Manaraq chaymanta willayta tukuchkaspay imaynanpi Diosta tukuy tiempoywan servisqaymantayá willasqaykichik.

Ñuqaqa Curazao islachapim 1942 watapi nacerqani. Papayqa Surinam nacionmantam karqa, ichaqa llamkananpaqmi Curazaoman ripukurqa. Manaraq nacechkaptiymi papayqa bautizakururqa. Payqa Curazao a llaqtapim punta kaq testigo karqa. Ñuqaykuqa pichqam kaniku, papayqa llapaykutam sapa semana bibliamanta estudiachiwaqku. 14 wataypi kachkaptiymi Surinam nacionmanña kutikurqaniku abuelayta cuidanaykupaq.

Surinampim ñuqa hina musu iñiqmasinchikkunawan allin amistadta ruwarurqaniku. Paykunaqa precursor regularmi karqaku, tukuy ima ruwasqankumantam Diosmanta willakuspanku kusisqa willakuqku. Huñunakuy tukuytapas rimaqmi kaniku bibliapa yachachikuyninkunamanta, wakinpiqa tutakamam rimaq kaniku. Tukuy chaykunamá yanapawarqa Diosta astawan servinaypaq. Tukuy tiempoywan Dios serviytam munarqani, chaymi 16 wataypi bautizakururqani, 18 wataypiñataqmi precursor regularña karqani.

Precursor kasqaymi allinta yanapawarqa qipa punchawpi Diosta astawan servinaypaq. Iñiqmasinchikkunata yachachiyqa ancha allin kasqantam yacharurqani, chaynapi imapipas astawan yanapakunankupaq. Precursor kaptiymi huklaw nacionkunapi willakuq iñiqmasinchik Willem van Seijl b allinta yanapawarqa. Paymi yachachiwarqa  maymi huñunakusqaypi sumaqta imatapas ruwanaypaq. Chay tiempokunapiqa manam yacharqanichu qipa punchawpi chay yachasqaykuna allinta yanapawananmantaqa. Chaymanta wata pasayllatam niwarqaku precursor especial kanaypaq. Chaymi niwarqaku yunkapiña yanapakunaypaq. Anchatam agradecekuni iñiqmasinchikkuna sumaqta yachaykachiwasqanmanta. Chaymantapacham ñuqapas tiempochakurqani iñiqmasinchikkunata allinta yachachinaypaq.

Chaymantapas yacharurqanim kapuqnillaywan kawsakuyta, manam yanqakunapiqa imaykunatapas tukuqchu kani. Killa qallaykuqtam precursor especialmasiywan semanapi imakuna ruwanaykumanta tantiaq kaniku. Chaymi hukkaqniyku llaqtaman rispayku tukuy imaykuta rantipakuq kaniku. Allintam qullqichaykuta killantin haypawanankupaq servichikuq kaniku, ima rantisqaykutapas manam usuchiqchu kaniku. Yunkapi imaykupas tukuruptinqa manam pipas yanapawanankupaqqa karqachu. Musu kasqaymanta chayna kawsakusqaymi yanapawarqa Diosta tukuy tiempoywan servinaypaq.

Chaymantapas yacharurqanim runakunataqa kikinkupa rimayninpi Diosmanta yachachiy aswan allin kasqanta. Ñuqaqa taksaymantam yacharqani holandes rimayta, ingles rimayta, papiamento rimayta hinaspa surinames rimayta. Surinames rimaytaqa ninkum “sranan” nispa. Yunkapim ichaqa saramacano rimayta hinaspa huk rimaykunata rimaqku. Wakin rimaykunaqa sasam karqa, saramacano rimaypas chayna kasqanraykum sasachakurqani. Chaywanpas anchata kallpanchakusqayqa manam yanqapaqchu karqa, chay rimayniyuq achka runakunatam Diosta riqsinankupaq yanaparqani.

Saramacano rimayta yachasqaypim achka kutipi pantarqani. Huk kutipim biblia estudiachisqayku warmita wiksa nanaywan kaptin “¿wiksaykichu nanachkan?” ninaymantaqa “¿wiksayuqchu kachkanki?” nirusqani, chaywanmi hukmanyarurqa. Chaynata pantaspaypas kallpanchakurqanim runakunataqa rimayninpi yachachinaypaq.

1970 watapim llaqtan-llaqtan watukuq kanaypaq niykuwarqaku. Chay watapim fotokunata qawachispay Estados Unidospi betel wasi imayna kasqanmanta yachachirqani. Chaypaqmi huk iñiqmasinchikkunapiwan botewan riq kaniku. Aparqanikum motorta, lamparakunata, gasolinata chaynataq fotokunata qawachinaykupaq kaqkunata. Botewan rispaykupas llaqtachaman chayanaykupaqqa chakiwanmi riq kaniku tukuy ima apasqaykuta qipirikuspa. Runakunaqa anchatam agradecekuqku Jehova Diosmanta hinaspa serviqninkuna imakuna ruwasqankumanta yachachisqaykuwan. Chaykunamanta yachasqankuwanmi ñuqaqa anchata kusikurqani. Maynataña pisipaspapas Jehova Diosta tukuy  sunqumanta serviyqa anchatam kusichiwanchik.

Sapallay llaqtan-llaqtan watukunaypaq mana sasachakuspaypas casarakuytam munarqani. Ñuqaqa munarqanim warmichayqa maypiñapas puriysiwaspan kusisqa kananta, chaymi Diosta mañakurqani chaypaq hina warmichata quykuwananpaq. Hinaptinmi wata pasayllata Ethel sutiyuq sipasta riqsirurqani. Payqa precursora especialmi karqa, warmacha kasqanmantam apostol Pablota qatipakuspan maypiñapas tukuy sunqunwan Diosmanta willakuyta munarqa. Paywanmi 1971 watapi septiembre killapi casarakurqani, hinaspam iskayniykuña iñiqmasinchikkunata llaqtan-llaqtan watukurqaniku.

Ethelqa taksa kasqanmantapacham mana ancha kapuqniyuq karqa, chaymi yunkapi llaqtan-llaqtan watukuptiykupas mana sasachakuspalla yanapawarqa. Karu llaqtachaman yunkapi watukuspaykupas manam imatapas achkataqa apaqchu kaniku. Pachaykutapas mayupim taqsaq kaniku, hina mayupitaqmi bañakuqpas kaniku. Mikunaykupaqpas iñiqmasinchikkunam wakinpi lagartota, challwata utaq imapas hapisqankuta quwaqku. Plato mana kaptinmi platanopa llaqinpi mikuq kaniku, mana cuchara kaptinpas makiykuwanmi mikuq kaniku. Ethelwan kuska tukuypi Jehova Diosta servisqaykuraykum ‘kimsa pata qaytu’ hina Dioswan karqaniku (Ecl. 4:12). ¡Anchatam kusikuniku tukuy tiempoykuwan Diosta servisqaykumanta!

Qallariypi willakusqayqa hukkaqnin watukusqayku llaqtachamanta kutimuchkaptiykum pasawarqaku. Boteykuqa yakuman chinkaykuspapas wanpuramurqam, ñuqaykuñataqmi chalecoyuq kasqaykurayku botemantaqa  mana kacharikurqanikuchu. Ichaqa boteykumanmi achka yaku huntarurqa, chaymi mikuy apakusqaykutapas wischuspayku yakuta botemanta maqchirqaniku.

Chaymantam yarqaruwaptinku challwata hapiyta munarqaniku, ichaqa manam atirqanikuchu. Chaymi Jehova Diosta mañakuspayku nirqaniku: “Mikunaykutayá quykullawayku”, nispa. Hinaptinmi mañakuyta tukuruptillayku hukkaqnin iñiqmasinchik hatun challwata hapirurqa, chaymi pichqayku saksanaykukama mikurqaniku.

Pichqa wataña llaqtan-llaqtan watukuchkaptiykum warmichay Ethel wiksayakururqa. Chayta yacharuspaymi kusisqa karqani, ichaqa manam puntata hinañachu imapas kanan karqa. 1976 watapim churiy Ethniel nacerurqa, iskay wata partenmanñataqmi churiy Giovanni nacerurqa. Chaywanpas Ethelwanqa hinallam munarqaniku tukuy tiempoykuwan Diosta serviyta.

Chaymi achkaraq ruwanapaq kasqanrayku betel wasimanta niwarqaku hinalla llaqtan-llaqtan watukuq kanaykupaq. Warmayku taksallaraq kasqanraykum aslla llaqtakunata watukurqaniku. Killapim iskay semanalla watukuq kani. Iskay semanañataqmi precursor kaspay maymi huñunakusqaypi karqani. Mana llumpay karupi watukunay kaptinqa warmichaywan hinaspa churiykunapiwanmi riq kani. Ichaqa watukunaypaq utaq hatun huñunakuyta ruwanaypaq karupi kaptinqa sapallaymi riq kani.

Tukuy niwasqankuta allinta ruwanaypaqqa tiempochakuqmi kani. Warmichaywan hinaspa churiykunawanqa sapa semanam bibliamanta estudiarqaniku. Mana paykunawan kuska kaptiymi warmichay Ethel warmaykuta bibliamanta yachachiq. Kallpanchakurqanikum llapayku kuskalla imatapas ruwanaykupaq, hinaspapas warmaykuwan kuskam kusirikuq kaniku. Chaymantapas imatapas qawanaykupaqmi maymanpas riq kaniku. Achka kutipim tutakama estudiaq kani watukuspay hinaspa hatun huñunakuypi allinta yachachinaypaq. Ethelqa Proverbios 31:15 nisqanman hinam allin warmi karqa. Payqa  tutapaytam hatariq sapa punchaw bibliata kuska leenaykupaq, hinaspapas warmayku manaraq escuelaman richkaptinkum mikuq kaniku. Tukuypi yanapawasqanmantam warmichayta anchata agradecekuni. Payqa Diosta allinta servinaypaqmi yanapawarqa.

Ethelwan kuskam warmaykutaqa Jehova Diosta kuyanankupaq yachachirqaniku. Munarqanikum tukuy tiemponkuwan Diosta servinankuta, ichaqa manam munarqanikuchu ñuqayku nisqaykuraykulla chayta ruwanankutaqa, aswanqa kikinku munasqankurayku ruwanankutam munarqaniku. Sapa kutitaqmi niq kaniku tukuy tiempowan Diosta serviyqa kusikunapaq kasqanta. Nirqanikutaqmi: “Sasachakuypi tarikuptiykupas Jehova Diosmi tukuy imapi yanapawarqaku”, nispa. Chaymantapas warmaykutam kallpancharqaniku tukuy tiemponkuwan Diosta yupaychaq iñiqmasinchikkunawan hukllawakunankupaq.

Jehova Dios yanapawasqankuraykum mana imaykupas pisirqachu. Arí, kallpanchakurqanim churiykunata allinta uywanaypaq. Yunkapi sapallay kasqaymi hinaspa precursor especial kasqaymi yanapawarqa qullqita yanqakunapi mana usuchinaypaq, ichaqa wakinpi qullqiyku mana haypawaptinkupas Jehova Diosmi yanapawaqku. 1986 watapim Surinam nacionpi guerra qallaykurqa, chayraykum mikuy pisirurqa, chaywanpas Jehova Diosqa manam saqiruwarqakuchu (Mat. 6:32).

Jehova Diosqa manam haykapipas saqiwarqakuchu. Pay yanapawaptinkum kusisqa kawsakurqaniku. Churi-wawaykuqa Jehova Diospa quwasqankum, chaymi anchata kallpanchakurqaniku paymanta yachachinaykupaq. Anchatam kusichiwanku tukuy tiemponkuwan Jehova Diosta servisqanku. Ethnielwan Giovanniqa Diosmanta astawan yachanapaq escuelakunamanmi rirqaku. Kunanqa Surinam betel wasipim warmichankuwan kuska yanapakuchkanku.

Ethelpas ñuqapas kunanqa yuyaqñam kachkaniku, ichaqa hinallam precursor especial kaniku. Arí, achka ruwayniyuqmi kachkaniku, chaymi kunankamapas mana nadiayta yachaniraqchu. Chaywanpas manam pesakunichu Diospaq tukuy tiempoywan llamkasqaymantaqa. Musullaraq kaspay tukuy tiempowan Jehova Diosta servinaypaq tantiakusqaywanqa anchatam kusikuni.