Galatas 5:22, 23 apostol Pablo kaynata qillqarqa: ‘Taytanchik Jehovapa atiyninqa runakunatam kawsachin: Kuyakuqta, kusisqata, hawkallata, pacienciakuqta, sumaq sunquyuqta, kuyapayakuqta, iñiyniyuqta, llampu sunqullata hinaspa controlakuqta. Chaykunapa contranpiqa manam ima kamachikuypas kanchu’, nispa. Manam kayna kanallapaqchu taytanchik Jehovapa atiyninqa yanapawanchik.

Kaykunamanta manaraq qillqachkaspanmi apostol Pablo kaynata qillqarqa: “Aychapa munasqanman hina ruwaykunaqa kaykunam: Huchapakuykuna, millakuypaq ruwaykuna, mana pinqakuspa mana allin ruwaykuna, taytacha-mamacha yupaychaykuna, layqa ruwaykuna, chiqninakuykuna, liryanakuykuna, sientichinakuykuna, rabiakuykuna, mana acuerdopi churanakuykuna, rakinakuykuna, runakunapa yachachikuyninkunaman hapipakuykuna, envidianakuykuna, sinkakuykuna, mana pinqakuspa kusirikuykuna hinaspa chaykunaman rikchakuq llapa mana allin ruwaykunapas”, nispa (Gal. 5:19-21). Ichaqa aychapa mana allin munapayasqankunaqa manam kaykunallachu (Col. 3:5). Taytanchik Jehovapa atiyninpas manam Galatas 5:22, 23 nisqanman hina kanallapaqchu yanapawanchik.

¿Imaynanpitaq chaynataqa ninchik? Chaynataqa ninchik Galatas qillqapi apostol Pablopa qillqasqanwan Efesios qillqapi qillqasqan tupasqanraykum. Chaypim nin: “Achkipi kawsakuyqa tukuy imapi sumaq sunquyuq kaymi, allinta ruwaymi, chiqapman hina kawsakuymi”, nispa (Efes. 5:8, 9). Chaynaqa taytanchik Jehovapa atiyninqa yanapawanchiktaqmi Efesios qillqapi nisqanman hina kawsakunapaqpas.

Pabloqa yaqa chaynatam Timoteomanpas qillqarqa, qillqasqanpim nirqa: “Kallpanchakuyá allin ruwaq kanaykipaq, Diosta tukuy sunquykiwan servinaykipaq hinaspa iñiyniyuq, kuyakuq, takyaq chaynataq llampu sunqu kanaykipaq, qamqariki Diospa runanmi kanki”, nispa (1 Tim. 6:11). Kay nisqanmantaqa iñiyniyuq, kuyakuq hinaspa llampu sunqu kayllam Galatas 5:22, 23 nisqanpiqa rikurin, manam rikurinchu allin ruwaq kaywan Diosta tukuy sunquwan serviq kaywan allin takyaq kayqa. Ichaqa Pablom Timoteota nirqa allin ruwaq kananpaq. Chayna kananpaqqa taytanchik Jehovapa atiyninchá Timoteotaqa yanaparqa, Diosta tukuy sunqunwan servinanpaq hinaspa allinta takyananpaq (qaway Colosenses 3:12; 2 Pedro 1:5-7).

Chaynaqa manam Galatas 5:22, 23 nisqanman hina kanallapaqchu taytanchik Jehovapa atiyninqa yanapawanchik. Yanapawanchiktaqmi tukuy imapi allin runa kanapaqpas (Efes. 4:24).