Kaypi bibliamanta rikuriq willakuykunaqa kay tukupay punchawkunapim sutilla qawakuchkan (Dan. 12:⁠4).

• Bibliapa mayqin qillqanpi willakusqanmanta: Apoc. 11:7; 12:13, 17; 13:1-8, 12

  Bibliapa willakusqanmanta: Chay ‘manchakuypaq animalmi’ utaq atiyniyuq nacionkunam unay watakuna imapas munasqankuta ruwarqaku. Tukupay punchawkunapim chay manchakuypaq animalpa qanchis umanta tuksiruptinku wañusqa hina karqa. Chaymanta qipallanmanmi ichaqa sanoyarurqa. Hinaptinmi ‘kay pachapi llapallan runakuna chay animalta qatikurqaku’. Satanasmi atiyniyuq nacionkunawan hanaq pachapaq akllasqa iñiqmasinchikkunata ñakarichinanpaq tukuyta ruwachkan.

  Bibliapa willakusqan imayna ruwakusqanmanta: Noeypa tiemponpi sinchi para karusqan qipallamanmi atiyniyuq nacionkuna rikurirurqaku. Chay nacionkunam Diospa contranpi hatariruspanku yupaychaqninkunatapas ñakarichirqaku. Punta kaq hatun guerrapiñataqmi Gran Bretaña nacionta yaqalla puchukarachirqaku. Ichaqa Estados Unidoswan hukllawakuruspanmi kaqmanta atiyniyuq rikurirurqa. Kay tukupay punchawkunapim chay nacionkunaqa Jehova Diospa yupaychaqninkunata ñakarichinankupaq tukuyta ruwachkanku.

• Bibliapa mayqin qillqanpi willakusqanmanta: Dan. 11:25-45

  Bibliapa willakusqanmanta: Tukupay punchawkunapim norte hinaspa sur lawmanta nacionkunaqa atiyniyuq kanankupaq tukuyta ruwarqaku.

  Bibliapa willakusqan imayna ruwakusqanmanta: Norte lawmanta Alemania nacionmi aswan atiyniyuq kayta munasqanrayku Gran Bretaña hinaspa Estados Unidos nacionpa contranpi hatarikururqa. 1945 watapiñataqmi norte lawmanta musuq nacionña rikurirurqa. Chayqa karqa Union Sovietica hinaspa yanapaqnin nacionkunam. 1991 watapim ichaqa Union Sovietica nisqanku nacionqa manaña atiyniyuqchu karqa, chaymi watakuna risqanman hina Rusia hinaspa yanapaqnin nacionkunaña Danielpa willakusqan norte lawmanta kaq nacionqa karqaku.

• Bibliapa mayqin qillqanpi willakusqanmanta: Isa. 61:1; Mal. 3:1; Luc. 4:18

  Bibliapa willakusqanmanta: Jehova Diosmi, ‘ñanta allichachkaq’ hina yupaychaqninkunata kamachirqa paypa munaychakuyninmanta willakuyta qallarinankupaq.

  Bibliapa willakusqan imayna ruwakusqanmanta: 1870 watapim iñiqmasinchik Charles Russellwan yanapaqninkuna bibliamanta imam kaqta yachayta qallaykurqaku. 1880 watamantañataqmi kallpanchakurqaku bibliamanta imam kaqta willakunankupaq. Chaymi qillqanchikkunapipas qillqarqaku Diosmanta willakunanchikpaq imanasqa kallpanchakunamanta yachachikuykunata. Wakin yachachikuykunapa sutinmi nirqa “Waranqa Diosmanta willakuqkunatam maskachkaniku” hinaspa “Diosmi akllaruwanchik paymanta willakunapaq” niq.

• Bibliapa mayqin qillqanpi willakusqanmanta: Mat. 13:24-30, 36-43

  Bibliapa willakusqanmanta: Huk runam chakranpi trigota tarpururqa. Ichaqa enemigonmi tarpusqan hawanman mana allin qurata tarpuparurqa. Chaymi mana allin quraqa trigowan kuska wiñaramurqa. Cosecha tiempopim ichaqa mana allin qurataqa huk lawman akllarurqaku.

  Bibliapa willakusqan imayna ruwakusqanmanta: 1870 watamantam Jehova Diospa yupaychaqninkunaqa suti riqsiyllaña karqaku. 1914 watamantañataqmi pantay religionmanta lluqsikuspanku huk ayllu hinallaña Jehova Diosta yupaychanchik.

• Bibliapa mayqin qillqanpi willakusqanmanta: Dan. 2:31-33, 41-43

  Bibliapa willakusqanmanta: Danielmi willawanchik hatunkaray runa kaqllapa iskaynin chakin mitumantawan fierromanta kasqanta.

  Bibliapa willakusqan imayna ruwakusqanmanta: Mituqa tupan Gran Bretaña hinaspa Estados Unidos nacionpi yachaq runakunawanmi. Chay runakunaqa manam kusisqachu kanku chay nacionpi autoridadkunapa ruwasqankuwanqa.

• Bibliapa mayqin qillqanpi willakusqanmanta: Mat. 13:30; 24:14, 45; 28:19, 20

  Bibliapa willakusqanmanta: Jesusmi nirqa trigota cosecharuspanku taqiman hinarusqankumanta. Nirqataqmi allin ruwaq yuyayniyuq sirvienteta patronnin tiempollanpi serviqninkunaman mikuchinanpaq churarusqanmantapas. Chaymantapas nirqaraqmi Diospa munaychakuyninmanta enteron allpa pachapi willasqa kananmanta.

  Bibliapa willakusqan imayna ruwakusqanmanta: 1919 watapim Jehova Dios yuyayniyuq sirvienteta akllarurqa Dios yupaychayninchikpi yanapawananchikpaq. Chaymi chay watamanta tukuyta ruwachkanchik taytanchik Jehovamanta willakunanchikpaq. Chayraykum kunankama 200 masnin nacionkunapiña willakuchkanchik 1000 masnin rimaykunapi.

• Bibliapa mayqin qillqanpi willakusqanmanta: Dan. 12:11; Apoc. 13:11, 14, 15

  Bibliapa willakusqanmanta: Carnero hina iskay waqrayuq manchakuypaq animalmi kay pachapi yachaqkunata kamachirqa manchakuypaq punta kaq animalpa rikchayninta ruwanankupaq. “Chaymantapas chay iskay waqrayuq animalqa atiytam chaskirqa manchakuypaq punta animalpa rikchayninta kawsachinanpaq”.

  Bibliapa willakusqan imayna ruwakusqanmanta: Gran Bretañawan Estados Unidos nacionmi yanapakurqaku Sociedad de Naciones nisqanku rikurichinankupaq. Chaytaqa rikurichirqaku enteron allpa pachapi hawkayay kananta munasqankuraykum. Norte lawmanta kaq nacionpas chay nacionkunawanmi hukllawakururqa. Ichaqa 1926 watamanta 1933 watakamallam karqa. Chay Sociedad de Naciones nisqankum hatun tukuspanku nirqaku paykunalla hawkayay kananpaq yanapakunankumanta. Chaynallatataqmi nirqaku chaymantaña rikurimuq Organizacion de las Naciones Unidas nisqankupas.

• Bibliapa mayqin qillqanpi willakusqanmanta: Dan. 8:23, 24

  Bibliapa willakusqanmanta: Bibliam niwanchik ‘llumpay hatun tukuq hinaspa sakrillaña’ kamachikuq rikurimunanmanta.

  Bibliapa willakusqan imayna ruwakusqanmanta: Kay llumpay hatun tukuq hinaspa sakrillaña kamachikuqqa tupan Gran Bretañawan Estados Unidos nacionwanmi. Kay nacionkunaqa Danielpa willakusqanman hinam wakin nacionkunata munaychakunankupaq tukuyta ruwarqaku. Chaymi iskay kaq hatun guerra kachkaptin contrankupi hatariq nacionkunapa huk kaqnin llaqtapi bombata tuqyarachirqaku.

• Bibliapa mayqin qillqanpi willakusqanmanta: Dan. 11:31; Apoc. 17:3, 7-11

  Bibliapa willakusqanmanta: Manchakuypaq pukay-pukay animalmi uku-ukuman chinkaykuq uchkumanta lluqsimun. Payqa pusaq kaq kamachiqmi. Danielmi willawanchik chay pukay-pukay animalqa millakuypaq kaqkunata ruwasqanmanta.

  Bibliapa willakusqan imayna ruwakusqanmanta: Sociedad de Naciones nisqankum iskay kaq hatun guerrapi chinkarurqa. Ichaqa kaqmantam achka nacionpi kamachikuqkuna huñunakuspanku rikurichirqaku Organizacion de las Naciones Unidas nisqankuta. Chaytaqa rikurichirqaku enteron allpa pachapi hawkayay kananta munasqankurayku hinaspa runakuna paykunallapi hapipakunankuta munasqankuraykum. Ichaqa manapas unaymantam paykunaqa pantay religionkunata chinkachinqa.

• Bibliapa mayqin qillqanpi willakusqanmanta: 1 Tes. 5:3; Apoc. 17:16

  Bibliapa willakusqanmanta: ONU nisqanpi huñunasqa kamachikuqkunam ninqaku “hawkañam, seguroñam kachkanchik”, nispa. Ichaqa manam chaynachu kanqa. Chunka waqrakunam manchakuypaq animalpiwan chuchumikata chinkachinqa. Hinaspam chay nacionkunapas qalaypaq chinkachisqa kanqaku.

  Bibliapa willakusqan imayna ruwakusqanmanta: ONU nisqanpi huñunasqa kamachikuqkunam runakuna kusisqa kanankupaq ninqaku “hawkañam, seguroñam kachkanchik”, nispa. Chayqa llullam kanqa. Paykunaqa llapallan pantay religionkunatam chinkachinqa. Chaywanmi qallarinqa llumpa-llumpay ñakariy punchawkuna. Chayqa kanqa Armagedon punchawkamam. Chaypim ichaqa llapallan nacionkuna chinkachisqa kanqaku.

• Bibliapa mayqin qillqanpi willakusqanmanta: Ezeq. 38:11, 14-17; Mat. 24:31

  Bibliapa willakusqanmanta: Gogmi mana murallasqa nacionman yaykunqa hawka kawsakuqkunata chinkachinanpaq. Chaymantañataqmi angelkuna akllasqakunata huñunqaku.

  Bibliapa willakusqan imayna ruwakusqanmanta: Norte lawmanta nacionmi yanapaqnin nacionkunapiwan chinkachiyta munawaspanchik contranchikpi hatarikunqaku. Chayllapitaqmi kay pachapiraq kaq hanaq pachapaq akllasqa iñiqmasinchikkuna hanaq pachapi huñusqa kanqaku.

• Bibliapa mayqin qillqanpi willakusqanmanta: Ezeq. 38:18-23; Dan. 2:34, 35, 44, 45; Apoc. 6:2; 16:14, 16; 17:14; 19:20

  Bibliapa willakusqanmanta: Yuraq caballopi sillakuqmi Gogta hinaspa soldadonkunata chinkachinqa. Manchakuypaq animaltawan runaman rikchakuqtapas chinkachinqam.

  Bibliapa willakusqan imayna ruwakusqanmanta: Kamachiwaqninchik Jesucristom hanaq pachapaq akllasqakunapiwan hinaspa angelkunapiwan chinkachiwananchikpaq nacionkuna hatarikamuchkaptin qalaypaq chay nacionkunata chinkachinqaku.