1. ¿Imatam achkallaña runakuna ninku?

WARANQANTIN religionkunam ninku Diospa munasqanman hina yupaychasqankuta. Chayraykuchá achkallaña runakunaqa ninku: “¿Kanmanchu chiqap religion, icha llapallan religionkunatachu Diosqa chaskin?”, nispanku. ¿Ñuqanchikqa ima nichwantaq? ¿Seguropunichu kachkanchik Jehova Diospa testigonkunalla imam kaqta yachachisqanchikmanta hinaspa Diospa munasqanman hina yupaychasqanchikmanta? Chaykunamantayá yachaykusun.

2. ¿Imanasqataq apostol Pabloqa yachasqankunamanta manapuni iskayrayarqachu? (Rimarimuytaq 1 Tesalonicenses 1:5 nisqanmantapas).

² Apostol Pabloqa yachasqankunamantaqa manapunim iskayrayarqachu (qaway 1 Tesalonicenses 1:5). Manaqa iskayrayarqachu Diospa palabranta allintapuni estudiasqanraykum. Chaymi nirqa: “Diospa llapallan qillqanqa paypa yuyay qusqanwan qillqasqam kachkan”, nispa (2 Tim. 3:16). Allinta estudiaspanmi Pabloqa manapuni iskayrayarqachu Jesusqa Diospa akllasqan runa kasqanmanta. Religionkunapi punta apaqkunam ichaqa yachachkaspankupas mana kaqpaqpas hapirqakuchu. Chay iskay uya runakunaqa ‘Diostam riqsiniku’ nichkaspankupas ruwasqankuwanqa manam chayna kasqankutachu qawachirqaku (Tito 1:16). Pablom ichaqa mana paykuna hinachu karqa. Payqa manam Diospa palabranmantaqa allinninpaq kaqkunallatachu akllakurqa, aswanqa Diospa ‘tukuy ima nisqankunatam’ yachachirqa, hinaspapas chayman hinam kawsakurqa (Hech. 20:27).

3. Chiqap kaqmanta mana iskayrayanapaqqa, ¿lliwmantaraqchu yachananchik? (Qaway “ Diosmantaqa manam lliwtachu yachanchik” niqta).

 ³ Wakin runakunam ninku: “Chiqap religionpi kaqkunaqa bibliapa nisqanmanta utaq mana nisqanmantapas lliwtam yachananku”, nispa. ¿Chay nisqankuqa ciertochu? Manam. ‘Tukuy imamanta allinta yachanankupaq’ iñiqkunata apostol Pablo nispanpas kikinmi riqsikurqa lliwta mana entiendesqanta (1 Tes. 5:21). Paymi nirqa ‘wakillanta yachasqanchikta’ hinaspa ‘fierromanta ruwasqa espejopi qawachkaq hina kunanqa manaraq sumaqta qawasqanchikta’ (1 Cor. 13:9, 12). Arí, Pablo hinamá ñuqanchikpas mana lliwtachu yachanchik. Chaywanpas, Pabloqa chiqapmanta mana iskayrayananpaqmi allintapuni entienderqa.

4. ¿Imataq yanapawachwan yachasqanchikmanta manapuni iskayrayanapaq? ¿Imamantam yachasun?

⁴ ¿Imataq yanapawachwan yachasqanchikmanta manapuni iskayrayanapaq? Chaypaqqa Diosta imayna yupaychanapaq Jesuspa yachachisqantam tupachichwan kunan tiempopi testigokunapa Diosta yupaychasqankuwan. Kay yachachikuypim yachasun chiqap religionpi kaqkunaqa 1) taytacha-mamachata mana yupaychasqankumanta, 2) Diospa sutinta riqsichisqankumanta, 3) bibliapa nisqanman hina kawsakusqankumanta hinaspa 4) llapallanku kuyanakusqankumanta.

5. ¿Imaynata Diosta yupaychanapaqmi Jesusqa yachachirqa? ¿Imaynatam payta qatipakuchwan?

⁵ Jesusqa Jehova Diosta anchata kuyasqanraykum hanaq pachapi kaspanpas  chaynataq kay pachapi kaspanpas payllata yupaycharqa (Luc. 4:8). Qatiqninkunatapas Diosllata yupaychanankupaqmi yachachirqa. Paykunaqa manam haykapipas taytacha-mamachataqa servichikurqakuchu Diosta yupaychanankupaqqa. Diosqa espiritum, chaymi runakunapa ima ruwasqanpas paymanqa manapuni rikchakunmanchu (Is. 46:5). ¿Ima nichwantaq taytacha-mamachakunata ruwakuruspanku chaykunaman rezakuqkunamantaqa? Moisesman qusqan kamachikuypim Dios kaynata nirqa: ‘Amam taytacha-mamachataqa ruwankichu imaman rikchakuqtapas, hanaq pachapi kaqman rikchakuqtapas, kay pachapi kaqman rikchakuqtapas nitaq allpapa ukun yakupi kaqman rikchakuqtapas. Amam qunqurakunkichu chaykunapa ñawpaqninpiqa, amataqmi adorankichu’, nispa (Ex. 20:4, 5). Diospa munasqanman hina yupaychaqkunaqa chayna nisqantam kasukunanku.

6. ¿Pikunata qatipakuspam kunan tiempopi testigokunapas Diosta yupaychanchik?

⁶ Ñawpaq tiempomanta estudiaq runakunam ninku Jesuspa qatiqninkunaqa Diosllata yupaychasqankuta. Chay tiempomanta willakuq libropas nintaqmi paykunaqa taytacha-mamachakunata chiqnisqankuta. Kunan tiempopi Jehova Diospa testigonkunapas Jesuspa qatiqninkuna hinam Diostaqa yupaychanchik. Manam mañakunchikchu taytacha-mamachakunataqa, angelkunataqa nitaq Jesustapas. Manataqmi nacionninchikpa banderantapas saludanchikchu nitaq himno nacionaltapas takinchikchu. Ñuqanchikqa imaña-haykaña kaptinpas Jesuspa nisqantam kasukunchik. Paymi nirqa: “Jehova Diosllaykitam yupaychanaykiqa”, nispa (Mat. 4:10).

7. ¿Imakunapitaq testigokunaqa wakin religionkunawan mana chaynallachu kanchik?

⁷ Kunan tiempopi achka runakunam religionkunapi punta apaqkunataqa llumpayta alabanku. Chaymi iglesiankumanpas achkallaña rinku, libronkutapas rantinku, hinaspapas achkallaña qullqitam qunku. Wakinkuqa imapas nisqankutam kasukunku. Paykunaqa manam kikin Jesustaña rikuspankupas chaynataqa creenmankuchu. Jehova Diospa serviqninkunam ichaqa mana pi runatapas qatinchikchu. Diosta yupaychanapaq yanapawaqninchikkunata respetaspanchikpas Jesuspa nisqantam kasukunchik. Paymi nirqa: “Qamkunaqa wawqintillanmi kankichik”, nispa (Mat. 23:8-10). Manamá pi runatapas llumpaytaqa alabanchikchu religionkunapi punta apaqkunaña kaptinpas utaq nacionkunata kamachiqkunaña kaptinpas. Manataqmi paykunamanqa sayapakunchikchu. Tukuy chaykunapim “Diostam serviniku” niq religionkunawanqa mana chaynallachu kanchik (Juan 18:36).

8. ¿Imaynatam yachanchik Diosqa sutinta hatunchananchikta hinaspa riqsichinanchikta munasqanta?

⁸ Huk kutipim Jehova Diosta mañakuspan Jesus kaynata nirqa: “Taytalláy, sutikita hatunchay”, nispa. Chaynata niptinmi kikin Jehova Dios hanaq pachamanta nimurqa sutinta hatunchananpaq (Juan 12:28). Kay pachapi kaspanmi Jesusqa taytanpa sutinta riqsichirqa (Juan 17:26). Chaynam kunan tiempopi Diospa chiqap serviqninkunapas sutinta rimananchik hinaspa hukkunaman riqsichinanchik.

9. ¿Imaynatam apostolkunapa tiemponpi iñiqkunaqa Diospa sutinta riqsichirqaku?

⁹ Jehova Diosmi apostolkunapa tiemponpi  huklaw nacionniyuq runakunamanta “sutin apaq llaqtata” utaq serviqninkunata rikurichirqa (Hech. 15:14). Paykunam Diospa sutinta rimarqaku hinaspa hukkunaman kusikuywan willarqaku. Arí, paykunaqa willakuspankupas Diospa sutintam rimarqaku, churarqakutaqmi bibliata qillqaspankupas. * Chaywanmi sutillata riqsichikurqaku paykunaqa Diospa serviqninkuna kasqankuta (Hech. 2:14, 21).

10. ¿Imaynatataq yachanchik testigokunaqa Diospa akllasqan kasqanchikta?

¹⁰ Kunan tiempopi llapallan religionkunaqa tukuytam ruwanku Diospa sutinta mana rimanankupaq. Huk rimaykunaman bibliata ruwaspankupas manam Diospa sutintaqa churankuchu. Manataqmi munankuchu paykuna ukupi pipas rimanantaqa. * Jehova Diospa testigonkunam ichaqa enteron pachapi Diospa sutintaqa hatunchanchik hinaspa riqsichinchik. Arí, manam mayqan religionpas ñuqanchik hinaqa Diospa sutintaqa riqsichinkuchu. Chayraykum Diosqa akllawarqanchik testigonkuna kananchikpaq (Is. 43:10-12). Ñuqanchikqa 240 millon masnintañam Traducción del Nuevo Mundo sutiyuq bibliatapas aypurunchik. Chay bibliapiqa maymi kananpim Diospa sutinqa kachkan. 1.000 masnin rimaykunapi kaq  qillqanchikkunapipas Diospa sutinqa kachkanmi.

11. ¿Imaynatam Jesuspa qatiqninkuna qawachirqaku Diospa munasqanman hina kawsakusqankuta?

¹¹ Jesusqa Diospa munasqanman hinam kawsakurqa, chayman hina kawsakunankupaqtaqmi hukkunatapas yachachirqa (Juan 18:37). Qatiqninkunapas bibliapa nisqanman hinam kawsakurqaku (Juan 4:23, 24). Chaymi apostol Pedro nirqa ‘Diospa ñanninpi’ kasqankuta (2 Ped. 2:2). Paykunaqa Diospa yachachikuyninkunataqa anchatam kuyarqaku. Chayraykum pantay religionkunapa yachachisqankumantawan costumbrenkumantaqa karunchakurqaku (Col. 2:8). Chaynallataqmi kunan tiempopi Diospa serviqninkunapas ‘chiqap yachachikuyman hina’ utaq bibliapa nisqanman hina kawsakunchik (3 Juan 3, 4).

12. ¿Imanasqataq testigokunapi punta apaqkunaqa imatapas entienderuspankuqa chaylla willawanchik?

¹² Testigokunaqa manam ninchikchu bibliamanta suma-sumaqta yachasqanchiktaqa. Wakinpiqa bibliapa nisqankunamantam allinta mana entiendesqanchikrayku pantarqanchik. Chaywanqa manam hukmanyananchikchu. Bibliaqa nirqañam tiempopa pasasqanman hina Diosmanta astawan entiendenanchikmanta (Col. 1:9, 10). Arí, Jehova Diosqa pisi-pisimantam imam kaqtaqa willawanchik. Chaymi chiqap kaqkuna achkirichkaq hina kananta pacienciawan suyananchik (Prov. 4:18). Achka religionpi punta apaqkunam imatapas tantianku runankuna kusisqa kanallankupaq utaq hukkunapa allin qawasqan kanallankupaq. Testigokunapi punta apaqkunam ichaqa imatapas cambianku Diosman astawan asuykunanchikpaq hinaspa Jesuspa yachachisqanman hina yupaychananchikpaq. Chaymi imatapas allinta entienderuspankuqa chaylla willawanchik chayman hina kawsakunapaq (Sant. 4:4). Arí, imatapas cambianchikqa manam runakunapa nisqanman hina kananchikraykuchu, aswanqa bibliapa nisqanta allinta entiendesqanchikraykum. Chaykunawanmi Diosta kusichinchik (1 Tes. 2:3, 4).

13. ¿Imayna kasqanchikwantaq testigokunaqa astawan riqsichikunchik? ¿Imaynatam chayta qawachinchik?

¹³ Ñawpaq tiempopi Diospa serviqninkunaqa kuyakuq kasqankuwanmi astawan riqsichikurqaku. Jesusmi nirqa: “Qamkuna kuyanakuptikichikmi llapallan runakuna yachanqaku qatiqniykuna kasqaykichikta”, nispa (Juan 13:34, 35). Kunan tiempopi Jehova Diospa testigonkunapas enteron pachapi iñiqmasinchikkunawanmi kuyanakunchik hinaspa huk sunqulla kanchik. Arí, llapallanchikmi kuyanakunchik may nacionniyuqña kaspapas, ima rimayniyuqña kaspapas utaq ima rikuqña kaspapas. Chaymi sutilla qawakun lliw huñunakuyninchikkunapi. Chaywanmi manapuni iskayrayanchikchu ñuqallanchik Diospa munasqanman hina yupaychasqanchikta.

14. Colosenses 3:12-14 nisqanman hinaqa, ¿imaynatam ancha kuyanakusqanchikta qawachichwan?

¹⁴ Bibliam nin: “Tukuy sunqumantayá llapallaykichik kuyanakuychik”, nispa (1 Ped. 4:8). Kuyanakusqanchiktam qawachichwan aguantanakuspanchik hinaspa pantasqanchikkunamanta pampachanakuspanchik. Chaymantapas, llapallankuwan qukuykuq hinaspa chaskikuykuq kananchikpaqmi kallpanchakunanchik  (qaway Colosenses 3:12-14). Chayna kaptinchikqa Diospa chiqap serviqninkuna kasqanchiktam yachanqaku.

15. ¿Imakunapiraqtaq ñawpaq tiempopi Diospa serviqninkunata qatipakunchik?

¹⁵ ¿Imakunapiraqtaq ñawpaq tiempopi Diospa serviqninkunata qatipakunchik? Paykunata qatipakuptinchikmi kan llaqtan-llaqtan watukuqkuna, iñiqkunapi punta apaqkuna hinaspa paykunapa yanapaqninkuna (Filip. 1:1; Tito 1:5). Ñawpaq tiempopi Diospa serviqninkuna hinataqmi piensanchik manaraq casarakuchkaspa warmi-qari puñuymantapas, casarakuymantapas, yawarmantapas chaynataq huchata ruwaruspa mana wanakuqkunamantapas (Hech. 15:28, 29; 1 Cor. 5:11-13; 6:9, 10; Heb. 13:4).

16. ¿Imatam yachachiwanchik Efesios 4:4-6 nisqan?

¹⁶ Jesusqa ñam willakurqaña paypa qatiqnin tukuqkuna kanankumanta (Mat. 7:21-23). Bibliapas ñam willakurqaña kay tukupay punchawkunapi achka runakuna yanqalla “Diostam serviniku” ninankumanta (2 Tim. 3:1, 5). Hina bibliapitaqmi niwanchik iñiyqa chullalla kasqantapas (qaway Efesios 4:4-6).

17. ¿Pikunataq Jesusta qatipakunku hinaspa chiqap religionpi kanku?

¹⁷ Chaynaqa, ¿pikunataq kanku kunan tiempopi chiqap religionpi kaqkuna? Jehova Diospa testigonkunallam. Chaytam yachanchik Diosta imayna yupaychanapaq Jesuspa yachachisqanwan hinaspa ñawpaq tiempopi qatiqninkuna imayna kasqankuwan. Diospa serviqnin kayqa hinaspa paymanta imam kaqta yachayqa ancha kusikunapaqmi. Chayraykuyá hinalla kallpanchakusun Diospa munasqanman hina kawsakunapaq.