41 KAQ YACHACHIKUY
¿Imaynatam yanapachwan bautizakunankupaq? (Punta kaq)
“Qamkunam ñuqaykupa qillqasqayku Cristopa cartan kankichik, ñuqaykuqa kaniku hukkunaman willaspa serviqkunam” (2 COR. 3:3).
78 KAQ TAKI Diospa palabranmantam yachachinchik
¿IMAMANTAM YACHASUN? *
Llapallanchikmi anchata kusikunchik bibliamanta yachaq runamasinchik bautizakuptinqa. (Qaway 1 kaqta).
1. 2 Corintios 3:1-3 nisqanman hinaqa, ¿imatam qawachinchik bibliamanta yachachisqanchik bautizakuptin? (Qaway qaranpi kaq fotota).
¿IMAYNAM tarikunchik pipas bautizakuptin? Anchatamá kusikunchik (Mat. 28:19). Astawanraqmi kusikunchik ñuqanchikpa yachachisqanchik bautizakuptinqa (1 Tes. 2:19, 20). Yachachisqanchik runakuna bautizakusqanwanmi qawakun yanapanapaq anchata kallpanchakusqanchik hinaspa iñiqmasinchikkunapa kallpanchakusqanku (qaway 2 Corintios 3:1-3).
2. (1) ¿Imata ruwanapaqmi kallpanchakunanchik hinaspa imanasqa? (2) ¿Imaynataq runamasinchikkunaman bibliamanta yachachiyqa? (Qaway uray patanpi willakuyta).
2 Pasaq tawa watapim 10.000.000 runakunaman sapa killa yachachirqanchik. * Hinaptinmi sapa wata bautizakunku 280.000 runakuna. Chaywanpas, achkaraqmi kachkan bautizakunankupaqqa. Chaymi anchata kallpanchakunanchik yachachisqanchik runamasinchikkuna bautizakunankupaq. Taytanchik Jehovaqa kuyakuq kasqanraykum mana munanchu runakuna wañunantaqa, chaymi munachkan paymanta yachaspanku bautizakunankuta. Manañam tiempo kanñachu, chaymi anchata kallpanchakunanchik paykunata yanapaptinchik bautizakunankupaq (1 Cor. 7:29a; 1 Ped. 4:7).
3. ¿Imamantam kay yachachikuypi yachasunchik?
3 Yachachisqanchikkuna bautizakunankupaq imaynata yanapanapaqmi Diospa llaqtanpi punta apaqkuna tapurqaku betel wasipi kaq iñiqmasinchikkunata. Chaymi kay yachachikuypiwan qatiqnin yachachikuypi yachasunchik llaqtan-llaqtan watukuqkuna, huk law nacionpi willakuqkuna hinaspa Diosmanta unay wataña willakuqkuna runamasinchikkunata bautizakunankupaq imayna yanapasqankumanta (Prov. 11:14; 15:22). * Paykunapa ima nisqankuwanmi yachasun yachachisqanchik runamasinchikkuna bautizakunankupaq imata ruwananchikmanta. Yachasuntaqmi bautizakunankupaq kikinku imata ruwanankumantapas.
BIBLIAMANTAM SAPA SEMANA YACHANAN
Yachachisqanchik runatayá tapusun: “¿Maypipas tiyaykuchwanchu astawan yachananchikpaq?”, nispa. (Qaway 4-6 kaqta).
4. Yachachisqanchik runamasinchik bautizakuyman chayananpaqqa, ¿imanasqataq mana wasin punkullapichu yachachinanchik?
4 Achka iñiqmasinchikkunam wasinku punkullapi runamasinchikkunaman yachachinku. Chay ruwasqanku allin kaptinpas manamá unaytachu wasinku punkullapiqa yachachinku. Hinaspapas manam sapa semanachu yachachinku. Chayna wasinku punkullapi killantinña yachaspankupas manam Diostaqa kuyanqakuchu nitaqmi bautizakuymanpas chayanqakuchu. Bautizakunankupaqqa sapa semana tiempochakuspankum bibliamanta allinta yachananku.
5. Lucas qillqapi Jesuspa nisqanman hinaqa, ¿imakunatam yachachisqanchik runamasinchik ruwanan?
5 Jesusmi rikchanachiykunawan huk kutipi rimarqa pipas qatiqnin kananpaq imakunata ruwananmanta. Chaypim rimarqa wasi ruwayta munaq runamanta. Chay runaqa hayka qullqipaq kananmanta hinaspa qispirachinankama llapa iman haypananmantam puntata tantianan karqa. Jesusqa rimarqataqmi peleayman riq kamachiqmantapas. Paypas manaraq peleaq richkaspanmi puntata tantianan karqa vencey utaq mana vencey atinanmanta (qaway Lucas 14:27-33). Chaywanmi Jesusqa yachachirqa pipas qatiqnin kananpaqqa imakunata ruwananpi allinta yuyaymanananmanta. Chaypaqmi yachachisqanchik runamasinchikta kallpanchananchik bibliamanta sapa semana yachananpaq. ¿Imakunatam chaypaq ruwachwan?
6. ¿Imatam ruwachwan yachachisqanchik runamasinchik utqayman bautizakuyman chayananpaq?
6 Wasinku punkullapi bibliamanta yachachispapas kallpanchakunanchikmi unayta yachachinapaq. Chaynata unayña yachachisqanchikmantam tapuykuchwan: “¿Maypipas tiyaykuchwanchu astawan yachananchikpaq?”, nispa. Ima niwasqanchikwanmi yachasunchik hinalla yachay munasqanta utaq manaña yachay munasqanta. Chaymantaqa ichapas tapuykuchwan semanapi iskay kutikamaña yachachinanchikpaq. Chaynata yachachiptinchikqa utqaymanmi bautizakuyman chayanqa.
BIBLIAMANTA YACHANAPAQ QILLQATAM ALLINTA ÑAWINCHANAN
Manaraq richkaspam allinta yachananchik imamanta yachachinanchikta. Yachachisqanchiktapas yachachinanchikmi sapallanpiraq qillqata ñawinchaspa marcananpaq. (Qaway 7-9 kaqta).
7. ¿Imatam ruwananchik sapa semana manaraq yachachiq richkaspa?
7 Manaraq yachachiq richkaspanchikmi imamanta yachachinapaq kaqta qillqanchikpi sumaqta qawananchik. Chayta ñawinchaspam bibliapi maskana kaqkunata maskananchik. Yuyaymanachwanmi yachachinanchikpaq kaq yachachikuypa qallariyninpi ima nisqanpi, yana letrachakunawan kaqpi, tapukuykunapi, dibujokunapi hinaspa chay yachachikuywan tupaq videokunapi. Chaymantañataqmi yuyaymanachwan yachachisqanchik runa imayna tarikusqanpi hinaspa kamas entiendenanpaq hina imayna yachachinanchikpi, chaynapi yachasqanman hina kawsakunanpaq (Neh. 8:8; Prov. 15:28a).
8. Colosenses 1:9, 10 nisqanman hinaqa, ¿imakunatam yachachisqanchik runakunapaq ruwananchik?
8 Chaymantapas, manaraq yachachiq richkaspanchikmi paykunapaq Jehova Diosta mañakunanchik. Mañakunanchiktaqmi ñuqanchikta yanapawananchikpaqpas, chaynapi yachachisqanchik runapa sunqunman chayaqta yachachinanchikpaq (qaway Colosenses 1:9, 10). Yuyaymanananchiktaqmi sasa yachachikuykunata chaylla entiendenanpaq hina imayna yachachinanchikpipas. Kallpanchakunanchikqa bautizakunanta munaspanchikmi.
9. ¿Imaynatam yachachisqanchikta yanapachwan qillqanmanta sapallanpiraq allinta yachananpaq?
9 Munanchikmi yachachisqanchik runa yachachisqanchikwan Jehova Diosta hinaspa Jesusta kuyananta (Mat. 5:3, 6). Chaymi kallpanchananchik yachanan qillqamanta sapallanpiraq allinta yachananpaq hinaspa chay yachasqanta imayna kasukunanpi yuyaymanananpaq. Chaypaqqa paywan kuskam punta kaq yachachikuyta ñawinchachwan. * Yachachichwanmi tapukuykunapa kutichiyninta imayna tarinanpaq hinaspa mayqinkunata yuyarinanpaq kaqta marcananpaq. Chaymantañataqmi nichwan ima entiendesqanta rimarinanpaq. Chaynapim yachasun entiendesqanta utaq mana entiendesqanta.
SAPA PUNCHAWMI BIBLIATA ÑAWINCHANAN HINASPA DIOSTA MAÑAKUNAN
Jehova Diosta mañakunanpaqyá yachachisun. (Qaway 10, 11 kaqta).
10. ¿Imanasqataq yachachisqanchik runaqa sapa semana bibliata ñawinchanan? ¿Imatam ruwanan bibliata ñawinchasqan sunqunpi takyananpaq?
10 Yachachisqanchik runaqa sapa semana yachaspanpas Jehova Diostam uyarinan, hinaspapas paywanmi rimanan. Uyarinmanqa bibliata sapa punchaw ñawinchaspanmi (Jos. 1:8; Sal. 1:1-3). Chaypaqqa sapa punchaw bibliata ñawinchanapaq listatam quykuchwan, chaytam hurquchwan jw.org nisqamanta. * Chaymantapas, bibliata ñawinchasqan sunqunpi takyananpaqmi kallpanchananchik ñawinchaspan Jehova Diosmanta ima yachachisqanpi hinaspa kikinta imayna yanapananpi yuyaymanananpaq (Hech. 17:11; Sant. 1:25).
11. ¿Imaynatam yachachisqanchik runata yanapachwan Jehova Diosta mañakunanpaq? ¿Imanasqataq ancha allin sapa punchaw Diosta mañakuyninqa?
11 Yachachisqanchik runamasinchiktaqa kallpanchasuntaqyá sapa punchaw Jehova Diosta mañakunanpaqpas. Yachachispanchikpas qallarinapaqwan tukunapaqyá Jehova Diosta sunqumanta mañakusunchik. Mañakuspanchikqa nichwantaqmi yachachisqanchik runata yanapananpaqpas. Chaynapim paypas yachanqa Jehova Diosta sunqumanta mañakuyta hinaspa Jesuspa sutinpi mañakuyta (Mat. 6:9; Juan 15:16). Bibliata sapa punchaw ñawinchaspanqa hinaspa sunqumanta mañakuspanqa astawanmi Jehova Diosman asuykunqa (Sant. 4:8). Hinaspapas sunqumanta Jehova Diosta kuyaspanmi payllapaqña kawsakunanpaq tantiakuspan bautizakuyman chayanqa.
JEHOVA DIOSTAM SUNQUMANTA KUYANAN
12. ¿Imaynatam yachachisqanchik runamasinchikta yanapachwan Jehova Diosta tukuy sunqunwan kuyananpaq?
12 Yachachisqanchik runataqa sunqunman chayananpaq hinam yachachinanchik, chaynapi Jehova Diosta tukuy sunqunwan kuyaspan paypa munasqanman hina kawsakunanpaq. Jesuspas runakunapa sunqunman chayaqtam yachachiq (Luc. 24:15, 27, 32). Yachachisqanchik runapaqqa Jehova Diosqa kanan Diosnin, taytan hinaspa kuyasqanmi (Sal. 25:4, 5). Chaymi yachachispanchikqa sapa kuti ninanchik imayna sunquyuq Diosninchik kasqanta (Ex. 34:5, 6; 1 Ped. 5:6, 7). Jesusmi nirqa ‘punta kaq hinaspa aswan hatun kamachikuyqa’ Jehova Diosninchikta kuyay kasqanta (Mat. 22:37, 38). Chaymi imamanta yachachispanchikpas ninanchik Jehova Diosqa kuyakuq, qukuykuq hinaspa llakipayakuq kasqanmanta, chaynapim yachachisqanchik runaqa astawan Jehova Diosta kuyanqa.
13. ¿Ima nisqanchiktaq yachachisqanchikta yanapanqa Jehova Diosta astawan kuyananpaq?
13 Yachachisqanchik runamasinchiktam ninanchik Jehova Diosta anchata kuyasqanchikta. Chaymanta willasqanchikqa ichapas kallpanchanman paypas sunqumanta Diosta kuyananpaq (Sal. 73:28). Ichapas yachachisqanchik qillqapiqa rimachkan Diosninchik kuyakuq, yachayniyuq, allin ruwaq utaq atiyniyuq kasqanmanta. Chaymanta rimaspanchikqa nichwanmi chayrayku Jehova Diosninchik kuyasqanchikta.
HUÑUNAKUYKUNAMANMI RINAN
Huñunakuykunaman rinanpaqyá kallpanchasun. (Qaway 14, 15 kaqta).
14. Hebreos 10:24, 25 nisqanman hinaqa, ¿imapaqmi yachachisqanchik runaqa kallpanchakunan?
14 Llapanchikmi munanchik yachachisqanchik runamasinchik bautizakunanta. Chaypaqqa huñunakuykunaman rinanpaqmi kallpanchananchik. Achka runakunata yanapaq iñiqmasinchikkunam ninku huñunakuykunaman riqkunaqa bautizakuyman chaylla chayasqankumanta (Sal. 111:1). Wakin iñiqmasinchikkunam yachachisqanku runakunata ninku bibliamanta astawan yachanankupaqqa huñunakuykunamanpas rinankupaq. Yachachisqanchik runamasinchikpaqmi ñawinchaykapuchwan Hebreos 10:24, 25 nisqanta (qaway), hinaspam nichwan huñunakuykunaman riy imanasqa ancha allin kasqanmanta. Qawachichwantaqmi ¿Imaynataq huñunakuyniykuqa? * niq videotapas. Sapa huñunakuyman rinanpaqyá yanapasun.
15. ¿Imatam ruwachwan yachachisqanchik runamasinchik huñunakuykunaman rinanpaq?
15 ¿Imaynatam yachachisqanchik runata yanapachwan huñunakuykunaman rinanpaq? Chaypaqqa huñunakuypi ima yachasqanchikmantam willachwan. Willachwantaqmi chay yachasqanchik anchata yanapawasqanchikmantapas. Chaymantapas, quchwanmi huñunakuypi yachasqanchik Willakuq qillqata utaq Huñunakuypi yanapawaqninchik qillqata. Qatiqnin yachachikuypi ima yachanamanta qawachispanchiktaqmi tapuchwan mayqan yachachikuymanta astawan yachay munasqanta. Huñunakuyman rispanmi yachanqa imapas uyarisqanqa hinaspa qawasqanqa mana wakin religionkunapi hina kasqanta (1 Cor. 14:24, 25). Chaymantapas, iñiqmasinchikkunatam riqsinqa. Paykunam yanapanqa Diospa munasqanman hina kawsakuspan bautizakuyman chayananpaq.
16. (1) ¿Imatam ruwananchik runamasinchik bautizakuyman chayananpaq? (2) ¿Imamantam qatiqnin yachachikuypi yachasunchik?
16 Chaynaqa, ¿imatam ruwachwan yachachisqanchik bautizakuyman chayananpaq? Sapa semana yachachinapaq tiempochakunanpaqmi kallpanchananchik. Kallpanchananchiktaqmi manaraq richkaptinchik yachachisqanchik qillqata sapallanpiraq sumaqta ñawinchananpaqpas. Chaymantapas, yachachinanchikmi sapa punchaw bibliata ñawinchananpaq hinaspa Jehova Diosta mañakunanpaq. Yanapananchiktaqmi Jehova Diosta tukuy sunqunwan kuyananpaqpas chaynataq huñunakuykunaman rinanpaqpas. (Qaway “ ¿Imatam bibliamanta yachachisqanchik ruwanan?” niq yachachikuyta). Qatiqnin yachachikuypiñataqmi yachasunchik yachachisqanchik runakuna bautizakunanpaq ñuqanchik imakuna ruwanamanta.
76 KAQ TAKI ¿Kusikullankichu ruwasqaykiwan?
^ par. 5 Kay watapaq bibliapa nisqanmi hurqusqa kachkan Mateo 28:19 nisqanmanta, chaypi nisqanmi yuyarichiwanchik llapallan runakunata Diosmanta yachachinanchikpaq hinaspa bautizakunankupaq yanapananchikpaq. Chaymantam kay yachachikuypi hinaspa qatiqnin yachachikuypi yachasunchik.
^ par. 2 ASTAWAN YACHANAPAQ: Bibliamanta yachachiyqa manam willaylla-willaychu, aswanqa sapa semana kutispa qillqanchikwan utaq qillqanchikpa nisqanman hina yachachiymi. Iskay utaq kimsa kutikamaña watukuruspaqa hayka hora willakusqanchikpim churachwan bibliamanta yachachisqanchikta.
^ par. 3 Kaypi wakin yachachikuykunaqa “Diosta servinanpaq hina estudiota qusun” niq yachachikuymantam hurqusqa kachkan. Chay yachachikuymi lluqsimurqa Diospaq Llamkayninchik qillqapi 2004 watapa julio killanmanta 2005 watapa mayo killankama.
^ par. 9 Qaway “Yachachisqayki runata yachachiy qillqanchikkunata kikinmanta imayna estudiananpaq” niq videota. JW Library® nisqapi maskay MULTIMEDIA > NUESTRAS REUNIONES Y MINISTERIO > MEJORE SUS HABILIDADES EN EL MINISTERIO nisqanta.
^ par. 10 Maskay ENSEÑANZAS BÍBLICAS > AYUDAS PARA ESTUDIAR LA BIBLIA nisqanta.
^ par. 14 JW Library® nisqapi maskay MULTIMEDIA > NUESTRAS REUNIONES Y MINISTERIO > AYUDAS PARA LA PREDICACIÓN nisqanta.
