1. ¿Imatam yacharqanchikña? ¿Imamantam mana iskayrayananchikchu?

 YACHANCHIKMI willakusqanchiktaqa runakuna wakinpiqa mana uyarinankumanta hinaspa harkakunankumanta. Yachanchiktaqmi qipakunamanpas aswanraq chayna kananmantaqa (Dan. 11:44; 2 Tim. 3:12; Apoc. 16:21). Chayna kaptinpas manam iskayrayanchikchu Jehova Dios yanapawananchikmantaqa. Payqa ñawpaqmantapacham serviqninkunata yanaparqa kamachisqan sasaña kaptinpas. Chaymanta yachaykunapaqyá rimarisun Diosmanta willakuq Ezequielmanta. Paymi Babiloniaman apasqa judio runakunaman Diosmanta willakurqa.

2. (1) ¿Imaynataq Diospa nisqanman hinaqa Ezequielpa tiemponpi runakunaqa karqaku? (Rimarimuytaq Ezequiel 2:3-6 nisqanmantapas). (2) ¿Imamantam kay yachachikuypi yachasun?

² Diosmi Babiloniaman apasqa judiokunamanta nirqa mana kasukuq hinaspa rumi sunqu kasqankumanta. Llumpay mana allinkuna ruwaq kasqankuraykum nirqa kichkakuna hina hinaspa atuq-atuq urukuna hina kasqankumanta. Chayraykuchá Ezequielta nirqa: “Amam manchakunkichu”, nispa (leey Ezequiel 2:3-6). ¿Imataq Ezequielta yanaparqa Diosmanta willakunanpaq? 1) Willakunanpaq kikin Diospa kamachisqanta yuyarisqanmi, 2) Jehova Diospa atiyninmi hinaspa 3) Diospa palabranmanta allinta yachasqanmi. ¿Imaynatataq Ezequielta hina chaykuna ruway yanapawachwan? Chaymantayá yachaykusun.

3. ¿Jehova Diospa ima nisqantaq Ezequielta kallpancharqa? ¿Diospa achkakama ima ruwasqanwantaq Ezequielqa mana iskayrayarqachu?

³ Jehova Diosmi Ezequielta nirqa: ‘Qamtam kachasqayki’,  nispa (Ezeq. 2:3, 4). Chayqa maynatachá kallpancharqa, payqa yaqapaschá yuyarirqa Moisesta hinaspa Isaiasta willakuqnin kanankupaq Dios akllaspan chaynata nisqanta (Ex. 3:10; Is. 6:8). Ezequielqa yacharqataqmi Moisestapas hinaspa Isaiastapas Jehova Diosqa kamachisqanta ruwanankupaq yanapasqanmantapas. Chayraykum Ezequielqa mana iskayrayarqachu paytapas yanapananmantaqa. Chaymantapas Jehova Diosqa achka kutitam Ezequielta rimapayarqa. Chaymi Ezequielqa nirqa: “Jehova Diosmi rimapayawaspan niwarqa”, nispa (Ezeq. 14:2). Achka kutitataqmi nirqa: “Jehova Diosqa kaqmantam niwarqa”, nispapas (Ezeq. 6:1). Chaynata achkakama Diospa rimapayasqanwanmi Ezequielqa mana iskayrayarqachu willakunanpaq Jehova Dios kachasqanmantaqa. Chaymantapas taytanmi sacerdote karqa, yaqapaschá taytanqa yachachirqa serviqninkunata Dios imaynata yanapasqanmanta. Jehova Diosqa Isaactam, Jacobtam hinaspa Jeremiastam nirqa: “Ñuqam yanapasqayki”, nispa (Gen. 26:24; 28:15; Jer. 1:8).

4. ¿Jehova Diospa ima nisqantaq Ezequielpa sunqunta tiyaykachirqa?

⁴ Israel runakunaqa, ¿kasukunankuchu karqa Ezequielpa willakusqanta? Jehova Diosmi nirqa: ‘Israel runakunaqa ñuqata uyariwayta mana munasqankuraykum mana uyarisunkichu’, nispa (Ezeq. 3:7). Ezequielta mana kasukuspankuqa kikin Jehova Diostam qipanchachkarqaku. Chayna nisqanwanqa Jehova Diosqa Ezequielpa sunquntam tiyaykachirqa. Runakunaqa manaqa uyarirqakuchu rumi sunqu kasqankuraykum, manam Ezequiel mana allin willakuq kasqanraykuchu. Chaymantapas Diospa nisqan cumplikuptinqa yachanankum karqa ‘Diosmanta willakuq chaypi kasqanta’ (Ezeq. 2:5; 33:33). Tukuy chayqa  maynataya Ezequieltaqa kallpancharqa hinalla Diosmanta willakunanpaq.

5. ¿Imaynatataq Isaias 44:8 nisqanqa yanapawanchik?

⁵ Ñuqanchiktapas kikin Jehova Diosmi paymanta willakunapaq kamachiwanchik, paypa testigonkunamá kanchik (Is. 43:10). Ezequielta hinam Jehova Diosqa ñuqanchiktapas niwanchik: “Amayá manchakuychikchu”, nispa. Chaynaqa, amayá manchakusunchu Diosmanta willakusqanchikta harkakuptinkuqa. Jehova Diosmi paymanta willakunapaqqa kamachiwanchik, paytaqmi kallpanchawanchikpas (leey Isaias 44:8).

6. (1) ¿Imatataq Jehova Diosqa ñuqanchiktapas kallpanchawananchikpaq niwanchik? (2) ¿Ima yachasqanchiktaq sunqunchikta tiyaykachin hinaspa anchata kusichin?

⁶ Jehova Diosqa ñuqanchiktapas kallpanchawananchikpaqmi niwanchik: “Yakukunata chimpaptikipas ñuqaqa qanwanmi kasaq, mayukunata chimpaptikipas manam pampasunkichu. Ninanta purispaykipas manam kañakunkichu, ninapas manam rupasunkichu”, nispa (Is. 43:2). Wakinpiqa Diosmanta willakuptinchikmi mayu hina harkawaqninchik sasachakuykuna kan, wakinpiñataqmi nina hina sasachakuykuna chayamuwanchik. Chaywanpas Jehova Dios hinalla yanapawasqanchikraykum paymanta willakunchik (Is. 41:13). Ñuqanchiktapas Ezequielta hinam achka runakuna rumi sunqu kasqankurayku mana uyariwanchikchu, manam Diospa mana allin testigonkuna kasqanchikraykuchu. Chayqa sunqunchiktam tiyaykachin. Chaymantapas imaña kaptinpas hinalla willakuptinchikqa Jehova Diosqa kusikunmi, chayqa anchatam kusichiwanchik. Apostol Pablom nirqa: “Llamkasqankuman hinam sapakama pagonta Diosmanta chaskinqaku”, nispa (1 Cor. 3:8; 4:1, 2). Unay wataña precursora iñiqmasinchikmi nin: “Hinalla willakunapaq kallpanchakusqanchikrayku Jehova Diospa bendeciwasqanchikwanmi anchata kusikuni”, nispa.

7. Musquypi hina qawasqanta yuyarispanqa, ¿imamantam Ezequielqa mana iskayrayarqachu? (Qaway qaranpi kaq dibujota).

⁷ Jehova Diosqa ancha atiyniyuq kasqantam Ezequielman qawachirqa, chaymi Ezequielqa musquypi hina rikurqa ancha atiyniyuq angelkunata Diospa atiynin yanapasqanta hinaspa hatun ruedakunata Diospa atiynin kuyuchisqanta (Ezeq. 1:20, 21). Chaymi Ezequielqa mana imatapas niyta atispan “qunqurakuspa pampakama kumuykurqa” (Ezeq. 1:28). Chay rikusqanta sapa yuyarispanmi mana iskayrayarqachu willakuptin atiyninwan Dios yanapananmantaqa.

8, 9. (1) ¿Imatam Diosqa Ezequielta kamachispan nirqa? (2) ¿Imakunatawanraqtaq Diosqa ruwarqa Ezequielta yanapananpaq?

⁸ Jehova Diosqa Ezequielta kamachispanmi nirqa: “Runapa churin, rimapayanaypaqyá sayariykuy”, nispa. Chay nisqanwan kallpanchasqa kaspanmi hinaspa Diospa atiynin yanapaptinmi Ezequielqa sayariykurqa. Ezequielmi nirqa: “Dios rimapayaykuwaptinmi atiynin huntaykuwaspa sayarirachiwarqa”, nispa (Ezeq. 2:1, 2). Chaymantapacham Jehova Diosqa Ezequielta atiyninwan yanaparqa mana kasukuq “pasaypaq rumi sunqu” Israel runakunaman hinalla willakunanpaq (Ezeq. 3:7, 22; 8:1; 33:22; 37:1; 40:1). Chaymi Jehova Diosqa nirqa: “Chayna kasqankuraykum qamtapas mana manchakuqta rikurichisqayki. Qamqa rumimantapas aswan mana pakikuq diamante rumi hinam kanki. Amam paykunataqa manchakunkichu nitaq qayllanpipas hukmanyankichu”, nispa (Ezeq. 3:8, 9). Jehova Diosqa chaywanqa nichkarqa:  “Rumi sunqu kaptinkupas amayá hukmanyaychu, ñuqam atiyniywan kallpata qusqayki”, nispam.

⁹ Chaymantam Jehova Diosqa atiyninwan Ezequielta huqariruspan pusarqa maymi willakunan lawman. Ezequielmi nirqa: “Jehova Diospa atiyninmi ñuqapi huntallaña karqa”, nispa (Ezeq. 3:14, 15). Payqa qanchis punchaw yuyaymanaspanmi sunqunman churarqa imakuna willakunanta (Ezeq. 3:23, 24). Chaymantañataqmi pampaman riptin Diospa atiynin huntaykurqa. Tukuy chaywanmi Ezequielqa Diosmanta willakunanpaq hinaña kachkarqa.

10. ¿Imawan Dios yanapawaptinchiktaq paymanta willakuyta atinchik hinaspa imanasqataq yanapawananchikta necesitanchik?

¹⁰ Atiyninwan Jehova Dios yanapawaptillanchikmi paymanta willakuytaqa atinchik. Ezequieltapas manaraq willakuq richkaptinmi atiyninwan huntaykurqa. Ñuqanchiktapas atiyninwan mana yanapawaptinchikqa manam willakuytaqa atichwanchu. ¿Imanasqa? Satanas diablo mana willakunanchikpaq tukuyta ruwasqanraykum (Apoc. 12:17). Ñuqanchikpaqqa mana vencenapaq hinam diabloqa rikchakuwachwan, chayna kaptinpas Diosmanta willakuspaqa diablotam vencechkanchik (Apoc. 12:9-11). Diosmanta hinalla willakuspaqa harkawananchikpaq diablopa ima ruwasqantapas manam manchakunchikchu. Diosmanta sapa willakuspam satanastaqa venceypaq-vencenchik. Chaynaqa, harkakuptinkupas Diosmanta hinalla willakusqanchikwanmi yachanchik Diosninchik atiyninwan yanapawasqanchikta hinaspa willakusqanchikta allinpaq hapisqanta (Mat. 5:10-12; 1 Ped. 4:14).

11. ¿Imapaqtaq Jehova Diosqa atiyninwan yanapawanchik, hinaspapas imatam hinalla ruwananchik?

¹¹ Imaynam Jehova Diosqa Ezequieltapas atiyninwan yanaparqa mana manchakunanpaq, chaynam ñuqanchiktapas atiyninwan yanapawanchik paymanta willakuptinchik ima  sasachakuyña kaptinpas mana hukmanyarunapaq (2 Cor. 4:7-9). Hinaptinqa, ¿imatam ruwananchik Diosninchik atiyninwan hinalla yanapawananchikpaq? Sapa kutim yanapawananchikmanta mana iskayrayaspa mañakunanchik. Jesusmi qatiqninkunata nirqa: “Hinallayá mañakuychik”, “hinallayá maskaychik”, “hinallayá punkuta takaychik”, nispa. Jehova Dios ima ruwananmantañataqmi nirqa: “Hanaq pachapi kaq taytaqa, ¡aswanraqchiki mañakuqninkunamanqa atiyninta qunqa!”, nispa (Luc. 11:9, 13; Hech. 1:14; 2:4).

12. Ezequiel 2:9–3:3 nisqanman hinaqa, ¿maymantataq wankukuq qillqaqa hamurqa hinaspa ima willakuytaq chay qillqapi karqa?

¹² Ezequieltaqa manam Diospa atiyllanchu yanaparqa, yanaparqataqmi Diospa palabranpas, chayqa mikuy hinam karqa. Huk kutipim musquypi hina rikurqa wankukuq qillqata maki hapisqanta (leey Ezequiel 2:9–3:3). ¿Maymantataq chay wankukuq qillqa hamurqa? ¿Ima willakuytaq chay wankukuq qillqapi karqa? ¿Imaynatataq chay wankukuq qillqapi palabrakuna Ezequielta yanaparqa? Chay wankukuq qillqaqa hamurqa Diospa tiyananmantam, ichapas Jehova Diosqa Ezequielpa rikusqan huknin angelwan chay qillqataqa haywaykachirqa (Ezeq. 1:8; 10:7, 20). Chay qillqapiqa karqa mana kasukuq Israel runakunata ima pasananmanta Ezequielpa willakunan kaqkunam (Ezeq. 2:7). Chayqa wankukuq qillqapa iskaynin lawninpim qillqasqa karqa.

13. ¿Imata wankukuq qillqawan ruwananpaqmi Diosqa Ezequielta nirqa? ¿Imanasqataq wankukuq qillqaqa miskillaña karqa?

¹³ Jehova Diosmi Ezequielta nirqa: “Wankukuq qillqatayá [...] mikuy”, nispa. Chaymi Ezequielqa lliwta mikururqa. ¿Ima ninantaq chayqa? Ezequielqa chay qillqapa ima ninantam sumaqta entiendenan karqa. Chay willakuyqa yuyayninpiwan sunqunpim kanan karqa. Mikuruspanñataqmi Ezequielqa nirqa chay qillqaqa “miel hina miskillaña” kasqanta (Ezeq. 3:3). ¿Imanasqa? Diospa rantinpi rimariy miskillaña miel hina paypaq sumaqllaña kasqanraykum (Sal. 19:8-11). Payqa anchatam agradecekurqa willakuqnin kananpaq Diospa akllasqanmanta.

14. ¿Imatam Ezequielqa ruwanan karqa Diosmanta manaraq willakuchkaspan?

¹⁴ Chaymantam Jehova Diosqa Ezequielta nirqa: “Nisqaykunata sumaqta uyarispayá sunquykipi waqaychay”, nispa (Ezeq. 3:10). Diosqa nichkarqa wankukuq qillqapi nisqanta Ezequiel yuyarinantam hinaspa chaypi yuyaymananantam. Chayta ruwaspanmi Diospa palabranmanta allinta yachanan karqa, chaynapi mana iskayrayaspa Diosmanta willakunanpaq (Ezeq. 3:11). Diospa nisqankunapi yuyaymanaspan allinta entienderuspanmi Ezequielqa willakunanpaq hinaña kachkarqa. Chaytaqa tukunankamamá ruwanan karqa (tupachiy Salmos 19:14 nisqanwan).

15. Diosmanta hinalla willakunapaqqa, ¿imam sunqunchikpi kanan?

¹⁵ Ezequiel hinam ñuqanchikpas Jehova Diospa palabranta sunqunchikpi churananchik. Chayqa yanapawasunmi mana iskayrayaspa Diosmanta hinalla willakunanchikpaq. Chaynaqa, ¿imatam ruwananchik Diospa palabranta sunqunchikpi churanapaq?

16. ¿Imatam ruwananchik Diospa palabranta sunqunchikpi churanapaq?

¹⁶ Imatapas mikuspaqa manaraq millpuchkaspam sumaqta kachunchik, chayqa yanapawanchikmi allin kananchikpaq. Chaynallataqmi Diospa yachachikuyninkuna sunqunchikpi  kananpaqqa leesqanchikpi allinta yuyaymanananchik, chayta ruwananchiktam Jehova Diosqa munan. Payqa munanmá palabranmanta allinta yachananchikta. Chaypaqqa Diostam mañakunanchik, palabrantam leenanchik hinaspa yuyaymanananchik. Puntataqa bibliata manaraq leechkaspam mañakunanchik leesqanchikta entiendenapaq, chaymantañam bibliata leeyta qallarinanchik, leeyta tukuruspañataqmi leesqanchik imayna yanapawasqanchikpi sumaqta yuyaymanananchik. Chayta ruwaspaqa Diospa kamachikuyninkunatam allinta entiendesun hinaspa kasukusun.

17. ¿Imanasqataq ancha allin bibliata leespa yuyaymanayqa?

¹⁷ ¿Imanasqataq ancha allin bibliata leespa yuyaymanayqa? Chayqa yanapawasunmi mana manchakuspa Diosmanta willakunapaq, yanapawasuntaqmi hamuq punchawkunapi mana allin runakunata ima pasananmanta willakuna kaptinpas willakunapaq. Chaymantapas Jehova Diosninchik tukuy atiyniyuq, ancha kuyakuq hinaspa llakipayakuq kasqanpi yuyaymanaspaqa paywanmi astawan kuyachikusun, hinaspapas hawkam hinaspa kusisqam kawsakusun (Sal. 119:103).

18. Diospa piñakuynin punchawpiqa, ¿imatam runakunaqa mana ninqakuchu hinaspa imanasqa?

¹⁸ Ñuqanchiktaqa Jehova Diosqa manam Ezequielta hinachu musquypi hina rimapayawanchik. Chaywanpas kapuwanchikmi biblianchik, chayqa Diospa palabranmi. Chaynaqa Diosninchik “kaykamallaña” niwananchikkamayá hinalla paymanta willakusun. Jehova Diospa piñakuynin punchawpiqa manam runakunaqa ninqakuchu: “Diosmantaqa manam pipas willawarqachu”, nispaqa (Ezeq. 3:19; 18:23). Aswanqa riqsikunqakum Diosmanta willakusqanchikta.

19. ¿Imataq yanapawasun Diosmanta hinalla willakunapaq?

¹⁹ ¿Imataq yanapawasun Diosmanta hinalla willakunapaq? Kikin Dios kamachiwasqanchikta yuyariymi, Diospa atiyninmi hinaspa palabranta leespa yuyaymanaymi. Jehova Diospa yanapakuyninwanqa atisunmi “tukupaykama” paymanta willakuyta (Mat. 24:13).