1. ¿Imapim qawakun imayna runa kasqanchik?

 UNAYÑA utaq chayllaraq testigo kaspanchikpas, llapallanchikmi kallpanchakunanchik Jehova Diospa munasqanman hina imatapas ruwananpaq. Chaypaqqa imayna piensasqanchiktam qawarikunanchik. ¿Imaynanpi? Imayna piensasqanchikpi imayna runa kasqanchik qawakusqanraykum. Aychapa munasqallanpi piensaspaqa mana allinkunallatam ruwasun (Efes. 4:17-19). Allin kaqkunapi piensaspam ichaqa Jehova Diospa munasqanman hina imatapas ruwasun (Gal. 5:16).

2. ¿Imamantam yachasun kay yachachikuypi?

² Qayna yachasqanchikman hinam mana allin piensaykunaqa umanchikman chayamunqa. Ichaqa atichwanmi chay mana allin piensaykunata mana ruwayman churaytaqa. Manaraq bautizakuchkaspam Diospa chiqnisqan mana allin ruwaykunatawan mana allin rimaykunataqa saqinanchik. Imamantapas puntataqa ñawpaq vidanchiktam saqinanchik. Ichaqa, chaywanpas Jehova Diosta astawan kusichinapaqqa kallpanchakunanchikmi “musuq runaña” kanapaq (Col. 3:10). Kay yachachikuypim chaykunamanta yachachkasun. ¿Imaynataq “musuq runaña” kaq runaqa? ¿Imaynatam “musuq runaña” kachwan? ¿Imam yanapawasun “musuq runaña” kachkaspa ñawpaq vidanchikman mana kutinapaq?

3. ¿Imaynataq “musuq runaña” kaq runaqa? ¿Imaynatam “musuq runaña” kachwan Galatas 5:22, 23 nisqanman hinaqa?

³ “Musuq runaña” kaq runaqa Diospa piensasqanman hina  piensaqmi, ruwasqanman hina imatapas ruwaqmi. ¿Imaynatam “musuq runaña” kachwan? Diospa munasqanman hina imatapas piensaspam hinaspa ruwaspam (leey Galatas 5:22, 23). “Musuq runaña” kaqqa kuyantaqmi Jehova Diostawan runankunatapas (Mat. 22:36-39). Sasachakuykunapi kaspanpas kusisqam tarikun (Sant. 1:2-4). Maypipas hukkunawanmi hawkalla kawsakun (Mat. 5:9). Manam chaylla piñakuqchu, aswanqa kuyakuqllañam (Col. 3:13). Mana allin kaqta chiqnispam allin kaqta ruwan (Luc. 6:35). Imapipas Diosllapim hapipakun (Sant. 2:18). Imata niptinkupas manam kutipakunchu. Mana allinkunaman mana wichinanpaqmi kallpanchakun (1 Cor. 9:25, 27; Tito 3:2).

4. ¿Imaynanpitaq Galatas 5:22, 23 nisqanqa pisanasqa hina kachkan?

⁴ “Musuq runaña” kanapaqqa kay Galatas 5:22, 23 nisqanman hinam kananchik. Chaymantapas wakin textokunapa nisqanman hinam kawsakunanchik. * Kay textokunapi nisqanqa yaqa pisanasqa hinam kachkan. Chayna kasqanraykum pitapas kuyaspaqa, mana amispa kuyanchik. Runamasinchikkunawanpas llampu sunqu, controlakuq kanchik.

5. ¿Ima ninantaq “Cristopa piensasqanman hina” piensayqa? ¿Imaynanpitaq Jesuspa vidanmanta sumaqta yachananchik? (Rimarimuytaq 1 Corintios 2:16 nisqanmantapas).

⁵ (Leey 1 Corintios 2:16). Musuq runaña kanapaqqa ‘Cristopa piensasqanman hinam piensananchik’, chaypaqqa Jesuspa imayna piensasqanta yachaspanchikmi chayman hina piensananchik. Payqa suma-sumaqmi kawsakuyninpiqa. Payqa Jehova Diospa imayna kasqantam qatipakun (Heb. 1:3). Ñuqanchikpa piensasqanchikpas Jesuspa piensasqanman rikchakuptinqa imayna kasqantawan, imaynata imatapas ruwasqantam qatipakusunchik (Filip. 2:5).

6. ¿Imatam yuyarinanchik musuq runaña kanapaq kallpanchakuspaqa?

⁶ ¿Chiqaptapunichu atichwan Jesusta qatipakuyta? Ichapas nichwan: “Jesusqariki mana pantaqmi. ¡Manam haykaqpas pay hina kaytaqa atiymanchu!”, nispa. Chaynata  nispanchikqa kaykunatam yuyarinanchik. Punta kaq: Ñuqanchikqa unanchasqa karqanchik Jehova Dioswan Jesus hina kanapaqmi. Chaynaqa atisqanchikman hina paykunata qatipakuytaqa atichwanmi (Gen. 1:26). Iskay kaq: Diospa atiynin hinaqa manam imapas kanchu. Chaynaqa, Dios atiyninwan yanapawaptinchikqa imatañapas atisunmi. Kimsa kaq: Jehova Diosqa manam imapipas mana pantananchiktachu suyan. Chayraykum kuyakuq taytanchik Jehova Diosqa waranqa watata quykuwanchik mana pantaq kayta haypanapaq (Apoc. 20:1-3). Jehova Diosqa ñuqanchikmantaqa suyachkan, atisqanchikman hina kallpanchakuspa paypi hapipakunanchiktam.

7. ¿Imakunamantam yachasun?

⁷ ¿Imakunapitaq astawan Jesusta qatipakuchwan? Chaypaqqa tawa kaqkunapi Diospa atiynin imaynata Jesusta yanapasqanmantam yachasun. Yachasunmi Jesus imaynata chaykunata ruwasqanmanta hinaspa imaynata chayta qatipakunamanta. Chaymantapas yachachkasuntaqmi, musuq runaña kanapaq imakuna yanapawananchikmanta.

8. ¿Imakunatam Jesusqa ruwarqa kuyawasqanchikrayku?

⁸ Jesusqa Jehova Diostam ancha-anchata kuyarqa, chayraykum tukuy imata ruwarqa paypaqwan ñuqanchikpaq (Juan 14:31; 15:13). Chaymantapas, runakunata kuyasqanmi qawakurqa imayna kawsakusqanpi. Payqa chiqnisqa kachkaspanpas kuyakuqllañam, llakipayakuqllañam karqa. Payqa runakunata kuyasqanraykum Dios kamachimunanmanta willakurqa (Luc. 4:43, 44). Diostawan ñuqanchikta anchata kuyawasqanchikraykutaqmi ñakarispa wañurqa. Chayraykum ñuqanchikpas wiñay kawsayta haypayta atichwan.

9. ¿Imakunata ruwaspam runakunata Jesus hina kuyachwan?

⁹ Ñuqanchikqa Diosta kuyasqanchikraykum, payllapaqña kawsakunapaq nispa bautizakurqanchik. Chaynaqa, Diosta kuyasqanchikraykum ñuqanchikpas Jesus hina runakunata kuyananchik. Apostol Juanpas qillqarqam: “Pipas rikusqan iñiqmasinta mana kuyaqqa manamá mana rikusqan Diostaqa kuyanmanchu”, niqta (1 Juan 4:20). Chaynaqa nikusunyá: “¿Kuyanichu wakinkunata? ¿Llakipayanichu mana allinta ruwawaqniy runakunata? ¿Imaymanata ruwaspachu Diosmanta runakunaman willakuni? ¿Hinallachu willakuni wakinkuna willakusqayta mana allinpaq hapiptinkupas utaq chiqnikuwaptinkupas? ¿Atiymanchu Diosmanta willakuyta?”, nispa (Efes. 5:15, 16).

10. ¿Imatam Jesusqa ruwarqa hukkunawan allinlla kawsakunanpaq?

¹⁰ Jesusqa piwanñapas allinllam kawsakurqa. Mana allinta ruwaptinkupas manam mana allinwanqa kutichiqchu. Ichaqa manam chayllatachu ruwarqa. Payqa hukkunawan allinlla kawsakunanpaqmi tukuyta ruwarqa. Wakinkunatapas kallpanchaqmi sasachakuyninkuta allichanankupaq. Yachachirqataqmi pipas Jehova Diospa chaskisqan kayta munaspanqa, iñiqmasinwan allinyanakunanmanta (Mat. 5:9, 23, 24). Sapa kutitaqmi apostolninkunatapas kallpancharqa atipanakuq kayninkuta saqinankupaq (Luc. 9:46-48; 22:24-27).

11. ¿Imakunatam ruwachwan hukkunawan allinlla kawsakunapaq?

¹¹ Piwanpas allinlla kawsakunapaqqa tukuytam  ruwananchik. Puntataqa kikinchikmi iñiqmasinchikkunata allinyanakunapaq maskananchik. Chaymantapas, iñiqmasinchikkunatam kallpanchananchik allinyanakunankupaq (Filip. 4:2, 3; Sant. 3:17, 18). Nikunanchikmi: “¿Tukuytachu ruwani hukkunawan allinyanakunaypaq? ¿Pampachaykunichu pipas imatapas ruwawaptin? ¿Ima sasachakuytapas allichanaypaqqa huknin runa asuykamuwanantaraqchu suyani? ¿Icha ñuqachu puntata asuykuni paypa huchan kachkaptinpas? ¿Kallpanchanichu hukkunatapas allinyanakunankupaq?”, nispa.

12. ¿Imakunatam Jesusqa ruwarqa kuyakuq kasqanrayku?

¹² Jesusqa kuyakuqllañam karqa (Mat. 11:28-30). Payqa sasachakuypi kaspanpas kuyakuyllawanmi pitapas rimapayaq. Kuyakuyllawanmi rimapayarqa Fenicia warmi wawanta hampiykunanpaq niptinpas. Qallariyllanpiqa mañakusqantaqa manam ruwarqachu, ichaqa Diospi hapipakusqanta qawaspanmi llakipayarispan wawanta hampiykurqa (Mat. 15:22-28). Ichaqa, manam kuyakuqllaña kasqanraykuchu pipas mana allinkunata ruwanankuta saqiq. Payqa kuyasqankunataqa rimapayaqpunim. Pedrotapas Diospa munayninta ruwananta harkakuptinmi, wakinkunapa qayllanpi anyarqa (Mar. 8:32, 33). Chaytaqa ruwarqa, manam pinqaypi kachinanpaqchu, aswanqa wakin qatiqninkunapas mana hatun tukuq kanankupaqmi. Pedroqa anyaruptinqa pinqarikurqachá, ichaqa allinninpaqmi karqa.

13. ¿Imatam ruwananchik chiqaptapuni kuyakuq kaspaqa?

¹³ Chiqaptapuni kuyakuq kaspaqa pitapas pantasqanmantam rimapayananchik. Pitapas rimapayaspaqa Jesustayá qatipakusun, bibliapi nisqanman hinayá rimapayasun, kuyakuywanyá rimapayasun. Amayá iskayrayasunchu Diostawan ñuqanchikta kuyawaqninchikkunaqa rimapayasqanchikta uyarikunankumantaqa. Chaynaqa nikusunyá: “¿Rimapayanichu pipas kuyasqay mana allinkunata ruwaptin? ¿Imaynatam rimapayani? ¿Kuyakuywanchu, icha qaqchaspachu? ¿Imaynanpitaq rimapayani? ¿Chay runawan piñasqa kasqayraykuchu, icha payta kuyasqayraykuchu?”, nispa.

14. ¿Imatam Jesusqa ruwarqa allin runa kasqanrayku?

¹⁴ Jesusqa manam yachayllachu-yacharqa allin kaqkunataqa, aswanqa ruwaymanmi churarqa. Payqa, taytanta kuyasqanraykum haykaqpas allin kaqta ruwan, taytanta hatunchananpaqmi imatapas ruwan. Allin runapas, tukuyta ruwaspam hukkunata yanapan. Chaynaqa, manam allin kaqta yachayllachu, aswanqa ruwayman churaymi. Hinaspapas imapas ruwasqanchikwanqa Diostam hatunchana. Ichapas ninmanku: “¿Yaqachu allin kaqkunata ruwanmanku kikillankupaq munaq kasqankurayku?”, nispa. Awriki. Huk kutipim, Jesus rimarqa wakchakunata yanapaqkunamanta. Paykunaqa, chaytaqa ruwasqaku riqsisqa kayta munasqankuraykum, hatunchakuyta munasqankuraykum. Chay ruwasqankuqa Jehova Diostaqa manamá kusichirqachu (Mat. 6:1-4).

15. ¿Imatam ruwananchik chiqaptapuni allin runa kaspaqa?

¹⁵ Allin runaqa kasunchik hukkunapa allinninpaq imatapas ruwaspam, manam kikinchikpa allinninchikpaq imatapas ruwaspachu. Chaynaqa nikunanchikmi: “¿Yachayllachu yachani allin kaq ruwayta, icha  ruwaymanchu churani? ¿Imaynanpitaq allin kaqkunata ruwani?”, nispa.

16. ¿Imatam sapa punchaw ruwananchik? ¿Imaynanpi?

¹⁶ Amayá nisunchu bautizakuruspanchik musuq runaña kasqanchiktaqa. Musuq runaña kayqa, pachanchikta sumaqta waqaychay hinam. Chaymi sapa punchaw kallpanchakunanchik Diospa munasqanman hina kawsakunapaq. ¿Imaynanpi? Jehova Dios atiyninwan yanapawasqanchikraykum (Gen. 1:2). Chaynaqa, Dios atiyninwan yanapawaptinchikqa tukuy imatam ruwayta atichwan. Chayraykum Santiagopas nirqa: ‘Iñiyninchikpas wañusqam kachkan allin kaqkunata mana ruwaptinchikqa’, nispa (Sant. 2:26). Chaynaqa, tukuyta ruwaspam kallpanchakunanchik Diospa munasqanman hina kawsakunapaq. Diospa munasqanman hina kawsakuptinchikqa, Diosninchik atiyninwan yanapawasqanchikmi sutilla kanqa.

17. ¿Imatam ruwananchik wakinpi pantaspanchikpas?

¹⁷ Achka wataña testigo kaspanchikpas wakinpiqa pantanchikmi. Ichaqa hinallam kallpanchakunanchik. Kuyayllapaq kaq pachanchik llikchikuruptinqa manam chayllachu wikaparunchik ¿aw? Aswanqa sumaqchallatam sirarunchik. Ñuqanchikpas, wakinpiqa ichapas nanay simiwan rimarusun utaq chaylla piñakurusun. Chayna kaptinqa, chay llikchikuruq pachanchikta siraykuchkaq hinayá imapas pantasqanchikpi kallpanchakusun. Pampachaykuwananchikpaq mañakuspayá, chay runawan allinyanakusun hinaspayá yapapi chayta amaña ruwanapaq kallpanchakusun.

18. ¿Imamantam mana iskayrayananchikchu?

¹⁸ ¡Anchatam yanapawanchik Jesusta qatipakuyqa! Paypa piensasqanman hina piensaspaqa pay hinam imatapas ruwasun. Chaypaq kallpanchakuspanchikqa musuq runañam kasun. Kaypiqa rimarqanchik tawa kaqkunapi allin runa kanamantam. Ichaqa hinallam kallpanchakunanchik wakinkunapipas Diospa munasqanman hina kawsakunanchikpaq. Chaypaqqa yanapawasunmi Jehova Diospa testigonkunapa qillqankunapi maskanapaq, niqpi “Diosta serviymanta” niqta maskaspa “Chuya espiritupa rurun” niqta qawayninchik. Allin runaña kanapaq kallpanchakuptinchikqa Jehova Diosqa yanapawasunmi, chaymantaqa manam iskayrayananchikchu.