Chaywantaqmi qawachiwanchik riqsiwasqanchikta hinaspa ima necesitasqanchikta yachasqanta. Chaynam bibliawanpas pasan. Bibliata estudiaspam astawan Diosninchikmanta yachanchik, cuentatataqmi qukunchik allinta riqsiwasqanchikta hinaspa imapas necesitasqanchikta yachasqanta. Chayraykum kay yachachikuypi yachasun Diospa yachayniyuq, allin ruwaq hinaspa kuyakuq kasqanmanta biblia qawachiwasqanchikmanta. Puntatayá rimarisun yachayniyuq kasqanmanta.

5. ¿Imaynatam yachanchik bibliapa nisqankuna Dios yachayniyuq kasqanta qawachiwasqanchikta?

⁵ Jehova Diosqa allintam yachan consejonkuna necesitasqanchikta. Chayraykum yachayninwan huntasqa bibliata quwarqanchik. Bibliapa nisqankunaqa runakunapa vidantam cambian. Bibliapa qallariynin librokunata qillqachkaspanmi Israel runakunata Moises nirqa: “Kaytaqa manam yanqatachu nichkaykichik, kay nisqaykunata kasukuspaykichikqa kawsankichikmi”, nispa (Deut. 32:47). Diosta kasukuspankuqa kusisqam kawsakunanku karqa. Tukuy ima ruwasqankupas allinmi kanan karqa (Sal. 1:2, 3). Bibliaqa ñawpaq tiempopiraq qillqasqa kaspanpas hinallam runakunapa vidanta cambiachkan. Arí, “Bibliam imayna kawsasqanta cambiarqa” niqpim achka runamasinchikkuna willawanchik bibliapa consejonkunata kasukuspanku allinña kawsakusqankumanta. Chaytam tarinchik internetpi jw.org niqpi (1 Tes. 2:13).

6. ¿Imanasqataq biblia hina huk libroqa mana kanchu?

⁶ Biblia hinaqa manam ima libropas kanchu. ¿Imanasqam chaynata ninchik? Tukuy atiyniyuq hinaspa wiña-wiñaypaq kawsakuq Jehova Diospa qillqachisqan kasqanraykum. Paypa yachayninqa mana tukuqmi. Achka librokunatam hinalla leenku qillqaqnin wañukuptinpas, ichaqa manañam ima nisqankunaqa ancha yanapanchu leeqkunataqa. Bibliapa nisqankunam ichaqa waranqantin wataña hinalla runakunata yanapachkan. Bibliata leespa yuyaymanaptinchikqa paymi atiyninwan yanapawasun chayman hina kawsakunapaq (Sal. 119:27; Mal. 3:16; Heb. 4:12). Bibliata qillqachiq taytanchikqa anchatam yanapaykuyta munawachkanchik. ¿Manachu chaypi piensayninchikqa kallpanchawanchik bibliata sapa punchaw leenapaq?

7. ¿Imaynatam bibliaqa ñawpaq tiempopi iñiqkunata yanaparqa huk sunqulla kanankupaq?

⁷ ¿Imawanraqtaq yachanchik bibliapa nisqankunaqa Dios yachayniyuq kasqanta qawachiwasqanchikta? Diospa serviqninkuna huk sunqulla kanankupaq yanapasqanwanmi. Diospa nisqan allpaman Israel runakuna chayaruspankuqa manam huk hawaqllapichu yacharqaku. Wakinmi karqaku challwa hapiqkuna, animal michiqkuna hinaspa chakrapi llamkaqkuna. Huklawkunapi yachasqankuraykum paykunaqa chaylla qunqanakurunmanku  karqa. Ichaqa Jehova Diosmi kamachirqa sapa kuti huñunakunankupaq, chaynapi palabranta uyarinankupaq hinaspa ima ninan kasqanta astawan entiendenankupaq (Deut. 31:10-13; Neh. 8:2, 8, 18). Diospa nisqanta kasukuspankum Israel runakunaqa tukuy lawmanta Jerusalen llaqtaman huñunakuqku Diosta yupaychanankupaq. ¡Mayna kusisqachá tarikuqku millonnintin Israel kastamasinkuwan tupaykuspankuqa! Chaynatamá Jehova Diosqa yanaparqa huk sunqulla kanankupaq. Apostolkunapa tiemponpi iñiqkunapas manam huk llaqtallamantachu karqaku. Wakinmi karqa riqsisqa runakuna, apukuna, wakchakuna hinaspa huk idiomata rimaqkuna. Chaywanpas, Diospa palabranta kuyasqankuraykum Diosta huk sunqulla yupaycharqaku. Hukkunapas Diospa palabranmantam astawan entienderqaku wakin iñiqkuna yachachiptinku chaynataq kuska huñunakuptinku (Hech. 2:42; 8:30, 31).

8. ¿Imaynatam kunanpas Diosqa bibliawan yanapawanchik huk sunqulla kananchikpaq?

⁸ Kunan tiempopipas Jehova Diosqa hinallam bibliawan yachachiwanchik hinaspa yanapawanchik huk sunqulla kananchikpaq. Chaymi tukuy ima yachachikuykuna chaskisqanchikqa bibliapa nisqanman hina. Hatun huñunakuykunaman hinaspa sapa semana huñunakuykunaman rispanchikmi bibliata estudianchik hinaspa astawan entiendenchik. Manamá iskayrayanchikchu huk sunqulla yupaychananchikpaq  Jehova Dios yanapawasqanchikmantaqa. Chaynatamá payqa qallariymantapacha munarqa (Sof. 3:9).

9. ¿Pikunallataq bibliapa nisqanta entiendenku? (Rimarimuytaq Lucas 10:21 nisqanmantapas).

⁹ ¿Imawanraqtaq yachanchik Jehova Diosqa yachayniyuq kasqanta? Payqa bibliapim achka yachachikuykunata qillqachirqa llampu sunqu runakunalla entiendenankupaq (leey Lucas 10:21). Bibliataqa tukuy nacionniyuq runakunam leenku. Yachaysapa huk runapa nisqanman hinaqa bibliatam ima libromantapas astawanqa leenku hinaspa estudianku. Ichaqa llampu sunqu runakunallam nisqankunataqa entiendenku hinaspa kasukunku (2 Cor. 3:15, 16).

10. ¿Imawanraqtaq yachanchik bibliaqa Jehova Dios yachayniyuq kasqanta qawachiwasqanchikta?

¹⁰ ¿Imawanraqtaq yachanchik bibliaqa Jehova Dios yachayniyuq kasqanta qawachiwasqanchikta? Diosninchikqa bibliawanmi llapallan serviqninkunata yachachiwanchik. Yachachiwanchiktaqmi sapakamatapas. Palabranta leespanchikmi yachanchik sapakama imayna tarikusqanchikta allinta yachasqanta (Is. 30:21). Ima sasachakuypipas tarikuspaqa, ¿yaqachu kamas yanapawaqninchik kaqta bibliapi leerqanchik? Arí, achka kutikamachá tarirqanchik. Millonnintin runakunapaq biblia qillqasqa kachkaspanqa, ¿imaynatataq kunan tiempopipas sapakamata yanapawachwan? Pimantapas aswan yachayniyuq taytanchik qillqachisqanraykum (2 Tim. 3:16, 17).

11. ¿Imaynatam Diosqa bibliata qillqachispan qawachirqa mana pimanpas sayapakuq kasqanta?

¹¹ Jehova Diosqa imatapas allin ruwaqmi (Deut. 32:4). Chayraykum mana pimanpas sayapakunchu (Hech. 10:34, 35; Rom. 2:11). Ima idiomakunapi palabran qillqasqa kananpaq tantiasqanwanmi chayna kasqanta yachanchik. Genesismanta Malaquias librokamaqa yaqa llapallanmi hebreo idiomapi qillqasqa karqa. Chay tiempopiqariki Diosta serviqkunaqa llapallankum chay idiomataqa rimaqku. Apostolkunapa tiemponpaqmi ichaqa yaqa llapallan runakunaqa griego rimayta entiendeqku, chayraykum Mateomanta Apocalipsis librokamaqa yaqa llapallan griego idiomapi qillqasqa karqa. Jehova Diospaqqa allinmi rikchakurqa mana huk idiomallapi palabran qillqasqa kasqanqa. Kunan tiempopiqa enteron allpa pachapim yaqa pusaq waranqa millon runakuna kanchik, hinaspapas manam huk idiomallatachu rimanchik. Chaywanpas, ¿imaynatam llapallanchik Jehova Diosmanta yachachwan?

12. ¿Imaynatam Daniel 12:4 nisqan kay tukupay tiempopi cumplikuchkan?

¹² Jehova Diosmi Danielwan qillqachirqa kay tukupay tiempopi runakuna ‘chiqap kaqta allinta yachanankumanta’ utaq bibliapa nisqankunata allinta entiendenankumanta (leey Daniel 12:4). Chayraykum bibliamanta rimaq librokunata traducichkanku, imprimichkanku hinaspa achka-achkata aypuchkanku. Chaymi bibliaqa ima libromantapas aswan achka idiomakunapi kachkan, hinaspapas achkanpi aypusqam kachkan. Hukkunapa traducisqanku bibliakunaqa anchatam cuestakun. Jehova Diospa testigonkunam ichaqa enterontapas utaq wakillantapas 240 masnin idiomakunamanña traducirunku, chaytaqa mana qullqillapaqmi internetpipas utaq papelpipas chaskinmanku. Chayna mana qullqillapaq kasqanraykum llapallan nacionpi millonnintin runamasinchikkuna ‘Diospa gobiernonmanta sumaq willakuyta’  uyarichkanku piñakuynin punchaw manaraq chayamuchkaptin (Mat. 24:14). Diosqa mana pimanpas sayapakusqanraykum chaynataq anchata kuyawasqanchikraykum munachkan palabranta leespa payman asuykunanchikta.

13. ¿Imanasqataq ninchik bibliapa nisqankunaqa Dios kuyakuq kasqanta qawachiwasqanchikta? (Rimarimuytaq Juan 21:25 nisqanmantapas).

¹³ Bibliapa lliw nisqankunaqa qawachiwanchiktaqmi Diospa ancha kuyakuq kasqantapas, chayna kasqanmi sutilla qawakun tukuy ima ruwasqankunapi (1 Juan 4:8). Piensarisunchik imakunata bibliapi Dios churachisqanpi hinaspa imakunata mana churachisqanpi. Paymi palabranpi qillqachirqa amistadnin kanapaq, kusisqa kawsakunapaq hinaspa wiñaypaq kawsakunapaq imakuna yachay necesitasqanchikta. Ichaqa anchata kuyawasqanchikraykum yachachikuykunataqa mana llumpaytachu quwarqanchik, aswanqa payta servinanchikpaq kaqkunallatam (leey Juan 21:25).

14. ¿Imaynatawanmi bibliapa nisqankunaqa qawachiwanchik Dios kuyakuq kasqanta?

¹⁴ Kuyakuq kasqanraykutaqmi Jehova Diosqa imata ruwananchikpaq rimapayawaspanchikpas sumaqllata niwanchik. Payqa manamá bibliapiqa kamachikuykunallatachu kawsakunanchikpaqqa qillqachirqa. Qillqachirqataqmi ñawpaq tiempopi runakunamantapas, sumaq willakuykunamantapas chaynataq allinninchikpaq consejokunamantapas, chaynapi kikinchikmanta allinta tantiakunanchikpaq. Tukuy chaykunawanmi bibliaqa kallpanchawanchik Diosta kuyananchikpaq hinaspa sunqumanta kasukunanchikpaq.

15. (1) ¿Imaynatam bibliata leespa yachanchik Diosqa allintapuni riqsiwasqanchikta? (2) ¿Diospa mayqin serviqninkunapim yuyaymanachkan fotopi qawasqanchik warmacha, musu hinaspa yuyaq iñiqmasinchik? (Rimarimuytaq Gen. 39:1, 10-12; 2 Rey. 5:1-3; Luc. 2:25-38 nisqanmantapas).

 ¹⁵ Bibliata leespanchikmi yachanchik Jehova Diosqa allintapuni riqsiwasqanchikta, chaymi palabranpi qillqachirqa ñuqanchik hina kusisqa, llakisqa utaq imaynapas tarikuq runamasinchikkunamanta. Wakinpiqa ñuqanchikpas paykuna hina tarikusqanchikraykum imayna kasqankuta entiendenchik. Arí, paykunaqa llapallankum karqaku “ñuqanchik hina sentimientoyuq” (Sant. 5:17). Paykunata Dios imayna yanapasqanwanmi astawanraq yachanchik payqa “kuyapayakuq hinaspa ancha llakipayakuq kasqanta” (Sant. 5:11).

16. ¿Dios imayna kasqantam yachanchik huchallikuruq runakunamanta bibliapi leespaqa? (Rimarimuytaq Isaias 55:7 nisqanmantapas).

¹⁶ Bibliata leespanchikmi yachanchik Jehova Diosqa imaynatawanraq kuyawasqanchikta qawachiwasqanchikmanta. Bibliapimá niwanchik pantaruptinchikpas Diosqa mana qunqawasqanchikmanta. Ñawpaq tiempopi Israel runakunam sapa kuti huchallikuqku, chaywanpas Diosninchikqa pampachaykuqmi sunqumanta wanakuptinkuqa (leey Isaias 55:7). Apostolkunapa tiemponpi Diosta serviqkunapas manam iskayrayarqakuchu Dios kuyasqanmantaqa. Jehova Diosmi Pablowan qillqachirqa huchallikuruq runata pampachaykunankupaq hinaspa sunqunta tiyaykachinankupaq iñiqmasinkunata kallpanchananpaq (1 Cor. 5:1-5; 2 Cor. 2:6, 7). Anchatamá kusikunchik Diosqa serviqninkuna pantaruptinpas mana qipanchasqanmanta yachaspanchikqa, pantaruptinkupas payqa kuyakuywanmi yanaparqa, corregirqa hinaspa kaqmanta payman kutirikunankupaq nirqa. Kunan tiempopipas payqa huchallikuqkunatam nin sunqumanta wanakuptinkuqa pampachaykunanpaq (Sant. 4:8-10).

17. ¿Imanasqataq bibliaqa Diospa quwasqanchik ancha chaninniyuq regalo?

¹⁷ ¿Imanasqataq bibliaqa Diospa quwasqanchik ancha chaninniyuq regalo? Kay yachachikuypi yachamusqanchikman hinam bibliata leespa yachanchik Diosninchikqa allin ruwaq, yachayniyuq hinaspa ancha kuyakuq kasqanta. Bibliapa nisqankunawantaqmi yachanchik Jehova Diosqa pay riqsinanchikta hinaspa amistadninkuna kananchikta munasqanta.

18. ¿Imata ruwaspataq agradecekuchwan bibliata Dios quwasqanchikmanta?

¹⁸ Manamá qunqananchikchu bibliaqa Diosninchikpa ‘tukuy imapas allin kaqkuna’ quwasqanchikmanta huknin kasqantaqa (Sant. 1:17). Chaynaqa, taytanchik Jehova Diostayá mañakusun bibliata leenanchikpaq, hinaspapas leesqanchikkunapiyá yuyaymanasun. Chayta ruwaspanchikmi agradecekusqanchikta qawachichkanchik. Bibliata leenapaq kallpanchakuspaqa ‘Diostam allinta riqsisun’ (Prov. 2:5). Chaypaq kallpanchakusqanchikmantaqa payqa bendeciwasunmi.