1. Mateo 24:9 nisqanman hinaqa, ¿imayna kananchikmantam Jesus nirqaña?

JEHOVA DIOSQA unanchawarqanchik kuyakuq kanapaqmi hinaspa kuyasqa kanapaqmi. Chaymi pipas chiqniwaptinchikqa hukmanyachwan utaq manchakuywan kachwan. Iñiqmasinchik Yoryinam nin: “Chunka tawayuq wataypi kachkaptiymi Diosta servisqayrayku mamay chiqniyta qallaykuwarqa. Chaywanmi hukmanyasqa hinaspa mana pipapas kuyasqan hina tarikurqani”, nispa. * Iñiqmasinchik Danilopas ninmi: “Testigo kasqayrayku militarkuna maqawaspan tukuyta niwaptin, hinaspa mana allinta ruwawananpaq niwaptinmi manchakuywan karqani”, nispa. Jesuspas nirqam Jehova Diosta yupaychasqanchikrayku runakuna chiqniwananchikmanta (qaway Mateo 24:9).

2, 3. ¿Imanasqataq runakunaqa chiqniwanchik?

² Runakunaqa chiqniwanchik Jesusta qatipakuspanchik paykuna hina mana kasqanchikraykum (Juan 15:17-19). Ñuqanchikqa autoridadkunata kasukuspanchikpas manam paykunamanqa chaqrukunchikchu. Manataqmi banderata respetaspanchikpas makinchiktaqa qasqunchikmanqa churanchikchu, nitaqmi nacionninchikpaq takitapas takinchikchu, aswanqa Jehova Diosllatam yupaychanchik. Pay kamachiwananchiktam munanchik, satanaspa munaychakusqan runakunam ichaqa mana munankuchu (Gen. 3:1-5, 15). Chaymantapas, tukuy ima sasachakuykunata hinaspa satanastawan runankunata Dioslla chinkachinanmantam willakuchkanchik (Dan. 2:44;  Apoc. 19:19-21). Chayta uyarispankum allin sunquyuq runakunaqa kusikunku, mana allin runakunam ichaqa piñakunku (Sal. 37:10, 11).

³ Diospa munasqanman hina kawsakusqanchikraykutaqmi runakunaqa chiqniwanchik. Ñawpaq tiempopi Diospa chinkachisqan Sodoma hinaspa Gomorra llaqtapi yachaqkuna hinam kunan tiempopipas runakunaqa kawsakunku (Jud. 7). Ñuqanchikmi ichaqa Diospa munasqanman hina kawsakunchik, chaymi achka runakuna asikuwanchik hinaspa chiqniwanchik (1 Ped. 4:3, 4).

4. ¿Imataq yanapawasun chiqnisqa kaspapas mana hukmanyanapaq?

⁴ ¿Imataq yanapawasun chiqnisqa kaspapas mana hukmanyanapaq? Jehova Diospi iñiyninchikmi. Manamá iskayrayanchikchu pay yanapawananchikmantaqa. Iñiyninchikqa harkachikuna escudo hinam, chaywanmi ‘satanaspa rupachkaq llapallan flechankunata amachasun’ (Efes. 6:16). Mana hukmanyanapaqqa yanapawasuntaqmi kuyakuq kaypas. Kuyakuq kaspaqa ‘mana chaylla piñakuruqmi kasun’, ‘imapiña tarikuspapas allintam takyasun’, aguantasuntaqmi tukuy ima sasachakuykunatapas (1 Cor. 13:4-7, 13). Qatiqninpiyá yachaykusun Jehova Diosta, iñiqmasinchikkunata hinaspa chiqniwaqninchikkunata kuyaspaqa sasachakuykunata atipanamanta.

5. ¿Imaraykum Jesusqa sasachakuykunata atiparqa?

⁵ Chiqniqninkuna wañuchinankupaq manaraq hapichkaptinkum qatiqninkunata Jesus nirqa: “Taytay kuyasqayta runakuna yachanankupaqmi taytaypa kamachiwasqanman hina imam kaqta ruwachkani”, nispa (Juan 14:31). Jesusqa taytanta anchata kuyasqanraykum ima sasachakuytapas atiparqa. Chaynam ñuqanchikpas Jehova Diosta anchata kuyaspaqa ima sasachakuytapas atipasun.

6. Romanos 5:3-5 nisqanman hinaqa, ¿imaynam tarikunchik Dios servisqanchikrayku runakuna chiqniwaptinchik?

⁶ Diosta achka serviqkunam sasachakuypi kaspankupas payta kuyasqankurayku mana hukmanyarurqakuchu. Jesuspa apostolninkunapas autoridadkuna Diosmanta willakunankuta harkakuptinkum nirqaku: “Runakunamantaqa Diostam kasukunayku”, nispa. Chaynataqa nirqaku Diosta kuyasqankuraykum (Hech. 5:29; 1 Juan 5:3). Kunan tiempopi achka iñiqmasinchikkunapas Diosta kuyaspankum hinalla payman sunqu kachkanku autoridadkunapa ñakarichisqan kaspankupas. Runakuna chiqniwaptinchikqa manamá hukmanyanchikchu, aswanqa kusisqam kanchik (Hech. 5:41; qaway Romanos 5:3-5).

7. ¿Imaynam kananchik Dios servinanchikta ayllunchikkuna harkakuptinku?

⁷ Dios servinanchikta ayllunchikkuna harkakuptinkuqa astawanraqmi hukmanyaruchwan. Wakin ayllunchikkunaqa pantaypi kasqanchikta hinaspa locoyarusqanchiktam piensanmanku (tupachiy Marcos 3:21 nisqanwan). Chayraykupaschá imatapas niwachwan utaq maqawachwanpas. Ichaqa manamá hukmanyananchikchu. Jesusqa nirqañam chiqniwaqninchikkunaqa wasinchikpi kaqkunalla kananmanta (Mat. 10:36). Chayna kaptinpas ayllunchikkunataqa manam chiqninanchikchu, aswanqa Jehova Diosta kuyasqanchikraykum kuyakuq kananchik (Mat. 22:37-39). Ichaqa manam haykapipas runamasinchikkunata kusichinanchikraykuqa Diostaqa qipanchananchikchu.

8, 9. ¿Imakunataq iñiqmasinchik Yoryinata yanaparqa sasachakuypi tarikuptin?

⁸ Qallariypi rimamusqanchik Yoryinam willakun: “Mamaypiwanmi bibliamanta yachayta qallaykurqaniku, suqta killa pasayta huñunakuykunaman riyta munaptiymi ichaqa  mana munarqachu. Payqa testigokunamanta rakikuruspanku pantayta yachachiqkunapa qillqankunatam ñawinchasqa, chayraykum yanqakunata niwaq. Chaymantapas chukchayta chutawaspanmi maqawaq, qillqanchikkunatapas wikaparapuwaqmi. Chaywanpas 15 wataypi kachkaspaymi bautizakururqani. Mamayqa Diosta qipancharunaypaqmi mana allin musu-sipaskunata yanapananku wasiman churaruwarqa. Chaypi kaqkunamanta wakinqa drogakuqkum, hinaspapas tukuy mana allinkunatam ruwaqku. Sasamá mamaykipuni harkakuptin Diosman sunqu kayqa”, nispa.

⁹ Chayna sasachakuypi tarikuptin ima yanapasqanmantam Yoryina willakun: “Mamay harkakuyta qallaykusqan punchawmi biblia ñawinchayta tukururqani. Chaypi yachasqaymantaqa manapunim iskayrayarqanichu. Jehova Diostapas tukuy sunquywantaqmi kuyarqani. Mañakuptiypas payqa uyariykuwaqmi. Mamaypa churawasqan wasipi yachachkaptiymi huk iñiqmasinchik niwarqa wasinman rispa bibliamanta astawan yachanaykupaq. Chay watakunapiqa iñiqmasinchikkunam anchata kallpanchawarqa. Ayllunkutapas hinam yanapaykuwarqa. Piña chiqniwaptinchikpas Jehova Diosmá yanapawanchik”, nispa.

10. ¿Imamantam mana iskayrayachwanchu?

¹⁰ Pablom qillqarqa Diospa kuyakuyninmantaqa mana imapas rakiwananchikmanta (Rom. 8:38, 39). Ima sasachakuypiña kaptinchikpas taytanchik Jehova Diosqa hawkayaykachiwasunmi, hinaspapas kallpatam quwasun. Yoryinata hinataqmi iñiqmasinchikkunawanpas yanapaykuwasun. Chaymantaqa manamá iskayrayanchikchu.

11. Juan 15:12, 13 nisqanman hinaqa, ¿imatam qatiqninkunata Jesus nirqa? ¿Imapaqmi chayna kasqanku yanapanan karqa?

¹¹ Jesusmi manaraq wañukuchkaspan qatiqninkunata yuyarichirqa kuyanakunankupaq (qaway Juan 15:12, 13). Payqa yacharqam qatiqninkuna kuyanakuspankuqa huk sunqulla kanankuta hinaspa runakuna chiqniptinpas mana hukmanyarunankuta. Rimarisun Tesalonica llaqtapi iñiqkunamanta. Paykunataqa Jesuspa qatiqnin kayta qallaykusqankumantapacham chiqnirqaku. Chaywanpas kuyanakusqankuraykum hinaspa Diosman sunqu kasqankuraykum iñiqmasinkupa qatipakunankupaq karqaku (1 Tes. 1:3, 6, 7). Paykunataqa astawanraq kuyanakunankupaqmi Pabloqa kallpancharqa, chaynapi hukmanyasqakunata  kallpanchaykunankupaq hinaspa mana kallpayuqkunata yanapaykunankupaq (1 Tes. 4:9, 10; 5:14). Tesalonica llaqtapi iñiqkunaqa Pablopa nisqantam kasukurqaku, chaymi wata pasayta paykunaman kaqmanta qillqaspan nirqa: ‘Llapallaykichikpa kuyanakuynikichikmi yapakuchkan’, nispa (2 Tes. 1:3-5). Arí, kuyanakusqankuraykum runakuna chiqniptinpas mana hukmanyarurqakuchu.

12. ¿Imaynatam iñiqmasinchikkuna guerra kaptin yanapanakurqaku?

¹² Danilotawan warminta ima pasasqanmanta rimarisun. Yachasqan nacionpi guerra kasqanraykum llaqtanpipas sasachakuy karqa. Chaywanpas paykunaqa hinallam huñunakuykunaman riqku, tukuy sunqunkuwan Diosmanta willakuqku, mikunankupaq kaqtapas iñiqmasinkuwanmi quykanakuqku. Huk punchawmi Danilopa wasinman militarkuna chayarurqaku. Paymi willakun: “Paykunam niwarqa testigo kasqayta saqinaypaq, mana munaptiymi maqaparuwarqaku, hinaspapas manchachiwananpaqmi armata qawaykachiwarqa, ichaqa huklawmanmi balearurqa. Chayta ruwaruwaspanmi niykuwarqa kutiramuspankuqa warmichayta abusarunankupaq, ichaqa iñiqmasinchikkunam chaylla yanapawarqaku huklaw llaqtaman ripukunaykupaq. Kuyakuywan yanapaykuwasqankutaqa manamá haykapipas qunqasaqchu. Chay risqayku llaqtapipas iñiqmasinchikkunaqa mikuykachiwarqakum, yanapaykuwarqataqmi llamkayta tarinaypaqpas hinaspa maypi yachanaykupaqpas. Chayna yanapaykuwasqankuraykum ñuqaykupas qipakunaman ayqikamuq iñiqmasinchikkunata yanapaykurqaniku”, nispa. Danilopa willawasqanchikman hinam iñiqmasinchikkunawan kuyanakuyqa yanapawanchik runakuna chiqniwaptinchikpas mana hukmanyarunapaq.

13. ¿Imaynatam Jehova Dios yanapawanchik runamasinchikkuna chiqniwaptinchik?

¹³ Jesusmi nirqa chiqniwaqninchikkunata kuyananchikpaq (Mat. 5:44, 45). Chay sasa kaptinpas Diospa yanapakuyninwanqa atisunmi. Paymi yanapawanchik kuyakuq, pacienciakuq, sumaq sunqu, llampu sunqu hinaspa controlakuq kanapaq (Gal. 5:22, 23). Achka runamasinchikkunam hinaspa ayllunchikkunam manaña chiqniwanchikñachu chayna sumaq sunquyuq kasqanchikrayku, wakinkuqa iñiqmasinchikkunañam. Chiqniwaqninchikkuna kuyayta sasachakuspaqa, Jehova Diostam mañakunanchik  yanapaykuwananchikpaq (Luc. 11:13). Paypa nisqanta kasukuyninchikmi haykapipas aswan allinqa (Prov. 3:5-7).

14, 15. Romanos 12:17-21 nisqanqa, ¿imaynatam Yasminta yanaparqa qusan ñakarichiptinpas hinalla kuyananpaq?

¹⁴ Rimarisun Yasmin sutiyuq iñiqmasinchikmanta. Testigo kayta qallaykuptinmi qusan piensarqa pantayta yachachisqankuta, chaymi Dios serviyninta saqirunanpaq tukuyta ruwarqa. Tukuy mana allinkunata nispanmi kamirqa. Chaymantapas ayllunkunata, iglesiapi punta apaqta hinaspa layqa ruwaqtam nirqa manchachinankupaq. Huk kutipipas huñunakuyman riruspanmi iñiqmasinchikkunata tukuyta nispan kamiparqa. Qusan chayna kasqanraykum Yasminqa sapa kuti waqallaq.

¹⁵ Yasmintaqa huñunakuypim iñiqmasinchikkuna sunqunta tiyaykachiqku. Iñiqkunapi punta apaqkunapas Romanos qillqapa nisqanman hina ruwananpaqmi kallpancharqaku (qaway Romanos 12:17-21). Yasminmi nin: “Bibliapa nisqanta kasukuyqa sasamá karqa, chaywanpas Jehova Diosta mañakuspaymi munasqanman hina kawsakunaypaq kallpanchakurqani. Chaymi qusay disyunta wasita qachacharuptinpas pichaq kani, tukuyta niwaptinpas manam piñakuruqchu kani, unquruptinpas kuyakuywanmi atiendeq kani”, nispa.

16, 17. ¿Imatam yachachwan iñiqmasinchik Yasminpa willakusqanmanta?

¹⁶ Iñiqmasinchik Yasminta qusan imataña niptinpas utaq imataña ruwaptinpas hinalla kuyasqanqa allinpaqmi karqa. Paymi nin: “Mana haykapipas llullakusqayta yachasqanraykum qusayqa ima nisqaymantapas manaña iskayrayarqañachu, bibliamanta willaptiypas mana piñakuspanmi uyariwarqaña. Huñunakuykunaman rinaypaqpas kunanqa kallpanchawanñam hinaspapas hawkañam kawsakuniku. Mana amiruspaymi suyachkani Diosmanta yachay qallaykunanta, chaynapi kuskayku Jehova Diosta servinaykupaq”, nispa.

¹⁷ Kuyakuq runamantam biblia kaynata nin: “Imapiña tarikuspanpas allintam takyan, tukuytam suyan, tukuytam aguantan”, nispa. Chayna kasqantam yachanchik Yasminpa willakusqanwan (1 Cor. 13:4, 7). Kuyakuq kaptinchikqa chiqniwaqninchik runakunapas manañam chiqniwasunñachu, manataqmi Dios servinanchiktapas harkakunqakuchu. Imaña kaptinpas, kuyakuq kaspaqa Jehova Diostataqmi kusichisun. Qatiqninpiyá yachaykusun  chiqniwaptinchikpas imanasqa kusisqa kanamanta.

18. ¿Imanasqataq kusisqa kanchik runakuna chiqniwaptinchikpas?

¹⁸ Jesusmi nirqa: “Mayna kusisqam kankichik [...] runakuna chiqnisuptikichik”, nispa (Luc. 6:22). Manamá munanchikchu nitaq kusikunchikchu runakuna chiqniwaptinchikqa. Chaynaqa, ¿imanasqataq kusisqa kanchik runakuna chiqniwaptinchikpas? Diosman sunqu kaspa paypa sunqunta kusichisqanchikraykum (1 Ped. 4:13, 14). Jehova Diospi astawan hapipakusqanchikraykum (1 Ped. 1:7). Hinaspapas wiñaypaq kawsakunapaq yachasqanchikraykum (Rom. 2:6, 7).

19. ¿Imanasqataq Jesuspa apostolninkunaqa maqapasqa kaspankupas kusisqa karqaku?

¹⁹ Jesuspa kawsarimusqanmanta qipallamanmi qatiqninkunata autoridadkuna maqaparurqaku, hinaspapas manaña willakunankupaqmi kamachirqaku. Chaywanpas, ‘Jesuspa sutinrayku pinqaypi kasqankumantam’ kusisqallaña karqaku (Hech. 5:40-42). Manchakunankumantaqa Jesusta tukuy sunqunkuwan kuyasqankuraykum mana samaykuspanku hinalla willakurqaku. Chaynam kunan tiempopi achka iñiqmasinchikkunapas imaña kaptinpas hinalla Diosman sunqu kachkanku. Jehova Diosqa manam qunqanqachu paypaq imapas ruwasqankutaqa. Chaymantaqa manamá iñiqmasinchikkunaqa iskayrayankuchu (Heb. 6:10).

20. ¿Imamantam qatiqnin yachachikuypi yachasun?

²⁰ Diospa piñakuynin punchaw chayamunankamaqa hinallaraqmi runakunaqa chiqniwasun (Juan 15:19). Ichaqa manam manchakunanchikchu. Jehova Diosqa kallpanchaykuwasunmi, hinaspapas satanasmantam harkaykuwasun. Chaymantam qatiqnin yachachikuypi yachasun (2 Tes. 3:3). Chaynaqa, hinallayá Jehova Diostapas, iñiqmasinchikkunatapas chaynataq chiqniwaqninchikkunatapas kuyasun. Kuyakuq kaspaqa iñiqmasinchikkunawanmi huk sunqulla kasun, Diosman sunqum kasun, hinaspapas paytam astawan kuyasun.