1. ¿Imanasqataq Diospa serviqnin kanchik?

KIKIN Jehova Diosmi sapakamata akllawarqanchik paypa serviqnin kananchikpaq (Juan 6:44). Arí, payqa achka-achka runakunamantam allin sunquyuq kasqanchikta qawawaspanchik akllaykuwarqanchik (1 Cron. 28:9). Jehova Diosqa riqsiwanchikmi, yanapawanchikmi hinaspapas anchatam kuyawanchik.

2. ¿Imawanmi Jesus rikchanachirqa taytan sapakamata kuyawasqanchikta yachanapaq?

² Jehova Diosqa sapakamatam anchata kuyawanchik. Chaymanta allinta yachanapaqmi michiqmanta rimaspan Jesus kaynata nirqa: “Pachak ovejayuq runapa huknin ovejan chinkaruptinqa, ¿manachu isqun chunka isqunniyuq ovejanta urqupi saqiykuspan chay chinkasqa ovejanta maskaq rinqa?”, nispa. Chay chinkasqa ovejachanta tariruspanqa manamá piñakunchu, aswanqa kusikunmi. Chaywanmi yachanchik Diosqa oveja michiq hina sapakamata anchata kuyawasqanchikta. Jesusmi nirqa: ‘Taytayqa manam munanchu kay uchuychakunamanta hukllanpas chinkarunantaqa’, nispa (Mat. 18:12-14).

3. ¿Imakunamantam kay yachachikuypi yachasun?

³ Manamá munanchikchu ruwasqanchikwan utaq rimasqanchikwan iñiqmasinchikkunata sientirachiytaqa. Chaymi kay yachachikuypi kay tapukuykunamanta yachasun: ¿Imatam ruwachwan iñiqmasinchikkunata mana sientirachinapaq? ¿Imatam ruwachwan iñiqmasinchikkuna sientirachiwaptinchik?  Chaykunamanta manaraq yachachkaspayá yachaykusun Mateo 18 capitulopi uchuychakunamanta Jesuspa nisqan pikuna kasqanmanta.

4. ¿Pikunam kanku Jesuspa nisqan ‘uchuychakuna’?

⁴ Jesuspa nisqan ‘uchuychakunaqa’ llapallan paypa qatiqninkunam kanchik. Jesuspa yachachisqan kasqanchikraykum warmachakuna hina kanchik (Mat. 18:3). Chaymantapas, maymantaña kaspanchikpas utaq mana chaynalla kaspanchikpas llapanchikmi Jesuspi iñinchik, Jesusñataqmi anchata kuyawanchik (Mat. 18:6; Juan 1:12).

5. ¿Imaynataq Dios tarikun serviqninkunata pipas sientirachiptin utaq imanaruptinpas?

⁵ Jesuspa nisqan ‘uchuychakunataqa’ utaq Diospa llapallan serviqninkunataqa anchatam Jehova Diosqa kuyawanchik. Warmachakunaqa manam yuyayniyuqkuna hinachu kanku, chaymi pipas imanaruptinqa piñakunchik. Chaynam Jehova Diospas serviqninkunata pipas sientirachiptinqa utaq imanaruptinpas piñakun. Payqa manamá munanchu pipas imanawananchiktaqa (Is. 63:9; Mar. 9:42).

6. 1 Corintios 1:26-29 nisqanman hinaqa, ¿imaynataq Jesuspa qatiqninkunaqa runakunapaq kanchik?

⁶ ¿Imanasqaraqtaq Jesuspa qatiqninkunaqa ‘uchuychakuna’ hina kanchik? Runakunapa despreciasqan hinaspa mana valeqpaq qawasqan kasqanchikraykum. Jehova Diospaqmi ichaqa mana chaynachu kanchik. Runakunaqa apukunata, ancha riqsisqa runakunata hinaspa munayniyuqkunatam aswan allinpaqqa hapinku (qaway 1 Corintios 1:26-29).

7. ¿Iñiqmasinchikkunawan imayna kananchiktam Jehova Diosqa munan?

⁷ Jehova Diosqa llapallan serviqninkunatam kuyawanchik. Chaymi ñuqanchikpas llapallan iñiqmasinchikkunata kuyananchik (1 Ped. 2:17). Manam munanchikchu paykunata imapas pasarunantaqa, hinaspapas yanapaykuytam munanchik. Mayqin iñiqmasinchiktapas piñarachispaqa utaq sientirachispaqa manam ninanchikchu: “¿Chayllawanchu piñakurun?”, nispaqa. Wakin iñiqmasinchikkunaqa ichapas chaylla piñakuq utaq sientikuq kanku imayna uywasqa kasqankurayku. Wakinkuñataqmi chayllaraq bautizasqa kachkanku, ichapas chayrayku iñiqmasinkunapa pantasqankuwan hukmanyanku. Imaraykuña sientirachinakuspanchikpas pampachaykanakunanchikmi. Imawanpas chaylla sientikuruq kaspaqa mana chayna kanapaqmi kallpanchakunanchik. Chayqa allinmi kanqa kikinchikpas chaynataq iñiqmasinchikkunawanpas allinlla kanapaq.

8. ¿Imanasqataq Jesuspa qatiqninkunaqa hukkunamanta aswan riqsisqa kayta munarqaku?

⁸ ¿Imanasqataq Jesusqa qatiqninkunamanta rimaspan ‘uchuychakuna’ nispa nirqa? Qatiqninkunam Jesusta tapurqaku: “¿Pitaq hanaq pacha Diospa munaychakuyninpi aswan riqsisqaqa?”, nispanku (Mat. 18:1). Jesuspa tiemponpi judiokunaqa qullqisapa kayta hinaspa allin riqsisqa kaytam anchata munaqku. Yaqachusmi chayrayku Jesuspa qatiqninkunapas hukkunamanta aswan riqsisqa kayta munarqaku.

9. ¿Imapaqmi Jesuspa qatiqninkunaqa kallpanchakunanku karqa?

⁹ Jesusqa yacharqam wakin judiokuna hina mana kanankupaq qatiqninkuna anchata kallpanchakunankuta. Chaymi nirqa: “Qamkunamanta pipas riqsisqa kaqqa llapallanpa sullkan hinam kanan, kamachiqpas sirviente  hinam kanan”, nispa (Luc. 22:26). “Llapallanpa sullkan” hina kanapaqqa hukkunatam ñuqanchikmanta aswan allinpaq hapinanchik (Filip. 2:3). Chayna kanapaq kallpanchakuspaqa manam hukmanyachisunchu hukkunataqa.

10. ¿Apostol Pablopa ima nisqantam kasukunanchik?

¹⁰ Llapallan iñiqmasinchikkunam ñuqanchikmantaqa imapipas aswan allin kanku. Chayna kasqankutam yachasunchik paykunapa allinkuna ruwasqankuta utaq allin sunqu kasqankuta qawaspanchik. Corinto llaqtayuq iñiqmasinkunaman Pablopa nisqantam kasukunanchik, paymi nirqa: “¿Pitaq qamtaqa wakinmanta aswan allinta ruwasunki? Chiqaptapuniqa, ¿imataq qampaqqa kan mana chaskisqaykiqa? Chaskichkaspaykiqa, ¿imanasqataq alabakunki manapas chaskichkawaqchu hinaqa?”, nispa (1 Cor. 4:7). Chaynaqa, amayá hukkunamanta aswan allin kasqanchikpaqqa hapikusunchu. Mayqanninchikpas huñunakuykunapi allin yachachiq kaspaqa utaq achka runaman bibliamanta yachachispaqa Jehova Diospa yanapakuyninwan chaykuna ruwasqanchiktam riqsikunanchik.

11. ¿Imatam yachanchik kamachiqmantawan sirvientenmanta Jesuspa willasqanmanta?

¹¹ Hukkunata mana sientichinankupaq utaq mana hukmanyachinankupaq qatiqninkunata niruspanmi Jesusqa kamachiqmantawan sirvientenmanta rikchanachiyta willarqa. Chay kamachiqmi sirviententa pampachaykurqa mana haykapipas pagay atinan debesqanmanta. Chaymantam chay sirvienteqa sirvientemasinta mana pampachayta munarqachu aslla debechkaptinpas. Hinaptinmi kamachiqqa mana pampachay munaq sirvienteta carcelman wichqarachirqa. Chaymanta willaruspanmi Jesusqa nirqa: “Chaynallatataqmi hanaq pachapi taytaypas qamkunata ruwasunkichik, wawqikichikta sapakama sunqumanta mana pampachaptikichikqa”, nispa (Mat. 18:21-35). Chaynaqa, Dios pampachawananchikpaqqa iñiqmasinchikkunatam pampachaykunanchik.

12. Pitapas mana pampachayta munaptinchikqa, ¿imaynataq hukkunapas kanqaku?

¹² Mana pampachay munaq sirvienteqa mana llakipayarispanmi sirvientemasintaqa carcelman churarachirqa debesqanta pagapunankama. Chaymantapas, Jesuspa nisqanman hinam chay sirvientepa ruwasqanwanqa wakin sirvientemasinkunapas llumpayta llakikururqaku. Chaynallataqmi ñuqanchikpas sientirachiwaqninchik iñiqmasinchikta mana pampachaptinchikqa llumpayta llakikunman. Ichapas manaña kuyasunñachu utaq manaña rikuytapas munasunñachu. Chayna kaptinchikqa wakin iñiqmasinchikkunapas hukmanyarunmankum.

13. ¿Imatam yachachwan iñiqmasinchik Crystalpa willakusqanmanta?

¹³ Pampachakuq kayqa allinninchikpaqmi, hukkunapas hawkataqmi tarikunqaku. Crystal sutiyuq iñiqmasinchikmi nin: “Huk iñiqmasinchikpa niwasqankunam cuchillopa tuksisqan hinaraq nanawaq. Diosmanta willakuq lluqsispaypas manam paywan willakuq riytaqa munaqchu kani. Chaywanqa manañam kusisqañachu karqani”, nispa. Chay iñiqmasinchikpa nisqanwan piñakunan kaptinpas Crystalqa iñiqmasinpaq mana piñasqalla kananpaqmi kallpanchakurqa. Hinaspanmi mana hatun tukuspan pampachakuymanta rimaq yachachikuyta * kasukuspan iñiqmasinta pampachaykurqa. Paymi nin: “Llapallanchikmi kallpanchakuchkanchik Diospa munasqanman  hina kawsakunapaq. Jehova Diosqa sapa punchawmi pampachawanchik. Pampachakuq kaspayqa hawka hinaspa kusisqam tarikuni”, nispa.

14. (1) Mateo 18:21, 22 nisqanman hinaqa, ¿Pedro imayna kasqantam nichwan? ¿Imatam yachachwan Pedrota Jesuspa nisqanmanta? (2) ¿Imataq yanapawasun pampachayta mana atiptinchikqa?

¹⁴ Pampachakuq kayqa wakinpiqa sasam. Yaqachusmi apostol Pedropaqpas chayna karqa (qaway Mateo 18:21, 22). ¿Imataq yanapawasun pampachakuq kanapaq? Puntataqa sapa punchaw Jehova Dios pampachawasqanchikpim yuyaymanananchik (Mat. 18:32, 33). Mana pampachawananchikpaq hina kaptinchikpas payqa pampachawanchikmi (Sal. 103:8-10). Kuyanakunanchikpaqtaqmi kamachisqa kachkanchik, chayraykum iñiqmasinchikkunawanqa pampachaykanakunanchikpuni (1 Juan 4:11). Pampachakuq kanapaqqa yanapawasuntaqmi imanasqa ancha allin kasqanpi yuyaymanaypas. Pampachakuq kaptinchikqa sientirachiwaqninchikpas hawkam tarikunqa. Iñiqmasinchikkunawanpas huk sunqullam kasun. Jehova Diospas astawanmi kuyawasun, hinaspapas hawkam kikinchikpas tarikusun (2 Cor. 2:7; Col. 3:14). Chaymantapas, pampachakuq kanapaqqa Jehova Diosmi yanapawasun, chaymi payta mañakunanchik. Iñiqmasinchikkunamanta satanas mana karuncharuwananchikpaqmi anchata kallpanchakunanchik, chaypaqqa Jehova Diosmi yanapawasun (Efes. 4:26, 27).

15. Colosenses 3:13 nisqanman hinaqa, ¿imatam ruwananchik mayqin iñiqmasinchikpas sientirachiwaptinchik?

¹⁵ ¿Imatam ruwachwan iñiqmasinchik imawanpas sientirachiwaptinchikqa? Jehova Diosta mañakuspam willakunanchik imayna tarikusqanchikta. Mañakunanchiktaqmi sientirachiwaqninchikpaqpas. Jehova Diosqa iñiqmasinchikkunapa allin sunquyuq  kasqantam qawan. Chayna kananchikpaqmi ñuqanchikpas mañakunanchik (Luc. 6:28). Sientirachiwasqanchikta mana qunqayta atispaqa paywanmi rimananchik, hinaspapas mana disyunta utaq llullanta sientirachiwasqanchiktam piensananchik (Mat. 5:23, 24; 1 Cor. 13:7). ¿Imatam ruwachwan allinyanakuyta iñiqmasinchik mana munaptinqa? Bibliam nin: “Hinallayá aguantanakuychik”, nispa (qaway Colosenses 3:13). Amayá iñiqmasinchikpaqqa piñasqallañaqa kasunchu, manachayqa Jehova Diosmantam karunchakuruchwan. Diosta tukuy sunquwan kuyaspaqa pampachakuykuqmi kasun (Sal. 119:165).

16. ¿Imapaqmi llapallanchik kallpanchakunanchik?

¹⁶ ¡Anchatamá kusikunchik “huk kanchallaña” chaynataq “huk michiqniyuqllaña” hina Jehova Diosta huk sunqulla yupaychasqanchikwanqa! (Juan 10:16). Castellano rimaypi Organizados para hacer la voluntad de Jehová sutiyuq qillqapim 165 paginanpi nin: “Llapallanchikmi kallpanchakunanchik huk sunqulla kananchikpaq”, nispa. Nintaqmi: “Jehova Diosta qatipakuspa iñiqmasinchikkunapa allin kasqankuta qawaspaqa huk sunqullam kasun”, nispa. Jehova Diospaqqa llapallanchikmi ‘uchuychakuna’ hina kanchik. Llapallanchiktam payqa kuyawanchik. Ñuqanchikpas chaynam iñiqmasinchikkunawan kananchik. Diosqa manam qunqanqachu iñiqmasinchikkunapaq imapas ruwasqanchiktaqa (Mat. 10:42).

17. ¿Imatam ruwananchik iñiqmasinchikkunata kuyaspaqa?

¹⁷ Llapallan iñiqmasinchikkunatam anchata kuyanchik. Chaynaqa, “tukuy atisqanchiktayá ruwasun pitapas mana urmachinapaq, iñiqmasinchikpa ñawpaqninpipas amayá ima sasachaqnintapas churasunchu” (Rom. 14:13). Iñiqmasinchikkunatayá ñuqanchikmantapas aswan allinpaq hapisun, hinaspayá sunqumanta pampachaykusun. Amayá hukmanyasunchu paykunapa imapas ruwasqankuwanqa, aswanqa ‘hinallayá ruwasun hawkalla kanapaq imapas yanapawaqninchik kaqkunata hinaspa kikinchikpura kallpanchanakunapaq kaqkunata’ (Rom. 14:19).