Eclesiastes 5:8 kaynata nin: ‘Huk kaqnin llaqtapi wakchakunata autoridad ñakarichisqanta qawaspaykiqa chaynataq allin arreglota derechonpi mana ruwaptinkuqa amayá admirakuychu. Chay autoridadpa hawanpim kachkan aswan huk autoridad, paykunapa hawanpipas hukkunaraqmi kachkan’, nispa.

Kaypi nisqanqa runakunamanta rimaspanpas rimachkantaqmi Jehova Diosmantapas. Kusichiwanchikmá chayta yachayninchikqa.

Eclesiastes 5:8 rimachkan wakchakunata kamachiq ñakarichisqanmanta, chay kamachiqqa yachananmi paypa hawanpi kaq kamachiq kasqanta, paykunapa hawanpipas huk kamachiqkunaraqmi kachkan. Ichaqa yaqa llapan kamachiqkuna mana allinta ruwasqankuraykum llapallan runakunapas ñakarinku.

Chayna kaptinpas yachanchikmi paykunapa ima ruwasqanta tukuy atiyniyuq Jehova Dios qawamusqanta. Chaymi Jehova Diosta mañakunanchik yanapawananchikpaq, paymantaqmi ima sasachakuyninchiktapas willakunanchik (Sal. 55:22; Filip. 4:6, 7). Bibliam nin: ‘[Jehova] Diosqa kay pachapi tukuy ima pasakusqantam qawamuchkan, chaynapi paypa qayllanpi allin sunquyuqkunaman atiyninta qawachinanpaq’, nispa (2 Cron. 16:9).

Chaynaqa Eclesiastes 5:8 nisqanwanmi yachanchik wakin kamachiqkunapa hawanpipas aswan atiyniyuq kamachiqraq kasqanta. Chaywanqa yachanchiktaqmi pi kamachiqmantapas Jehova Diosqa aswan atiyniyuq kasqanta. Jehova Diosninchikqa tukuy imatamá qawamuchkan, hinaspapas allinninchikpaqmá imatapas ruwanqa. Chaynamá kamachiwananchikpaq churasqan Jesuspas.