Canada nacionpim papayqa iglesia unidapi punta apaq karqa. Chaymi sapa domingo temprano chay iglesiaman panichaytawan mandawaqku. Chaymantam papaywan riq kaniku chay iglesiapa las onceta qallariq huñunakuyninman. Tardenñataqmi mamaywan riq kaniku testigokunapa huñunakuyninman. Chaymi iskayninman risqaykurayku cuentata qukurqaniku mana chaynalla yachachisqankuta.

Mamayqa bibliamanta tukuy ima yachasqankunatam willarqa amistadnin Bob hinaspa Marion Hutchesonman, chaymi paykunaqa testigo kanankupaq bautizakurqaku. 1958 watapim Bobwan Marionqa Nueva York llaqtapi apakuq “Voluntad Divina” sutiyuq hatu-hatun huñunakuyman warmankunatawan kuskata pusawarqa. Kunanmi chayraq cuentata qukuni chay huñunakuyman pusawanankupaqqa tukuy ima ruwasqankumanta, chaytaqa manamá haykaqpas qunqaymanchu chay huñunakuy suma-sumaq kasqanrayku.

Musucha kaspayqa sumaq chakra wasipim yacharqani. Chaypim animalniykuna cuiday gustawaq. Chaymi animalkunata hampinaypaq estudiayta munarqani. Chaypaq tantiakusqaytam huñunakusqaypi punta apaqman mamay willaykusqa, hinaptinmi chay punta apaqqa sumaqllata yuyarichiwarqa ‘tukupay punchawkunapiña’ kawsasqanchikta. Hinaspam piensarichiwarqa achka wata universidadpi kaptiyqa Jehova Dioswan amistadniy imayna kananmanta (2 Tim. 3:1). Chaywanmi tantiakururqani universidadpiqa manaña estudianaypaq.

Ichaqa manam yacharqanichu colegioyta tukuruspay ima ruwanaymanta. Sapa semana tukuytam Diosmanta willakuq lluqsiq kani, ichaqa manam anchatachu gustawaq. Chaymi precursor kaytaqa piensarqanichu. Mana testigo kaq tioywan papayqa Toronto llaqtapi kaq hatun empresapi llamkanaytam munarqaku. Tioyqa chay empresapi hukkaqnin cuentallikuqmi karqa. Chaymi chaypi llamkanaypaq niwaptin “arí” niykurqani.

Chay empresapiqa tutankunapas llamkaqmi kani, chaymi mana testigo kaq runakunawan aswan unay  tiempo karqani. Diospaq kaqta ruwanaypaqpas manañam anchachu tiempochakurqani. Chay tiempoqa mana testigo kaq abueloywanmi yacharqani. Ichaqa wañukuptinmi huk cuartotaña maskarqani.

1958 watapi hatu-hatun huñunakuyman pusawaqniy iñiqmasinchik Bobwan señoranqa tayta-mamay hinam ñuqapaqqa karqa, paykunawanñam yachallarqani. Paykunam yanapallawarqa iñiyniypi ñawparinaypaq. 1960 watapim paykunapa churin Yonwan kuska bautizakurqani. Yonqa chayllam precursor kananpaq tantiakururqa, chaymi ñuqapas tantiakurqani Diosmanta astawan willakunaypaq. Chayta qawaspankum akllawarqaku Diosmanta yachachinapaq escuelamanta cuentallikunaypaq. a

1966 watapim Diosmanta anchata willakuyta munaq precursora Randi sutiyuq iñiqmasinchikwan casarakururqani. Payqa munaqmi mana testigokunapa kasqanpi willakuyta. Llaqtan-llaqtan watukuqmi niwarqaku Orillia llaqtaman astakuspa yanapakunaykupaq, chay llaqtaqa karqa Ontario lawpim. Chaymi tukuy imachaykuta aparikuspa ripukurqaniku.

Warmichay Diosmanta kusisqallaña willakusqanraykum ñuqatapas gustawarqaña. Chaymi Orillia llaqtachaman chayaruptiyku tantiarurqani precursor kanaypaq chaynataq allin yachachiq kanaypaq. Achka runamasinchikkunatam Diosta servinankupaq bibliawan yanaparqani, chaywanmi ancha kusisqa tarikurqani. Dios yanapawaptinmi Orillia llaqtapi casarasqa warmi-qarita yanaparqani bautizakunankupaq.

Toronto llaqtata risqaypim riqsirurqani Arnold MacNamara sutiyuq iñiqmasinchikta, payqa Canada nacionpi betel wasimanta hukkaqnin cuentallikuqmi karqa. Chay iñiqmasinchikmi tapuwarqa sichu precursor especial kayta munasqaykumanta. Hinaptinmi chaylla nirqani: “Arí, munaymankum wawqichallay, ichaqa manam Quebec lawpiqa”, nispa. Chay tiempopiqa, Canada nacionniyuq ingles rimaq runakunaqa hukmantam qawarqaku Quebec llaqtapi  frances rimaq runakunataqa. Chaymi ñuqapas chayna nisqaywanqa paykuna hinaña piensachkasqani.

Arnoldmi ichaqa niwarqa: “Quebec llaqtallamanmi precursor especialkunataqa mandachkaniku”, nispa. Chaymi hinata “arí” nirqani. Musyarqanim warmichayqa chaypi willakuy munasqanta. Watakuna pasaytam cuentata qukurqaniku Quebecman risqaykuqa vidaykupaq ancha allin kasqanta.

Pichqa semanalla frances rimayta yachaykuptiykum huk casarasqa warmi-qari iñiqmasinchiktawan aviawarqaku Rimouski llaqtaman, chay llaqtaqa kachkan Montreal llaqtamanta karuniqpim. Manaraqmi allintaraqchu frances rimaytaqa yacharqani, chaymi huñunakuypi willakuyta leespay sumaq tuqyachiyta pantarurqani. Hatun huñunakuyninchikman “Austria nacionmantam hamunqaku” ninaymantaqa “raprayuq hatun animalkunam hamunqaku” nirusqani.

Rimouski llaqtapiqa ñuqaykuwan riq warmi-qari iñiqmasinchikpas hina chay wasillapim ñuqaykuwan kuska yacharqa. Chaypitaqmi yacharqaku tawa soltera paninchikkunapas. Chaymantapas hina chay wasillapim yacharqaku casarasqa warmi-qari iñiqmasinchik Huberdeaupas, paykunapaqa karqataqmi iskay warmi churinkupas. Iñiqmasinchik Huberdeaumi chay hatun wasita arriendarusqa, chaymi llapayku arriendon pagaypi yanaparqaniku. Pirqankunawan columnankuna yuraq kasqanraykum chay wasitaqa suticharqaniku “la Casa Blanca”, nispa. Chay wasipiqa yacharqaniku 12 runam, wakinpim ichaqa 14. Precursor especial kasqaykuraykum ñuqaykuqa yaqa tukuy punchaw Diosmanta willakuq kaniku. Chay wasipi yachaq iñiqmasinchikkunaqa turnanakuqkum chiripipas, tutanpas riysiwanankupaq. Chay ruwasqankumantam anchata agradecekuq kaniku.

Chay wasipi yachaq precursokunawanqa anchatam kuyanakururqaniku. Kusirikunaykupaqmi ninata rataykachispa muyuriqninpi tiyaq kaniku. Sapa semanataqmi pierogis empanadachata yanukuruspayku mikuq kaniku, sapa sabado tutanñataqmi huk iñiqmasinchik musicata tocaptin takiq hinaspa tusuq kaniku.

Rimouski llaqtayuqkunaqa Diospa llaqtanmanmi yaykumuyta qallaykurqaku. Pichqa watallapi bibliata estudiaq achka runakuna bautizakurusqankuraykum anchata kusikurqaniku. Chaymi congregacionniykupiqa 35 Diosmanta willakuqkunaña karqaniku.

Quebec llaqtapi kayniykuqa anchatam yanapawarqaku allin yachachiq kanaykupaq. Diosqa yanapawarqakum allinta willakunaykupaq. Manataqmi faltachipuwaqkuchu ima nesecitasqaykutapas. Chaymantapas, frances rimayniyuq runamasinchikkuna imayna kasqankuta riqsispaykum anchata kuyarurqaniku. Chayqa yanapawarqakum huklaw nacionniyuq hinaspa huk rimayniyuq runamasinchikkunatapas kuyanaykupaq (2 Cor. 6:13).

Chaymanta qipatam betelpi cuentallikuqkuna niwarqaku sichu Tracadie llaqtaman ripuyta atinaykumanta. Chayna niwanankutaqa manam piensarqanikuchu. Huk wasita arriendanaykupaqmi chayllaraq contratota ruwarurqaniku. Hinaspapas, escuelapim profesor karqani. Chaymantapas, bibliamanta yachachisqayku wakin runakunam chayllaraq Diosmanta willakuyta qallaykurqaku. Hinaspapas chay llaqtapim huñunakunanchik wasita ruwachkarqaniku. Ima ruwanaykupaq tantiakuyqa sasam karqa.

Allinta tantianaykupaqmi Diosninchikta mañakurqaniku. Chaymi tantiarurqaniku Tracadie llaqtaman ripukunaykupaq, chay llaqtaqa manam Rimouski llaqta hinachu karqa. Ichaqa ninakurqanikum: “Jehova Diosmi munachkan kay llaqtapi willakunanchikta. Chaynaqa kaypiñayá willakusun”, nispa. Chayta ruwasqaykuraykum Jehova Diosqa pisi-pisimanta bendeciwarqaku (Mal. 3:10). Warmichaypa imayna kasqanmi yanapawarqaku kusisqa kanaykupaq. Payqa  Diosninchiktam anchata kuyan, manam kikillanpichu piensan, hinaspapas asi-asillañam.

Tracadie llaqtapiqa Robert Ross iñiqmasinchikllam punta apaq karqa. Señoran Lindapiwanmi chay llaqtapi precursor kaspa yanapakurqaku, warmachanku karuptinmi hina chay llaqtallapiña qipakusqaku. Warmachankuta allinta uywaspankupas kallpanchakurqakum Diosmanta willakunankupaq. Chaymantapas samaykachikuqllañam karqaku. Chayna kasqankum anchata kallpanchawarqaku.

Tracadie llaqtapiña Diosmanta willakuchkaptiykum niwarqaku llaqtan-llaqtan watukuq kanaykupaq. Chaywanmi anchata admirakurqaniku. Qanchis watapunim ingles rimayniyuq iñiqmasinchikkunata watukurqaniku. Chaymantam ichaqa Quebec lawpi Frances rimayniyuq iñiqmasinchikkunataña watukurqaniku. Chaylawpi kaq superintendente de distrito Leonce Crepeault iñiqmasinchikmi sapa discurso yachachiyta tukuruptiy alaballawaq. b Chaymantam ichaqa niwaq: “¿Imaynatam yachachiwaq iñiqmasinchikkuna uyarisuspayki ruwayman churanankupaq?”, nispa. Chaymantapacham chaylla entiendekuqtaña yachachirqani hinaspa ruwayman churanapaq hinaña.

Ñuqaqa astawanqa yuyarini Montreal llaqtapi apakuq “Fe Victoriosa” niq hatun huñunakuytam. Chayqa karqa 1978 watapim. Chay huñunakuypim yanapakurqani iñiqmasinchikkunapaq mikuy yanuypi. Chay huñunakuymanqa yaqa 80.000 runakunam hamunanku karqa. Chay kutipiqa musuq maquinakunapiñam yanukunayku karqa. 20 camionniykum karqa mikuykunata guardanaykupaq, chay camionqa karqa hatun refrigerador hinam. Ichaqa wakinpim mana funcionaqchu. Chaymantapas, huk punchawllaña hatun huñunakuyninchikpaq faltachkaptinmi chay estadiopiqa apakurqa equipokunapa pukllaynin, chaymi chawpi tutakama yaykunaykupaq suyanayku karqa. Manaraq achikyamuchkaptinmi desayunota ruwanaykupaq hornopas prendesqaña kanan karqa. Llumpay pisipasqam karqaniku, chaywanpas chaypi yanapakuq iñiqmasinchikkunaqa manam piñakurqakuchu. Chayta qawaspam admirakurqani, chaymi chay iñiqmasinchikkunawanqa kunankamapas allin amistad kaniku. 1940 watamanta yaqa 1960 watakamam Quebec lawpiqa Diosmanta willakuyninchikta gobierno harkakurqa. Chaymi chaypi hatun huñunakuyninchik apakusqanqa ancha kusikunapaq karqa.

Montreal llaqtapi hatun huñunakuypi llaqtan-llaqtan watukuqkuna imayna yachachisqankuta  qawaspaymi ñuqapas paykunamanta yacharqani. Chay tiempopim Diospa llaqtanpi punta apaq iñiqmasinchik David Splaneta riqsirurqani. Payqa ñawpaqtaqa hatun huñunakuymantam cuentallikurqa. Chaymanta qipamanqa ñuqañam cuentallikurqani hatun huñunakuypiqa, hinaptinmi iñiqmasinchik Davidqa anchata yanapallawarqa.

36 watam iñiqmasinchikkunata llaqtan-llaqtan watukurqani. 2011 watapiñataqmi punta apaqkunapaq escuelapi yachachinaypaqña niykuwarqaku. Chaymi yaqa sapa semana huk wasipi puñuq kaniku. Sasa kaptinpas chay ruwasqaykum iñiqmasinchikkunata anchata yanaparqa. Semana tukuruptinmi punta apaqkunaqa anchata agradecekullawaq Diospa llaqtan ñuqaykuwan iñiyninkupi allin kanankupaq yanapasqanmanta.

Chaymantam niwarqaku Diospa gobiernonmanta willakuqkunapaq escuelapiña yachachiq kanaypaq. Chaypi estudiaq iñiqmasinchikkunaqa pisipasqam tarikurqaku yaqa tukuy punchaw estudiasqankurayku. Chaymantapas yaqa kimsa horam tareankuta ruwaqku. Yaqa sapa punchawtaqmi demostracionta utaq discursotapas ruwaqku. Escuelapi kaqkunatam yachachiqmasiypiwan niq kaniku: “Ama llakikuychikchu, Jehova Diospa yanapakuyninwanqa atinkichikmi”, nispa. Manamá haykapipas qunqasaqchu chay iñiqmasinchikkuna Jehova Diospi hapipakuspanku piensasqankumantapas aswan allintaraq tareankuta ruwasqankumanta.

Mamayqa bibliamanta yachachisqan runakunataqa tukuy imapim yanaparqa. Chaywanmi kallpanchasqa tarikurqaku bautizakunankupaq. Chayta qawaspam papaypas testigokunataqa allinpaqña qawarqa. Mamaypa wañukusqanmanta kimsa punchaw pasayllatam huñunakuyman kikillanmanta hamurusqa. Chaywanmi admirakurqaniku. Chay punchawmantapacham papayqa lliw huñunakuyman rirqa 26 watapuni. Mana bautizakuspanpas lliw huñunakuymanmi puntataraq chayarqa, chayna kasqantam punta apaqkuna willawarqa.

Mamayqa kimsa paniykunapaqwan ñuqapaqmi qatipakunaykupaq hina karqa. Chaymi paniykunapas qusankuwan kuska kunankama tukuy sunqunkuwan Jehova Diosninchikta servichkanku. Iskaynin paniykunam betelpi yanapakuchkanku, hukninmi Portugal nacionpi, hukninñataqmi Haiti nacionpi.

Kunanqa warmichaypiwanmi precursor especial kachkaniku Hamilton llaqtapi. Llaqtan-llaqtan watukuq kaspaykum iñiqmasinchikkunata bibliamanta yachachiq riysispayku kusikuq kaniku. Kunanmi ichaqa astawan kusikuniku kikiykuña yachay munaq runakunata yachachispayku. Chaymantapas kunanqa huñunakusqaykupi iñiqmasinchikkunatam aswan allintaña riqsiniku. Anchatataqmi kusikuniku ima sasachakuypiña tarikuptinkupas Diosninchik imayna yanapasqanta qawaspayku.

Iñiqmasinchikkuna imayna yanapawasqankuta yuyarispaykum Jehova Diosta anchata agradecekuniku. Chaymi ñuqaykupas iñiqmasinchikkunata tukuypi yanapaniku ‘allinlla kanankuta munaspayku’. Chaypaqqa kallpanchanikum Diospa llaqtanpi tukuy ima ruwaypi yanapakunankupaq (2 Cor. 7:6, 7). Congregacionniykupim huk warmi iñiqmasinchik qari wawanwan hinaspa warmi wawanwan precursor karqaku. Papanta imanasqa manaraq precursor kasqanmanta tapuptiymi niwarqa: “Kimsankutamriki yanapachkani precursor kanankupaq”, nispa. Chaymi nirqani: “¿Manachu Diosninchikqa qanmanta aswan allintaraq paykunata yanapanman?”, nispay. Kallpancharqanim precursor kaspanqa imakuna ruway atinanmanta, hinaptinmi suqta killamantaqa precursorña karqa.

Warmichaywan kuskam hinalla ‘qipa wiñaykunaman’ willasaqku Jehova Diospa ‘sumaq kaqkuna ruwasqanmanta’. Anchatam munaniku ñuqayku hina paykunapas Jehova Diosta servispanku kusisqa kanankuta (Sal. 71:17, 18).