Iñiqmasinchik Saram * willakun: “Taksachaymantam pinqapakuq hinaspa manchapakuq kani. Chaymi piwanpas mana anchatachu rimani, astawanraqmi chaylla piñakuq utaq hatun tukuq runakunawanqa. Llampu sunquyuq runakunawan kuska kaspaymi ichaqa kusisqa tarikuni. Chayna runakunamanqa imapas llakichiwasqanmanta utaq imapas kusichiwasqanmantam willakuni”, nispa.

Iñiqmasinchik Sara hinam ñuqanchikpas munanchik llampu sunqu runakunawan hukllawakuyta. Taytanchik Jehovapas chayna kananchiktam munan. Chaymi niwanchik “llampu sunqu” kanapaq kallpanchakunamanta (Col. 3:12). Chaynaqa, ¿imaynataq llampu sunqu runaqa? ¿Imatam Jesusqa ruwarqa llampu sunqu kasqanrayku? ¿Imaynatam llampu sunqu kayqa yanapawanchik aswan kusisqa kananchikpaq?

Llampu sunqu runaqa manam chayllaqa imawanpas piñakunchu. Hukkunatapas kuyakuywan hinaspa sumaq siminwanmi rimapayan. Chaymantapas ima llaki qatiruptinpas manam llumpaytaqa hukmanyarunchu.

Llampu sunqu runaqa imatapas allinta tantiarispantaqmi ruwan. Ñawpaq tiempopim Grecia llaqtayuq runakuna llampu sunqu kayta tupachiqku mansoyachisqa caballowan. Imaynam mansoyachisqa caballoqa kallpasapa kaspanpas dueñonwanqa sumaqllataña pusachikun. Yaqa chaynam ñuqanchikpas llampu sunqu kaspaqa manam chayllaqa imawanpas piñakurusunchu.

Pantaq runa kasqanchikrayku hinaspa hatun tukuq chaynataq kikillankupaq munaq runakunapa chawpinpi kawsasqanchikraykum sasachakunchik llampu sunqu kanapaqqa (Rom. 7:19). Chaymi anchata kallpanchakunanchik. Taytanchik Jehovapas atiyninwanmi yanapawasunchik (Gal. 5:22, 23). Qatiqninpiyá yachaykusun imanasqa llampu sunqu kanapaq kallpanchakunamanta.

Llampu sunqu kaptinchikqa hukkunapas ñuqanchikwan kuska kaytam munanqaku. Iñiqmasinchik Sara hinam ñuqanchikpas llampu sunqu runakunawan kuska kaspanchikqa kusisqa tarikunchik. Jesusmi pimantapas aswan kuyapayakuq hinaspa llampu sunqu karqa (2 Cor. 10:1). Chaymi warmachakunapas mana manchakuspanku Jesuswan kuska kayta munaqku (Mar. 10:13-16).

Llampu sunqu kayqa allinninchikpaqmi, hukkunawanpas allinlla kawsakunapaqmi yanapawanchik. Llampu sunqu kaspanchikqa manam chayllaqa  imawanpas piñakusunchu nitaq hukmanyasunchu (Prov. 16:32). Chayqa allinninchikpaqmi. Manataqmi pesapakusunchu imapas nisqanchikmantaqa utaq ruwasqanchikmantaqa. Chayna kayninchikqa yanapawasuntaqmi pitapas mana sientirachinapaq.

Jesusqa achka ruwayniyuq kachkaspanpas tiempochakuqmi hukkunata yanapaykunanpaq. Chaymi llakisqakunata hinaspa imawanpas ñakariq runakunata nirqa: “Ñuqamanyá hamuychik llapallan hukmanyasqakuna hinaspa llasaq qipiyuqkuna, ñuqam samaykachisqaykichik. [...] ñuqaqa kani llampu sunqu hinaspa humillakuqmi”, nispa (Mat. 11:28, 29).

¿Imam yanapawasun Jesus hina llampu sunqu kanapaq? Chaypaqqa bibliatam sapa punchaw ñawinchananchik, hinaspam yuyaymanananchik Jesus kay allpa pachapi kachkaspan runakunawan imayna kasqanpi, chaynataq sasachakuykunapi tarikuspan mana hukmanyarunanpaq ima ruwasqanpi. Yanapawasuntaqmi pipas imatapas niwaptinchik Jesus hina mana chaylla piñakunapaq kallpanchakuyninchikpas (1 Ped. 2:21). Qatiqninpiyá yachaykusun Jesus imayna kasqanmanta.

Jesusqa mana hatun tukuqmi karqa. Chaymi nirqa: “Ñuqaqa kani llampu sunqu hinaspa humillakuqmi”, nispa (Mat. 11:29). Bibliapas niwanchikmi ñuqanchikpas llampu sunqu hinaspa humillakuq kanapaq (Efes. 4:1-3). ¿Imanasqa?

Humillakuq kaspaqa manam pipapas ima niwasqanchikwanqa chayllaqa piñakurusunchu. Jesuspas manam chayllaqa piñakurqachu “mikuysapa hinaspa vino tomakuq” nispa llaqtamasinkuna niptinkuqa. Aswanmi nirqa:“Runapa allin ruwasqankunam qawachin yachayniyuq kasqanta”, nispa (Mat. 11:19).

Ñuqanchikpas amayá chayllaqa piñakusunchu pipas maymanta kasqanchikmanta utaq imayna uywasqa kasqanchikmanta asikuwaptinchikqa. Aswanqa sumaqllatam rimapayananchik. Rimarisun punta apaq iñiqmasinchik Pitermanta. Paymi nin: “Piñakunaypaq hina pipas imatapas niwaptinqa chayllam Jesuspi yuyaymanani. Hinaspam sunqullaypi nikuni: ‘¿Imatam Jesusqa ruwanman karqa kayta uyarispan?’, nispa. Kayna yuyaymanayniyqa anchatam yanapawan mana chaylla piñakunaypaq”, nispa. Payqa ninraqmi: “Kunanqa pipas ñuqamanta asikuwaptinqa mana kaqpaqta hinañam niwasqantaqa hapini”, nispa.

Jesusqa pampachakuqmi karqa. Jesuspa qatiqninkunaqa pantaq runa kasqankuraykum allin kaqkuna ruwayta munaspankupas wakinpiqa pantaqku. Huk kutipim qatiqninkunaqa Jesusta kallpanchanankumantaqa utaq imapipas yanapanankumantaqa puñukururqaku. Chaywanqa manam piñakurqachu, aswanmi nirqa: “Allin ruwayta runa munaptinpas cuerpoqa mana kallpayuqmi kachkan”, nispa (Mat. 26:40, 41). Arí, Jesusqa qatiqninkunapa pantasqankuwanqa manam piñakurqachu, aswanmi llakipayaykuspan pampachaykurqa.

Rimarisun iñiqmasinchik Mandymanta. Paysi ñawpaqta munaq paypa munasqanman hina imapas kananta. Chaypaqsi pitapas llumpayta hikutaq. Kunansi ichaqa kallpanchakun Jesus hina llampu sunqu kananpaq. Paymi nin: “Taytanchik Jehovata qatipakusqayraykum iñiqmasinchikkunapa pantasqallankuta qawanaymantaqa kallpanchakuni paykunapa imapas allin ruwasqankupi yuyaymananaypaq”, nispa. Arí, kunanqa Mandyqa Jesus hina llampu sunquñam. Ñuqanchikpas llampu sunqu kanapaq kallpanchakuspaqa kusisqam kasun.

Jesusqa Jehova Diosllapim hapipakurqa. Jesustaqa kay allpa pachapi kachkaptinmi runakuna chiqnispanku maqaparqaku. Chaywanpas Jesusqa llampu sunqu kasqanraykum mana kutipakurqachu, aswanmi Diosllapi hapipakusqanrayku payllata suyarqa (1 Ped. 2:23). Arí, Jesusqa yacharqam Jehova Dios mana haykapipas qunqarunanmanta, chaynataq chay ñakarichiqnin runakunata chinkachinanmantapas.

Pipas yanqamanta mana allinta ruwawasqanchikmanta piñakuruspaqa nanay siminchikwanmi imatapas niruchwan. Chaymi bibliapas niwanchik: “Runapa piñakusqanqa manam Diospa allin ruwaq kasqanman hinachu”, nispa (Sant. 1:20).

Iñiqmasinchik Catim ñawpaqta tukuyta ruwaq autoridadkuna utaq pipas leypa nisqanman hina ruwananpaq. Paymi nin: “Autoridadkunata utaq pitapas mana hikutaptiyqa manam allintaqa imatapas ruwaqkuchu”, nispa. Dios yupaychayta qallaykusqanmantam ichaqa manaña chaynañachu karqa. Payqa ninraqmi: “Kunanqa taytanchik Jehovallapi hapipakusqayraykum manaña hawa runakuna hinachu autoridadkunataqa utaq  pitapas hikutani imatapas allinta ruwanankupaqqa”, nispa. Pipas mana allinta ruwaruwaptinchikqa ñuqanchikpas Jesus hinayá taytanchik Jehovallapi hapipakusunchik.

Jesusmi nirqa: “Mayna kusisqam llampu sunquyuqkunaqa”, nispa (Mat. 5:5). Qatiqninpiyá yachaykusun llampu sunqu kayqa imayna yanapawasqanchikmanta.

Casado vidapi kusisqa kawsakunapaqmi yanapawanchik. Australia nacionpi yachaq iñiqmasinchik Robertom nin: “Piñasqa kasqayraykum warmichayta nanay simiywan tukuyta niparurqani. Chayna nirusqaymantam pesapakurqani, hinaspam llumpay hukmanyasqa tarikurqani”, nispa.

Pantaq kasqanchikraykum rimasqanchikwan sapa kuti pantanchik, chaymi mana tantiarispa imatapas rimaruspaqa casado vidanchikpiqa sasachakuchwan (Sant. 3:2). Chayna sasachakuykunapi mana tarikunapaqqa llampu sunqu kayninchikmi yanapawasun (Prov. 17:27).

Iñiqmasinchik Robertoqa anchatam kallpanchakurqa imawanpas mana chaylla piñakurunanpaq. Paymi nin: “Kunanqa warmichaywan imapas tantiasqay wakinpi mana tupaptinqa manañam chayllaqa piñakunichu, manataqmi nanay simiywanqa imatapas nirunichu. Aswanqa kallpanchakunim imapas niwasqanta sumaqllata uyariykunaypaq. Chaymi kunanqa kusisqa kawsakuniku”, nispa.

Iñiqmasinchikkunawan hawkalla kawsakunapaqmi yanapawanchik. Chaylla imawanpas piñakuq runawanqa manam hukllawakuytaqa munanchikchu. Llampu sunqu runakunawanmi ichaqa hukllawakuyta munanchik, paykunawan kuska kaspaqa kusisqam tarikunchik (Efes. 4:2, 3). Iñiqmasinchik Catim nin: “Llampu sunqu kanaypaq kallpanchakusqayraykum manaña chayllaqa imamantapas piñakunichu. Chaymi llapallan iñiqmasinchikkunawan hawka hinaspa kusisqa tarikuni”, nispa.

Hawka kawsakunapaqmi yanapawanchik. Bibliapa nisqanman hinam Diospa runankunaqa llampu sunqu kanku, hinaspapas hawkam kawsakunku (Sant. 3:13, 17). Llampu sunqu kasqankuraykutaqmi mana imawanpas chayllaqa piñakunkuchu (Prov. 14:30). Iñiqmasinchik Martinpas llampu sunqu kananpaqmi kallpanchakurqa. Paymi nin: “Kunanmi ichaqa manaña yanqakunamantaqa piñakunichu. Chaymi hawkalla hinaspa kusisqa kawsakuni”, nispa.

Pantaq runa kasqanchikraykum llapallanchik kallpanchakunanchik llampu sunqu kanapaq. Huk iñiqmasinchikpas ninmi: “Llampu sunqu kanaypaq kallpanchakuspaypas wakinpim yanqamanta piñakuni”, nispa. Ichaqa taytanchik Jehova Diosmi atiyninwan yanapawasun llampu sunqu kananchikpaq (Is. 41:10; 1 Tim. 6:11). Paytaqmi yanapawasun ‘qaqa hina sayaq, kallpayuq hinaspa allin takyaq kananchikpaq’ (1 Ped. 5:10). Arí, Taytanchik Jehovapa yanapakuyninwanqa apostol Pablo hinam llampu sunqu kasun (2 Cor. 10:1).