Ñuqaqa nacerqani 1983 watapim. Chunka watayuq kachkaptiymi enteron cuerpoy nisyuta nanayta qallaykuwarqa. Iskay wata qipamanqa manañam puriytapas atirqaniñachu. Chaymantapas, taksa warmacha hinallañam qiparurqani.

Chayna tarikuspay unayña wasillaypi kachkaptiymi bibliamanta yachachiq iskay warmikuna wasiyman chayaramurqaku. Hukninpa sutinmi karqa Florencia. Ñuqaqa pipas hamuptinqa manam rikuchikuqchu kani, chay punchawmi ichaqa chay testigokunawan rimayta munarqani. Paykunam kay allpa pacha sumaq huerta kananmanta willawarqa, hinaptinmi yuyarirurqani Jetro sutiyuq runamanta. Paymi pichqa wataypi kachkaptiy Surinam nacionmanta hamuspan taytayman bibliamanta yachachiq. Chaymantapas, abueloywan abuelaymi testigokunapa huñunakuyninkuman pusawaq. Chaymi bibliamanta yachachiwananpaq Florencia niykuwaptin “arí” nirqani.

Florenciaqa qusanpiwanmi bibliamanta yachachiwarqa. Paykunaqa yachachiwarqataqmi ñawinchaytapas. Chaymantam paykunaqa niykuwarqa Surinam nacionpiña Diosmanta willakunankumanta. Hinaptinmi manaña pipas karqachu bibliamanta yachachiwaqniy. Chaywanpas, Jehova Dios mana qunqaruwasqanmantam kusisqa tarikurqani.

Chaymantam kay Orealla llaqtachaman chayaramurqa Diosmanta willakuq Floyd. Paymi Diosmanta willakuspan wasiyman chayaramurqa, hinaspanmi niwarqa bibliamanta yachachiwananpaq, hinaptinmi ñuqañataq asirirqani. Chaymi payñataq tapuwarqa imanasqa asirisqaymanta, hinaptinmi willarqani ¿Imatam Dios munan ñoqanchikmanta? sutiyuq qillqata tukuruspay El conocimiento que lleva a vida eterna * niq qillqamantaña yachasqayta. Hinaptinmi Floydqa chay qillqamantaña yachachiyta qallaykuwarqa. Ichaqa paytapas niykurqakum huk llaqtamanña rinanpaq, chaymi kaqmanta manaña pipas karqachu yachachiwaqniy.

2004 watapiñataqmi kay llaqtaman chayaramurqaku Granville hinaspa Joshua sutiyuq tukuy tiemponkuwan Diosmanta willakuqkuna. Paykunapas wasin-wasin Diosmanta willakuspankum tariramuwarqa,  hinaspam tapuwarqa bibliamanta yachachiwanankupaq. Hinaptinmi asirispay nirqani Conocimiento qillqata qallariyninmanta kaqmanta yachachiwananpaq. Chaynataqa nirqani ñawpaq yachachiwaqniykunapa yachachiwasqanwan tupasqanta utaq mana tupasqanta yachanaypaqmi. Granvillem niwarqa kay llaqtaypi huñunakuy kasqanmanta, chaymi yaqa chunka wata wasillapi kachkaspaypas huñunakuyman rirqani.

Chaymanta qipatam Granville kallpanchawarqa huñunakuypi Diosmanta yachachinapaq escuelapi kanaypaq. Paymi niwarqa: “Mana puriyta atispaykipas rimankiqa allintam. Chaymantam puntamanta yachachiqña kanki”, nispa. Chayna niwasqanwanmi kusisqa tarikurqani.

Chaymantam Diosmanta willakuyta qallaykurqani. Ñankuna ranrallaña hinaspa uchkullaña kaptinmi mana silla ruedawanqa riyta atiqchu kani. Hinaptinmi Granvilleqa carretillapiña tanqawarqa Diosmanta willakuq rinaykupaq. 2005 watapa abril killanpim bautizakurqani. Chaymantam iñiqmasinchikkuna yachachiwarqaku huñunakuypi qillqanchikkunata aypuywan hinaspa yachachikuykuna allinta uyarikunanpaq aparatokunawan yanapakunaypaq.

2007 watapim bote tikrakuykuptin taytay wañukurqa. Aylluykunawan llakisqa kaptiykum Granvilleqa ñuqaykuwan Jehova Diosta mañakuq, hinaspapas bibliawanmi sunquykuta tiyaykachiq. Iskay wata qipatañataqmi Granvillepas bote tikrakuykuptin wañukurqa.

Huñunakusqaykupiqa iñiqkunapi punta apaqqa manañam karqachu, qiparurqaqa punta apaqkunapa yanapaqnillanñam. Granville wañukuptinmi llumpay llakisqa karqani. Paymi yanapawaq Diosmanta yachayniypipas chaynataq tukuy imapipas. Paypa wañukusqan qipatam huñunakuypi Willakuq qillqata ñawinchay tuparuwarqa. Allinta ñawinchachkaspaymi yuyariruspay waqakururqani. Chaymi manaña ñawinchayta atirqaniñachu.

Chaymantam huk lawpi kaq iñiqmasinchikkuna yanapaqniyku hamurqa, chaymi kusisqaña tarikurqaniku. Chaymantapas, betel wasipi iñiqkunam tukuy tiemponwan Diosmanta willakuq iñiqmasinchikta kamachimurqaku kayman hamunanpaq. Chaymantam mamay hinaspa sullkay bibliamanta yachaspanku bautizakururqaku, chaywanmi anchata kusikurqani. 2015 watapa marzo killanpim iñiqkunapi punta apaqkunapa yanapaqninña karqani. Chaymanta qipallatam puntamantaña yachachimurqani. Chay punchawmi puntamanta yachachiq kanaypaq Granvillepa niwasqanta yuyariruspay kusikuymanta waqarqaniraq.

Sapa killa lluqsimuq videokunapim qawani ñuqa hina unquq iñiqmasinchikkunata. Paykunaqa unquspankupas Diosman sunqu hinaspa kusisqam tarikunku. Chaynam ñuqapas imallapipas yanapakuytaqa atini. Tukuy sunquywan Jehova Diosta kuyaspaymi 70 horataña sapa killa willakuyta qallaykurqani. 2019 watapa septiembre killanpim iñiqkunapi punta apaq kanaypaqña niwarqaku. Chaywanmi ancha kusisqa tarikurqani. Kunanqa yaqa tawa chunkañam huñunakuniku.

Yachachiwaqniykunatam anchata agradecekuni Jehova Diosta servinaypaq yanapaykuwasqankumanta, astawanqa Jehova Diostam agradecekuni. Payqa manamá qunqaruwarqachu.