¿Imanasqataq ‘Elimelecpa hichpa ayllunqa’ nirqa Rutwan casarakuruptinqa ‘herencian yanqachakurunanmanta’? (Rut 4:1, 6).

Ñawpaq tiempopiqa sichu huk qari casado kachkaspan mana churiyuq wañukuptinqa Moisespa leyninpim nirqa allpanwan imata ruwanankumanta chaynataq sutin mana chinkananpaq imata ruwanankumantapas.

Sichu huk runa wañukuptinqa utaq wakchayarusqanrayku allpanta rantikuptinqa wawqinmi utaq hichpa ayllunmi chay rantiq runamanta rantinan karqa, chaynapi hina chay familiallapa chay allpa kananpaq (Lev. 25:23-28; Núm. 27:8-11).

Ichaqa ¿imatam ruwaqku wañukuqpa sutin mana chinkananpaq? Wañukuqpa wawqinmi viuda qipaqta casaranan karqa, chaynapi chay naceq churi wañukuq taytanpa sutinta apananpaq hinaspa allpanta chaskinanpaq. Chayna ruwayninkuqa allinmi karqa viuda qipaq imanmantapas mana usunanpaq (Deut. 25:5-7; Mat. 22:23-28). Rutpa tiemponpipas chaytaqa ruwaqkuraqmi.

Noemiyta ima pasasqantayá yuyariykusun. Payqa Elimelecwanmi casarasqa karqa, chaymi iskay warmanku karqa. Ichaqa qusanpas hinaspa wawankunapas wañukurqam, hinaptinmi manaña pipas karqachu uywaqninqa (Rut 1:1-5). Chaymi Noemiyqa Juda nacionninman kutiruspan llumchuynin Rutta nirqa allpankuta kaqmanta rantipunanpaq Boazta nimunanpaq, Boazqa karqa wañukuq qusan Elimelecpa ayllunmi (Rut 2:1, 19, 20; 3:1-4). Ichaqa Boazmi nirqa paymantaqa huk ayllunku aswan mas ‘hichpa ayllun’ kasqanta, chaymi nirqa rantinanpaqqa pay aswan derechoyuq kasqanta (Rut 3:9, 12, 13).

Qallariypiqa Elimelecpa hichpa ayllunqa munarqam allpankuna rantiytaqa (Rut 4:1-4). Payqa yaqapaschá piensarqa chay rantisqan allpaqa paypaqña qipananta. Chaynataqa piensarqa Noemiy yuyaqña kaspa manaña wawayuq kay atinanta yachaspam, chayraykupaschá allpankuna rantiyta munarqa.

Ichaqa Elimelecpa hichpa ayllunqa yacharurqam Rutta casarananmanta, chaymi manaña allpan rantiytaqa munarqañachu. Kaynatam nirqa: “Manam rantiymanchu, rantiptiyqa herenciaymi yanqapaq kanman”, nispa (Rut 4:5, 6). ¿Imanasqataq chaynata nirqa?

Sichu Elimelecpa hichpa ayllun utaq hukkaqnin ayllun Rutwan casarakuruptinqa paypa wawanmi Elimelecpa allpanwanqa qipakunan karqa. ¿Imaynatam chayqa Elimelecpa hichpa ayllunpa herencianta yanqachanman karqa? Bibliaqa manam ninchu. Chaywanpas kaykunaraykupaschá chaynataqa ninman karqa.

• Punta kaq, yaqapaschá payqa piensarqa chay allpa rantiyninqa qullqin usuchiy kasqanta, chaynataqa piensarqa Elimelecpa allpan Rutpa wawanpaña kananta yachaspam.

• Iskay kaq, payqa Ruttawan Noemiytam uywanan karqa casarakuspanqa.

• Kimsa kaq, sichu Rutwan casarakuruptin achka churi-wawanku kaptinqa chay churi-wawankum paypa sapaq churinkunawan herenciata rakinakunanku karqa.

• Tawa kaq, sichu sapaq churinkuna mana kaptinqa Rutpapi kaq churillanmi Elimelecpa hinaspa kikinpa allpanwanpas qipakunan karqa, hinaptinmi Elimelecpa sutin apaq churiña allpanwanqa qipakunan karqa. Kikinpa sutinqa chinkananñam karqa. Chaymi Elimelecpa hichpa ayllunqa Noemiyta mana yanapayta munarqachu herencianta yanqacharuyta mana munaspan. Chayraykum nirqa Boazña Rutta casarananpaq, paypas chay ruwananpaq derechoyuq kasqanrayku. Hinaptinmi Boazqa “arí” niykurqa, chaynapi wañukuqpa “tukuy imanpas sutinpi hinalla kananpaq” (Rut 4:10).

Yachamusqanchikman hinaqa Elimelecpa hichpa ayllunqa manam munarqachu sutinwan herencian chinkanantaqa. ¡Kikillanpaq munaqmá karqa! Chayta ruwasqanqa yanqapaqmá karqa. ¿Imanasqa? Sutinqa manamá riqsisqachu, hinaspapas manamá paypa mirayninmantachu Jesusqa karqa. ¡Boazpa mirayninmantamá karqa! Arí, Elimelecpa hichpa ayllunqa Noemiytawan Rutta yanapayta mana munasqanraykum hinaspa kikillanpaq munaq kasqanraykum qunqasqa kachkan, Boazmi ichaqa ancha riqsisqa kachkan (Mat. 1:5; Luc. 3:23, 32).