Chayta bibliapi leespanchikqa ichapas chaynata nichwan, ichaqa chaypiqa rimachkan iskay runakunamantam chayta allinta qatipaspaqa yachasunmi imallatapas.

Israel nacionta kamachiq Saulpa churinkunam karqa qanchis qari, iskay warmi. Piwi churintam suticharqa Jonatanwan, Rizpa sutiyuq warminpi churintañataqmi suticharqa Mefi-bosetwan. Piwi churin Jonatanpas churintam suticharqa Mefi-bosetwan, chaynaqa Saulpaqa churinpas willkanpas hina chay sutiyuqllam karqaku.

¿Imaynanpitaq Davidqa Saulpa mirayninkunata quykurqa Gabaon runakuna wañuchinankupaq? Kamachiq Saulqa, Israel runakuna ukupi yachaq Gabaon runakunata chiqnikuspam wañuchiyta qallaykurqa. Chayqa manamá allinchu karqa. ¿Imaynanpi? Josueypa tiemponpi, Israel runakuna Gabaon runakunawan allinlla kawsakunankupaq rimanakusqankuraykum (Jos. 9:3-27).

Kamachiq Saulqa, chay rimanakusqankutam yanqacharurqa Gabaon runakunata wañuchiyta qallaykuspan, chayta ruwasqankuwanqa huchallikururqakumá, chay ruwasqankuraykum mana kawsaypas qispirqachu chay tiempopiqa (2 Sam. 21:1). Davidña Israel nacionta kamachiyta qallaykuptinmi, Gabaon runakunaqa kamachiq Saul paykunawan ima ruwasqanta willaykurqaku. Chaymi Davidqa imapas mañakusqankuta ruwayta munarqa. Chaynata niptinmi Gabaon runakunaqa mañakurqaku Saulpa qanchis churinkunata wañuchinankupaq (Num. 35:30, 31). Davidqa chay mañakusqankutamá ruwarqa (2 Sam. 21:2-6).

Chaypaqqa, Saulwan churin Jonatanqa wañukurqakuñam. Jonatanpa churin Mefi-bosetmi ichaqa kawsakuchkarqaraq, payqa warmacha kachkaspallanraqmi iskaynin chakichanwan wiqru qiparurqa. Chayna kasqanraykumá payqa mana yanapanmanchu karqa Gabaon runakunata abuelon wañuchiptinqa. Davidpas Mefi-bosetpa taytan Jonatanwantaqmi rimanakurqaku, paywan chaynataq ayllunkunawan allinlla kawsakunankupaq (1 Sam. 18:1; 20:42). Bibliapipas kaynatam nin: ‘Saulpa willkan utaq Jonatanpa churin Mefi-boset runatam ichaqa [Gabaon runakunamanqa] mana quykurqachu, Saulpa churin Jonatanwan juramento ruwasqanrayku’ nispa (2 Sam. 21:7).

Chaywanpas Davidqa, Gabaon runakunapa mañakusqantam ruwarqa, Saulpa iskay churinkunatawan qanchis willkankunatam Gabaon runakunaman quykurqa. Chay qanchismanta huk kaqninmi karqa Mefi-boset sutiyuq churin (2 Sam. 21:8, 9). David chayta ruwaruptinñam, allpankupiqa kawsaykuna qispiyta qallaykurqa.

Kay willakuymantaqa, kaytam yacharunchik. Saulpa iskay churinkunawan pichqa willkankuna mana huchayuq kaptinkuqa, Jehova Diosqa manam saqinmanchu karqa paykuna wañunankutaqa. Diospa kamachikuyninpiqariki nirqam, taytankupa huchanmantaqa churikunaqa mana wañunanpaq. Hina chay kamachikuypim nirqa: “Huchallikuspaqa sapakamam huchankumanta wañunqaku”, nispa (Deut. 24:16). Tukuy kaykunawanmi yachanchik Saulpa iskay churinkunawan pichqa willkankunaqa. Gabaon runakunata wañuchisqankumanta huchayuq kasqankurayku wañusqankuta. Paykunaqa, kikinkupa huchankumantam wañurqaku.

¿Imatam yachachwan kay willakuymanta? Imatapas ruwaruspanqa manam pipas ninanchu, kamachisqankuta kasukusqanrayku ruwarusqantaqa. Aswanqa, sapakamam bibliapi kayna nisqanta ruwananchik. Ninmi: ‘Cuidadowanyá puriy maymi sarusqaykita qawaspayki. Chaynata ruwaspaykiqa segurom kawsakunki’, nispa (Prov. 4:24-27; Efes. 5:15).