1. ¿Ima ruwananchiktam Diosninchikqa munan?

 DIOSQA munan kunan tiempopi pay kamachiptin imakuna kananmanta willakunanchiktam (Mar. 13:10; 1 Tim. 2:3, 4). Chay ruwayqa imamantapas aswan allinmi, chayraykum churinta churaykurqa tukuy chaykunamanta nanachikunankupaq. Chaynaqa, manam iskayrayananchikchu Diospa piñakuynin punchaw chayamuptin tukuy ima ruwasqanchikmanta Diosninchik kusisqa kananmantaqa (Mat. 24:14).

2. ¿Imakunamantam yachasun kay yachachikuypi?

² Kay yachachikuypim yachasunchik, Jesus ‘allin ruwaq yuyayniyuq serviqninwan’ yanapawasqanchikmanta, paykunaqariki mikuchichkaq hinam yachachiwanchik, chaymantapas Diosmanta imaynata willakunapaqmi yanapawanchik (Mat. 24:45). Yachachkasuntaqmi imata ruwaspa sapakama Jesusta yanapanamanta chaynataq allin ruwaq yuyayniyuq serviqninta yanapanamanta.

3. ¿Imamantam Jesusqa nanachikuchkan?

³ Jesusmi nanachikun Diosmanta willakusqanchikmantaqa. ¿Imaynatataq chaytaqa yachanchik? Hanaq pachaman kutikunanpaqña kachkaspanmi Galilea urqupi qatiqninkunaman nirqa: “Tukuy atiytam chaskiruni hanaq pachapipas kay pachapipas”, nispa. Chaymantapas nirqaraqmi: “Chaynaqa llapallan nacionpi runakunaman rispayá yachachimuychik qatiqniykunaña kanankupaq”, nispa (Mat. 28:18, 19). Chay nisqankunawanmi yachanchik  Diosmanta willakusqanchikmantaqa Jesus nanachikusqanta.

4. ¿Imaynanpitaq mana iskayrayananchikchu Diosmanta willakusqanchikmanta Jesus nanachikusqanmanta?

⁴ Jesusmi nirqa willakunapaq chaynataq “llapallan nacionpi runakunaman” yachachinapaq. Chaymantapas nirqataqmi: “Sapa punchawmi ñuqaqa qamkunawan kasaq kay tiempopa tukupayninkama”, nispa (Mat. 28:20). Chay nisqankunawanmi yachanchik willakusqanchikmantaqa kunan tiempokama Jesus nanachikusqanta.

5. ¿Imaynatam yanapakunchik Salmo 110:3 nisqan cumplikunanpaq?

⁵ Jesusqa manam iskayrayarqachu kay tukupay punchawkunapi achka willakunankumantaqa. Payqa manam iskayrayarqachu “atiywan peleasqayki punchawpim, llaqtayki kikinmanta ofrecekunqa” nispa bibliapi nisqanmantaqa (Sal. 110:3). Diosmanta willakuspaykiqa Jesustawan allin ruwaq serviqnintam yanapachkanki chaymantapas yanapakuchkankitaqmi Salmos qillqapi willakuy cumplikunanpaq. Ichaqa wakinpiqa sasachakunchikmi.

6. ¿Imata rimaspankum sasachawanchik?

⁶ Diosmanta willakuptinchikpas tukuy imam sasachawanchik. Hukkaqninmi llullakuna rimasqanku. Diosmanta karunchakuqkunawan autoridadkunawan chaynataq wakin religionpi kaqkunam llullakunata ñuqanchikmanta rimanku. Ayllunchikkuna, riqsinakusqanchikkuna, llamkaqmasinchikkuna, chay nisqankuta allinpaq hapispankuqa Diosmanta karunchawananchikpaqmi chaynataq Diosmanta manaña willakunanchikpaqmi tukuyta ruwanqaku. Wakin nacionkunapiqa chiqniwaqninchikkunam tukuyta niwanchik, tukuyta ruwawanchik, carcelkunaman hinawanchik. Ichaqa chaywanqa manam hukmanyanchikchu “sutiyraykutaqmi lliw nacionkunapas chiqnisunkichik” nispa Jesuspa nisqanrayku (Mat. 24:9). Chayna chiqnisqa kasqanchikwanmi yachanchik Jesuspa ruwasqanta qatisqanchikmanta chaynataq Diosninchik chaskiwasqanchikmanta (Mat. 5:11, 12). Tukuy kay sasachakuykunapa qipanpiqa satanasmi kachkan. Ichaqa paymantaqa Jesusmi aswan atiyniyuqqa. Jesucristo yanapawasqanchikraykum llapallan nacionpi runakunaman willakuchkanchik.

7. ¿Imakunawantaq yachanchik Apocalipsis 14:6, 7 nisqan cumplikusqanta?

⁷ Sasachakunchiktaqmi imaymana rimaykuna kasqanrayku. Ichaqa tukuy chaykunapas mana harkawananchikmantam Jesusqa nirqa (leey Apocalipsis 14:6, 7). Imaymana rimaykuna sasachawaptinchikpas atipachkanchikmi. ¿Imaynata? Ñuqanchikqa internetpim jw.org nisqanpi 1.000 masnin rimaykunapi yachachikuykunata churarunchik. Chaymantapas Diospa llaqtanpi punta apaqkunam niykuwanchik Kusisqa kawsakunapaq niq libronchikta 700 masnin rimaykunapi ruwananchikpaq. Chaymantapas kachkantaqmi yachachikuykunaqa videokunapi chaynataq braille nisqankupi mana uyariqkunapaqwan ñawsakunapaq. Chayraykum yaqa llapallan runakuna Diosmanta yachachkanku. Chaywanmi bibliapi willakuykuna cumplikuchkan. Chaymi “tukuy rikchaq rimayniyuq huklaw nacionkunamanta” runakuna imam kaqta Diosmanta willakuchkanku (Zac. 8:23; Sof. 3:9). Diosmanta willakuptinchik Jesus yanapawasqanchikraykum tukuy chaykunaqa kachkan.

8. ¿Imatam runakunaqa ruwachkanku Diosmanta willakusqanchikrayku?

 ⁸ Kunan tiempopiqa 240 nacionkunamanta pusaq millon masnin runakunam Jehova Diosta yupaychachkanchik. Bautizakuqkunapas sapa watam bautizakunku waranqantin. Ichaqa, manam achka kaychu aswan allinqa. Aswanqa Diospa munasqanman hina kawsakuymi. Chayna kawsakuytam bibliapi tupachin “musuq runaña” kaywan (Col. 3:8-10). Bautizakuqkunaqa saqirqakum huchapakuyta, maqanakuyta, chiqnikuyta, nacionninkuman sayayta. Chaywanqa Isaias 2:4 “guerrapaqpas manañam yachachinakunqakuñachu” nisqanmi cumplikuchkan. “Musuq runaña” kanapaq kallpanchakusqanchikraykum chaynataq umanchik Jesusta qatipakusqanchikraykum runakunaqa Diosman iñikuchkanku (Juan 13:35; 1 Ped. 2:12). Chaykunaqa manam kikillanmantachu pasachkan, aswanqa Jesusmi yanapawachkanchik.

9. ¿Ima pasananmantam Jesus nirqa Mateo 24:45-47?

⁹ (Leey Mateo 24:45-47). Jesusmi nirqa kay tukupay punchawkunapi ‘allin ruwaq yuyayniyuq serviqnin’ mikuchichkaq hina yachachiwananchikmanta. Paykunaqa tukuy imata saqispankum chayta ruwachkanku. Hanaq pachapaq akllasqakunamanta wakintam Jesusqa churaykun Diosta serviqkunamanwan wakin runakunaman “tiempollanpi mikuchinanpaq”. Paykunaqa manam runakunamantaqa munaychakunkuchu (2 Cor. 1:24). Aswanqa riqsikunkum Jesus umanku kasqanta (Is. 55:4).

10. ¿Mayqan librowantaq Diosmanta yacharqanki? (Qaway fotokunata).

¹⁰ 1919 watamantapacham yuyayniyuq  serviqqa imaymana yachachikuykunata ruwarqa, chaynapi runakuna Diosmanta yachanankupaq. 1921 watapiñataqmi ingles rimaypi, El Arpa de Dios niq librota runakunaman riqsichirqaku. Tiempopa risqanman hinamá imaymana librokunata ruwarqaku. ¿Mayqan librowantaq qampas Diosmanta yacharqanki? Ichapas “Sea Dios veraz” niq librowan, utaq La verdad que lleva a vida eterna niq librowan, utaq Usted puede vivir para siempre en el paraíso en la Tierra niq librowan, utaq El conocimiento que lleva a vida eterna niq librowan, utaq ¿Imatapunim bibliaqa yachachin? niq librowan, utaq ¿Imamantam bibliaqa yachachiwanchik? niq librowan, utaqchá yachachkanki Kusisqa kawsakunapaq niq musuq librowan. Kay librokunataqa ruwarqaku runakunaman Diosmanta allinta yachachinankupaqmi, tiempollanpitaqmi ruwarqakupas.

11. ¿Imaynanpitaq llapallanchik bibliamanta yachachikuykunata sumaqta yachananchik?

¹¹ Yachachisqanchik runakunallachuqaya bibliamantaqa allintaqa yachananku, aswanqa llapanchikmi. Apostol Pablopas nirqam: “Mikuyqa yuyayniyuqkunapaqmi”, nispan. Nirqataqmi bibliamanta yachasqanchikkunaqa ‘allin kaqtapas hinaspa mana allin kaqtapas riqsichiwananchikmanta’ (Heb. 5:14). Kunanqa huchapakuyllaña kasqanraykum Diospa kamachikuyninkunata kasukuyqa sasapaq rikchakapuwachwan. Ichaqa, Jesusmi kallpanchawaqninchik yachachikuykunawan yanapawanchik, chaynataq bibliapi tukuy ima nisqankunawan. Jesus kamachiptinmi allin ruwaq serviqqa chayta ruwallan.

12. ¿Imakunatam ruwarqanchik Diospa sutinta Jesus hina riqsichinapaq?

¹² Jesuspa nisqanman hinam ñuqanchikqa Diosninchikpa sutinta runakunaman  riqsichinchik (Juan 17:6, 26). Chaymi 1931 watapi Jehova Diospa testigonkunawan sutichakurqanchik. Imamantapas aswan allin kasqanraykum ñuqanchikqa Diosninchikpa sutinta apanchik (Is. 43:10-12). Hina chay watapitaqmi octubre killapi ingles rimaypi willakuq qillqanchikpa qaranpi Diospa sutin rikuriyta qallaykurqa. Chaymantapas, Traducción del Nuevo Mundo biblianchikpim maymi kasqanpi Diospa sutinqa churasqa kachkam. Wakin religionpi runakunam ichaqa Diospa sutintaqa bibliamanta qalaypaq chinkarachinku.

13. ¿Imakunaraykutaq nichwan Jesusqa allin ruwaq yuyayniyuq serviqninwan yanapawasqanchikmanta? (Rimarimuytaq Juan 6:68 nisqanmantapas).

¹³ Allin ruwaq yuyayniyuq serviqninwanmi Jesusqa qatiqninkunata yanapachkan Diosta allinta servinankupaq. ¿Imatataq niwaq Diospa testigonkunamanta? Apostol Pedro hinapaschá qampas niwaq. Paymi Jesusta nirqa: “¿Pimantaq riymanku? Rimasqaykikunaqa wiñay kawsay qukuqmi”, nispa (Juan 6:68). ¡Imaya ñuqanchikmanta kanman karqa Diosta mana riqsiptinchikqa! Diospa runankunawan kasqanchikraykum ñuqanchikqa saksay mikusqa hina tarikunchik tukuy imaymana yachachikuykunawan. Chaymantapas allin yachachiq kanapaqmi yachachisqa kanchik, yanapawanchiktaqmi “musuq runaña” kaspa Diosninchikta kusichinapaqpas (Efes. 4:24).

14. ¿Imaynatam Diosta riqsisqayki yanapasurqanki kay coronavirus unquy tiempopi?

¹⁴ Sasachakuykuna kaptinpas Jesusqa allin ñannintam pusawanchik, chaytam sutillata qawarqanchik kay coronavirus unquy  kasqanrayku. Hawa runakunaqa manam yacharqakuchu imayna cuidakuyta, ñuqanchikmi ichaqa yacharqanchik. Niwarqanchikmi siminchikta tapakunanchikpaq, chaynataq mana piwanpas asunakuykunanchikpaq. Punta apaqkunapas iñiqkunata qayaspankum pisipuqninkunapi yanaparqaku chaynataq Diosmanta yachachirqaku (Is. 32:1, 2). Diospa llaqtanpi punta apaqkunapas kallpanchawananchikpaqmi sapa killa willakuykunata ruwarqaku.

15. ¿Imakunatam niwarqanchik kay unquy kasqanrayku? ¿Imaynatam chayqa yanapawachkanchik?

¹⁵ Kay coronavirus tiempopiqa, niwarqanchiktaqmi imaynata huñunakunanchikpaq, imaynata Diosmanta willakunanchikpaq. Internetllawanñamá huñunakuyninchikta uyariyta qallaykurqanchik, Diosmantapas willakurqanchik cartallawanñam, celularllawanñam. Chaypiqa Jehova Diosmá yanapaykuwarqanchik. Chayraykum achka runakuna Diosninchikman iñikuchkanku, achka iñiqmasinchikkunam Diospa makinta qawarqaku (qaway “ Jehova Diosmi willakunankupaq yanaparqa” niqta).

16. ¿Imamantam mana iskayrayananchikchu?

¹⁶ Ichapas wakiqninchikqa nirqanchik: “Kay tukuy ima niwasqanchikqa llumpayñam”, nispa. Ichaqa, tukuy chaykunaqa allinninchikpaqmi karqa (Mat. 11:19). Jesuspa cuidawasqanchikpi yuyaymanaspaqa, manam iskayrayasunchu hamuq punchawmantaqa, Jehova Dioswan Jesus waqaychawananchikmantaqa (leey Hebreos 13:5, 6).

17. ¿Imaynañam tarikunki umanchik Jesuspaq llamkasqaykiwan?

¹⁷ Ancha kusisqamá tarikunchik umanchik Jesuspaq llamkasqanchikwan. Ñuqanchikqa maymantaña-chaymantaña kaspanchikpas huk sunqullam Diosninchikta servichkanchik. Saksay mikusqa hinam tarikunchik sumaq yachachikuykunawan chaynataq imaynata willakunapaq yachachiwasqanchikkunawan. Sapakamataqmi kallpanchakuchkanchik musuq runaña kananchikpaq chaynataq wakinkunata kuyananchikpaq. Ancha kusisqamá tarikunchik umanchik Jesucristopaq llamkasqanchikwan.