ACHKA iñiqmasinchikkunam nacionninkumanta huk nacionman ripukurqaku llamkayrayku. Chay nacionpi unayña yachaspankupas Jehova Diostawan runamasinkuta kuyasqankuraykum mana ancha willakuqkunapa kasqanpi willakunankupaq nacionninkuman kutirunku (Mat. 22:37-39). Kaypim yachasunchik Camerun nacionman kutinankupaq wakin iñiqmasinchikkuna imakuna saqisqankumanta hinaspa paykunata Jehova Dios imayna yanapasqanmanta.

Onesimo sutiyuq iñiqmasinchikmi Camerun nacionninmanta ripukuspan chunka tawayuq wata huk nacionpi yacharqa. Huk kutipim huñunakuypi kachkaptin ñawpaqmanta yachachimuq iñiqmasinchik Diosmanta astawan willakunamanta rimaspan kaynata nirqa: “Iskay runakuna mayupi challwachkanmanku. Sichum huknin qawanman achka challwa hapisqanta hinaspaqa, ¿manachum chayman pasakunqa?”, nispa.

Chayta uyarispanmi Onesimoqa Camerun nacionman kutiyta munarqa. Payqa yacharqam Diosmanta yachay munaq runamasinchikkuna achka kasqanta. Ichaqa huk lawpi unayña kasqanraykum llaqtanpi amañananmanta iskayrayarqa. Chaymi imayna kananmanta yachananpaq suqta killallaraq rirqa. Chaymantam ichaqa 2012 watapi Camerun nacionpiña yachananpaq rirqa.

Onesimom kaynata nin: “Kaqmantam amañanay karqa rupayman hinaspa imayna kawsakuyman. Huñunakuypipas tablamanta bancakunallapim tiyarqaniku. Chaywanpas, yachachikuykunata allinta uyarispayqa qunqaruqmi kani imapi tiyasqaytapas”, nispa.

2013 watapim Onesimoqa Geraldina sutiyuq iñiqmasinchikwan casarakururqa. Payqa isqun wata Francia nacionpi kasqanmantam Camerun nacionninman kutirurqa. ¿Imaynatam Jehova Diosqa yanaparqa paymanta astawan willakunankupaq nacionninkuman kutisqankurayku? Onesimom kaynata nin: “Diospa munaychakuyninmanta willakuqkunapaq escuelamanmi rirqaniku, yanapakurqanikutaqmi betel wasipipas. Pasaq watapim ñuqaykupa huñunakusqaykumanta iskay chunka runamasinchikkuna bautizakurqaku. Challwa hapiqkuna hinamá Diosmanta yachay munaq runakunapa kasqanpi kachkaniku”, nispa (Mar. 1:17, 18). Geraldinapas ninraqmi: “Diospaq tukuy imata ruwasqaykuraykum ancha kusisqa kachkaniku”, nispa.

Estados Unidos nacionpi unayña yachaq Yudit sutiyuq iñiqmasinchikpas Diosmantam astawan willakuyta munarqa. Paymi willakun: “Camerun nacionta sapa kuti aylluyman watukuq rispayqa llakisqam kutimuq kani. Chaypim achka runakunaman  bibliamanta yachachirqani”, nispa. Chaywanpas, Camerun nacionman kutiytaqa iskayrayarqam. Achka qullqita ganasqanraykum Camerun nacionpi unquq taytantapas chay qullqiwan yanapaq. Chaymantam ichaqa Jehova Dios yanapananpi mana iskayrayaspan nacionninman kutikurqa. Yuditpaqa manam Estados Unidos nacionpi hinachu tukuy iman kapurqa. Tukuy chaykunamanta mana hukmanyasqa kananpaqmi Jehova Diosta mañakurqa. Yudittaqa kallpanchaykurqataqmi llaqtan-llaqtan watukuq iñiqmasinchikpas warmichanpiwan.

Camerun nacionman kutikusqanmantam Yuditqa kimsa watallapi tawa runakunata bautizakunankupaq yanaparqa. Chaymantam tukuy tiemponwan Diosmanta willakunanpaq nirqaku. Kunanqa Sam-Castel sutiyuq qusanpiwanmi iñiqkunata llaqtan-llaqtan watukunku. Taytanpaqpas huk law nacionpim hospitalta tarirurqaku, chaypim mana qullqillapaq operarurqaku.

Victor sutiyuq iñiqmasinchikpas Canada nacionpim unayña yacharqa. Paymi Willakuq qillqanchikpi estudiaymanta ñawincharuspan tantiakururqa achka wata universidadpi estudiananmantaqa ima llamkayllatañapas yachananpaq. Victormi nin: “Chaypaq tantiakusqayraykum chaylla llamkayta tarirurqani, hinaspapas sapa killam Diosmanta 70 hora willakuyta atirqani”, nispa. Chaymantam Victorqa Carolinawan casarakururqa, hinaspankum Camerun nacionta rirqaku. Chaypi betel wasita riptinkum iñiqmasinchikkuna kallpancharqaku Camerun nacionpi qipakunankupaq. Victormi nin: “Chaynata niwaptinkum imapas kapuqllaykuwan kawsakusqaykurayku ‘arí’ nirqaniku”, nispa. Paykunaqa Camerun nacionman ripukunankupaqmi tantiarurqaku Carolina wakinpi unquptinpas.

Victorwan Carolinaqa sapa killam Diosmanta 70 hora willakuyta qallaykurqaku, chaynapi yachay munaq achka runakunata yanapanankupaq. Paykunaqa qullqi huñuchakusqankuwanmi karqaku, chaymantam ichaqa iskay-kimsa killa llamkaq riqku Canada nacionta, hinaspankum Camerun nacionman kutiqku hinalla Diosmanta willakunankupaq. ¿Imaynatam paykunata Jehova Dios yanaparqa? Paykunaqa Diospa munaychakuyninmanta willakuqkunapaq escuelamanmi rirqaku, hinaspapas tukuy tiemponkuwan Diosmanta willakuqkunam karqaku. Kunanñataqmi huñunakuna wasikunata ruwaypi yanapakunku. Victormi nin: “Mana ancha kapuqniyuq kaptiykupas Jehova Diosmi yanapawachkanku”, nispa.

Alain sutiyuq iñiqmasinchikmi 2002 watapi Alemania nacionpi kaq universidadpi estudiachkarqa. Chaypi kachkaspanmi Musu-sipas ¿imatam vidaykiwan ruwanki? niq qillqata ñawincharurqa. Hinaspanmi tantiarurqa Diospa munayninta ruwaypi astawan kallpanchakunanpaq. Chaymi 2006 watapi solterokunapaq bibliamanta escuelaman rirqa, chaymantam Camerun nacionman rinanpaq nirqaku.

Chaypim semanapi iskay-kimsa punchawlla llamkarqa. Chaymantam huk llamkayta tarirurqa, chaypiqa achka horam llamkanan karqa. Chaywanpas, tukuy tiemponwan Diosmanta willakuytam munarqa. Chaymi betel wasimanta tukuy tiemponwan willakuq kananpaq niptinku “arí” nirqa. Llamkayninmanta lluqsikunanpaq niptinmi patronnin nirqa astawan pagonta yapananpaq. Alainmi ichaqa mana munarqachu. Chaymanta qipatam Estefaniwan casarakururqa, payqa Francia nacionpim achka wata yacharqa.

¿Imakunawanmi Estefaniqa sasachakurqa Camerun nacionman kutispan? Kikinmi willakun:  “Chayaramuspayqa sapa kutim unquq kani. Chaywanpas, allimantam hampikunawan allinyarurqani. Jehova Diosninchikmá paykunataqa yanaparqa. Alainmi willakun: “Kate sutiyuq llaqtachatam Diosmanta willakuq rirqaniku. Chaypim tarirurqaniku Diosmanta yachay munaq achka runakunata. Paykunatam celularllawan bibliamanta yachachirqaniku, hinaptinmi iskay bautizakururqaku. Chaymantam chay llaqtachapiña huñunakuyta qallaykurqaku”, nispa. Estefanipas ninmi: “Kay Camerun nacionpim achka runamasinchikkunata yanaparqaniku bautizakunankupaq. Chayqa ancha kusikunapaqmi”, nispa. Kunanqa iñiqmasinchikkunatam llaqtan-llaqtan watukunku paykunaqa.

Gisela sutiyuq iñiqmasinchikmi doctora kananpaq Italia nacionpi estudiachkaspan bautizakururqa. Giselataqa casarasqa iñiqmasinchikkunam yachachirqa, paykunaqa kapuqllankuwan kawsakuspanku Diosmanta tukuy sunqunkuwan willakuqkunam karqaku. Chayta qawaspanmi Giselapas Diosmanta astawan willakuyta munarqa. Chaymi Diosmanta sapa killa 70 hora willakuyta qallaykurqa.

Giselaqa Camerun nacionmanmi kutiyta munarqa Diosmanta astawan willakunanpaq. Ichaqa Camerunman pasakuptinqa manañam saqinankuñachu karqa Italia nacionman kutispan yachanantaqa. Hinaspapas Italia nacionpi riqsinakusqankunamantawan ayllunkunamanta karupim kanan karqa. Chaywanpas, 2016 watapim Camerunman kutikurqa. Chaymanta qipatam Leonciowan casarakururqa. Hinaspankum Ayos sutiyuq llaqtachaman rirqaku Diosmanta willakuypi astawan yanapakunankupaq.

¿Imaynataq Ayos llaqtapiqa kawsakurqaku? Giselam nin: “Achka kutipim semanantin mana achkiyku kaqchu, chaymi aylluykutapas mana qayayta atiqchu kaniku. Chaypiqa yantawan yanukuytataqmi yacharurqani. Chaymantapas, tutam mana ancha runa kachkaptin carretillawan achkichantin yakuman riq kaniku. Chaywanpas, Jehova Diospa yanapakuyninwan, kikiykupura kallpanchanakusqaykuwan hinaspa aylluykuwan riqsinakusqayku yanapawaptinkum mana hukmanyarurqanikuchu”, nispa.

Giselaqa manam ñakakunchu Camerun nacionman kutisqanmantaqa. Qallariypi sasa kaptinpas qusanpiwanmi kusisqa tarikurqaku. Hinaspapas imam ruwanankutam ruwarqaku. Chaymantapas, Jehova Diosta tukuy sunqunkuwan kuyaspankum pay yanapananmantaqa mana iskayrayankuchu. Leonciowan Giselaqa Diospa munaychakuyninmanta willakuqkunapaq escuelamanmi rirqaku. Kunanqa tukuy tiemponkuwanmi Diosmanta willakuchkanku.

Imaynam challwaqkunapas ima sasachakuyña kaptinpas achka challwata hapinankupaq anchata kallpanchakunku, chaynam nacionninkuman kutiq iñiqmasinchikkunapas runamasinchikkunaman Diosmanta yachachinankupaq anchata kallpanchakunku. Jehova Diosqa manapunim qunqanqachu paypaq tukuyta ruwasqankutaqa (Neh. 5:19; Heb. 6:10). Sichum qam yachanki nacionnikipi Diosmanta mana ancha willakuqkuna kasqanta hinaspaqa, ¿manachu kutiwaq? Jehova Diosmanta astawan willakunaykipaq kutiptikiqa paymi yanapasunki (Prov. 10:22).