1. ¿Imanasqataq ancha allin Diosmanta yachachiyninchikqa?

DIOSMANTAQA yachachinchik runamasinchikkuna salvakunankupaqmi. Jesusmi kaynata nirqa: “Rispayá yachachimuychik qatiqniykunaña kanankupaq, hinaspayá bautizamuychik”, nispa (Mat. 28:19, 20). Diospa piñakuynin punchawpi mana wañunankupaqqa bautizasqam kananku. Chaymantapas, bautizakuyta munaqkunaqa ñuqanchikrayku Jesuspa wañukusqanwan hinaspa kawsarimusqanwan wiñay kawsayta haypanamantam mana iskayrayananchu. Chayraykum apostol Pablopas iñiqkunaman kaynata qillqarqa: “Jesucristopa kawsarimusqanpi iñispa bautizakuspaykichikmi salvasqa kachkankichik”, nispa (1 Ped. 3:21). Chaynaqa, pipas wiñay kawsay haypaytaqa atinman bautizakuspallanmi.

2. 2 Timoteo 4:1, 2 nisqanman hinaqa, ¿imayna yachachiqmi kananchik?

² Runamasinchikkuna bautizakunankupaqqa sumaq yachachiqmi kananchik (qaway 2 Timoteo 4:1, 2). Apostol Pablom Timoteota nirqa allin yachachiq kaypi kallpanchakunanpaq, chaymi nirqa: ‘Tukuy tiempoyá qawarikuy imayna yachachisqaykita. [...] Chaynata ruwaspam kikikipas salvakunki chaynataq uyarisuqnikikunatapas salvanki’, nispa (1 Tim. 4:16). Chaynaqa, kallpanchakusunyá allin yachachiq kanapaq, chaynapi yachachisqanchik runamasinchikkuna bautizakunankupaq.

3. ¿Imamantam kay yachachikuypi yachasun?

³ Yachachisqanchik runamasinchikkuna Diosta kuyaspanku bautizakunankutam munanchik. Chayraykum kay yachachikuypi yachasunchik yachachisqanchik runakuna bautizakunankupaq imakuna ruwananchikmanta.

4. Bibliamanta yachachispaqa, ¿imatam mana ruwananchikchu? (Qaway uray patanpi willakuyta).

⁴ Ichapas yachachisqanchik runa astawan yachananta munaspanchik tukuy ima yachasqanchikta willayta munachwan. Ichaqa manamá allinchu chay ruwayqa. Ñuqallanchik rimanamantaqa bibliapa ima nisqantam qawachinanchik (Juan 16:12). * Huñunakuypi Willakuq qillqanchikmanta utaq huk qillqamanta yachachiqkunapas manam llumpaytaqa rimanankuchu. Chayllaraq Diosmanta yachaspaqa manam lliwtachu yacharqanchik, watakuna pasasqanman hinam astawan yacharqanchik, chayraykum yachachisqanchik runakunamanqa mana tukuy imamantachu willarunanchik (Heb. 6:1).

5. (1) 1 Tesalonicenses 2:13 nisqanman hinaqa, ¿yachachisqanchik runamasinchik ima yachanantam munanchik? (2) ¿Imatam ruwachwan biblia ñawinchasqanchikmanta ima entiendesqanta willawananchikpaq?

⁵ Yachachisqanchik runakunaqa yachanankum imapas yachachisqanchikqa Diosmanta kasqanta (qaway 1 Tesalonicenses 2:13). Biblia ñawinchasqanchikmanta ñuqallanchik rimanamantaqa ima entiendesqanta willawananchikpaqmi kallpanchachwan. Nichwantaqmi bibliapa ima nisqan imayna yanapananpi yuyaymanananpaqpas. Bibliata ñawinchaspam tapuchwan chaymanta ima piensasqanta (Luc. 10:25-28). Bibliata ñawinchaspaqa tapuchwantaqmi kaynata: “¿Imatam Jehova Diosmanta yachachisunki? ¿Imaynatam kaypi nisqan yanapasunkiman? ¿Imaynataq kay yachasqaykiwan tarikunki?”, nispa (Prov. 20:5). Bibliamanta tukuyta yachananmantaqa bibliapa ima nisqanta yachaspan kasukuyninmi aswan allinqa.

6. ¿Imanasqataq allin yachachiq iñiqmasinchikkunata nichwan yachachiq riysiwananchikpaq?

⁶ Bibliamanta allin yachachiq iñiqmasinchikkunatam nichwan yachachiq riysiwananchikpaq. Chaymantam tapuchwan: “¿Imaynatam yachachisqanchik rikchakusurqanki? ¿Bibliata qawachirqanichu yachachispay icha ñuqallachu rimarirqani? ¿Yaqachu yachachisqanchikta entiendechkan? ¿Ima niwaqtaq?”, nispa. Allin yachachiq kanapaqqa mana hatun tukuspam yanapawananchikpaq ninanchik (tupachiy Hechos 18:24-26 nisqanwan). Mana riyta atispaqa nichwanmi pay yachachiq rinanpaq, chaynapi runamasinchik ima yachachisqanchikmanta mana  qunqarunanpaq hinaspa bibliamanta yachayqa ancha allin kasqanmanta yachananpaq. Amayá piensasunchu: “Ñuqam yachachichkaniqa, manam hukqa rinmanchu”, nispaqa. Munanchikqa allinta yachaspan bautizakuyman chayanantam.

7. ¿Imatam ruwananchik yachachisqanchik runa bibliamanta astawan yachayta munananpaq?

⁷ Sunqumantam yachachinanchik. Chaymantapas, yachachisqanchik runam yachanan yachachisqanchikmanta mana iskayrayasqanchikta (1 Tes. 1:5). Chayta ruwaptinchikqa astawanmi bibliamanta yachayta munanqa. Nichwantaqmi bibliata kasukuspa kusisqa kawsakusqanchiktapas. Chaywanmi yachanqa bibliata kasukuspanqa kusisqa kawsakunanta.

8. ¿Imakunamantam willachwan yachachispanchik? ¿Imaynatam chayqa yanapanqa?

⁸ Yachachisqanchik runamasinchik ima mana allintapas saqinanpaq sasachakuptinqa willachwanmi chaynapi tarikuq iñiqmasinchikkuna ima ruwasqankumanta. Ñawpaqta pay hina tarikuq iñiqmasinchiktam nichwan riysiwananchikpaq. Qawachichwantaqmi wakin iñiqmasinchikkunata kawsakuyninpi biblia imayna yanapasqanmantapas, chaymi tarikun internetpi jw.org * nisqapi. Chaymi yanapanqa bibliapa nisqanta kasukuspan imayna kawsakunanpaq.

9. ¿Imatam ruwachwan yachasqanmanta hukkunaman willakunanpaq?

⁹ Warmillanman utaq qusallanman yachachispanchikqa niykuchwanmi iskayninkutaña yachachinanchikpaq. Yachachisqanchik runamasinchiktaqa kallpanchachwantaqmi ayllunman hinaspa riqsinakusqankunaman ima yachasqanmanta willananpaqpas (Juan 1:40-45). Chaypaqqa bibliamanta yachachispanchikmi nichwan: “¿Imaynatataq aylluykiman kaymanta yachachiwaq? ¿Bibliapa ima nisqanwantaq riqsinakusqaykiman kaymanta yachachiwaq?”, nispa. Chaynata nispanchikmi yanapasunchik paypas allin yachachiq kananpaq. Chaynapim Diosmanta willakunanpaqña punta apaqkuna niptinpas mana manchakuspan ñuqanchikwan kuska willakunqa. Yachachisqanchiktaqa tapuchwantaqmi: “¿Riqsinkichu pitapas bibliamanta yachay munaqta?”, nispa. “Arí” niwaptinchikqa  nichwanmi riqsichiwananchikpaq, chaynapi paymanpas bibliamanta yachachinapaq. Chaymantam riqsichiwasqanchik runaman qawachichwan ¿Imaynatam Bibliamanta yachachiniku? * niq videota.

10. 1 Tesalonicenses 2:7, 8 nisqanman hinaqa, ¿imaynatam Pablota qatipakuchwan?

¹⁰ Bibliamanta yachachisqanchik runamasinchikkunataqa kuyananchikmi. Iñiqmasinchikkuna hinañam paykunaqa kanan (qaway 1 Tesalonicenses 2:7, 8). Paykunapaqqa sasam Diosta mana serviq amistadninkunata saqiyqa. Chayraykum yanapananchik iñiqmasinchikkunawan hukllawakuspanku amistad kanankupaq. Ñuqanchikpas paykunawan kuskaqa kananchik manam yachachisqanchik punchawkunallachu. Huk punchawkunapas qayaykunanchikmi, utaqmi paykunawan kuska kananchik, chaynapi amistadnin kasqanchikta yachanankupaq.

11. ¿Imanasqam ancha allin yachachisqanchik runakuna iñiqmasinchikkunawan hukllawakuyninkuqa?

¹¹ Yachachisqanchik runakuna bautizakunankupaqqa manam sapallanchikchu yanapachwan. Iñiqmasinchikkunapas yanapanmankum, chaymi paykunaman riqsichinanchik. Iñiqmasinchikkunam yanapanmanku Diosta astawan kuyanankupaq hinaspa paypa munasqanman hina kawsakunankupaq. Munanchikmi huk ayllu hinalla kasqanchikta hinaspa paykuna kuyasqanchikta yachanankuta. Iñiqmasinchikkunawan hukllawakuspankuqa manañam hukllawakunqakuñachu Diosta mana serviq amistadkunawanqa (Prov. 13:20). Diosta servisqankurayku ñawpaq amistadninkuna qipancharuptinpas, iñiqmasinchikkunawan hukllawakusqankuraykum mana sapallankuñachu tarikunqaku (Mar. 10:29, 30; 1 Ped. 4:4).

12. ¿Imanasqam yachachisqanchikta rimapayananchik Diosllapaqña kawsakunanmantawan bautizakunanmanta?

¹² Runamasinchikmanqa yachachinchik bautizakuspan Jehova Diosta yupaychananpaqmi. Chaymi mana manchakuspa rimapayananchik Diosllapaqña kawsakunanmantawan bautizakunanmanta. Unayña yachachiptinchikqa utaq huñunakuykunaman riyta qallaykuspanqa yachananmi Jehova Diospa testigon kananpaq yachachisqanchikta.

13. ¿Imakunatam yachachisqanchik runaqa ruwanan bautizakunanpaq?

 ¹³ Bibliamanta yachachisqanchik bautizakunanpaqqa puntatam Jehova Diosta riqsispan kuyanan, hinaspapas paypim iñinan (Juan 3:16; 17:3). Jehova Diosmanmi astawan asuykunan, iñiqmasinchikkunawanmi hukllawakunan (Heb. 10:24, 25; Sant. 4:8). Mana allinkunata saqispanmi huchanmanta wanakunan (Hech. 3:19). Diosmanta yachasqantam hukkunaman willanan (2 Cor. 4:13). Chaymantañam Diosllapaqña kawsakunanpaq tantiakuspan bautizakunan (1 Ped. 3:21; 4:2). Bautizakusqan punchawqa llapallanchikmá anchata kusikunchik. Chayraykuyá bautizakunankupaq kallpanchasun.

14. ¿Imaynatam yachachwan bautizakunanpaq kallpanchakusqanta utaq mana kallpanchakusqanta?

¹⁴ Mana amispam yanapananchik bibliamanta yachachisqanchik bautizakunanpaq. Ichaqa Jehova Diosta yupaychananpaq kallpanchakusqanta utaq mana kallpanchakusqantam qawananchik. ¿Kallpanchakunchu Jesuspa nisqankunata kasukunanpaq, icha imamantapas yachayta munasqanraykullachu bibliamanta yachachkan?

15. ¿Imaynatam yachachwan yachachisqanchik runamasinchik kallpanchakusqanta utaq mana kallpanchakusqanta?

¹⁵ Bibliamanta yachachisqanchik kallpanchakusqanta utaq mana kallpanchakusqantam sapa kuti qawananchik. Chaypaqqa kaykunapim yuyaymanachwan: ¿Willawanchikchu Jehova Dios kuyasqanta? ¿Diosta mañakunchu? (Sal. 116:1, 2). ¿Bibliata ñawinchanchu? (Sal. 119:97). ¿Sapa kutichu huñunakuykunaman rin? (Sal. 22:22). ¿Mana allinkunata saqispanchu Diospa munasqanman hinaña kawsakun? (Sal. 119:112). ¿Willanchu Diosmanta yachasqanta ayllunman hinaspa riqsinakusqankunaman? (Sal. 9:1). Chaymantapas, ¿munanchu Jehova Diospa testigon kayta? (Sal. 40:8). Chaykunapaq mana kallpanchakuptinqa imanasqa mana kallpanchakusqantam yachananchik, hinaspam sumaqllata ninanchik chaykunapi kallpanchakunanpaq. *

16. ¿Imakunapaq mana kallpanchakuptintaq manaña yachachinanchikchu?

 ¹⁶ Chaymantapas, tantiananchikmi yachachisqanchikta hinalla yachachinanchikpaq utaq manaña yachachinanchikpaqpas. Chaymi kaykunapi yuyaymanachwan: “¿Manaraq richkaptinchikchu sapallanpiraq yachanapaq qillqata ñawinchan? ¿Munanchu huñunakuykunaman riyta? ¿Saqirunñachu mana allinkunata? ¿Lluqsikurunñachu pantay religionmanta?”, nispa. Mana kallpanchakuptinqa hinaspa yachachisqanchikta yanqapaq hapiptinqa manañam yachachinanchikchu.

17. 1 Timoteo 4:16 nisqanman hinaqa, ¿imatam bibliamanta yachachiqkuna ruwananchik?

¹⁷ Llapallanchikmi munanchik yachachisqanchik runakuna bautizakunankuta, chaymi anchata kallpanchakunchik yachachinanchikpaq. Chayraykum ñuqallanchik rimanamantaqa bibliata servichikuspa yachachinanchik. Mana iskayrayaspam sunqumanta yachachinanchik. Iñiqmasinchikkunawan hukllawakunankupaqmi kallpanchananchik. Diosllapaqña kawsakunankumantawan bautizakunankumantam sapa kuti ninanchik. Hinaspapas Diosta yupaychanankupaq kallpanchakusqankuta utaq mana kallpanchakusqankutam sapa kuti qawananchik. (Qaway “ ¿Imatam bibliamanta yachachiqkuna ruwananchik?” niq yachachikuyta). ¡Mayna kusikunapaqmá runamasinchikkuna salvakunankupaq yanapayqa! Chayraykuyá anchata kallpanchakusun yachachisqanchik runakuna bautizakunankupaq.