Jehova Diosninchikqa yanaparqamá paymanta tukuy sunqunkuwan willakuqkunataqa. Chaymi chay watapiqa pachak masnin yapakuruptinku 350 precursorkunaña karqaku. Chay watapitaqmi pusaq waranqa masnin iñiqmasinchikkuna Diosmanta hayka hora willakusqankuta betel wasiman apachiyta qallarirqaku.

1920 watapim marzo killapa 21 punchawninpi iñiqmasinchik Joseph Rutherford yachachirqa “Wara-waranqantin kunan kawsaqkunam mana haykapipas wañunqakuchu” niq yachachikuymanta. Chay sumaq yachachikuyta achka runakuna uyarinankupaqmi iñiqmasinchikkunaqa anchata kallpanchakurqaku.

Chay huñunakuymanmi achkallay-achka runamasinchikkuna rirurqaku. Ukupim 5.000 runakuna karqaku, hawapiñataqmi qiparurqaku 7.000 runakuna. Chay huñunakuymantam ingles rimaypi Willakuq qillqanchik kaynata nirqa: “Iñiqmasinchikkuna anchata kallpanchakusqankuraykum chay huñunakuymanqa achka-achka runakuna rirqaku”, nispa.

“Wara-waranqantin kunan kawsaqkunam mana haykapipas wañunqakuchu” nispa willakusqankuwanmi iñiqmasinchikkunaqa ancha riqsisqa rikurirurqaku. Chay tiempopi iñiqmasinchikkunaqa manam yacharqakuchu Diosmanta willakuy kunankama kanantaqa. Chaywanpas, tukuy sunqunkuwanmi Diosmantaqa willakurqaku. Ida Olmstead sutiyuq iñiqmasinchikmi kaynata nirqa: “Yacharqanikum runamasinchikkuna wiñaypaq kawsakunankuta Jehova Diospa munasqanta, chaymi maypiña kaspaykupas hinalla willakurqaniku”, nispa.

Betelpi yanapakuq iñiqmasinchikkunam maquinakunata rantirurqaku, chaynapi wakin qillqanchikkunata kikinku ruwanankupaq. Chay maquinakunam karqa betel wasimanta hichpallapi Nueva York llaqtapi.

Leo hinaspa Walter sutiyuq iñiqmasinchikkunam betel wasipi yanapakuyta qallaykurqaku 1920 watapa enero killanpi. Waltermi  nin: “Qillqakuna ruwana wasiman chayaruptiykum huk iñiqmasinchik niwarqaku: ‘Manaraqmi doceraqchu. Qillqakunatayá uku lawmanta astamuchkaychik’”, nispa.

Iñiqmasinchik Leopas kaynatam nirqa: “Paqarintinmi niwarqaku pirqakunata pichanaykupaq. ¡Pirqakunaqa qachay-qachayllañamá kakusqa! Chaywanpas, Diosninchikpaq kasqanraykum kusikuywan ruwarqaniku”, nispa.

Iskay-kimsa semanamantam wakin iñiqmasinchikkunaqa ingles rimaypi Willakuq qillqanchikta ruwaytaña qallaykurqaku. Punta kaq ruwasqankum karqa febrero killapa punta kaq punchawninpi lluqsiq, llapallanmi karqa 60.000 qillqakuna. Ruwarqakutaqmi ingles rimaypi ¡Rikchariy! qillqanchiktapas. Punta kaq ruwasqankum karqa abril killapa 14 punchawninpi lluqsiq. Chaytaqa Jehova Diospa yanapakuyninwanmá ruwarqaku.

Diosman sunqu iñiqmasinchikkunaqa hinallam kallpanchakurqaku Diosmanta willakunankupaq hinaspa huñunakunankupaq. Ichaqa 1917 watamanta 1919 watakamam wakin iñiqmasinchikkuna Diosmanta karunchakururqaku. ¿Imaynatam Diosman kutimunankupaq yanaparqaku?

1920 watapi abril killapa punta kaq punchawninpaq ingles rimaypi Willakuq qillqapim lluqsimurqa “Huk sunqullayá kawsakusun” niq yachachikuy, chaypim nirqa: “Manapunim iskayrayanikuchu llapallanchik huk sunqulla kawsakunapaq Diosman sunqu kutimunankumantaqa”, nispa.

Chayta ñawinchaspankum Diosman sunqu achka iñiqmasinchikkuna kutimurqaku. Casarasqa iñiqmasinchikkunam Diosmanta karunchakusqanku mana allin kasqanta riqsikuspanku nirqaku: “Watapunim Diosmanta karunchasqa karqaniku. Chaymi mana willakurqanikupaschu. [...] Kaqmanta karunchakuytaqa manam munanikuchu”, nispa. Chay iñiqmasinchikkunaqa kutiramuspankum hinalla tukuy sunqunkuwan Diosmanta willakurqaku.

Junio killapa 21 punchawninpim iñiqmasinchikkunaqa bibliamanta yachachiq qillqata * astawan aypunankupaq kallpanchakurqaku. 1918 watapi chay qillqa aypusqa kananta autoridadkuna harkakusqanmantaraqmi chay qillqaqa churarayarqa.

Chay qillqata aypunankupaqmi nirqaku Diospi llapallan iñiqkunata. Paykunamanmi kaynata qillqarqaku: “Bautizasqa kaqkunaqa llapallankuyá tukuy sunqunkuwan kay qillqata aypuchunku”, nispa. Edmund Hooper sutiyuq iñiqmasinchikmi willakun chay qillqata aypuspanku achka iñiqmasinchikkuna chayllaraq wasin-wasin willakusqankumanta. Hina paytaqmi kaynata nin: “Chaywanmi yacharurqaniku Diosmanta willakuyqa enteron allpa pachapi apakunanmanta”, nispa.

Guerra kasqanraykum Europa lawpi iñiqmasinchikkuna imayna kasqankutaqa mana yacharqakuchu. Chaymi agosto killapi iñiqmasinchik Rutherford hinaspa tawa iñiqmasinchikkunapiwan rirqaku Diosmanta willakunankupaq iñiqmasinchikkunata kallpanchaq.

Gran Bretaña nacionpim hatun huñunakuykunata ruwarqaku. Llapan huñunakuyman riqkunam karqaku yaqa 50.000 runakuna. Chayna watukusqankuwanmi iñiqmasinchikkunaqa kusisqa hinaspa kallpanchasqa tarikurqaku. Llapallankum Dios serviyninkupi huk sunqulla karqaku. Tukuy ima pasasqanwan llakisqa kasqankumantam kusisqaña karqaku. Paris llaqtapipas iñiqmasinchik Rutherfordqa “Wara-waranqantin kunan kawsaqkunam mana haykapipas wañunqakuchu” niq yachachikuymanta yachachirqa. Chay yachachisqanpim kichkiy-kichkiy runakuna karqaku. Chay huñunakuy tukuytam kimsa pachak runamasinchikkuna astawan bibliamanta yachayta munarqaku.

Chaymantam wakin iñiqmasinchikkuna Atenas, El Cairo hinaspa Jerusalen llaqtaman rirqaku. Diosmanta yachay munaq runakunata yanapanankupaqmi Rutherfordqa Jerusalenpa hichpan Ramala llaqtapi qillqakunata  churanapaq wasi kananpaq tantiarurqa. Europa lawman kutiruspanñataqmi iñiqmasinchik Rutherfordqa chaypi betel wasi kananpaq nirqa, chaynapi qillqakunata chaypi ruwanankupaq.

1920 watapa septiembre killanpi ruwasqanku ingles rimaypi ¡Rikchariy! qillqapim nirqa 1918 watapi autoridadkunapa ñakarichisqan kasqankumanta. Chay qillqatam achkallay-achkata ruwarurqaku.

Chay qillqapim nirqa Emma Martin, Edward Hamm, Edward Sonnenburg hinaspa Ernest Stevens sutiyuq iñiqmasinchikkuna 1918 watapi carcelman apasqa kasqankumanta.

Autoridadkunam huk runata kamachirqa paykunapa huñunakusqankuman rinanpaq. Chaypim bibliamanta yachachiq qillqata tarirurqa. Chay qillqata servichikunankutaqa manamá autoridadkunaqa munarqakuchu.

Chaymi autoridadkunaqa chay tawa iñiqmasinchikkuna kimsa wata carcelpi kanankupaq tantiarurqaku. Iñiqmasinchikkunaqa tukuytam ruwarqaku chay tawa iñiqmasinchikkuna mana carcelpi kanankupaq. Chaywanpas, 1920 watapim mayo killapa 17 punchawninpi carcelasqa karqaku. Ichaqa manamá unaychu karqaku.

Junio killapa 20 punchawninpim San Francisco llaqtapi hatun huñunakuy apakurqa. Chaypim iñiqmasinchik Rutherford willakurqa iñiqmasinchikkunata ima pasasqanmanta. Chayta uyariqkunam piñakuspanku Estados Unidos nacionta kamachiqman cartata apachirqaku iñiqmasinchikkunata kacharinanpaq.

Paqarintinmi Estados Unidos nacionta kamachiqqa tawa iñiqmasinchikkuna carcelpi manaña kanankupaq nirqa.

1920 wata tukuypaqqa kusisqallañam iñiqmasinchikkunaqa karqaku. Betel wasipi iñiqmasinchikkunaqa astawanraqmi llamkarqaku. Willakuqkunapas tukuy sunqunkuwanmi hinalla willakurqaku tukuy mana allinkunata Dios chinkachinanmanta (Mat. 24:14). Qatiqnin wataqa aswan kusikunapaqraqmi karqa.