1. ¿Imapaq tantiakuymi imamantapas aswan allinqa?

TAYTA-MAMAKUNAPA tantiasqankuwanmi churi-wawakunaqa kusisqa utaq sasachakuypi tarikunqaku. Churi-wawakunapas allintam tantiakunanku kusisqa tarikunankupaqqa. Imapaq tantiakuymantapas aswan allinqa kuyakuq taytanchik Jehovata yupaychananchikpaq tantiakuymi (Sal. 73:28).

2. Bibliapa nisqanman hinaqa, ¿imapaqmi tantiakururqaku Joseywan Mariaqa hinaspa Jesusqa?

² Joseywan Mariaqa churi-wawanku Jehova Diosta yupaychanankupaq yanapaypim anchata kallpanchakurqaku. Paykunaqa Diospa munayninta puntapi churanankupaqmi tantiakururqaku (Luc. 2:40, 41, 52). Jesuspas taytanpa munayninta ruwananpaqmi tantiakururqa (Mat. 4:1-10). Payqa karqa allin runam, Diosman sunqum hinaspa mana manchakuqmi. ¿Pi tayta-mamataq mana munanmanchu churi-wawan chayna kananta?

3. ¿Ima tapukuykunamantam yachasunchik kay yachachikuypi?

³ Kay yachachikuypim yachasunchik kay tapukuykunamanta: ¿Imatam Jehova Diosqa tantiarurqa churin Jesusmanta? ¿Imatam tayta-mamakuna yachanmanku Joseypawan Mariapa tantiasqankumanta? ¿Imatataq Diosta yupaychaq musu-sipaskuna yachanmanku Jesuspa tantiakusqanmanta?

4. ¿Imatam Jehova Diosqa churin Jesusmanta allintapuni tantiarqa?

⁴ Jehova Diosqa churin Jesusta pikuna uywananpaqqa allin tayta-mamatam akllarqa (Mat. 1:18-23; Luc. 1:26-38). Mariamanta  bibliapa ima nisqanwanmi yachanchik Jehova Diosta tukuy sunqunwan kuyasqanta (Luc. 1:46-55). Joseypas Jehova Diosta kuyaspanmi imapas nisqanta kasukurqa (Mat. 1:24).

5, 6. ¿Ima sasachakuykunamantam Jehova Diosqa churin Jesusta mana harkarqachu?

⁵ Jesuspa uywaqnin Joseywan Mariaqa manam apuchu karqaku. Chaymi Jesus naceruptinpas Jehova Diospaq qurqaku iskay mallqu palomachakunallata (Luc. 2:24). Joseyqa carpinterom karqa, paypa churinkunaqa yaqachusmi qanchis masnin karqa. Chayraykuchá mana anchachu imapas kapuqninqa karqa (Mat. 13:55, 56).

⁶ Jehova Diosqa sasachakuykunamanta churin Jesusta harkaspanpas wakin sasachakuykunamantaqa manam harkarqachu (Mat. 2:13-15). Jesuspa wakin ayllunkunam Diospa akllasqan kananmanta iskayrayarqaku. ¡Chaywanqa imaynaraq tarikurqa! (Mar. 3:21; Juan 7:5). Uywaqnin Joseypas yaqachusmi musullaraq kachkaptin wañukurqa. ¡Chaywanpas mayna llakisqachá tarikurqa! Chaymantapas, Jesusqa piwi kasqanraykuchá Joseypa llamkayninpi payña llamkanan karqa (Mar. 6:3). Watakuna pasasqanman hinam payña ayllunta uywarqa. Chaypaqqa maynatachá kallpanchakurqa.

7. (1) ¿Imakunatam tapukunanku churi-wawayuq kaqkunaqa? (2) Proverbios 2:1-6 nisqanman hinaqa, ¿imatam tayta-mamakunaqa churi-wawankuman yachachinmanku?

⁷ Churi-wawayuq kayta munaspaykichikqa kaytam tapukunaykichik: “¿Joseywan Maria hinachu kanchik, chaynapi churi-wawanchikta Jehova Diospa munasqanman hina uywanapaq?”, nispa (Sal. 127:3, 4). Churi-wawayuq kaqkunañataqmi tapukunaykichik: “¿Churi-wawanchikta yachachinchikchu allin llamkaq kanankupaq? (Ecl. 3:12, 13). ¿Tukuytachu ruwanchik imapas mana allinkuna mana pasarunanpaq utaq imapas mana allinkunaman mana wichiykunanpaq?”, nispa (Prov. 22:3). Manamá lliw sasachakuykunamantachu harkaytaqa atinkichik. Chaywanpas, kuyakuywanmi yachachiwaqchik imapas sasachakuy kaptin bibliapa yanapakuyninta maskanankupaq (qaway Proverbios 2:1-6). Chaymi ayllumanta pipas Dios serviyta manaña munaptinqa churi-wawaykichikta bibliawan qawachiwaqchik Diosman sunqu kay imanasqa ancha allin kasqanmanta (Sal. 31:23). Pi  ayllupas wañukuptinñataqmi bibliawan yanapaspa churi-wawaykichikpa sunqunta tiyaykachiwaqchik (2 Cor. 1:3, 4; 2 Tim. 3:16).

8. ¿Imaynatam Joseywan Mariaqa kasukurqaku Deuteronomio 6:6, 7 nisqanta?

⁸ Joseywan Mariaqa Jehova Diosta kuyananpaqmi Jesustaqa yanaparqaku. Chaytaqa ruwarqaku tayta-mamakunapaq Jehova Diospa kamachikuyninkunata kasukuspankum (qaway Deuteronomio 6:6, 7). Iskayninkum Jehova Diosta tukuy sunqunkuwan kuyarqaku. Chaymi anchata kallpanchakurqaku churi-wawanku Diosta kuyanankupaq yanapaypi.

9. ¿Imapaqmi anchata kallpanchakurqaku Joseywan Mariaqa?

⁹ Joseywan Mariaqa anchatam kallpanchakurqaku churi-wawankuwan kuska Diosta yupaychanankupaq. Sapa semanam Nazaret llaqtapi Diospa wasinman riqku. Sapa watataqmi pascua fiestamanpas riqku Jerusalen llaqtata (Luc. 2:41; 4:16). Yaqapaschá Jerusalen llaqtaman risqankupi Jesusmanwan sullkankunamanqa willaq serviqninkunata Dios imayna yanapasqanmanta. Ñan risqankupiqa riqsichiqkutaqchá Diospa ñawpaq serviqninkunapa maypi yachasqankutapas chaynataq mayninta risqankutapas. Achka churi-wawayuq kasqankuraykuchá Joseypaqwan Mariapaqqa sasa karqa sapa semana paykunaman Diosmanta yachachiyqa hinaspa kuska Diosta yupaychayninkuqa. Chaywanpas, Diospa munayninta puntapi churayninkuqa manamá yanqachu karqa. Churi-wawankuqa Diosta kuyaqkunam karqaku.

10. ¿Imaynatam tayta-mamakuna qatipakunmanku Joseytawan Mariata?

¹⁰ Tayta-mamakuna, ¿imaynatam qatipakuwaqchik Joseytawan Mariata? Imamantapas astawanqa churi-wawaykichiktam yanapanaykichik Jehova Diosta kuyanankupaq. Chaypaqqa kikikichikraqmi imapas rimasqaykichikwan hinaspa ruwasqaykichikwan Diosta tukuy sunquwan kuyasqaykichikta qawachinaykichik. Chaymantapas, churi-wawaykichiktam kallpanchanaykichik sapankupi Diosmanta yachanankupaq, Diosta mañakunankupaq, huñunakuykunaman rinankupaq hinaspa qamkunawan kuska Diosmanta yachanankupaq (1 Tim. 6:6). Mikunankupaq hinaspa  pachakunankupaq yanapaspaykichikpas, astawanqa yanapanaykichik Diosman sunqu kanankupaqmi (1 Tim. 5:8). Amayá qunqaychikchu, churi-wawaykichikqa wiñay kawsaytaqa haypanqaku manam tukuy imayuq kaspankuchu, aswanqa Diosman sunqu kaspallankum (Ezeq. 7:19; 1 Tim. 4:8). *

11. (1) 1 Timoteo 6:17-19 nisqanqa, ¿imaynatam tayta-mamakunata yanapanqa? (2) ¿Imakunata ayllunkuwan ruwanankupaqmi tantianmanku? ¿Imaynam tarikunqaku chaypaq tantiakuspankuqa? (Qaway “ ¿Imakunata ruwanankupaqmi kallpanchakunmanku?” niq yachachikuyta).

¹¹ ¡Mayna allinmi churi-wawankuta yanapanankupaq tayta-mamakunapa kallpanchakusqankuqa! Achka tayta-mamakunam churi-wawankuwan kuska rinku sapa semana huñunakuykunaman, hatun huñunakuykunaman hinaspa Diosmanta willakuq. Wakin ayllukunañataqmi rinku Diosmanta mana ancha willakuqkunapa kasqanpi willakuq. Hukkunañataqmi rinku betel wasita riqsiq. Wakinkuñataqmi Diosta yupaychana wasikunata ruwaypi yanapakunku. Tukuy chaykunaqa qullqipaq utaq sasa kaptinpas manam yanqachu. Jehova Diosqa manamá qunqanqachu (qaway 1 Timoteo 6:17-19). Chayna uywasqa churi-wawakunaqa manam qunqankuchu taksankupi ima yachasqankutaqa. Hinaspapas tayta-mamankutam anchata kuyanku (Prov. 10:22). *

12. ¿Imatam Jesusqa ruwanan karqa wiñasqanman hina?

¹² Jesuspa taytan Jehova Diosqa imatapas tantiaspanqa manam pantanchu. Joseywan Mariapas Jesuspa hinaspa sullkankunapa allinninpaqmi imatapas tantiaqku. Chaywanpas, wiñasqanman hinam Jesusqa imatapas kikin tantiakunan karqa (Gal. 6:5). Imapas munasqanta ruwananpaq tantiakunanmantaqa taytan Jehova Diosta kuyaspanmi munayninta ruwananpaq tantiakurqa (Juan 8:29). Chaymi kunan tiempopi musu-sipaskunapas Jesustaqa qatipakunmanku.

13. ¿Imaynam Jesusqa karqa warmallaraq kachkaspan?

¹³ Jesusqa warmallaraq kasqanmantapacham tayta-mamantaqa kasukurqa. Manataqmi haykapipas Joseymantawan Mariamanta aswan yachayniyuq kasqanpaqqa hapikurqachu, aswanqa paykunatam imapipas kasukurqa (Luc. 2:51). Payqa piwim karqa, chayraykuchá anchata kallpanchakurqa ayllunta uywaypi yanapananpaq. Chaypaqqa Joseypa ima ruwasqanta yachananpaqchá kallpanchakurqa.

14. ¿Imaynatam yachanchik Jesusqa Diospa palabranmanta allinta yachasqanta?

 ¹⁴ Joseywan Mariaqa willarqachá Jesusmanqa naceruptin angelkuna willakusqanmanta (Luc. 2:8-19, 25-38). Chaykunamanta willaptinkupas Jesusqa kikinmi kallpanchakurqa Diospa palabranmanta allinta yachananpaq. Chaymantaqa allintamá yacharqa warmallaraq kachkaspanpas. Chaymi Jerusalenpi yachachiqkunapas “yachayninmanta hinaspa tapukuykuna kutichisqanmanta admirakurqaku” (Luc. 2:46, 47). Chaymantapas, Jesusqa chunka iskayniyuq watanpi kachkaspallanraqmi manapuni iskayrayarqachu taytanqa Jehova kasqanmanta (Luc. 2:42, 43, 49).

15. ¿Imaynatam yachanchik Jesusqa taytanpa munayninta ruwananpaq tantiakusqanta?

¹⁵ Jesusqa taytanpa munayninta ruwananpaq kay pachaman hamusqanta entienderuspanmi kusikuywan ruwarqa (Juan 6:38). Achka runakuna chiqninanta yachaspanpas taytanta kasukunanpaqmi tantiakururqa. 29 watapi bautizakuruspanmi taytanpa munaynin ruwayta imamantapas puntapi churarqa (Heb. 10:5-7). Chaytamá ruwarqa wañukunan punchawkama (Juan 19:30).

16. ¿Imaynatam churi-wawakuna Jesusta qatipakunmanku?

¹⁶ Tayta-mamaykitayá kasukuy. Joseywan Maria hinam tayta-mamaykiqa pantaq kanku. Chaywanpas, Jehova Diosmi munan paykuna uywasunaykita, yanapasunaykita hinaspa yachachisunaykita. Chaymi Jesus hina tayta-mamaykipa imapas nisusqaykita kasukunayki. Kasukuspaykiqa allinmi kawsakunki (Efes. 6:1-4).

17. Josuey 24:15 nisqanman hinaqa, ¿imapaqmi musu-sipaskunaqa kikinku tantiakunanku?

¹⁷ Jehova Diosta servinaykipaqyá tantiakuy. Musu-sipas, kikikim yachanayki Jehova Dios imayna sunquyuq kasqanmanta, ima munaynin kasqanmanta hinaspa munayninta ruwanaykimanta (Rom. 12:2). Chayta yachaspallaykim Jehova Diosta servinaykipaqqa tantiakunki (qaway Josuey 24:15; Ecl. 12:1). Bibliata ñawinchaspaykiqa hinaspa chaypi yuyaymanaspaykiqa astawanmi Jehova Diosta kuyanki.

18. ¿Imapaqmi musu-sipaskunaqa tantiakunanku? ¿Imaynam kanqaku chaypaq tantiakuspankuqa?

¹⁸ Jehova Diospa munaynintayá puntapi churaychik. Diosta mana yupaychaq runakunam  ninku tukuy imayuq kaspa kusisqa kawsakunamanta, ichaqa manam chaynachu. Tukuy chaykunata imamantapas puntapi churaq runakunaqa ‘llumpaytam ñakarinku’ (1 Tim. 6:9, 10). Jehova Diosta kasukuspayki hinaspa munayninta puntapi churaspaykiqa kusisqam kawsakunki, ima ruwasqaykipas allintaqmi kanqa (Jos. 1:8).

19. ¿Imatam tayta-mamakunaqa mana qunqanankuchu?

¹⁹ Tayta-mamakuna, churi-wawaykichik Diosta servinankupaqyá tukuyta ruwaychik. Jehova Diospi hapipakuptikichikqa paymi yanapasunkichik allinta tantianaykichikpaq (Prov. 3:5, 6). Amayá qunqaychikchu, imapas nisqaykichikmantaqa imapas ruwasqaykichikmi churi-wawaykichiktaqa astawan yanapanqa. Chaynaqa, churi-wawaykichikta yanapanaykichikpaqyá imatapas tantiaychik. Hinaptinqa Jehova Diosmi paykunata yanapanqa.

20. ¿Imaynam musu-sipaskunaqa kawsakunqaku Diosta servinankupaq tantiakuspankuqa?

²⁰ Musu-sipaskuna, tayta-mamaykichikmi yanapasunkichikman allinta tantiakunaykichikpaq. Chaywanpas, Jehova Dios kuyasunaykichikpaqqa kikikichikmi kallpanchakunaykichik. Chayraykum Jesusta qatipakuspa Jehova Diosta servinaykichikpaq tantiakunaykichik. Chaypaq tantiakuspaykichikqa kunanpas hinaspa hamuq tiempopipas kusisqam kawsakunkichik (1 Tim. 4:16).