1. ¿Imaynam tarikun taytanchik Jehovaqa chiriyasqakuna payman kutirikamuptinku?

KUNAN hinatam yacharqanchik taytanchik Jehovaqa chiriyaruq iñiqmasinchikkunata maskasqanmanta. Israel runakunatam nirqa: ‘Kutirikamuwaychik ñuqaman, ñuqapas qamkunamanmi kutirikamusaq’, nispa. Kunanpas taytanchik Jehovaqa hinalla munachkan chiriyaruq iñiqmasinchikkuna payman kutirikamunankuta. ¿Imaynanpitaq chayta yachanchik? Paymi nin: ‘Ñuqaqa hina kaqllam kani’, nispa (Mal. 3:6, 7). Jesuspas nirqam chiriyasqa iñiqmasinchikkuna kutirikamuptinku taytanchik Jehova hinaspa angelkuna anchata kusikusqankumanta (Luc. 15:10, 32).

2. ¿Imakunamantam kunan yachasun?

² Kunanmi yachasun Jesuspa rikchanachisqankunamanta. Chaymanta yachayqa yanapawasunmi chiriyasqa iñiqmasinchikkunata yanapanapaq. Yachasuntaqmi chiriyasqa iñiqmasinchikkunata imaynata yanapaykuymanta, hinaspa yanapaykunapaq imanasqa kallpanchakunamanta.

3, 4. ¿Imaynanpitaq kay warmiqa chinkaruq qullqinta tarinanpaq tukuyta ruwarqa?

³ Taytanchik Jehovaman kutirikamuyta munaq iñiqmasinchikkunata maskanapaqqa, tukuytam ruwananchik. Jesusmi willakurqa huk warmi chinkaruq qullqinta maskananpaq tukuyta ruwasqanmanta. ¿Imaynanpitaq tukuyta ruwarqa? Chay  qullqin ancha chaninniyuq kasqanraykum (qaway Lucas 15:8-10).

⁴ Jesuspa tiemponpiqa warmi mamakunam, wawankuman quqku dracma sutiyuq qullqita casarakusqan punchawpi. Jesuspa willakusqan warmiqa mamanpa qusqan qullqitachá chinkarachirqa. “Pampaman wichiruspanchiki chinkarun” nispanmi chay warmiqa mecheronta rataykachispan maskayta qallaykurqa. Ichaqa manam tarirqachu, chayraykum wasinta kuchun-kuchun pichayta qallaykurqa. Chaynapi chay chinkaruq qullqinta tarinanpaq. Chayna pichachkaspanmi chay qullqichanta qupakuna chawpinpi tarirurqa. Tarirusqanmanta ancha-anchata kusikuspanmi riqsinakusqankunaman willakurqa.

5. ¿Imaynanpitaq tukuyta ruwananchik chiriyaruq iñiqmasinchikkunata maskananchikpaq?

⁵ Jesuspa willakusqanwanmi yachanchik imapas chinkaruqta tarinapaqqa, tukuyta ruwanamanta. Chaynam tukuyta ruwananchik chiriyaruq iñiqmasinchikkunata maskananchikpaqpas. Ichapas chiriyaruq iñiqmasinchikkunaqa una-unay watakunaña mana huñunakunkuchu utaq huk lawmanpas ripukunku. Ichaqa, yaqachá kunallanpas achka chiriyaruq iñiqmasinchikkunaqa taytanchik Jehovaman kutirikamuyta munachkanku. Paykunaqa kaqllamantam ñuqanchikwan kuska taytanchik Jehovata yupaychayta munanku. Chaypaqqa yanapaykunanchiktam munanku.

6. ¿Imaynatam llapallanchik yanapakuchwan chiriyaruq iñiqmasinchikkunata maskanapaq?

⁶ ¿Pikunataq maskananku chiriyaruq iñiqmasinchikkunata? Llapallanchikmi. ¿Yaqachu pi riqsinakusqanchikpas utaq ayllunchikpas chiriyasqa kachkan? ¿Yaqachu willakusqanchikpi tarirqanchik chiriyasqa iñiqmasinchikkunata? Chiriyasqa iñiqmasinchikkunata tariruspaqa punta apaqkunamanmi willananchik.

7. ¿Imatam yachachwan iñiqmasinchik Tomaspa willakusqanmanta?

⁷ ¿Imatam ruwanmanku punta apaqkunapas taytanchik Jehovaman kutirikamuy munaqkunata tarinankupaq? Punta apaq iñiqmasinchik Tomaspa * ima ruwasqanmantayá yachaykusun. Payqa tawa chunka masnin chiriyasqa iñiqmasinchikkunatam yanaparqa taytanchikman kutirikamunankupaq. Paymi willakun: “Puntatam iñiqmasinchikkunata tapuni chiriyaruq iñiqmasinchikkuna maypi yachasqankumanta, utaqmi nini: ‘¿Pillatapas riqsinkichikchu huñunakuykunaman manaña hamuq iñiqmasinchikkunata?’, nispa. Iñiqmasinchikkunaqa anchatam yanapawan chiriyaruq iñiqmasinchikkunata maskaypi. Chiriyaruq iñiqmasinchikkunata tariruspaypas churi-wawankumanta hinaspa ayllunkunamantam tapuni. Tapuniqa paykunatapas yanapaykunaypaqmi”, nispa.

8. Lucas 15:17-24 nisqanman hinaqa, ¿piñakururqachu taytaqa ripukuq churinwan?

⁸ ¿Imaynam kananchik taytanchik Jehovaman kutirikamuy munaq iñiqmasinchikkunata yanapanapaq? Chaypaqyá qawaykusun Jesuspa willakusqan rikchanachiymanta (qaway Lucas 15 :17-24). Jesusmi willakurqa taytanta mana kasukuspan ripukuq churimanta. Payqa huk punchawmi taytanpa kasqanman kutimunanpaq tantiakururqa. Taytanpa wasinman chayaruptinmi taytanqa makinta kichariykuspan kusisqallaña taripaykurqa, churinqa manchapakuspanmi taytanman asuykurqa, manañam churinpaq hinañachu hapikurqa. Chayta qawaspanmi taytanqa ancha-anchata llakirikurqa, hinaspam runankunata nirqa mikuyta  yanukunankupaq chaynataq allinnin kaq pachata apamuspa chaywan pachachinankupaq. Tukuy chaykunataqa ruwarqa churinta kuyasqanraykum.

9. ¿Imaynam kananchik chiriyaruq iñiqmasinchikkunata yanapanapaq? (Qaway  ¿Imaynatam yanapachwan taytanchik Jehovaman kutirikamuy munaq iñiqmasinchikkunata? niqta).

⁹ Taytanchik Jehovaqa Jesuspa willakusqan rikchanachiypi tayta hinam. Payqa chiriyasqa iñiqmasinchikkunatam ancha-anchata kuyan. Chaymi munan payman kaqmanta kutirikamunankuta. Ñuqanchikpas kuyakuq kaspaqa atisunmi chiriyasqa iñiqmasinchikkuna taytanchik Jehovaman kutirikamunankupaq yanapaytaqa. Chaypaqqa mana amispam yanapananchik, llakipayakuq hinaspa kuyakuqllañataqmi kananchik (Sant. 2:13). ¿Imaynanpitaq kaynaqa kananchik? ¿Ima ruwasqanchikpim chayna kasqanchikqa qawakunqa?

10. ¿Imaynanpitaq mana amispa yanapananchik chiriyaruq iñiqmasinchikkunata?

¹⁰ Chiriyaruq iñiqmasinchikkunata yanapaykuytaqa manam amirunanchikchu. Achka chiriyasqa iñiqmasinchikkunam ninku iñiqmasinchikkunapa kuti-kutirispa yanapasqankurayku taytanchik Jehovaman kutirikamusqankuta. Iñiqmasinchik Nancipas ninmi: “Huk kaqnin iñiqmasinchikmi ñañaypas hina yanapaykuwarqa. Kuskayku tukuy ima ruwasqaykutam yuyarichiwarqa, imayna tarikusqaymanta willakuptiypas mana amispam uyariykuwarqa. Sumaqta uyariykuwaspanmi allinllata rimapayawaq”, nispa.

11. Llakipayakuq kayninchikqa, ¿imapaqmi yanapawasun?

¹¹ Llakipayakuq kayqa anchatam yanapawanchik chiriyaruq iñiqmasinchikkuna imayna tarikusqankupi yuyaymananapaq. Wakin iñiqmasinchikkunaqa chiriyarurqaku piwanpas piñanakurusqankuraykum  hinaspam kunankamapas hukmanyasqa tarikunku. Chayraykum taytanchik Jehovaman kutirikamuytaqa mana munankuchu. Ichapas ninku: “Yanqamantam kaytaqa ruwawanku”, nispa. Paykunaqa anchatam munanku imayna tarikusqankumanta pipas uyariykunanta (Sant. 1:19). Iñiqmasinchik Mariapas ninmi: “Unaymi hukmanyasqa tarikurqani, chaymi munarqani imayna tarikusqaymanta pipas uyariykuwananta”, nispa.

12. ¿Imanasqataq ninchik taytanchik Jehovapa kuyakuyninqa waska hina kasqanmanta?

¹² Bibliapim niwanchik taytanchik Jehovaqa kuyakuqllaña kasqanta. Kuyakuqllaña kasqanmi yanapawarqanchik payman asuykunapaq. ¿Imaynataq chayqa? Chaymanta yachaykunapaqyá yuyaymanasun kaypi. Ukullay-uku uchkuman wichiykuspaqa manam kikillanchikmantaqa lluqsimuyta atichwanchu, pipas waskata chuqaykamuwaspanchik chutamuwaptinchikmi ichaqa lluqsimuyta atichwan. Yaqa chay waskawan hinam taytanchik Jehovapas kuyakuq kasqanrayku chiriyaruq iñiqmasinchikkuna payman kutirikamunankupaq yanapayta munan. Ñawpaq tiempopipas taytanchik Jehovaqa, paymanta karunchakuruq Israel runakunatam yanaparqa kaqmanta payman kutirikamunankupaq (Os. 11:4).

13. ¿Imaynatataq kuyakuqllaña kayninchikqa yanapanman chiriyasqa iñiqmasinchikkunata? Willarimuy iñiqmasinchik Pablomanta

¹³ Chiriyaruq iñiqmasinchikkunataqa ninanchikmi taytanchik Jehova hinaspa ñuqanchikpas anchata kuyasqanchikta. Kimsa chunka wata masnin chiriyasqa iñiqmasinchik Pablom nin: “Huk punchawmi wasiymanta lluqsichkarqani hinaptinmi huk payacha asuykamuwarqa, payqa iñiqmasinchikmi kasqa. Hinaspam kuyakuyllawanña rimapayaykuwarqa, chaymi uña  warma hina waqayta qallaykurqani. Nirqanim ‘taytanchik Jehovam qamtaqa kachamusurqanki’ nispay, chay punchawmi taytanchik Jehovaman kutirikamunaypaq tantiakururqani”, nispa.

14. Lucas 15:4, 5 nisqanman hinaqa, ¿imatam ruwarqa michiq, chinkaruq ovejanta tariruspan?

¹⁴ Chiriyaruq iñiqmasinchikkuna taytanchik Jehovaman kutirikamuptinkupas hinallam yanapananchik hinaspa kallpanchananchik, paykunaqa ichapas hukmanyasqaraq tarikunku. Chaymantapas taytanchik Jehovamanta unay watakuna karunchasqa kasqankurayku, ichapas sasachakunqaku taytanchik Jehovata yupaychaypi. Chayraykum ñuqanchikqa yanapananchik allin iñiyniyuq kanankupaq. Jesuspa willakusqan rikchanachiypiqa michiqqa chinkaruq ovejantam tariruspan marqayninpi apaspan kastanman kutichin. Kutirachispanpas hinallaraqmi chay ovejachanmanqa hampita quspan mikuchin (qaway Lucas 15:4, 5).

15. ¿Imaynatam yanapaykuchwan taytanchik Jehovaman kutirikamuq iñiqmasinchikkunata? (Qaway “ ¿Ima qillqanchiktaq yanaparqa Diosman kutirikamunankupaq?” niqta).

¹⁵ Ñuqanchikqa tukuytam ruwananchik kanqa kutirikamuq iñiqmasinchikkuna taytanchik Jehovallapi hapipakunankupaq (Rom. 15:1). Chaypaqqa taytanchik Jehovam atiyninwan  yanapawasun. Yanapawasuntaqmi biblianchikpas chaynataq qillqanchikkunapas. ¿Imaynatam yanapaykuchwan taytanchik Jehovaman kutirikamuq iñiqmasinchikkunata? Punta apaq iñiqmasinchikmi willakun: “Taytanchik Jehovaman kutirikamuq iñiqmasinchikkunataqa kaqllamantam taytanchikmanta yachachinanchik”, nispa. * Chaynaqa taytanchik Jehovaman kutirikamuq iñiqmasinchikkunata yanapanapaq punta apaqkuna niwaptinchikqa, chayllayá yanapaykusun. Punta apaq iñiqmasinchikqa ninraqmi: “Taytanchik Jehovaman kutirikamuq iñiqmasinchikkunaqa munankum pipas tayta-maman hina yanapaykunankuta”, nispa.

16. ¿Imaynatam yachanchik angelkuna yanapawasqanchikta?

¹⁶ Chiriyasqa iñiqmasinchikkunata tarinapaqmi taytanchik Jehovapa Angelninkuna yanapawanchik (Apoc. 14:6). Huk kutipim taytanchik Jehovapa angelninkunaqa punta apaqkunata yanaparqa iñiqmasinchik Silveriota tarinankupaq. Payqa wasinpis taytanchik Jehovata mañakuchkasqa, chaysi manaraqpas mañakuyta tukuchkaptin punkunta takaykamusqaku. Paykunaqa kasqa punta apaqkunas. Chaysi chaypunilla yanapayta qallaykusqaku taytanchik Jehovaman kutirikamunanpaq.

17. ¿Imaynam tarikunchik chiriyasqa iñiqmasinchikkunata yanapaspaqa?

¹⁷ Chiriyasqa iñiqmasinchikkuna taytanchik Jehovaman kutirikamuptinkuqa ancha kusisqam tarikunchik. Chiriyasqa iñiqmasinchikkunata yanapaq iñiqmasinchik Sabinopas kaynatam nin: “Ñuqaqa kusikuymantam waqaniraq chiriyasqa iñiqmasinchikkuna taytanchik Jehovaman kutirikamuptinku. Ancha-anchatam kusikuni paykuna yanapaykusqaymanta”, nispa (Hech. 20:35).

18. ¿Imamantam mana iskayrayanaykichu chiriyasqa kaspapas?

¹⁸ Kuyasqay iñiqmasillay, unay watakunaña chiriyasqa kaspaykipas amayá iskayrayaychu taytanchik Jehova kuyasusqaykimantaqa. Payqa munanmi kutirikamunaykita, chaypaqqa kallpanchakunaykichá kanqa. Ichaqa amayá qunqaychu taytanchik Jehovaqa makinta kichariykuspanmi suyasuchkanki.