LLAPALLANCHIKMI yachanchik kay “tukupay punchawkunapiqa” taytanchik Jehova llaqtanta pusasqanta (2 Tim. 3:1). Chaymi Diosta kasukunapaq kallpanchakuyninchikqa ancha allin. Ñuqanchikqa kachkanchik ñawpaq tiempopi chunniqpi tarikuq Israel runakuna hinam. Paykunaqa trompetapa waqasqanta uyarispankum kasukuqku.

Moisestam taytanchik Jehova nirqa qullqimanta iskay trompetakunata ruwachinanpaq, chaykunam servikurqa ‘runakunata huñunapaq chaynataq maymi kasqankumanta ñawpaqman rinankupaqpas’ (Num. 10:2). Sacerdotekunaqa manamá chaynallatachu trompetakunataqa waqachiqku Israel runakuna imatapas ruwanankupaqqa (Num. 10:3-8). Chaynam kunanpas, taytanchik Jehovaqa trompetata waqachichkaq hina qayachiwanchik hatun huñunakuykunaman rinanchikpaq, punta apaqkunatapas qayachintaqmi yachachisqa kanankupaq. Chaymantapas, trompetata waqachichkaq hinataqmi lliw iñiqkunata qayachimun huñunakuykunapi musuq kamachikuykunata uyarinanchikpaq.

Taytanchik Jehovaqa llapallan Israel runakuna carpanpa ñawpaqninman huñunakunankupaqmi iskay trompetakunata sacerdotekunawan waqachiq (Num. 10:3). Llapallam Israel runakunam chayta uyarispankuqa yachaqkuña imapaq kasqanmanta. Yaqapaschá Diospa carpanpa hichpallanpi yachaqkunaqa chaylla chayaqku, karupi yachaqkunañataqchá unamullaqku. Chaywanpas taytanchik Jehovaqa munarqa lliw yupaychaqninkuna huñunakunankutam, chaynapi llapallanku kamachikuyninkuta uyarinankupaq.

Kunan punchawkunapas, taytanchik Jehovaqa hatun huñunakuykunamanmi qayachiwanchik, chaypi kamachikuyninkunata uyarinanchikpaq. Enteron pachapi iñiqmasinchikkunam hatun huñunakuykunaman rinku hina chay yachachikuyllata chaskinankupaq. Chay huñunakuykunaman rinankupaqqa karullay-karutam wakin iñiqmasinchikkunaqa illanku. Ichaqa kusisqamá wasinkumanqa kutimunku.

Wakin iñiqmasinchikkunañataqmi karullay-karupi yachasqankurayku internetllawanña hatun huñunakuykunata qawanku. Chaypipas kachkankuman hinam tarikunku. Chaynatam ruwarqaku Nigeria nacionpa karu-karu llaqtanpi yachaq iñiqmasinchikkuna. Paykunam internetllanta qawarqaku Benin nacionpi betelta watukamuq iñiqmasinchikpa yachachisqanta. Chay  iñiqmasinchikkunaqa aschalla kachkaspankupas Benin nacionpi achka iñiqmasinchikkunawan kuska huñunakuytapas uyarichkanmankupas hinam tarikurqaku. Chay karullay-karu llaqtachapi yachaq iñiqmasinchikmi nin: “Anchatam agradecekuniku chay huñunakuyta uyarinaykupaq tukuyta ruwasqaykichikmanta. Kaywanmi musyakuniku anchata kuyawasqaykikuta”, nispa.

Sacerdotekuna huknin trompetallata waqachiptinkuqa, ‘Israelpa mirayninkunapi waranqa runakunapa kamachiqninkunallam’ Diospa carpanpa ñawpaqninman huñunakuqku (Num. 10:4). Hinaptinmi Moisesñataq paykunata yachachiq allin kamachiqkuna kanankupaq. Sichum huk kaqnin kamachiq kaspaqa tukuytachá ruwachwan karqa chaypi kanapaq hinaspa yachachikuykunata uyarinapaq, ¿aw?

Punta apaqkunaqa manamá “munaychakuq hinachu” iñiqkunataqa kamachinku (1 Ped. 5:1-3). Paykunaqa kallpanchakunkum allin punta apaqkuna kanankupaq. Chaymi allin punta apaq kanankupaq yachachikuy kaptinqa kusisqallaña rinku. Chay yachachikuyta chaskisqankuqa yanapanmi imapas ruwayninkuta allinta ruwanankupaq, hinaspa llapallan iñiqkunatapas iñiyninkupi allinta yanapanankupaq. Manaña punta apaqkuna kaspanchikpas, yanapachikuchwanmi punta apaqkunapa yachachikuy chaskisqankuwanqa.

‘Guerrapaq hina trompetata’ sacerdotekuna waqachiptinkuñataqmi llapallan Israel llaqta yachaqku huk lawmanña rinankuta taytanchik Jehova munasqanta (Num. 10:5, 6). Manam chapu-chapuchu lluqsiqku, aswanqa sapakamam tupasqankuman hina. Wakinqa qillapakuqkuchá rinankupaq qipichakuytaqa. ¿Imanasqa?

Wakin Israel runakunaqa nirqakupaschá sapa kutillaña hinaspa qunqayllamanta huk lawman illanankupaq trompetata waqachipayasqankumanta. Bibliam willawanchik, wakin kutipiqa Diospa carpanpa hawanpi kaq puyuqa huk tutalla karuspan paqarintinmanqa huqarikusqantaña. Wakinpiñataq ‘iskay punchawpas, huk killapas utaq huk watapas’ hinallapi kasqanmanta (Num. 9:21, 22). Chaymantapas, Numeros 33 kaqninpim willawanchik yaqa 40 qawaqpi Israel runakuna samasqankumanta.

Ichapas wakin Israel runakunaqa ‘chay manchakuypaq chunniqpiqa’ samanankupaq hina allpakunata tarirqaku (Deut. 1:19). Ichapas chayrayku chayllapiña qipakuyta munarqaku hukta manaña chaynata tarinankuta piensaspanku.

Guerrapaq hina trompetata waqachiptinkuqa llapallan Israel llaqtam uyariqku. Ichaqa manamá llapallankuchu chayllaqa lluqsiqku, aswanqa tupasqankuman hinam. Ichapas chayna suyasqankuwan wakinqa piñapakuqku. Guerrapaq hina trompetata waqachiptinkum lluqsiqku Juda, Isacar hinaspa Zabulon ayllukunallaraq (Num. 2:3-7; 10:5, 6). Chaynata waqachiptinkum wakin ayllukunapas tupasqankuman hina lluqsiqku.

Kay punchawkunaqa Diospa llaqtanmi musuq kamachikuykunata quwachkanchik, ichapas chaykunata ruwayman churanapaq qillapakurqanchik. ¿Imanasqa? Punta ruwayninchikman amañarusqanchikrayku. Ichaqa yacharqanchikmi chay musuq kamachikuyta kasukuyqa allinninchikpaq kasqanmanta. Hinalla chayna kallpanchakuptinchikqa taytanchik Jehovam yanapawasunchik.

Taytanchik Jehovam Israel runakunata yanaparqa chunniqninta illaptinku. Pay waqaychasqanraykum mana imapas paykunataqa pasarqachu. Kay tukupay punchawkunapipas taytanchik Jehovam yanapawachkanchik iñiyninchikpi allin kanapaq. Chaynaqa, ñuqanchikpas tukuy imapiyá taytanchik Jehovata kasukusun imaynam Israel runakuna trompetapa waqasqanta kasukusqankuman hina.