1. Mateo 28:18-20 nisqanman hinaqa, ¿imata ruwanankupaqmi Jesusqa qatiqninkunata kamachirqa?

JESUSMI kawsariramuspan qatiqninkunaman rikuriykurqa Galilea lawpi huñunasqa kachkaptinku. Chaypim qatiqninkunata nirqa imata ruwanankupaq. Imata kamachisqanmi bibliapi kachkan Mateo 28:18-20 nisqanpi (qaway).

2. ¿Ima tapukuykunamantam kay yachachikuypi yachasunchik?

² Kunan tiempopipas runamasinchikkunaman yachachinapaq Jesuspa kamachisqantam kasukunanchik. Chaymi kay yachachikuypi kay kimsa tapukuykunamanta yachasunchik: Yachachisqanchik runamasinchikkunaman Diospa kamachikuyninkunata yachachispanchikpas, ¿imataraqmi ruwananchik? ¿Imaynatam lliw iñiqkuna bibliamanta chayllaraq yachaqkunata yanapachwan Diosta astawan kuyanankupaq hinaspa servinankupaq? ¿Imaynatam Diosmanta karunchasqa iñiqmasinchikkunata yanapachwan kaqmanta willakunankupaq?

3. Jesuspa nisqanta kasukuspaqa, ¿yachachiyllachu-yachachinanchik?

³ Jesusmi nirqa: “Yachachimuychikyá tukuy ima kamachisqaykunata kasukunankupaq”, nispan. Chaymi runamasinchikkunamanqa mana yachachiyllachu-yachachinanchik. Yachachinanchiktaqmi Jesuspa nisqanta imayna kasukunankupaqpas.

4. Pipas yapuyta yachananpaqqa, ¿niyllachu-ninanchik?

 ⁴ ¿Imaynatam yachachichwan Jesuspa kamachisqanta kasukunankupaq? Kaypi piensarisun: ¿Imaynatataq pitapas yachachiwaq yapuyta yachananpaq? Ichapas kaynata niwaq: “Puntatam manchachiq toroman yuguta watarunki, hinaspaykim hukninmanpas yuguta watanki. Chaymantam takllata churaykuspayki yapunki”, nispa. Ichaqa manamá chayna nisqallaykiwanchu yapuytaqa yachanqa. Nisqaykiman hina ruwananpaqqa chakraman rispaykim yachachinayki.

5. (1) Juan 14:15 hinaspa 1 Juan 2:3 nisqanman hinaqa, ¿imata ruwanankupaqmi yachachisqanchik runamasinchikkunata yachachinanchik? (2) ¿Imaynatam chayta ruwachwan?

⁵ Yachachisqanchik runamasinchikkunatam yachachinanchik Diospa kamachikuyninkunata sapa punchaw kasukunankupaq (qaway Juan 14:15; 1 Juan 2:3). Chaypaqqa kikinchikraqmi Diospa kamachikuyninkunata kasukunanchik escuelapi, llamkaypi utaq maypi kaspanchikpas, chaynapim paykunapas kasukunqaku. Chaymantapas, willachwanmi Diospa kamachikuyninkuna imatapas allinta tantiananchikpaq yanapawasqanchikmanta. Paykunawan kuska mañakuspapas Jehova Diostam mañakuchwan atiyninwan yanapaykunanpaq (Juan 16:13).

6. ¿Imatawanraqmi ruwachwan Jesuspa kamachisqanta hukkuna kasukunankupaq?

⁶ ¿Imatawanraqmi ruwachwan Jesuspa kamachisqanta hukkuna kasukunankupaq? Yachachisqanchik runamasinchiktam yachachinanchik Diosmanta willakuy munaq kananpaq. Wakinkuqa Diosmanta willakuypi piensaspallankuraqmi manchakunkuña. Mana manchakuq kanankupaqqa allin iñiyniyuqmi kananku. Chayraykum mana amiruspa yanapananchik bibliapa nisqankunamanta allinta entiendenankupaq. Qatiqninpiyá qawasunchik Diosmanta willakuy munaq kanankupaq imakuna ruwananchikmanta.

7. ¿Imaynatam yachachisqanchikta yanapachwan Diosmanta willakuy munaq kananpaq?

⁷ Yachachisqanchik runamasinchik Diosmanta willakuy munaq kananpaqqa ichapas kaynata tapuchwan: “¿Imaynataq kawsakuchkanki Diosmanta yachayta qallaykusqaykimanta? ¿Imatam ruwawaq hukkunapas Diosmanta yachaspanku qam hina kusisqa kawsakunankupaq?”, nispa (Prov. 3:27; Mat. 9:37, 38). Taksa qillqanchikkunata qawachispam tapuchwan: “¿Mayqinkunamantataq aylluykikuna, amistadnikikuna utaq llamkaqmasikikuna yachayta munanmanku?”, nispa. Akllakusqan kaqkunata quykuspanchikmi yachachichwan chaykunawan Diosmanta imayna willakunanpaq. Diosmanta willakuqña kananpaq huñunakuypi nisqanku qipamanpas hinallam yanapananchik (Ecl. 4:9, 10; Luc. 6:40).

8. ¿Imanasqataq yachachisqanchikta yanapananchik Diostawan runamasinta kuyananpaq? (Qaway “ ¿Imaynatam yachachisqanchikta yanapachwan Diosta astawan kuyananpaq?” niq yachachikuyta).

⁸ Jesusmi nirqa: “Yachachimuychikyá tukuy ima kamachisqaykunata kasukunankupaq”, nispa. Chaywanqa nichkarqataqmi Diosta hinaspa runamasinchikkunata kuyanamanta yachachinapaqpas (Mat. 22:37-39). Yachachisqanchik runamasinchik Diostawan runamasinkunata sunqumanta kuyaspanqa Diosmantam willakuyta munanqa. Yaqapaschá qallariypiqa manchakunqa, ichaqa nichwanmi Jehova Dios yanapaptin pisi-pisimanta manaña manchakunanmanta  (Sal. 18:1-3; Prov. 29:25). Kay yachachikuypa ukunpi kaq yachachikuymi nichkan yachachisqanchik runamasinchik Diosta astawan kuyananpaq imayna yanapanamanta. Qatiqninpiyá qawasun bibliamanta yachachisqanchik runamasinchikta llapanchik imayna yanapanamanta.

9. ¿Imaynatam pipas allin yapuq kayta yachanman?

⁹ Kaqmanta rimarisun chayllaraq yapuyta yachaq runamanta. Yapuytaqa yachanqa manam yachachisqan runa imatapas niptillanchu. Yachanqataqmi yapuqkunata qawaspanpas. Qawanqamá imayna yapusqankuta, cantoman chayaruspan torota ima nisqankuta hinaspa imapas ruwasqankuta. Tukuy chaykunata qawaspanmá allin yapuq kanqa.

10. ¿Imanasqataq yachachisqanchik runamasinchikpa huñunakuyman riyninqa ancha allin?

¹⁰ Diosmanta yachachisqanchik runamasinchikpas manam ñuqallanchikmantachu yachanqa. Yachanqataqmi Diosman sunqu iñiqmasinchikkunata qatipakuspanpas. Chayraykum huñunakuykunaman riynin ancha allin. Chaypim bibliamanta astawan yachanqa, iñiyninpim allin kanqa, hinaspapas Diostam astawan kuyanqa (Hech. 15:30-32). Chaymantapas, huñunakuypim achka iñiqmasinchikkunata riqsinqa, hinaspam paykunapa allin ruwasqankuta qatipakunqa.

11. ¿Imakunawanmi bibliamanta yachaq runamasinchikkunaqa ancha kallpanchasqa tarikunmanku?

¹¹ Yuyaymanasun kaypi: Wawankunata sapallan uywaq bibliamanta yachaq warmim huñunakuyman rin, chaypim qawan pay hina wawankunata sapallan uywaq iñiqmasinchikta warmantinta, hinaspanmi ancha kallpanchasqa tarikun. Huk runamasinchikpas cigarro pitayta saqinanpaqmi kallpanchakun. Paymi huñunakuypi riqsirun cigarro pitayta saqiq iñiqmasinchikta. Chay iñiqmasinchikmi willan Jehova Diosta kuyaspan hinaspa bibliapa nisqankunata kasukuspan cigarro pitayta saqisqanmanta (2 Cor. 7:1; Filip. 4:13). Iñiqmasinchikpa willasqanwan hinaspa kallpanchasqanwanmi bibliamanta yachaq runamasinchikqa ancha kallpanchasqa tarikun. Huk sipasñataqmi wiñaymasin warmi iñiqmasinchikta qawan Jehova Diospa testigon kasqanrayku ancha kusisqa kasqanta. Chaymi chay sipasqa Jehova Diospa testigonkuna imanasqa ancha kusisqa kasqankumanta yachayta munan.

12. ¿Pikunataq yanapachwan bibliamanta chayllaraq yachaqkunata?

¹² Bibliamanta yachachisqanchik runamasinchikqa achka iñiqmasinchikkunata riqsiruspanmi yachanqa Diostawan runamasinchikkunata kuyanapaq Jesuspa kamachisqanta kasukusqankuta (Juan 13:35; 1 Tim. 4:12). Chaymantapas, ñawpaqta pay hina tarikuq iñiqmasinchikkuna sasachakuyninkuta imayna atipasqankum yanapanqa. Chaynapim yachanqa paypas Jesuspa qatiqnin kayta atinanmanta (Deut. 30:11). Chaynaqa, lliwmi yanapachwan bibliamanta chayllaraq yachaq runamasinchikkunataqa (Mat. 5:16). Chaymi sapakama tapukunanchik: “¿Kallpanchanichu chayllaraq bibliamanta yachaq runamasiykuna huñunakuyman hamuptin?”, nispa.

13, 14. ¿Imaynatam Jesusqa apostolninkunata kallpancharqa?

¹³ Diosmanta karunchasqa iñiqmasinchikkunataqa yanapaytamá munanchik Jesuspa kamachisqanman hina runamasinchikkunaman willakunankupaq. Jesusta  qatipakuspayá yanapasun. ¿Imatam Jesus ruwarqa apostolninkuna hukmanyasqa kaptinku? Chaymantayá yachaykusun.

¹⁴ Wañuchinankupaq Jesusta hapiruptinkuqa apostolninkunaqa saqiruspankum ayqikurqaku (Mar. 14:50; Juan 16:32). Chayna saqirusqankuwanqa maynatachá ñakakurqaku, hinaspapas hukmanyasqachá tarikurqaku. Kawsariramuspanmi Jesusqa qatiqnin warmikunata kaynata nirqa: “Ama manchakuychikchu, rispaykichikyá wawqiykunaman willamuychik”, nispa (Mat. 28:10a). Jesusqa saqiruptinkupas hinallamá apostolninkunataqa ‘wawqiykuna’ nispan nirqa, manam qipancharqachu. Payqa taytanta qatipakuspanmi llakipayaspan pampachaykurqa (2 Rey. 13:23).

15. ¿Imaynataq tarikunchik Diosmanta willakuyta saqiruq iñiqmasinchikkunamanta?

¹⁵ Ñuqanchikpas llakikunchikmi Diosmanta willakuyta saqiruq iñiqmasinchikkunamantaqa. Iñiqmasinchik kasqankuraykum paykunataqa anchata kuyanchik. Manamá qunqanchikchu ñawpaqta Jehova Diospaq tukuy ima ruwasqankutaqa. Wakinninkuqa chunkantin watam Jehova Diospaq tukuyta ruwarqaku (Heb. 6:10). Ñuqanchikwan kuska Dios yupaychanankutamá munanchik (Luc. 15:4-7). Chaynaqa, ¿imaynatam Jesusta qatipakuspanchik paykunata yanapachwan?

16. ¿Imatam ruwachwan Diosmanta karunchasqa iñiqmasinchikkunata kuyasqanchikrayku?

¹⁶ Huñunakuyman hamunanpaqmi kuyakuywan nichwan. Jesusmi apostolninkuna hukmanyasqa kachkaptinku willachirqa paywan huñunakunankupaq (Mat. 28:10b; 1 Cor. 15:6). Ñuqanchikpas Diosmanta karunchasqa iñiqmasinchikkunatam nichwan huñunakuyman hamunankupaq. Chaytaqa manapaschá huk kutillatachu ninanchik kanqa. Jesusqa maynatachá kusikurqa paywan huñunakunankupaq qatiqninkuna riruptinkuqa. Ñuqanchikpas chaynam tarikuchwan Diosmanta karunchasqa iñiqmasinchikkuna huñunakuyman hamuruptinkuqa (Mat. 28:16; tupachiy Lucas 15:6 nisqanwan).

17. ¿Imaynatam chaskiykunanchik Diosmanta karunchasqa iñiqmasinchik huñunakuyman hamuruptin?

¹⁷ Kusikuywanyá chaskiykusun. Jesusqa qatiqninkunawan tupaykuspanmi paykunaman asuykuspan rimapayarqa (Mat. 28:18). Ñuqanchikpas Diosmanta karunchasqa iñiqmasinchik huñunakuyman hamuruptinmi asuykuspa kusikuywan chaskiykunanchik. Tupaykuspaqa ichapas mana ima niytapas atisunchu, chaywanpas mana hukmanyachispallam niykuchwan huñunakuyman hamusqanmanta kusisqa tarikusqanchikta.

18. ¿Imaynatam Diosmanta karunchasqa iñiqmasinchikkunata kallpanchachwan kaqmanta willakunankupaq?

¹⁸ Kallpanchaykusunyá. Jesuspa qatiqninkunaqa hukmanyasqachá tarikurqaku enteron pachapi Diosmanta willakunankuta yachaspankuqa. Chaymi Jesusqa paykunata kallpanchananpaq kaynata nirqa: “Sapa punchawmi ñuqaqa qamkunawan kasaq”, nispa (Mat. 28:20). Chayna kallpanchasqanraykum mana samaykuspa “sumaq willakuyta yachachirqaku hinaspa willakurqaku” (Hech. 5:42). Diosmanta karunchasqa iñiqmasinchikkunatapas kallpanchaykunanchikmi. Paykunaqa ichapas hukmanyasqa tarikunku kaqmanta Diosmanta willakunankuta yachaspanku. Chaymi hawkalla tarikunankupaq nichwan paywan kuska willakunanchikmanta. Chaynaqa, Diosmanta karunchasqa iñiqmasinchikkunatam kallpanchananchik, hinaspapas wakin iñiqmasinchikkunata  hinam kuyananchik. Chaynata ruwaptinchikqa kaqmantam kusikuywan Diosmanta willakunqaku.

19. ¿Imatam tukuy sunqumanta ruwayta munanchik hinaspa imanasqa?

¹⁹ ¿Haykapikamataq runamasinchikkunaman yachachisun? Kay tiempopa tukupayninkamam (Mat. 28:20; qaway palabrakuna entiendenapaq listapi “kay tiempopa tukupaynin” niqta). ¿Atisunchu kay tiempopa tukupayninkama Jesuspa kamachisqanta ruwayta? ¡Chayta ruwanapaqmá kallpanchakuchkanchik! Chaymi tiemponchikta, kallpanchikta hinaspa tukuy ima kapuqninchikta servichikuspa Diosmanta yachay munaq runakunata maskananchikpaq kallpanchakunchik (Hech. 13:48). Chayta ruwaspamá Jesusta qatipakuchkanchik. Paymi nirqa: “Ñuqapa mikuyniyqa kachamuwaqniypa munayninta ruwaymi hinaspa kamachiwasqanta tukuymi”, nispa (Juan 4:34; 17:4). Jesuspa kamachiwasqanchiktaqa tukuy sunquwanmá ruwayta munanchik (Juan 20:21). Munanchiktaqmi Diosmanta karunchasqa iñiqmasinchikkunawan kuska tiempopa tukupayninkama chay ruwaytapas (Mat. 24:13).

20. Filipenses 4:13 nisqanman hinaqa, ¿pipa yanapakuyninwanmi Jesuspa kamachiwasqanchikta ruwayta atisun?

²⁰ Anchatamá kallpanchakunanchik Jesuspa kamachiwasqanchikta ruwanapaqqa. Ichaqa manamá sapallanchikchu kachkanchik. Jesusmi niwarqanchik ñuqanchikwan kananmanta. Chayta ruwanapaq kallpanchakuspanchikmi ‘Jehova Diospa llamkaqmasin kanchik’, hinaspapas ‘Cristowan kuskam’ kachkanchik. Chayraykum mana iskayrayachwanchu Jehova Dioswan Jesus yanapawananchikmantaqa (1 Cor. 3:9; 2 Cor. 2:17). ¡Mayna kusikunapaqmá chay ruwaypi yanapakuyqa hinaspa hukkunapas chayta ruwanankupaq yanapayqa! (Qaway Filipenses 4:13).