1. ¿Imamantataq rimachkan bibliapi ‘Diosta maskaymanta’ rimaspanqa? ¿Imanasqataq kusisqa kayta atinchik?

 CHIQAP kusikuyqa manam chinkaruqllachu, Jesuspas ancha riqsisqa yachachisqanpim nirqa chiqap kusikuyta imaynata tarinamanta, nirqam: “Mayna kusisqam Diosta maskaqkunaqa”, nispa (Mat. 5:3). Payqariki yacharqam Diosmanta yachaspanchik payta servinapaq unanchasqa kasqanchikta, chaymantam rimachkan bibliapi ‘Diosta maskaymanta’ rimaspanqa. Diosninchikqa ‘kusisqalla Diosmi’, chaymi serviqninkunapas kusisqa kayta atinchik (1 Tim. 1:11).

2, 3. (1) Llakisqa kaqkunapas, ¿imayna kanankumantam Jesusqa nirqa? (2) ¿Imamantam kay yachachikuypi yachasunchik? ¿Imaynanpitaq ancha allin chaymanta yachayninchikqa?

² Kusisqa kanapaqqa, ¿tukuy imachu allinlla kanan? Manam, Jesuspas ancha riqsisqa yachachisqanpim nirqa: “Mayna kusisqam llakisqakunaqa”, nispa. Chaynaqa, huchanchikmanta llakikuspapas utaq sasachakuykunawan llakikuspapas kusisqa kaytaqa atichwanmi. Nirqaraqmi: “Mayna kusisqam allin ruwasqankumanta ñakarichisqa kaqkunaqa”, nispa. Huk rimaypiqa nichkarqa chiqnisqa kaspapas kusisqa kananchikmantam (Mat. 5:4, 10, 11). ¿Imaynatataq kusisqa kachwan imapiña tarikuspapas?

³ Jesuspa yachachisqanman hinaqa manam tukuy imaraqchu allin kanan kusisqa kananchikpaqqa. Aswanqa, kusisqa kanapaqqa Diostam maskananchik hinaspam payman asuykunanchik (Sant. 4:8). ¿Imaynatataq chayta ruwachwan?  Kay yachachikuypim kusisqa kanapaq kimsa kaqkunamanta yachasun.

4. ¿Imatataq ruwananchik kusisqa kanapaq? (Rimarimuytaq Salmos 1:1-3 nisqanmantapas).

⁴ PUNTA KAQ: Kusisqa kanapaqqa mikuchkaq hinam Diosmanta yachananchik. Runakunapas chaynataq animalkunapas kawsanankupaqqa mikunankum. Ichaqa runakunallam mikuchkaq hinaqa Diosmanta yachaytaqa atinchik, chaymantapas chaytam ruwananchikpuni. Chayraykum Jesuspas nirqa: “Runaqa manam tantallawanchu kawsanan, aswanqa Jehova Diospa lliw rimasqankunawanmi”, nispa (Mat. 4:4). Chaynaqa amayá huk punchawllapas saqisunchu biblianchikta leeytaqa. Salmos qillqapipasriki ninmi Diospa “kamachikuyninkunata tuta-punchaw” leeq runaqa kusisqa kasqanmanta (leey Salmos 1:1-3).

5, 6. (1) ¿Imakunamantam Diosqa bibliapi niwanchik? (2) ¿Imaynatam yanapawanchik biblianchikta leeyqa?

⁵ Jehova Diosqa kuyawasqanchikraykum bibliapi niwanchik kusisqa kanapaq imata ruwanamanta. Payqa yachachiwanchikmi imapaq unanchawasqanchikmanta, imaynata paywan kuyachikunamanta, pampachawananchikpaq imata ruwanamanta. ­Yachachiwanchiktaqmi hamuq tiempopi imata ruwananmantapas (Jer. 29:11). Chaykunamanta yachayqa anchatamá kusichiwanchik.

⁶ Bibliaqa yanapawanchikmi allinta kawsakunapaq, chaypi nisqanman hina ruwaspanchikqa kusisqam kasunchik. Chaynaqa,  sasachakuykunapi tarikuspanchikqa astawanyá biblianchikta leesun. Jesuspas nirqam: “¡Kusisqaqa kanku Diospa palabranta uyarispa kasukuqkunam!”, nispa (Luc. 11:28).

7. ¿Imaynatataq biblianchikta leenanchik?

⁷ Imaynam miski mikuytapas tuqyachikuspa-tuqyachikuspa mikunchik, yaqa chaynatam biblianchiktapas leenanchik. Ichaqa wakinpiqa utqayman rinanchik kasqanraykum utaq imapas sasachakuykunawan kasqanchikraykum mikuypa miski kasqantaqa mana musyanchikchu. Yaqa chaynam pasawachwan biblianchikta leeywanpas. Tiempo mana haypakusqanraykum wakinpiqa leesqanchikpipas manaña yuyaymananchikñachu. Ichaqa kallpanchakunanchikmi chaypipas kachkachwan hina leenapaq, rimasqankutapas uyarichkaq hina leenapaq, chaykunapi yuyaymananapaq, chayta ruwaspanchikqa kusisqam kasunchik.

8. ¿Imatataq ruwachkan ‘allin ruwaq yuyayniyuq’ sirvienteqa? (Qaway uray patanpi willakuyta).

⁸ Jesusmi churarqa ‘allin ruwaq yuyayniyuq sirvienteta’ chaynapi tiempollanpi mikuchichkaq hina yachachiwananchikpaq (Mat. 24:45). * Yuyayniyuq sirvienteqa bibliapi nisqanman hinamá yachachiwachkanchik (1 Tes. 2:13). Chay yachachiwasqanchikqa yanapawanchikmi Diospa piensasqanta yachanapaq. Chayraykum leenchik Willakuq qillqanchikta, ¡Rikchariy! qillqanchikta, jw.org niqpi yachachikuykunata. Chaymantapas huñunakuykunapaqmi allinta estudianchik, qawanchiktaqmi killan-killan lluqsimuq videokunatapas. Chaykunawan yanapachikuspanchikqa kusisqam kasunchik.

9. ¿Imatawantaq ruwananchik kusisqa kanapaq?

⁹ ISKAY KAQ: Chiqaptapuni kusisqa kanapaqqa Diospa kamachikuyninkunatam kasukunanchik. Salmos qillqaqmi nirqa: “Mayna kusisqam pipas Jehova Diosta manchakuqqa. Mayna kusisqam ñanninkunapi puriqqa”, nispa (Sal. 128:1). Diosta manchakuyqa payta kasukuymi, sunqunta mana nanachiymi (Prov. 16:6). Chayraykum kallpanchakunanchik kamachikuyninkunata kasukuspa allin kaqta ruwanapaq (2 Cor. 7:1). Diospa munasqanta ruwaspaqa chaynataq mana munasqan kaqkunata qipanchaspaqa kusisqam kasunchik (Sal. 37:27; 97:10; Rom. 12:9).

10. ¿Yachayllachu-yachananchik Diospa kamachikuyninkunata? (Rimarimuytaq Romanos 12:2 nisqanmantapas?

¹⁰ (Leey Romanos 12:2). Diospa kamachikuyninkunataqa manam yachayllachu-yachananchik, aswanqa kasukunanchikmi. Choferkunapas yachankum carronkuwan mana llumpayta rinkanankupaq autoridadkunapa nisqantaqa, ichaqa chayta yachachkaspapas wakinqa manam kasukunkuchu. Runakuna chayna kaptinpas ñuqanchikpaqa imayna kawsakusqanchikpim qawakunan Diosta kasukusqanchik (Prov. 12:28). Davidpas Diospa munasqanman hinam kawsakurqa, chaymi nirqa: “Allinta kawsakunaypaqmi qamqa yachachiwanki. Qampa qayllaykipiqa ancha-ancha kusikuymi kachkan. Qampa alliqnikipiqa wiñaypaq kusikuymi kanqa”, nispa (Sal. 16:11).

11, 12. (1) ¿Imapitaq yuyaymanananchik llakisqa kaspa kusirikuspapas? (2) ¿Imaynatam yanapawanchik Filipenses 4:8 nisqanqa imawan kusirikunapaq?

¹¹ Wakinpiqa llakinchikkunatawan sasachakuyninchikkunata qunqanapaqmi imawanpas kusirikunchik, chayqa allinmi. Ichaqa manam kusirikunanchikchu Diospa chiqnisqan kaqkunawanqa (Efes. 5:10-12, 15-17).

¹² Filipos llaqtapi iñiqmasinkunaman qillqaspanmi apostol Pablo nirqa allin kaqkunapi, chuya kaqkunapi, kuyanapaq kaqkunapi, imapas respetana kaqkunapi piensanankupaq (leey Filipenses 4:8). Pabloqa manam rimachkarqa kusirikuykunamantachu, ichaqa yanapawanchikmi imawanpas kusirikuyta munaspa allinta akllanapaq. Chaynaqa, takikuna uyarisqayki, videokuna qawasqayki, librokuna leesqayki, pukllaykuna pukllasqayki, ¿tupanchu Pablopa nisqanwan? Chaypi yuyaymanayqa yanapawasunmi Diospa munasqanman hina kasqanta utaq mana kasqanta yachanapaq. Ñuqanchikqariki munanchik Diospa munasqanman hina kawsakuytam (Sal. 119:1-3). Diospa munasqanman hina allin concienciayuq kaspaqa kusisqam kasunchik (Hech. 23:1).

13. ¿Imatawantaq ruwananchik kusisqa kanapaq? (Rimarimuytaq Juan 4:23, 24 nisqanmantapas).

¹³ KIMSA KAQ: Jehova Diostam imamantapas puntapi churananchik. Unanchawaqninchik kasqanraykum Diosninchiktaqa yupaychananchik (Apoc. 4:11; 14:6, 7). Chaynaqa imamantapas puntatam Diosninchikta yupaychananchik “atiyninpa yanapakuyninwan” “chaynataq imam kaqta paymanta” yachaspa (leey Juan 4:23, 24). Ñuqanchikqa munanchikmi bibliapi nisqanman hina Diosninchik atiyninwan yanapawananchikta. Harkakusqanku lawpi yachaspanchikpas Diosninchiktaqa puntapim churananchik. Huklawkunapiqa pachak masnin iñiqmasinchikkunam testigo kasqankurayku preso kachkanku. * Ichaqa chayna kaspankupas kusisqam kachkanku. Paykunaqariki atisqankutam ruwanku mañakunankupaq, estudianankupaq, hukkunaman Diosmantawan gobiernonmanta willakunankupaq. Awriki, chiqniwaptinchikpas kusisqamá tarikunchik, Jehova Diosqariki ñuqanchikwanmi kachkan, imapas ruwasqanchikqa manamá yanqachu (Sant. 1:12; 1 Ped. 4:14).

14. ¿Ima sasachakuypim tarikurqa Yovidonqa? ¿Imaynanpi?

¹⁴ Achka iñiqmasinchikkunam kay yachamusqanchikman hina ruwaspanku sasachakuypiña kaspankupas kusisqa kachkanku. Rimarisunyá iñiqmasinchik Yovidon Boboyonovmanta. Payqa Tayikistanmantam, 19 watanpim kachkan. 2019 watapim 4 punchaw octubre killapi militar kayta mana munasqanrayku wasinmanta aparurqaku. Achka killakunam carcelpi kachirqaku, suwata hinam maqaparqaku. Noticiakunapipas chaymantam rimarqaku, nirqakum militar kayta chaynataq militar pachata mana hinakuyta munasqanrayku maqapasqankumanta. Chaymanta qipamanmi mana atisqan llamkaykunapi llamkachirqaku, chaynam karqa chay nacionpi  presidente hurqunankupaq kamachinankama. ­Chayna ­sasachakuypi kachkaspanpas Yovidonqa Diosman sunqum karqa, hinaspapas kusisqam karqa. Chaynaqa karqa Jehova Diosmanta hinalla yachasqanraykum.

15. ¿Imaynatataq Yovidonqa carcelpi kachkaspan Diosmanta hinalla yacharqa?

¹⁵ Yovidonqa carcelpi kachkaspanpas chaynataq qillqankuna mana kachkaptinpas mikuchkaq hinam Jehova Diosmanta hinalla yacharqa. ¿Imaynatataq chaytaqa ruwarqa? Imatapas apaspankum iñiqmasinchikkunaqa chay apasqaku bolsapi sapa punchaw leenapaq Diospa palabranta qillqaruqku, chayta leespanmi Yovidonqa Diospi yuyaymanaq. Chaymi carcelmanta lluqsiruspan wakinkunata nirqa: “Manaraq sasachakuypi kachkaspaykichikyá Diosman astawan asuykuychik, chaypaqqa bibliaykichiktawan qillqanchikkunatam leenaykichik”, nispa.

16. ¿Imatataq Yovidonqa ruwarqa?

¹⁶ Iñiqmasinchik Yovidonqa Diospa kamachikuyninkunatam kasukurqa. Mana allinkunata ruwananmantaqa Jehova Diospi piensaspanmi paypa munasqanta ruwarqa. Diospa unanchasqankunapim yuyaymanarqa,  sapa punchawmi rikchariq pichinkuchakunapa takisqanwan, tutankunañataqmi killatawan lucerokunata qawaq. Nirqam: “Tukuy chaykunaqa kusichiwaqmi”, nispa. Diosninchikpa tukuy ima yachachiwasqanchikwanqa chaynataq tukuy ima quwasqanchikwanqa kusisqam tarikunchik, hina chaytaqmi kallpata quwanchik hinalla aguantanapaq.

17. ¿Imaynatataq 1 Pedro 1:6, 7 nisqan yanapawachwan Yovidon hina tarikuptinchik?

¹⁷ Yovidonqa Diostam imamantapas puntapi churarqa. Payqa yacharqam Diosman sunqu kayqa imamantapas aswan allin kasqanta. Jesuspas nirqam: “Jehova Diosllaykitam yupaychanaykiqa, payllatataqmi servinaykipas”, nispa (Luc. 4:8). Militarkunaqa munarqakum Yovidon Diosta qipanchananta, ichaqa Jehova Diostam tuta-punchaw mañakuspan nirqa chayta aguantananpaq chaynataq payman sunqu kananpaq. Mana allinkunata ruwachikuchkaspanpas Yovidonqa Diosman sunqum karqa. Chaymi kunanqa kusisqa tarikun. Kunanqariki ñawpaqmantaqa astawanmi Diospi hapipakun (leey 1 Pedro 1:6, 7).

18. ¿Imaynatam kusisqa kasun?

¹⁸ Jehova Diosqa yachanmi imawan chiqaptapuni kusisqa kananchikta. Yachamusqanchik kimsa kaqkunaman hina ruwaspanchikqa imaña-haykaña kaptinpas kusisqam kasunchik. Nisuntaqmi: “¡Mayna kusisqam Jehova Diosta Diosninkupaq hapiq runakunaqa!”, nispa (Sal. 144:15).