1, 2. ¿Imakunaraykum achka iñiqmasinchikkuna sasachakunku Diosmanta willakuyta?

APOSTOL PABLOM Timoteota hinaspa llapallan iñiqkunata kallpancharqa Diosmanta allintapuni willakunankupaq (2 Tim. 4:5). Llapallanchikmi kallpanchakunchik Pablopa chayna nisqanta kasukunapaq, chaywanpas wakinpiqa sasam. Achka iñiqmasinchikkunam Diosmanta willakunankupaqqa anchata kallpanchakunku (2 Tim. 4:2). Diosmanta willakuyninchikta autoridadkunapa harkakusqanku nacionkunapi iñiqmasinchikkunaqa yachankum willakuptinku presocharunankuta, chaywanpas hinallam willakunku.

² Diospa serviqninkunataqa tukuy ima sasachakuykunam hukmanyachiwachwan. Achka iñiqmasinchikkunam sapa punchaw anchata llamkanku ayllunku mikusqa hinaspa pachasqa kananpaq. Paykunaqa munankum Diosmanta astawan willakuyta, ichaqa semana tukuyta pisipasqa tarikusqankuraykum mana atinkuchu. Wakin iñiqmasinchikkunañataqmi unqusqankurayku utaq yuyaqña kasqankurayku Diosmanta willakuytaqa manaña ancha atinkuchu. Wakinkuqa manam wasinkumantapas lluqsiyta atinkuchu. Huk iñiqmasinchikkunañataqmi mana valeqpaq hapikusqankurayku sasachakunku Diosmanta willakuyta. Iñiqmasinchik Marym * nin: “Mana valeqpaq hapikusqayraykum hukmanyasqa tarikuni. Chayllapiña umayuq kaspaymi mana munastinña Diosmantapas willakuni”, nispa.

3. ¿Imamantam kay yachachikuypi yachasun?

³ Ima sasachakuypiña tarikuptinchikpas Jehova Diosqa  yanapaykuwasunmi hinalla payta servinanchikpaq. Kay yachachikuypim yachasun Pablotawan Timoteota imayna kallpanchasqanmanta. Yachasuntaqmi ñuqanchikta imayna yanapawasqanchikmantapas.

4. ¿Ima sasachakuykunapim Pablo tarikurqa?

⁴ Pabloqa tukuy ima sasachakuypi tarikuspanmi Dios yanapaykunanta munarqa. Payqa maqapasqa, rumiwan chuqapasqa hinaspa carcelasqam karqa (2 Cor. 11:23-25). Kikintaqmi nirqa allin ruwayta munaspanpas mana atisqanta (Rom. 7:18, 19, 24). Chaymantapas, Diostam achka kutikama mañakurqa aychanpi tiparayachkaq kichkawan hina ñakarisqanpi yanapaykunanpaq (2 Cor. 12:7, 8).

5. ¿Imatam Pablo ruwarqa sasachakuypi tarikuspanpas?

⁵ Jehova Diosmi apostol Pablotaqa yanaparqa ima sasachakuyña kaptinpas hinalla paymanta willakunanpaq. Chaymi Roma nacionpi carcelasqa tarikuspanpas riqsisqa judiokunaman willakurqa. Willakurqataqchá kamachiqpa yanapaqninkunamanpas (Hech. 28:17; Filip. 4:21, 22). Willakurqataqmi kamachiqta cuidaq soldadokunamanpas chaynataq lliw watukuqninkunamanpas (Hech. 28:30, 31; Filip. 1:13). Chayna carcelpi kachkaptinmi Jehova Diosqa Pablota yanaparqa iñiqmasinkunaman cartakunata qillqananpaq. Chay qillqasqankunaqa ñuqanchiktapas yanapawanchikmi. Roma nacionpi iñiqmasinkunapas iñiyninrayku carcelasqa kasqanta qawaspankum kallpanchasqa tarikurqaku, hinaspam mana manchakuspanku Diosmanta willakurqaku (Filip. 1:14). Pabloqa Diosmanta astawan willakuyta munaspanpas tukuy atisqantam ruwarqa. Paymi nirqa tukuy ima pasasqanqa sumaq willakuy astawan willakusqa kananpaq kasqanta (Filip. 1:12).

6. 2 Corintios 12:9, 10 nisqanman hinaqa, ¿imam Pablota yanaparqa hinalla willakunanpaq?

⁶ Pabloqa yacharqam tukuy imapas ruwasqanqa Diospa yanapakuynillanwan kasqanta. Chaymi nirqa ‘Diospa atiyninqa mana kallpayuq runapi qawakusqanta’ (qaway 2 Corintios 12:9, 10). Pablotaqa Diosmi atiyninwan yanaparqa carcelpiña kaspanpas utaq ima sasachakuypiña tarikuspanpas hinalla willakunanpaq.

7. ¿Imakunataq Timoteota sasacharqa Diosta serviyninpi?

 ⁷ Timoteotapas Diosmi atiyninwan yanaparqa paypa munayninta hinalla ruwananpaq. Timoteoqa Pablotam riysirqa karu llaqtakunata Diosmanta willakuq riptin hinaspa iñiqmasinkunata watukuptin. Wakinpiqa sapallantañam kacharqa iñiqkunata watukuq rispan kallpanchananpaq (1 Cor. 4:17). Ichapas Timoteoqa chayta mana ruway atisqanpaq hapikurqa. Chayraykupaschá Pabloqa nirqa: ‘Amapuniyá musu kasqaykitaqa pipas despreciachunchu’, nispa (1 Tim. 4:12). Chay watakunapitaqmi Timoteoqa sapa kuti unqurqa (1 Tim. 5:23). Chaywanpas manam iskayrayarqachu willakunanpaq hinaspa iñiqmasinkunata yanapananpaq atiyninwan Dios yanapananmantaqa (2 Tim. 1:7).

8. ¿Imaynatam Dios yanapawanchik?

⁸ Jehova Diosqa atiyninwanmi yanapawanchik ima sasachakuypipas hinalla payman sunqu kanapaq (2 Cor. 4:7). Paymi yanapawanchik payta mañakuptinchik, bibliata ñawinchaptinchik, iñiqmasinchikkunawan hinaspa paymanta willakuptinchik. Chaykunamantayá yachaykusun.

9. ¿Imaynatam yanapawanchik Diosta mañakuy?

⁹ Diosta mañakuyninchik. Pablom nirqa: “Diosta tukuy tiempo mañakuychik”, nispa (Efesios 6:18). Chayta ruwaptinchikqa Diosmi kallpanchaykuwasun. Bolivia nacionpi yachaq iñiqmasinchik Jonnietam sasachakuypi tarikuptin Jehova Dios yanapaykurqa. Paypa tayta-mamanwan warmichanmi unqururqa. Jonniepaqqa sasamá karqa kimsanta cuidayqa. Chaymantam mamanqa wañukurqa. Warmichanpiwan papanñataqmi unaypi allinyarqaku. Chayta yuyarispanmi Jonnieqa nin: “Llumpay hukmanyasqa kaspaymi Diosta mañakurqani imapi yanapaykuwananpaq”, nispa. Jehova Diosmi Jonnietaqa yanaparqa sasachakuykunata aguantananpaq. Hina Boliviapitaqmi Ronald sutiyuq iñiqmasinchikpa mamanpas cancerwan wañukurqa. Ima yanapasqanmantam Ronald nin: “Diosta mañakuspaymi tukuy ima llakiykunata willani. Payqa pimantapas astawanmi yachan imayna tarikusqayta”, nispa. Mañakuspanchik mana ima niyta atiptinchikpas Diosqa munanmi payman asuykunanchikta (Rom. 8:26, 27).

10. Hebreos 4:12 nisqanman hinaqa, ¿imanasqam ancha allin bibliata leeyninchik hinaspa chaypi yuyaymanayninchik?

¹⁰ Bibliata ñawinchayninchik. Apostol Pablo hinam ñuqanchikpas bibliata leenanchik Dios yanapaykuwananchikpaq hinaspa sunqunchikta tiyaykachinanpaq (Rom. 15:4). Bibliata ñawinchasqanchikpi yuyaymanaptinchikqa Diosmi atiyninwan yanapaykuwasun ñawinchasqanchik imayna yanapawananchikta entiendenapaq (qaway Hebreos 4:12). Ronaldmi nin: “Sapa tutam bibliata leeni, chaymantam yuyaymanani Jehova Dios imayna kasqanpi hinaspa serviqninkunata kuyakuywan yanapasqanpi, chaymi anchata kallpanchawan”, nispa.

11. ¿Imaynatam huk iñiqmasinchikta bibliapa nisqan yanaparqa?

¹¹ Biblia leesqanchikpi yuyaymanayninchikmi yanapawasun sasachakuyninchikkunawan mana hukmanyarunapaq. Viudaña kaq iñiqmasinchiktam punta apaq iñiqmasinchik nirqa Job sutiyuq librota leeynin yanapananmanta. Iñiqmasinchikqa leeruspanmi Jobpa nisqankunamanta sunqullanpi nirqa: “¡Imaynamá Jobqa kaynataqa nirqa!”,  nispa. Chaymantam cuentata qukururqa paypas Job hina kasqanta. Chaymi iñiqmasinchiktaqa yanaparqa qusanpa wañukusqanwan manaña llumpay hukmanyasqa kananpaq.

12. ¿Imaynatam Diosqa iñiqmasinchikkunawan kallpanchawanchik?

¹² Iñiqmasinchikkuna. Jehova Diosqa iñiqmasinchikkunawanpas kallpanchawanchikmi. Apostol Pablom iñiqmasinkunaman qillqaspan nirqa kallpanchanakunankupaq tupaykuy munasqanta (Rom. 1:11, 12). Rimamusqanchik Marym iñiqmasinchikkunawan kuska kaspan anchata kusikun. Paymi nin: “Jehova Diosqa iñiqmasinchikkunawanmi yanapawan. Huk kutipim imayna tarikusqayta mana yachaspankupas rimapayaykuwaspanku hinaspa qillqaykamuwaspanku kallpanchaykuwarqa. Kallpanchawantaqmi ñawpaqpi ñuqa hina tarikuq iñiqmasinchikkunawan rimaypas. Punta apaq iñiqmasinchikkunapas niwanmi llapallan iñiqmasiykuna anchata kuyawasqankuta”, nispa.

13. ¿Imaynatataq huñunakuykunapi kallpanchanakuchwan?

¹³ Iñiqmasinchikkunawan kallpanchanakunapaqqa huñunakuykunapim kananchik. Huñunakuykunapi kaspaqa paykunatam nichwan anchata kuyasqanchikta hinaspa ruwasqankuwan kusisqa kasqanchikta. Peter sutiyuq punta apaq iñiqmasinchikmi Diosta mana serviq qusayuq iñiqmasinchikta nirqa: “Llapallan wawaykikunawan huñunakuykunaman hamusqaykita qawaspaykum hinaspa rimarinankupaq yanapasqaykiwanmi anchata kusikuniku”, nispa. Chaynata niykuptinmi iñiqmasinchikqa wiqi ñawintin nirqa anchata kallpanchaykusqanta.

14. ¿Imaynatam yanapawanchik Diosmanta willakuyninchik?

¹⁴ Diosmanta willakuyninchik. Runakuna uyariwaptinchik utaq mana uyariwaptinchikpas Diosmanta willakuspaqa kallpanchasqa hinaspa kusisqam tarikunchik (Prov. 11:25). Stacy sutiyuq iñiqmasinchikmi llumpay hukmanyasqa tarikurqa ayllunmanta huknin Diospa llaqtanmanta qarqurachikuptin. Chaymi sunqunpi nikuq: “Imallatapas ruwaymanchiki karqa yanapanaypaq”, nispa. Chayna tarikuptinmi Diosmanta willakuy yanaparqa. Willakuq lluqsispanqa manam chayllapiña umayuqchu karqa, aswanqa runamasinchikkunata yanapaypim piensaq. Paymi nin: “Jehova Diosmi yanapawarqa paymanta yachay munaq runata tarinaypaq. Payqa chayllam yachasqanman hina kawsakuyta qallaykurqa. Chayqa anchatam kusichiwarqa. Diosmanta willakuymi yanapawan ima sasachakuywanpas mana hukmanyarunaypaq”, nispa.

15. ¿Imatam yachachwan iñiqmasinchik Marypa nisqanmanta?

¹⁵ Wakinpiqa ichapas piensachwan Diosmanta mana ancha willakusqanchikta. Ichaqa amayá qunqasunchu tukuy sunqumanta willakuptinchikqa Jehova Dios kusikusqanta. Iñiqmasinchik Marym tantiarurqa huk rimaypi yanapakunanpaq. Paymi nin: “Chay rimaypi Diosmanta willakuyta qallaykuspayqa qillqanchikkunallatam quq kani. Huñunakuykunapipas bibliapa textonkunallatam leeq kani”, nispa. Chay rimayta allinta rimaqkunawan tupachikuspanmi iñiqmasinchikqa mana yanapakusqanpaq hapikurqa. Chaymantam ichaqa cuentata qukururqa chay rimayta mana allinta rimaspanpas Jehova Diospa yanapakuyninwan yanapakuy atisqanta. Paymi nin: “Bibliamanta  yachayqa manam sasachu. Pipas atinmanmi Diospa munasqanman hina kawsakuytaqa”, nispa.

16. ¿Imataq yanapawasun Diosmanta willakuyta munaspapas wasinchikmanta mana lluqsiyta atiptinchik?

¹⁶ Unqusqanchikrayku wasinchikmanta mana lluqsiyta atiptinchikpas Jehova Diosqa yachanmi paymanta willakuy munasqanchikta. Chaymi payqa yanapawachwan doctorkunaman hinaspa cuidawaqninchikkunaman willakunapaq. Ñawpaqta Diosmanta willakusqanchikta kunan ruwasqanchikwan tupachispaqa hukmanyaruchwanmi. Imaña-haykaña kaptinpas hinalla kusisqa kanapaqqa kunan Jehova Dios yanapawasqanchikpi yuyaymanaymi yanapawasun.

17. Eclesiastes 11:6 nisqanman hinaqa, ¿imanasqataq hinalla willakunanchik runakuna mana uyariwaptinchikpas?

¹⁷ Diosmanta willakuyninchikmi tupan muguta tarpuywan. Manam yachanchikchu mayqin mugu tarpusqanchik sapichakuspan wiñanantaqa (qaway Eclesiastes 11:6). Barbara sutiyuq yuyaq iñiqmasinchikmi telefonowan hinaspa cartawan willakun. Huk kutipim qillqasqan cartapi apachirqa 2014 watapi marzo killapa qallariynin punchawpi lluqsimuq La Atalaya qillqata. Chaypim rimarqa anchata kuyawaspanchik Dios imata ruwasqanmanta. Iñiqmasinchikqa mana yachastinmi aparachirqa 27 masnin wataña Jehova Diospa testigon kayta saqiruq casarasqakunaman. Paykunaqa kuti-kutirispam chay qillqataqa ñawincharqaku. Qusanpaqqa Jehova Dios rimapayachkanmanpas hinam karqa. Paykunaqa huñunakuykunaman riytam qallaykurqaku, hinaspam Jehova Diosta kaqmanta servirqaku. ¡Chaywanqa mayna kusisqachá iñiqmasinchik Barbaraqa tarikurqa!

18. ¿Imatam ruwananchik atiyninwan Jehova Dios yanapawananchikpaq?

¹⁸ Kay yachachikuypi yachamusqanchikman hinam Jehova Diosqa tukuy imaymanata atiyninwan yanapawanchik. Chaypaqqa paytam mañakunanchik, bibliatam ñawinchananchik, iñiqmasinchikkunawanmi hukllawakunanchik, hinaspapas runamasinchikkunamanmi willakunanchik. Chaytaqa ruwananchik Dios yanapawananchikmanta mana iskayrayaspam. Chaynaqa, taytanchik Jehova Diosllapiyá hapipakusun, payqa munan allin sunquyuqkunata atiyninwan yanapaytam (2 Cron. 16:9).