1. ¿Imanasqataq Diosmanta hamuq yanapakuykunata maskananchik?

TAYTANCHIK JEHOVAMANTAM hamun imapas allin kaqkunaqa. Chaymi Jesuspas kay allpa pachapi kachkaspan nirqa imamantapas Diosmanta hamuq yanapakuykunata maskanamanta. Nirqataqmi chay yanapakuykunata tukuy sunqunchikwan maskanapaq kallpanchakunamanta (Mat. 6:19-21). Arí, Diosmanta hamuq yanapakuykunata maskaspaqa atisunmi paywan kuyachikuyta chaynataq paypa runan kaytapas. Chayqa Jesuspa nisqanman hinam imamantapas aswan allin.

2. (1) ¿Imatam niwanchik Apostol Pablo 2 Corintios 4:17 hinaspa 18 kaqninpi? (2) ¿Imamantam kay yachachikuypi yachasun?

² Apostol Pablopas nirqam mana rikusqanchik kaqkunapi utaq Diosmanta hamuq yanapakuykuna imayna yanapawasqanchikpi yuyaymananapaq (qaway 2 Corintios 4:17, 18). Taytanchik Jehovaqa hamuq punchawpi sumaq huertapi kawsakuptinchikmi yanapawasun. Kunanpas taytanchikqa kusisqa kananchikpaqmi yanapawachkanchik. Chaypaqqa atiynintam quwanchik, mañakusqanchiktapas uyariwanchikmi. Manam chayllachu. Paymanta kusisqa willakunanchikpaqpas Jesuswan hinaspa angelninkunawanmi yanapawanchik. Chaymantapas taytanchik Jehovaqa yanapawanchiktaqmi paywan kuyachikunapaq. Kaykunamantayá qatiqninpi astawan yachaykusun. Yachaykusuntaqyá kaykunamanta imaynata agradecekunamantapas.

3. ¿Imam ñuqanchikpaqqa aswan allin, hinaspa imanasqataq mana iskayrayanachu taytanchik Jehova kuyawasqanchikmanta?

³ Taytanchik Jehovawan kuyachikuymi utaq paypa kuyasqan  runa kaymi imamantapas aswan allinqa (Prov. 3:32). Ichaqa yaqapaschá sunqunchikpiqa kaynata nikuchwan: “Tukuy unanchaq Jehova Diosqa, ¿yaqachu kuyawanman pantaq runa kachkaptiypas?”, nispa. Kuyawasqanchikmantaqa amayá iskayrayasunchu. ¿Imanasqa? Payqa churin Jesustam huchanchikrayku wañunanpaq kay allpa pachaman kachamurqa (Juan 1:29). Jesucristo ñuqanchikrayku wañunanmantaqa taytanchik Jehovaqa manam iskayrayarqachu. Chayraykum ñawpaqmantaraq Jesus manaraq kay allpa pachaman hamuchkaptin yupaychaqninkunataqa huchankumanta pampachaspan kuyarqaña (Rom. 3:25).

4. Willarimuy manaraq kay allpa pachaman Jesus hamuchkaptin Jehova Diospa kuyasqan yupaychaqninkunamanta.

⁴ Rimarisun Abrahanmanta, payqa Jesus manaraq kay allpa pachaman hamuchkaptinmi Jehova Diosninchikta tukuy sunqunwan yupaycharqa. Chaymi unay wataña wañukuptinpas Diosninchik nirqa Abrahanqa ancha kuyasqan kasqanmanta (Is. 41:8). Arí, Jehova Diosqa kuyasqan runankunataqa manam wañukuptinchikpas qunqawasunchu. Abrahantapas manamá qunqanchu (Luc. 20:37, 38). Jobtapas Jehova Diosqa anchatam kuyarqa, chaymi mana iskayrayarqachu payman sunqu kasqanmantaqa. Huk kutipim angelninkunapa ñawpaqninpi Jobmanta rimaspan nirqa: “Payqa mana huchallikuqmi, allin kaqkuna ruwaqmi, ñuqatapas kasuwanmi, mana allin ruwaykunamantapas sapaqchakuqmi”, nispa (Job 1:6-8). Chaynallatataqmi Danielmantapas nirqa. Danielqa Diosta mana yupaychaq runakunapa chawpinpi yachachkaspanpas tukuy sunqunwanmi Jehova Diosllata yupaycharqa. Chayraykum angelkuna kimsa kutikama Danielta kallpanchananpaq nirqa: “Qamqa [Jehova Diospa] ancha kuyasqanmi kanki”, nispa (Dan. 9:23; 10:11, 19). Arí, papanchik Jehova Diosqa wañukuq yupaychaqninkunata mana qunqasqanraykum hamuq punchawpi kawsarichimunqa (Job 14:15).

5. ¿Imatam ruwananchik Dioswan kuyachikunapaqqa?

⁵ Ñuqanchikpas pantaq runa kaspanchikpas atichwanmi Dioswan kuyachikuytaqa. Chaypaqqa uchuypas, hatunpas llapallanchikmi kallpanchakunanchik Diospa munasqanman hina kawsakunapaq. Chaypaq kallpanchakusqanchikta qawamuspanmi Jehova Diosqa kusikun, hinaspam ‘anchata kuyawanchik’ (Prov. 3:32). Chaymantapas Dioswan kuyachikuytaqa atinchik señorninchik Jesucristo huchanchikmanta wañukusqanraykum. Chaymi mana iskayrayaspa Diosllapaqña kawsakunapaq bautizakunanchik. Chaypaq kallpanchakuspanchikqa enteron allpa pachapi achka iñiqmasinchikkuna hinam Diospa kuyasqan runankuna kasunchik.

6. ¿Imatam ruwananchik Abrahan, Job hinaspa Daniel hina?

⁶ Abrahan hinaspa Jobqa wañukunanku punchawkamam Jehova Diosman sunqu karqaku. Ñuqanchikpas paykuna hinam unayña utaq chayllaraq Diosta yupaychaspanchikpas wañukunanchik punchawkama Diosman sunqu kananchik. Daniel hinataqmi imaña-haykaña kaptinpas Diosllata yupaychananchik (Dan. 6:7, 10, 16, 22). Jehova Diosmi yanapawasun ima sasachakuypiña tarikuptinchikpas mana llumpayta hukmanyarunapaq, chaynataq paymanta mana karunchakunapaq (Filip. 4:13).

7. (1) Proverbios 15:8 nisqanman hinaqa, ¿Diosqa uyariwanchikchu mañakusqanchikta? (2) ¿Mañakusqanchikman hinachu Diosqa yanapawasun?

⁷ Jehova Diosqa mañakunanchiktam munan. Imaynam kuyasqanchik iñiqmasinchikkunapa niwasqanchiktapas sumaqta uyariykunchik, chaynam taytanchikpa niwasqanchiktapas uyarinanchik. Chaypaqqa palabrantam  sapa punchaw ñawinchananchik. Kuyasqanchik iñiqmasinchikkunamanqa willakunchiktaqmi imapas llakichiwasqanchikmanta utaq imapas kusichiwasqanchikmanta. Chaynallataqmi taytanchik Jehova Diosmanpas sunqunchikpi tukuy ima kasqanta willakunanchik. Payqa kuyawasqanchikraykum uyariykuwasun (qaway Proverbios 15:8). Mañakusqanchikman hinataqmi yanapaykuwasun, wakinpim ichaqa suyachaykunanchik kanqa. Chayna kaptinpas hinallam mañakunanchik. Diosninchikqa allinta riqsiwasqanchikraykum yachan haykapi hinaspa imaynata yanapaykuwananchikta. Wakinpiñataqmi mañakusqanchikman hina mana yanapawaspanchikpas Jehova Diosqa kallpata chaynataq yachayta quwasun ima sasachakuykunawanpas mana llumpayta hukmayarunapaq (1 Cor. 10:13).

8. ¿Imatam ruwananchik Dioswan kuyachikunapaqqa?

⁸ Chaynaqa papanchik Jehova Dioswan kuyachikunapaqqa tukuy ‘tiempom mañakunanchik’ (1 Tes. 5:17). Payqa munan sunqumanta sapa punchaw achka kutita mañakunanchiktam (Rom. 12:12). Jehova Diosta mañakuspaqa amataqyá qunqasunchu tukuy ima quwasqanchikmanta agradecekuytapas (Sal. 145:2, 3).

9. (1) ¿Imatam nin huk iñiqmasinchik Diosta mañakuymanta? (2) ¿Imaynatam kay iñiqmasinchikta qatipakuchwan?

⁹ Jehova Diosta achka wataña yupaychasqanchikrayku hinaspa mañakusqanchikman hina yanapawasqanchikraykum paytaqa sapa kuti mañakuyta munanchik. Huk iñiqmasinchikpas sapa punchawmi Diosta mañakun. Payqa 47 watañam Diosmanta 70 horata willakun. Paymi nin: “Sapa kutim tuta-tutaraq hatarispay manaraq runakunapas purichkaptin Jehova Diosninchikta mañakullani. Kaynata ruwaspaymi Jehova Diosta astawan kuyani. Manaraq puñuq richkaspaypas Diosninchiktam mañakullani, chaymi miskitaraq puñuykuni”, nispa.

10. ¿Imanasqataq Jehova Diospa atiyninta mañakunanchik?

¹⁰ Jehova Diosqa atiyninwanpas yanapawanchiktaqmi. Chayqa mayna kusikunapaqmi.  Chaymi Jesuspas nirqa sapa kuti Jehova Diosta atiyninwan yanapawananchikpaq mañakunanchikmanta (Luc. 11:9, 13). Arí, Diospa atiyninwanqa tukuy ima ruwaytam atisun (2 Cor. 4:7; Hech. 1:8). Paypa atiyninwanqa ima sasachakuykunatapas atipasuntaqmi.

11. ¿Imaynatam Jehova Diosqa atiyninwan yanapawanchik?

¹¹ Jehova Diosqa atiyninwantaqmi yanapawanchik paypaq imatapas allinta ruwananchikpaq. Mana atisqanchikkunatapas Diospa atiyninwanqa ruwaytam atinchik. Chaymi imatapas allinta ruwaruspaqa ninanchik: “Jehova Diospa atiynillanwanmi kaytaqa allinta ruwaruni”, nispa.

12. Salmo 139:23, 24 nisqanman hinaqa, ¿imapaqmi Jehova Diosta mañakunanchik?

¹² Llapallanchikmi Jehova Diosta mañakunanchik imayna runa kasqanchikta musyakunapaq (qaway Salmo 139:23, 24). Jehova Diosqa uyariykuwaspanchikmi atiyninwan yanapawasun sunqunchikpa imapas mana allin munapayasqanmanta cuentata qukunapaq. Hinaspam atiyninwan yanapawasun chay mana allin munapayasqanchikta sunqunchikmanta chinkachinapaq. Chaypaq sapa kuti mañakuptinchikqa taytanchik Jehovaqa hinallam atiyninwan yanapawasun (Efes. 4:30).

13. ¿Imapim llapallanchik yuyaymanananchik?

¹³ Llapallanchikmi yuyaymanachwan Jehova Dios atiyninwan imayna yanapawasqanchikpi. Manaraq hanaq pachaman Jesus richkaspanmi qatiqninkunata nirqa: ‘Atiytam chaskinkichik hinaspam ñuqamanta willakunkichik [...] kay pachapa cantonkama’, nispa (Hech. 1:8). Jesuspa nisqanqa kunanmi astawanraq qawakuchkan. Chaymi enteron allpa pachapi pusaq wara-waranqa masninña Jehova Diospa yupaychaqninkunaqa kachkanchik. Chaymantapas Jehova Diosqa atiyninwanmi yanapawanchik kuyakuq, kusisqa, hawkalla, pacienciakuq, sumaq sunquyuq, kuyapayakuq, iñiyniyuq, llampu sunqu hinaspa controlakuq kananchikpaq (Gal. 5:22, 23). Mayna kusisqam tarikunchik taytanchik Jehova atiyninwan yanapawasqanchikmanta yachaspanchik.

14. ¿Pikunam yanapawanchik sumaqta willakunanchikpaq?

¹⁴ Jehova Dioswan Jesusmi hinaspa angelkunam yanapawanchik sumaqta willakunanchikpaq (2 Cor. 6:1). Jehova Diosqa paymanta willakuq lluqsiptinchikmi atiyninwan yanapawanchik. Payqa ñuqanchikwan kuska llamkachkanmanpas hinam kachkan. Chaymi apostol Pablopas nirqa: ‘Ñuqaykuqa Diospa llamkaqmasinmi kaniku’, nispa (1 Cor. 3:9). Jesuspas yanapawanchikmi taytanmanta willakuptinchik. Chaymi qatiqninkunata nirqa: “Llapallan nacionpi runakunaman rispayá yachachimuychik”, nispa. Jesusqa nirqaraqmi: “Sapa punchawmi ñuqaqa qamkunawan kasaq”, nispa (Mat. 28:19, 20). Angelkunapas yanapawanchiktaqmi llampu sunquyuq runakunata tarispanchik “sumaq willakuyta” paykunaman willaykunanchikpaq (Apoc. 14:6).

15. ¿Pipa yanapakuyllanwantaq runakuna yanapayta atinchik? Willarimuy Lidiamanta.

¹⁵ Jehova Diospa yanapakuyllanwantaqmi runakuna yanapaytapas atinchik. Jesusmi nirqa wakin runakunapa sunqunqa allin allpa hina kasqanmanta. Chayraykum runakunaqa Diosmanta yachayta qallaykuspanku paypa munasqanman hina kawsakunankupaq kallpanchakunku (Mat. 13:18, 23). Ichaqa, ¿kikillankumantachu chayna kanku? Manam. Jesusmi nirqa: “Manam pipas ñuqamanqa hamunmanchu [utaq qatiqniyqa kanmanchu] kachamuwaqniy taytay mana pusamuptinqa”, nispa (Juan 6:44). Chayqa ñawpaq tiempomantaraqmi sutilla qawakurqa. Rimarisun Filipos llaqtapi yachaq Lidiamanta. Paysi huk kutipi llaqtapa hawa lawninpi achka warmikunawan kachkasqaku. Hinaptinsi apostol Pablo Diosmanta willaykusqa. Chaysi Lidiaqa chay warmikunamantapas astawanraq Diosmanta yachayta munasqa. ¿Imaynapi? Bibliam nin: “Jehova Diosmi sunqunta suma-sumaqta kichaykurqa Pablopa rimasqankunata allinta uyarinanpaq”, nispa (Hech. 16:13-15). Kunanpas kikin Jehova Diosmi achkallay-achka runakunata yanapachkan yupaychaqninkuna kanankupaq.

16. ¿Pillatam hatunchananchik achka runakunaman Diosmanta yachachispanchikqa?

¹⁶ Chaynaqa, ¿pillatam hatunchananchik achka runakunaman Diosmanta yachachispanchikqa? Taytanchik Jehovallatam. Apostol Pablopas nirqam: “Ñuqam tarpurqani, Apolosñataqmi parqurqa, Diosmi ichaqa wiñachirqa. Chaynaqa, tarpuqwan parquqpas manam imachu, aswanqa wiñachiq Diosllam”, nispa (1 Cor. 3:6, 7). Apostol Pablo hinam ñuqanchikpas taytanchik Jehovallata hatunchananchik paymanta runakunaman allinta yachachisqanchikmanta utaq paypa yupaychaqninkuna kanankupaq yanapasqanchikmanta.

17. ¿Imata ruwaspam Jehova Diosta, Jesusta hinaspa angelkunata kusichiyta atichwan?

¹⁷ Ancha kusisqam tarikunchik Jehova Diospa, Jesuspa hinaspa angelkunapa yanapawasqanchikmanta yachaspa. Ñuqanchikpas paykunatam kusichiyta munanchik, chaymi wasin-wasin rispa utaq maypiña kaspapas tukuyta ruwanchik papanchik Jehovamanta willakunanchikpaq (Hech. 20:20). Achka iñiqmasinchikkunam maypiña tarikuspankupas Diosmanta willakunku. Chaypaqqa paykunaqa puntatas piwanpas tuparuspanku rimakuykunku. Chay runa kusisqallaña chaskiptinqa pisi-pisimantas Diosmanta rimayta qallaykunku.

18, 19. (1) ¿Imatam ruwananchik runamasinchikkunata sunqumanta yanapayta munaspanchikqa? (2) ¿Imaynatam taytanchik Jehovaqa huk iñiqmasinchikta yanapaykurqa?

¹⁸ Runamasinchikkunata sunqumanta yanapayta munaspanchikqa manam Diosmantaqa willayllachu-willasun, aswanqa tukuytam ruwasun paykunapas Jesuspa qatiqninkunaña  kanankupaq. Imaynam imatapas tarpukuruspanchikqa allinta wiñamunanpaq parqupayanchik, chaynallataqmi runamasinchikkunamanpas Jesuspa qatiqninkuna kanankupaqqa achka kutita watukunanchik, mana atispanchikqa wakin iñiqmasinchikkunatam nichwan paykunaña watukunankupaq. Yachachisqanchik runa Diosta kuyasqanrayku bautizakuyta munasqanta qawaspanchikmi kusisqa tarikunchik. Kusisqataqmi tarikunchik Jehova Dios imayna yanapasqanta qawaspanchikpas.

¹⁹ Rimarisun Africa lawpi yachaq huk iñiqmasinchikmanta. Payqa layqakunatas ruwaq. Chaymantas iñiqmasinchikkunawan bibliamanta yachayta qallaykusqa. Chaywansi kusisqa tarikusqa, ichaqa llumpaytas sasachakusqa layqa ruwaymanta hinaspa wañuqkuna qayapaymanta bibliapa ima nisqanta yacharuspan (Deut. 18:10-12). Ichaqa hinallas kallpanchakusqa Diospa munasqanman hina kawsakunanpaq. Chaysi Diosninchikqa atiyninwan yanapaykusqa chaykunata manaña ruwananpaq. Kunanqa kay iñiqmasinchikqa 60 watanpiñam kachkan. Paymi willakun: “Agradecekunim iñiqmasinchikkuna tukuy imapi yanapaykuwasqanmanta. Paykunam yanapaykuwarqa huk llamkayta maskaysiwaspanku. Astawanraqmi agradecekullani taytanchik Jehovataqa, paymi yanapawarqa punta vidayta saqinaypaq. Chaymi kunanqa iñiqmasinchikkunawan kuska runamasinchikkunaman kusisqa Diosmanta willakuni”, nispa.

20. ¿Imamantam anchata agradecekunanchik?

²⁰ Kunanmi suma-sumaqta yachaykunchik kusisqa kawsakunanchikpaq taytanchik Jehova imayna yanapawasqanchikmanta. Yacharunchikmi taytanchik Jehovaqa paywan kuyachikunanchikta munasqanmanta. Yacharunchiktaqmi anchata kuyawasqanchikrayku mañakusqanchikta uyarisqanmanta, atiyninwan yanapawasqanchikmanta hinaspa sumaqta willakunapaq pikunawan yanapawasqanchikmantapas. Kaykunawan Jehova Dios yanapawasqanchikta yachaspanchikmi anchata agradecekunanchik.