Pablom qillqarqa: “Ñuqaqa leynintakamam chay leypaqqa wañuruniña, chaynapi Diospaqña kawsanaypaq”, nispa (Gal. 2:19).

Chay nisqanwanmi apostol Pabloqa Galaciapi kaq iñiqmasinkunata nichkarqa Moisespa chaskisqan leyman hina manaña kawsakunankupaq. Paykunatam pantay yachachiqkuna nirqaku Moisesman ley qusqanta kasukuspankuqa salvasqa kanankuta. Chaytam wakinqa kasukuchkarqaku, Pablom ichaqa yacharqa chaykunata manaña ruwanankuta. Chaymi iñiqmasinkunata yanaparqa manaña Moisespa leyninpa sirvienten kaspanku Jesuspa wañukusqanpi iñinankupaq (Gal. 2:4; 5:2).

Bibliapim niwanchik pipas wañukuspanqa manaña imatapas sientesqanmanta (Ecl. 9:5). “Leypaqqa wañuruniñam” nispa Pablo nisqanwanqa, Moisespa chaskisqan leyta kasukunanpaq manaña obligasqa kasqanmantam nichkarqa. Payqa yacharqam Jesuspa wañukusqanpi iñisqanrayku wiñaypaq kawsakunanta.

Chaymi nirqa: “Runaqa manam Moisespa leyninpa nisqanta ruwaspachu Diospaqqa mana huchayuqña kanqa, aswanqa Jesucristopi iñisqanraykullam”, nispa (Gal. 2:16). Chaymantapas Pabloqa Galacia llaqtayuq iñiqmasinkunatam nirqa: “Leyqa karqa runakunapa mana allin ruwasqankuta qawachinanpaqmi hinaspa promesata chaskiq miray chayamunankamam”, nispa (Gal. 3:19). Pantaq runakuna kasqanchikraykum Moisespa chaskisqan leykunataqa mana llapallantaqa kasukuyta atichwanchu karqa, chaymi ñuqanchikrayku Jesus wañunan karqa. Moisespa leyninmanta yachasqankum Israel runakunataqa yanaparqa Diospa akllasqan Jesus kasqanmanta mana iskayrayanankupaq, chaymi Jesuspi iñispaqa Diospaqqa mana huchayuqña kanchik (Gal. 3:24). Pablopas Jesuspi iñisqanraykum Diospaqqa mana huchayuqña karqa, chaymi Moisespa leyninpaqqa wañusqa hinaña karqa. Chaymantapas, Jesuspa wañukusqanpi iñisqanraykum manaña obligasqachu karqa Moisespa leyninta kasukunanpaqqa.

Roma nacionniyuq iñiqmasinkunamanpas qillqaspam nirqa: “Wawqillaykuna, qamkunapas hukpaqña utaq wañusqakunapa kasqanmanta kawsarimuqpaqña kanaykichikpaqmi Moisespa leyninpaqqa wañuchisqaña karqankichik Cristopa cuerponwan [...]. Kunanmi ichaqa Moisespa leyninmanta librasqaña karunchik, ñuqanchikqa chay harkawaqninchik leypaqqa wañurunchikñam”, nispa (Rom. 7:4, 6). Chaymantapas Galatas 2:19 nisqanqa manam nichkarqa: “Moisespa leyninta kasukuspaykichikqa salvasqam kankichik”, nispachu. Aswanqa Jesuspa wañukusqanpi iñisqankurayku libreña kanankumantam nichkarqa.