1, 2. (1) ¿Imanasqataq chayllaraq casarasqakunaqa Jehova Diospi hapipakunanku? (Rimarimuytaq Salmos 37:3, 4 nisqanmantapas). (2) ¿Imamantam kay yachachikuypi yachasun?

CASARAKUYTA piensaspanchikpas utaq casarasqaña kaspanchikpas llapallanchikmi munanchik wañukunanchikkama kusisqa kawsakuyta. Casado vidapiqa kanqam sasachakuykunaqa, chaymi vidanchikpi imata ruwanapaqpas puntamantaraq tantiakunanchik. Imayna tantiakusqanchikman hinam kusisqapas utaq sasachakuypipas kasun. Chaymi Jehova Diospi hapipakuspa imatapas tantiaspaqa casado vidanchikpi kusisqa kawsakusun. Diosta mana kasukuspam ichaqa sasachakuykunapi kaspa mana kusisqachu kasun (qaway Salmos 37:3, 4).

² Kay yachachikuyqa chayllaraq casarasqakunapaq kaspanpas llapallan casarasqakunatam yanapawasun. Ñawpaq tiempopi Diosta servispanku kusisqa kawsakuq casarasqakunamanta hinaspa paykunata imayna qatipakunamantam rimasun. Yachasuntaqmi kunan tiempopi wakin casarasqakunata imayna qatipakunamantapas.

3, 4. ¿Ima sasachakuykunapim tarikunmanku chayllaraq casarasqakuna?

³ Wakin llaqtakunapiqa ichapas chayllaraq casarasqakunataqa tayta-maman utaq familiankuna ninmanku wawa-churiyuqña  kanankupaq. Amistadninkupas utaq wakin familiankupas yaqapaschá allin kanankuta piensaspanku ninmanku wasita rantispanku tukuy imata armakunankupaq.

⁴ Chayna nisqankuta kasukuspankuqa chayllaraq casarasqakunaqa wichiykunmankum hatun manuyaymanpas. Chayta paganankupaqqa ichapas iskayninku llamkananku kanqa. Chaynapim manaña tiemponku kanqañachu sapallankupi utaq familiankuwan bibliata estudianankupaq, Diosmanta willakunankupaq chaynataq huñunakuykunaman rinankupaqpas. Chayna kaspankuqa Diosta serviyninkupi manaña kallpanchakusqankuraykum hukmanyarunmanku.

5. ¿Imatam yachachwan Klausmantawan Marisamanta?

⁵ Tukuy imayuq kaspaqa manam kusisqachu kawsakusun. Chaynam tarikurqaku iñiqmasinchik Klauswan warmin Marisa. * Paykunaqa chayllaraq casarakuruspankum iskayninku anchata llamkarqaku tukuy imayuq kaspa hawka kawsakunankupaq. Ichaqa manam kusisqachu karqaku. Klausmi willakun: “Tukuy imayuqmi karqaniku. Dios serviyniykupi astawan ñawparinaykupaqmi ichaqa mana kallpanchakurqanikuchu. Chaymi wakinpiqa pisipasqallaña hinaspa mana ganasniyuqllaña karqaniku”, nispa. Yaqapaschá qampas paykuna hina tarikunki, ichaqa amayá hukmanyaychu. Hukkunapa imayna kawsakusqankum yanapasunkiman. Chaypaqyá puntata yachaykusun kamachiq Josafatmanta.

6. Proverbios 3:5, 6 nisqanman hinaqa, ¿imatam kamachiq Josafat ruwarqa hatun sasachakuypi tarikuspan?

⁶ Qusakuna, ¿tukuy ima ruwayniyuq kasqaykichikraykuchu hukmanyasqa tarikunkichik? Chayna kaptinqa kamachiq Josafatmanta yachaymi yanapasunkichik. Payqa kamachiq kasqanraykum llapallan runakunapa allinninpaq tukuy imata ruwarqa. Runakuna allin kananta munaspanmi murallasqa llaqtakunata ruwachirqa, huñurachirqataqmi 1.160.000 masnin soldadokunatapas (2 Cron. 17:12-19). Chaymanta qipatam hatun sasachakuypi tarikurqa. Ammon, Moab hinaspa Seir runakunam kamachiq Josafatpa contranpi peleaq hamururqaku (2 Cron. 20:1, 2). ¿Imatam chaynapi tarikuspan kamachiq Josafat ruwarqa? Jehova Diostam mañakurqa yanapaykunanpaq hinaspa kallpata qunanpaq (qaway Proverbios 3:5, 6). Jehova Diosta mañakusqanmi kachkan 2 Cronicas 20:5-12 nisqanpi. Chaymi sutillata qawachiwanchik Jehova Diospi tukuy sunqunwan hapipakusqanta. ¿Jehova Diosqa uyariykurqachu?

7. ¿Jehova Diosqa uyariykurqachu kamachiq Josafatpa mañakusqanta?

 ⁷ Jehova Diosqa Leviy ayllumanta Jahaziel sutiyuq serviqninwanmi kamachiq Josafatman kaynata willachirqa: ‘Maymi kasqaykichikpim qasillalla kankichik, hinaspam qawankichik imaynam tayta Diospa librasusqaykichikta’, nispa (2 Cron. 20:13-17, Chuya Qellqa 2012). ¿Imaynatataq chaynallaqa venceyta atinmanku karqa? Jahazielpa nisqanqa manam runamantachu karqa, aswanqa Jehova Diosmantam. Chayraykum Josafatqa Jahazielpa nisqanta kasukurqa. Kamachiq Josafatqa enemigonkunawan peleaq lluqsispanqa manam allinnin soldadokunatachu puntamanqa churarqa, aswanqa mana imayuq runakunatam. Paykunam takistin rirqaku. Chaynatamá Josafatqa Jehova Diospa nisqanman hina mana imata ruwaspallan enemigonkunata vencerurqa (2 Cron. 20:18-23).

8. ¿Imaynatam qusakuna kamachiq Josafatta qatipakunmanku?

⁸ Qusakuna, ¿imatam yachawaqchik kamachiq Josafatmanta? Qamkunaqa familiaykichik kusisqa kananta munaspaykichikmi tukuy imata ruwanaykichikpaq kallpanchakunkichik. Chayrayku ichapas ima sasachakuypas kaptinqa kikillaykichikpi hapipakuspa allichayta munawaqchik. Ichaqa amayá kikillaykichikpiqa hapipakuychikchu. Aswanqa sapallaykichikpiyá Jehova Diosta mañakuychik yanapasunaykichikpaq. Warmikichikwanpas Jehova Diostayá tukuy sunqumanta mañakuychik. Chaymantapas, bibliatawan qillqanchikkunata estudiaspaykichikyá chayman hina ruwaychik. Wakinpiqa hukkunaqa nisunkichikpaschá bibliapa nisqanman hina tantiasqaykichikqa yanqapaq kasqanta. Ichapas nisunkichikmanraq qullqiyuq hinaspa tukuy imayuq kay aswan allin kasqanta. Chaynapi tarikuspaykichikqa Diospi hapipakuq Josafattayá qatipakuychik. Payta hinam qamkunatapas Jehova Diosqa yanapasunkichik (Sal. 37:28; Heb. 13:5). ¿Imatam casarasqakunaqa ruwanmanku kusisqa kawsakunankupaq?

9. ¿Imataq Isaiaspaqwan warminpaq aswan allin karqa?

⁹ Isaiaspaqwan warminpaqqa Jehova Diosta serviyninkum imamantapas aswan allin karqa. Isaiasqa profetam karqa, yaqachusmi warminpas pay hina karqa. Chaymi bibliapi niwanchik “profetisa” kasqanmanta (Is. 8:1-4, CQ12). Paykunaqa Jehova Diostam tukuy sunqunkuwan servirqaku. Chaymi kunan tiempopi casarasqakunapas Isaiastawan warminta qatipakunmanku.

10. ¿Imanasqataq bibliapa willakusqankunamanta casarasqakunapa estudiayninku ancha allin?

¹⁰ ¿Imaynatam kunan tiempopi casarasqakuna Isaiastawan warminta qatipakunmanku? Jehova Diosta tukuy sunqunkuwan servinankupaq kallpanchakuspankum. Chaypaqqa kuskankum estudianmanku bibliapi willakuykunata hinaspa chaykuna imayna cumplikusqanta (Tito 1:2). * Chaymantapas, enteron allpa pachapi Diosmanta willakuy imayna cumplikunanpaq  yanapakusqankupim yuyaymananmanku (Mat. 24:14). Bibliapa nisqankuna cumplikusqanmanta manapuni iskayrayaspankuqa Jehova Diostam casarasqakunaqa tukuy sunqunkuwan servinqaku.

11. ¿Imakunatam Priscilawan Aquila ruwarqaku hinaspa imanasqa?

¹¹ Priscilatawan Aquilata casarasqakunapa qatipakuyninkuqa ancha allinmi kanman. Paykunaqa Romapim yacharqaku. Jesusmanta yacharuspankum Diosta servispa kusisqa kawsakurqaku. Ichaqa qunqayllamantam Roma nacionta kamachiq Claudio chaypi yachaq judiokunata qarqururqa, hinaptinmi paykunapas pasakurqaku. Priscilapaqwan Aquilapaqqa sasachá karqa hawka yachakusqanku llaqtamanta huklawman ripukuyninkuqa. Sitiotachá maskananku karqa maypi yachanankupaqpas chaynataq carpa ruwaypi negocionkupaqpas. ¿Chayraykuchu Dios serviyninkupi manaña kallpanchakurqaku? Hinallam kallpanchakurqaku. Chaymi Corinto llaqtapi kaspankupas apostol Pablota hinaspa lliw iñiqkunata yanaparqaku. Chaymantañataqmi huklaw llaqtamanña rirqaku Diosmanta astawan willakunankupaq (Hech. 18:18-21; Rom. 16:3-5). ¡Mayna kusisqachá karqaku chay ruwasqankuwanqa!

12. ¿Imanasqataq casarasqakunaqa Jehova Diosta astawan servinankupaq tantiakunanku?

¹² Kunan tiempopi casarasqakunapas Priscilatawan Aquilata qatipakuspankum Diospa munayninta imamantapas puntapi churanmanku. Chaymi riqsinakusqanku tiempopi rimanmanku Dios serviyninkupi imakuna ruwanankumanta. Casarasqakuna Jehova Diosta astawan servinankupaq tantiasqankuman hina kallpanchakuspankuqa Dios yanapasqantam cuentata qukunqaku (Ecl. 4:9, 12). Rimarisun Rusellmantawan warmin Elizabetmanta. Rusellmi nin: “Manaraq casarakuchkaspaykum rimaq kaniku Dios serviyniykupi imakunata haypay munasqaykumanta”, nispa.  Elizabetpas nintaqmi: “Chaykunamantaqa rimaq kaniku chayman hina imatapas tantianaykupaqmi”, nispa. Chaymantam paykunaqa Micronesia nacionman ripukurqaku Diosmanta astawan willakunankupaq.

13. Salmos 28:7 nisqanman hinaqa, ¿imaynam casarasqakuna kanqaku Jehova Diospi hapipakuspankuqa?

¹³ Achka casarasqakunam Rusellwan Elizabet hina Diosmanta astawan willakunankupaq hinaspa runamasinchikkunaman yachachinankupaq anchata kallpanchakunku. Jehova Diosta astawan servinankupaq tantiasqankuman hina kallpanchakuptinkuqa paymi yanapanqa hinaspa cuidanqa. Hinaspapas casado vidankupim kusisqa kawsakunqaku (qaway Salmos 28:7).

14. ¿Imaynatam Pedrowan warmichan qawachirqaku Mateo 6:25 hinaspa 31-34 nisqanman hina Dios yanapananmanta mana iskayrayasqankuta?

¹⁴ Casarasqakunaqa qatipakunmankutaqmi apostol Pedrotawan warmichantapas. Pedroqa allintam tantiakunan karqa Jesusta riqsisqanmanta yaqa wata pasaytaqa. Payqa challwa hapiypim llamkarqa. Chaymi qatiqnin kananpaq Jesus niykuptinqa tantianan karqa familianta imayna mantienenanpaq (Luc. 5:1-11). Pedroqa Diosmanta willakuypi Jesusta yanapananpaqmi tantiakururqa. ¡Ancha allinmá karqa chay tantiakusqanqa! Yaqapaschá warmichanpas chay tantiasqanman hina yanaparqa. Bibliam willawanchik Jesus kawsariramusqan qipata payqa qusan Pedropiwan Diosmanta willakunankupaq viajasqanmanta (1 Cor. 9:5). Chayna kusisqa kawsakusqankuraykuchá Pedroqa qusakunamanpas chaynataq warmikunamanpas allinlla kawsakunankupaq qillqarqa (1 Ped. 3:1-7). Pedrowan warmichanqa manamá iskayrayarqakuchu Diospa munayninta imamantapas puntapi churaptinku pay yanapananmantaqa (qaway Mateo 6:25, 31-34).

15. ¿Imatam yachawaq Tiagomantawan warmin Estermanta?

¹⁵ Unay wataña casarasqa kaptikichikqa, ¿imam yanapasunkichikman Diosta serviynikichikpi astawan kallpanchakunaykichikpaq? Chaypaqqa huk iñiqmasinchikkunapa ima ruwasqankutam qatipakuwaqchik. Chaypaqmi leewaqchik “Diosmanta willakuypim yanapakunku” niq yachachikuykunata. Chayta leesqankum Brasil nacionmanta Tiagotawan warmin Esterta yanaparqa huklaw nacionkunapi Diosmanta willakunankupaq. Tiagom nin: “Kay tiempopi iñiqmasinchikkunata Jehova Dios imayna yanapasqanmanta hinaspa cuidasqanmanta yachasqaykum anchata kallpanchawarqaku”, nispa. 2014 watapim Tiagowan warmichanqa Paraguay nacionman ripukurqaku Diosmanta astawan willakunankupaq. Estermi nin: “Efesios 3:20 nisqanmi iskayniykuta anchata gustawanku. Jehova Dios imayna yanapawasqankutam sutillata qawarqaniku”, nispa. Apostol Pablom Efeso llaqtapi iñiqmasinkunaman qillqaspan nirqa Diosqa mañakusqanchikmantapas astawanraq quwasqanchikta. Chayna nisqanqa cumplikunpunim.

16. Chayllaraq casarasqakuna, ¿pikunatam niwaqchik Diosta astawan serviypi yanapasunaykichikpaq?

¹⁶ Chayllaraq casarasqakuna, Jehova Diospi hapipakuq casarasqakunamantam anchata yachawaqchik. Wakin casarasqakunaqa  chunkantin watam tukuy tiemponkuwan Diosta servirqaku. Paykunatam niwaqchik Diosta astawan servinaykichikpaq imakunapi yanapasunaykichikpaq. Chaynata ruwaspaqa Jehova Diospim hapipakuchkankichik (Prov. 22:17, 19). Iñiqkunapi punta apaqkunapas yanapasunkichikmanmi Diosta astawan servinaykichikpaqqa.

17. Rimarimuy Klaustawan Marisata ima pasasqanmanta. ¿Imatam chaymanta yachachwan?

¹⁷ Wakinpiqa Diosta astawan servinanchikpaq tantiasqanchikqa manam piensasqanchikman hinachu kanman. Kaqmanta rimarisun Klausmantawan Marisamanta. Paykunaqa casarakusqankumanta kimsa wata pasaytam tantiarurqaku Finlandia nacionpi betel wasita ruwaypi yanapakunankupaq. Ichaqa suqta killalla yanapakunankupaqmi niykurqaku, chaymi qallariypiqa llakisqa tarikurqaku. Ichaqa chaymanta qipallatam arabe rimayta yachanankupaq escuelaman invitarurqaku. Chaymi kunanqa huklaw nacionpi arabe rimaypi Diosmanta willakuspanku kusisqa kachkanku. Marisam yuyarispan nin: “Jehova Diospi tukuy sunquykuwan hapipakunaykupaqqa lliw imaykutam saqinayku karqa. Chayqa manamá facilchu karqa. Chaywanpas Jehova Diosqa manam saqiwarqakuchu. Kunanqa astawanraqmi Jehova Diospi hapipakuniku”, nispa. Jehova Diospi tukuy sunqunchikwan hapipakuptinchikqa Klaustawan Marisata hinam bendeciwasun.

18. ¿Imatam casarasqakuna ruwanmanku Jehova Diospi hinalla hapipakunankupaq?

¹⁸ Bibliam niwanchik casarakuyqa Diospa regalon kasqanta. Chaymi payqa munan kusisqa kawsakunanchikta (Prov. 5:18; Mat. 19:5, 6). Chayllaraq casarasqakuna, ¿qawakuchkankichikchu imayna kawsakusqaykichikta? ¿Jehova Diosta agradecekunkichikchu tukuy ima qususqaykichikmanta? Diostayá mañakuychik, palabranpiyá maskaychik yachachikuyninkunata, hinaspayá chayman hina kawsakuychik. Diosta tukuy sunquykichikwan servispaykichikqa casado vidaykichikpim kusisqa kawsakunkichik.