Jehova Diosqa munan pipas casarakuspanqa kusisqa unay watakuna kawsakunantam (Mat. 19:4-6). ¿Casarakuytachu munachkanki? ¿Imaynatataq tariwaq allin qarita utaq allin warmita? Jehova Diosmi unanchawarqanchik. Payqa yachanmi imata ruwaspanchik riqsinakusqanchik tiempopi chaynataq casado vidanchikpi kusisqa kawsakunanchikmanta. Chaymi niwasqanchikkunata kasukunanchik, niwasqanchikkunaqa kusisqa kananchikpaqmi yanapawasun. Qatiqninpiyá yachasunchik biblia ima niwasqanchikmanta.

Runakunaqa riqsikunanchikmi ‘sunqunchikqa tukuy imamantapas aswan engañakuqllaña hinaspa mana allinpa huntasqan’ kasqanta (Jer. 17:9). Chaymi piwanpas casarakuyta munaspaqa, sumaqta riqsinakunanchik hinaspa tantiakunanchik. Sunqunchikpa munasqanman hina tantiakuspaqa sasachakuypim tarikuchwan (Prov. 28:26). Manataqmi allinchu kanman manaraq allinta riqsinakuchkaspa casarakunapaq ninakuyqa.

Chaymantapas Proverbios 22:3 nisqanpim nin: ‘Allin tantiakuq runaqa sasachakuyta qawarispam suchurikun, mana yachayniyuq runam ichaqa sasachakuyman yaykuruspan ñakarin’, nispa. ¿Ima sasachakuykunapim tarikuchwan casarakuyta munaspa internetpi maskaspaqa? Internetpiqa kanmi mana allin runakuna. Wakinqa ninkum Jehova Diospa testigon kasqankuta, ichaqa llullapas utaq suwapas kanmankum. Chaymi casarakuyta munasqanchikrayku internetpi maskaspaqa sasachakuypi tarikuchwan.

Chaymantapas, internetpim ruwarunku casarakuy munaqkunapaq yanapakuyta. Chayman yaykuspa qillqaptikis yanapasunkiman qampaq hina qarita utaq warmita maskaypi, chaynapi paywan casarakunaykipaq. ¿Allinchu kanman chaypi nisqanman hina piwanpas riqsinakuspa casarakuy? Manamá. Aswan allinqa kanman Jehova Diospa niwasqanchikman hina pitapas sumaqta riqsispa casarakuymi (Prov. 1:7; 3:5-7).

Proverbios 14:15 nisqanpas allintam yanapawachwan, chaypim nin: ‘Mana yuyayniyuq runaqa imataña nisqankutapas chayllam creerun, yachayniyuq runam ichaqa allinta tantiakuykuspan imatapas ruwan’, nispa. Kaypi nisqanman hinam piwanpas casarakunaykipaq tantiakuspaqa allintaraq riqsinayki. Ichaqa manamá pitapas allintaqa riqsichwanchu internetllawan  rimaspaqa. Internetllawan unayta rimaspankupas utaq fotonkuta apachinakuspankupas, ¿casarakunankupaq hinachu allinta riqsinakunku? Manamá. Wakinqa maypipas tupanankupaq ninakuspankum piensasqankuman hina mana kasqanta qawaykuspanku imanakuytapas atinkuchu.

Salmos qillqaqmi kaynata nirqa: “Iskay uya runakunawanqa manam hukllawakurqanichu, nitaqmi kuskanchakurqanichu”, nispa (Sal. 26:4). Internetpi kaq runakunaqa fotonkuta churanankumantaqa hukpa fotontam churanku, llullakunkum hayka watayuq kasqankuta, maylawmanta kasqankuta hinaspa imapi llamkasqankutapas. Chaymi mana atichwanchu imayna runa utaq imayna sunquyuq kasqanta sumaqta riqsiytaqa. Wakinqa ninmankum Jehova Diospa testigon kasqankuta. Ichaqa, ¿ciertotachu iñiqmasinchik kanman? ¿Bautizasqachu? ¿Iñiyninpi allin takyasqachu? ¿Jehova Diospa kamachisqanman hinachu kawsakun? Huñunakusqan lawpiqa, ¿allin runapaqchu iñiqmasinchikkuna hapinku icha mana kasukuq kaptinchu paymanta karunchakunku? (1 Cor. 15:33; 2 Tim. 2:20, 21). ¿Ciertotachu sapallanraq kachkan icha kanñachu warmin, qusan utaq churin-wawankuna? Chaykunamanta imam kaqta yachananchikpaqqa riqsinakusqanchik qarita utaq warmita allinta riqsiqninkunawanmi rimananchik (Prov. 15:22). Manamá Jehova Diosta mana kasukuqwanqa utaq mana bautizasqawanqa casarakuchwanchu (2 Cor. 6:14; 1 Cor. 7:39).

Casarakuyta munasqanchikrayku internetpi maskaspaqa sasachakuypimá tarikuchwan. Chaynaqa, ¿maypitaq tarichwan kuyay yananchikta? Tarichwanmi iñiqmasinchikkunawan huñunakusqanchikpi, hatun huñunakuyninchikpi utaq iñiqmasinchikkunawan imapaqpas huñunakusqanchikpi.

Coronavirus unquy kasqanraykum huñunakunanchik wasipiqa manaña huñunakunchikchu. Ichaqa huñunakunchikmi telefonontakama utaq zoom nisqantakama. Chay huñunakuykunapim mayqin iñiqmasinchiktapas riqsiyta atichwan. Imayna sunquyuq kasqantaqa yachachwanmi huñunakuypi imayna rimarisqanta allinta uyarispa, musyachwantaqmi Diosman sunqu kasqantapas utaq mana chayna kasqantapas (1 Tim. 6:11, 12). Riqsichwantaqmi huñunakuy tukuyta iñiqmasinchikkunawan rimaspapas. Wakin kutipiqa zoomta servichikuspam iñiqmasinchikkunawan huñunakuchwan pukllanapaq, takinapaq utaq rimarinapaq. Chaypipas atichwanmi riqsinakuy munasqanchik imayna kasqanmanta yachayta (1 Ped. 3:4). Chaynata riqsinakuspam cuentata qukuchwan entiendenakusqanchikmanta utaq mana entiendenakusqanchikmanta.

Jehova Diospa nisqanman hina casarakunanchikpaq warmita utaq qarita maskaspanchikqa, casado vidanchikpim kusisqa kawsakusunchik. Chaymi bibliapas nin: ‘Allin kaqtam tarikun allin warmiwan [utaq allin qariwan] casarakuqqa. Tayta Diospa favornintam hayparun chayna warmiwan [utaq chayna qariwan] casarakuqqa’, nispa (Prov. 18:22).