1, 2. ¿Bibliamanta yachachiqnillanchu runamasinchikta yanapanman bautizakuyman chayananpaq?

FIYI nacionpi yachaq Amy sutiyuq iñiqmasinchikmi nin: “Bibliamanta yachasqaywanmi anchata kusikurqani. Chaywanpas, mana allinkuna ruwaytam mana saqiyta atiqchu kani. Iñiqkunawan hukllawakusqaymi yanapawarqa chaykunata saqinaypaq”, nispa. Amypa nisqanwanmi yachanchik bibliata estudiaqkuna bautizakuyman chayanankupaqqa llapallanchik yanapakunanchikta.

² Llapallanchikmá yanapakuchwan runamasinchikkuna Diosta servinankupaqqa (Efes. 4:16). Vanuatu nacionpi yachaq Leila sutiyuq precursoram nin: “Bibliata estudiaq runamasinchikkuna bautizakuyman chayanankupaqqa llapallanchikmi yanapakunanchik”, nispa. Churi-wawakuna allin qispinanpaqqa manam tayta-mamallanchu yanapan. Yanapantaqmi ayllunkunapas, amistadninkunapas chaynataq profesorninkunapas. Chaynataqmi biblia estudiaqkunatapas llapanchik yanapananchik, kallpanchananchik hinaspapas qatipakunankupaq hinam kananchik, chaynapi bautizakuyman chayanankupaq (Prov. 15:22).

3. ¿Imatam yachachwan Anapa, Davidpa hinaspa Leilapa nisqanmanta?

³ Pimanpas bibliamanta yachachispaqa, ¿imanasqataq ancha allin iñiqmasinchikkunapiwan yachachiyninchik? Moldavia nacionpi yachaq Ana sutiyuq precursoram kaynata nin: “Bibliamanta yachachisqanchik runamasinchiktaqa manamá sapallanchikqa tukuypichu yanapayta atisun”, nispa.  Davidpas kaynatam nin: “Yachachiysiwaqniy iñiqmasinchikkunaqa bibliamanta yachachisqay runamasinchikkunatam allinta kallpanchaykunku. Ñuqapa mana haykapipas nisqaykunatam niykunku”, nispa. Leilapas ninmi: “Huk iñiqmasinchikkunapiwan yachachiptinchikqa cuentatam qukunqaku kuyakuq kasqanchikta hinaspa Jehova Diospa chiqap yupaychaqninkuna kasqanchikta”, nispa (Juan 13:35).

4. ¿Imakunamantam kay yachachikuypi yachasun?

⁴ Ichaqa, ¿imatam ruwachwan mayqan iñiqmasinchikpas yachachiysinanchikpaq niwaptinchik? ¿Imatam ruwachwan bibliata estudiaq runamasinchik huñunakuykunaman hamuyta qallaykuptin? ¿Imaynatam iñiqkunapi punta apaqkunapas paykunata yanapanmanku bautizakuyman chayanankupaq? Chaykunamantam kay yachachikuypi yachasun.

5. ¿Imatam ruwananchik yachachiysinanchikpaq mayqan iñiqmasinchikpas niwaptinchik?

⁵ Biblia estudiaqkunataqa yachachiqnin iñiqmasinchikmi Diosmantaqa allinta yachaykachinan. Ñuqanchikqa yanapayllam-yanapaysinanchik (Ecl. 4:9, 10). Chaynaqa, ¿imakunatam ruwachwan allintapuni yanapakunanchikpaq?

6. Proverbios 20:18 nisqanman hinaqa, ¿imatam ruwananchik mayqan iñiqmasinchikpas yachachiysiq rinanchikpaq niwaptinchik?

⁶ Kikinchikraqmi sumaqta yachaykunanchik. Puntataqa iñiqmasinchiktayá niykusun yachachiqnin runamasinchikmanta willaykuwananchikpaq (qaway Proverbios 20:18). Tapuykuchwanmi: “¿Imamantam yachachinki? ¿Imakunatataq mana rimanaychu utaq mana ruwanaychu? ¿Imapitaq kallpanchaykuyman?”, nispa. Iñiqmasinchikqa manapaschá yachachisqan runamantaqa lliwtachu willawasun, chaywanpas willawasqanchikqa yanapawasunmi allinta yanapanapaq. Yoi sutiyuq iñiqmasinchikmi kaynata willakun: “Yachachisqay runamasinchikmanta riysiwaqniyman willasqaymi yanapan sumaqta yachaykachiysiwananpaq hinaspa kallpanchaykunanpaq”, nispa.

7. ¿Imanasqataq kikinchikraq allinta yachaykunanchik yachachiysiq rinanchikpaq niwaptinchikqa?

⁷ Mayqan iñiqmasinchikpas yachachiysiq rinanchikpaq niwaptinchikqa kikinchikraqmi ima yachanankumanta allinta yachaykunanchik (Esd. 7:10). Davidmi nin: “Ima yachanaykumanta riqmasiy wasillanpiraq sumaqta yachaykuspanmi yachachisqay runamasinchiktaqa allinta yanapaykun”, nispa. Davidpa nisqanman hinam ancha allin iñiqmasinchikta manaraq riysichkaspanchik kikinchikraq puntata yachaykuyninchik. Chaynata  ruwaptinchikqa bibliamanta yachaq runamasinchikkunapas qatipakuwasunmi. Ima yachanankumanta suma-sumaqta mana yachaspapas leeyllapas-leeykunanchikpaqmi tiempochakunanchik.

8. Diosta mañakunanchikpaq iñiqmasinchik niwaptinchikqa, ¿imatam ruwananchik?

⁸ Bibliamanta pimanpas yachachispanchik Diosta mañakuyninchikqa ancha allinmi. Chaymi mañakunanchikpaq iñiqmasinchik niwaptinchikqa yuyaymanananchik imakunata ninanchikpi (Sal. 141:2). Japon nacionmanta iñiqmasinchik Hanam yachachiqninta riqmasinpa mañakusqanta yuyarispan nin: “Jehova Diostam tukuy sunqunwan mañakuq, chaymi ñuqapas pay hina mañakuyta munarqani. Chaymantapas, ñuqarayku mañakusqanwanmi cuentata qukurqani anchata kuyawasqankuta”, nispa.

9. Santiago 1:19 nisqanman hinaqa, ¿imaynatam allinta yanapakuchwan pi iñiqmasinchiktapas bibliamanta yachachiysispa?

⁹ Yachachiq iñiqmasinchiktayá yanapasun. Nigeria nacionpi yachaq iñiqmasinchikmi nin: “Bibliamanta yachachiysiq rispaqa imamanta rimasqankutam allinta uyarinanchik, rimarispaqa manataqmi llumpaytachu rimananchik, aswanqa yachachiq iñiqmasinchiktam saqiykunanchik allinta yachaykachinanpaq”, nispa (Prov. 25:11). Chaymi iñiqmasinchikpa hinaspa yachachisqan runamasinchikpa rimarisqanta sumaqta uyarinanchik, chaynapi rimarina kaptinqa rimariykunapaq (qaway Santiago 1:19). Ichaqa manam llumpaytaqa rimananchikchu, aswanqa ima yachasqanmanta allinta entiendenanpaqmi pisillapi rimaykuchwan. Manataqmi iñiqmasinchik rimachkaptinqa rimananchikchu, nitaqmi huk yachachikuykunamantachu rimayta qallaykunanchik. Wakinpiqa ichapas piensachwan bibliamanta yachachiypi mana sumaqta yanapasqanchikta, ichaqa bibliamanta yachaq runamasinchikta kallpanchaykuspaqa anchatam yanapasun.

10. ¿Imaynatam runamasinchikkunata yanapanman Jehova Dios yanapawasqanchikmanta willayninchik?

¹⁰ Jehova Dios imayna yanapawasqanchikmantam willachwan. Allin kaptinqa bibliamanta yachaq runamasinchikmanmi willachwan Diosmanta imayna yachasqanchikmanta, sasachakuykunata imayna atipasqanchikmanta utaq Jehova Dios imayna yanapawasqanchikmanta (Sal. 78:4, 7). Chayna willaykusqanchikqa yanapanmanmi hinalla bibliamanta yachananpaq, sasachakuykunata atipananpaq chaynataq bautizakuyman chayananpaqpas (1 Ped. 5:9). Iñiqmasinchik Gabrielmi bibliamanta chayllaraq yachachkaptin ima yanapasqanmanta nin: “Sasachakuykunapi tarikuptinku Dios imayna yanapasqanmanta  willawasqankum yanapawarqa sasachakuykunata atipanaypaq”, nispa.

11, 12. ¿Imanasqataq bibliamanta yachaq runamasinchikkunata kuyakuywan chaskiykunanchik?

¹¹ Runamasinchik bautizakuyman chayananpaqqa sapa semanam huñunakuykunaman hamunan (Heb. 10:24, 25). Yaqapaschá huñunakuyman hamuytaqa qallaykunqa yachachiqnin niykuptin, chaywanpas llapallanchikmi kallpanchananchik hinalla huñunakuyman hamunanpaq. Chaypaqqa, ¿imatam ruwachwan?

¹² Kuyakuywanmi chaskiykunanchik (Rom. 15:7). Bibliamanta yachaq runamasinchikkunata kuyakuywan chaskiykuptinchikqa hinallam huñunakuykunaman hamuyta munanqaku. Chayraykum kuyakuywan rimapayaykunanchik hinaspa iñiqmasinchikkunata riqsiykachinanchik. Manam ninanchikchu: “Yachachiqninchá paytaqa chaskiykunqa”, nispaqa. Ichapas yachachiqninqa manapas chayamunraqchu utaq huk ruwaykunapipas kachkan. Huñunakuyman hamuq runamasinchiktaqa tapuykuchwantaqmi imaynalla kasqanta, hinaspam ima willawasqanchikta sumaqta uyariykuchwan. Chaykunata ruwayninchikqa ancha allinmi. Dimitri sutiyuq iñiqmasinchikmi huñunakuykunaman hamuyta qallaykusqanta yuyarispan nin: “Manchakusqayraykum hawapi sayakuchkarqani, chaymi ukupi kaq hamuruspan pusaykuwarqa. Yaykuykuptiymi kuyakuywan chaskiykuwarqaku, chaywanqa ancha kusisqam tarikurqani. Sapa punchawpas huñunakuy kanantam munarqani”, nispa. Iñiqmasinchik Dimitriqa iskay-kimsa watallaraq bautizasqa kaspanpas kunanqa iñiqkunapi punta apaqkunapa yanapaqninñam.

13. ¿Imaynatam bibliamanta yachaqkunata yanapanman imayna runa kasqanchik?

¹³ Qatipakunankupaq hinayá kasun. Biblia estudiaq runamasinchikkunaqa imayna runa kasqanchikta qawaspankum mana iskayrayanqakuchu chiqap religionpi kasqanchikta (Mat. 5:16). Moldavia nacionpi yachaq Vitali sutiyuq iñiqmasinchikmi nin: “Imayna kawsakusqankuta hinaspa huñunakuypi imayna kasqankuta qawaspaymi manapuni iskayrayarqanichu chiqap religionpi kasqankumanta”, nispa.

14. ¿Imaynatam biblia estudiaqkunata yanapanqa Diospa munasqanman hina kawsakuyninchik?

¹⁴ Bibliamanta yachachisqanchik runamasinchikkuna bautizakuyman chayanankupaqqa yachasqankuman hinam kawsakunanku. Chayna kawsakuyninku sasa kaptinpas bibliapa nisqanta kasukuspanchik kusisqa kawsakusqanchikta qawaspankum  paykunapas qatipakunqaku (1 Cor. 11:1). Hanam nin: “Qawarqanim yachachiwasqankuman hina kawsakusqankuta, kallpanchanakusqankuta, pampachanakusqankuta hinaspa kuyanakusqankuta. Chaymi ñuqapas paykuna hina kayta munarqani”, nispa.

15. Proverbios 27:17 nisqanman hinaqa, ¿imanasqataq huñunakuykunaman hamuq runamasinchikkunapa amistadnin kananchik?

¹⁵ Amistadninyá kasun. Bibliamanta yachaq runamasinchikkuna huñunakuyman hamuptinkuqa imayna kasqankumantayá tapuykusun (Filip. 2:4). Mana pinqachispallanchikmi tapuykuchwan ayllun imaynalla kasqanmanta, imapi llamkasqanmanta utaq bibliamanta yachasqanpi imayna kasqanmanta. Alabaykuchwantaqmi imatapas allintaña ruwasqanmanta. Paykunapa amistadnin kaspaqa bautizakuyman chayanankupaqmi yanapasun (qaway Proverbios 27:17). Hanam huñunakuykunaman hamuyta qallaykuspan imayna tarikusqanmanta willakun: “Huñunakuypi astawan amistadniyuq kaspaymi pisipasqaña kaspaypas hinalla huñunakuykunaman riyta munaq kani. Chaypi amistadniykunawan aswan kusisqa kaspaymi Diospi mana iñiq amistadniykunawanqa manaña hukllawakuqchu kani. Diostawan iñiqmasiykunata kuyaspaymi bautizakunaypaq tantiakururqani”, nispa. Hanaqa precursorañam kunanqa.

16. ¿Imakunatawanraqmi ruwachwan bibliamanta yachaq runamasinchikkunata yanapanapaq?

¹⁶ Bibliamanta yachaq runamasinchikkunaqa ayllunku hina kasqanchiktam yachananku, chaymi wasinchikpi mikuykunallapaqpas niykuchwan (Heb. 13:2). Denis sutiyuq iñiqmasinchikmi biblia estudiasqanmanta yuyarispan nin: “Achka kutipim iñiqmasinchikkunaqa warmichaytawan niwaqku wasinkuman rinaykupaq. Chaypim paykuna willawaqku Jehova Dios imayna yanapasqanmanta. Chaymi yanapawarqaku Diosta servispayku kusisqa kawsakunaykupaq”, nispa. Diosmanta willakuyta qallaykuptinpas ñuqanchikwan lluqsinanpaqmi niykuchwan. Iñiqmasinchik Diegopas ninmi: “Diosmanta willakuyta qallaykuptiyqa achkam kuska rinaykupaq niwaq, chaynapim astawan paykunata riqsirqani. Hinaspapas Jehova Diostawan Jesustam astawan kuyarqani”, nispa.

17. ¿Imaynatam iñiqkunapi punta apaqkuna yanapanmanku bibliamanta yachaqkunata?

¹⁷ Bibliamanta yachaqkunapaqmi tiempochakunanku. Iñiqkunapi punta apaqkuna, chaypaq tiempochakuspaykichikqa bautizakuyman chayanankupaqmi yanapankichik. Chayraykum allin kanman sapa huñunakuypi huk ratullapas paykunawan rimaynikichik.  Bibliamanta yachaq runamasinchikkunaqa anchatataqmi kusikunku sutinmanta rimapayaptikichikqa. Allintaqmi kanman huk kaqnin iñiqmasikichikta bibliamanta yachachiysiq riynikichikpas, chayqa bibliamanta yachaqkunatam anchata yanapanqa. Iñiqmasinchik Yakim nin: “Bibliamanta yachachisqay runamasinchikkunaman huk kaqnin punta apaqpiwan yachachiq riptiyqa anchatam admirakunku. Huknin yachachisqay runamasinchikmi kaynata nirqa: ‘Ñuqaykupa pastorniykuqa manam haykapipas watukamuwankuchu. Paykunaqa apukunallatam watunku, chaypas pagaptillan’”, nispa. Chaynata niq runamasinchikqa huñunakuykunamanñam richkan.

18. Hechos 20:28 nisqanman hinaqa, ¿imaynatam punta apaqkuna iñiqmasinkuta yanapaykunmanku?

¹⁸ Iñiqmasinchikkunatam yachaykachinaykichik hinaspa kallpanchaykunaykichik. Iñiqkunapi punta apaqkuna, qamkunam iñiqmasikichikkunataqa yachaykachinaykichik Diosmanta runamasinchikkunaman allinta yachachinankupaq (qaway Hechos 20:28). Mayqan iñiqmasinchikpas qanwan kuska yachachiyta manchakuptinqa, qamña yachaykachinaykipaqmi niykuwaq. Yakim kaynata nin: “Iñiqkunapi punta apaqkunaqa sapa kutim tapuykuwan yachachisqay runamasinchikkunamanta, hinaptinmi imapipas sasachakusqaymanta willaykuptiyqa yanapaykuwanku”, nispa. Punta apaqkunaqa iñiqmasinchikkunatam kallpanchaykunmanku hinalla runamasinchikkunaman yachachinankupaq (1 Tes. 5:11). Yakiqa ninraqmi: “Runamasinchikkunaman yachachisqaymanta iñiqkunapi punta apaqkunapa kallpanchaykuwasqanwanmi anchata kusikuni, chayraykum runamasinchikkunaman kusikuywan yachachini”, nispa (Prov. 25:25).

19. ¿Imaynam tarikunchik bibliamanta yachaq runamasinchik bautizakuptin?

¹⁹ Ñuqanchik pimanpas bibliamanta mana yachachispanchikpas yanapakuchwanmi bibliata estudiaqkuna bautizakuyman chayanankupaq. Chaytaqa ruwachwan mayqan iñiqmasinchiktapas yachachiysispanchik allinta rimarispam, bibliamanta yachaq runamasinchikkunawan amistad kaspam hinaspa paykunapa qatipakunankupaq hina kawsakuspam. Iñiqkunapi punta apaq kaspaqa tiempochakuchwanmi bibliamanta yachaq runamasinchikkunawan rimarinapaq. Iñiqmasinchikkunatapas yachaykachinanchikmi hinaspa kallpanchaykunanchikmi. Llapallanchikmá anchata kusikunchik bibliamanta yachaq runamasinchik Jehova Diosta kuyaspan bautizakuptinqa.