1, 2. Eclesiastes 11:6 nisqanqa, ¿imapaqmi kallpanchawanchik?

WAKIN nacionkunapiqa kusikuywanmi chaskinku Diosmanta willakuyninchiktaqa. Wakin nacionkunapim ichaqa mana anchachu munanku. Runakuna uyariptinkupas utaq mana uyariptinkupas “kaykamalla” niwananchikkamam Jehova Diosqa hinalla munachkan paymanta willakunanchikta.

² Jehova Diospa tantiasqan punchaw chayaramuptinqa manañam paymantaqa willakusunchikñachu. Chaymantam paypa piñakuynin punchaw chayamunqa (Mat. 24:14, 36). Chay punchaw chayamunankamayá hinalla kallpanchakusun Diosmanta willakunanchikpaq (qaway Eclesiastes 11:6).

3. ¿Imamantam kay yachachikuypi yachasun?

³ Pasaq yachachikuypim yachamurqanchik runakunata challwanapaq utaq Diosmanta willakunapaq imakuna yanapawananchikmanta (Mat. 4:19). Kunanñataqmi yachasunchik imaña-haykaña kaptinpas Diosmanta hinalla willakunapaq imakuna yanapawananchikmanta. Yachasunchikmá Diosmanta willakuyta puntapi churanamanta, pacienciakuq kanamanta hinaspa Jehova Diospi hapipakunamanta.

4. ¿Imanasqataq Jehova Diosmanta willakuyninchikta puntapi churanapaq kallpanchakunanchik?

⁴ Jesusqa ñam willakurqaña tukupay punchawkunapi imakuna kananmanta hinaspa runakuna imayna kanankumanta. Nirqataqmi tukuy chaykunarayku wakin qatiqninkuna Diosmanta willakuyninkuta manaña puntapi churanankumantapas. Chayraykum nirqa: “Qawan-qawanllayá kaychik”, nispa (Mat. 24:42). Kunanpas Noeypa tiemponpi hinam runakunaqa imapas munasqallankuwan apachikunku (Mat. 24:37-39;  2 Ped. 2:5). Chayraykum anchata kallpanchakunanchik Jehova Diosmanta willakuyninchikta puntapi churanapaq.

5. Hechos 1:6-8 nisqanman hinaqa, ¿maykamataq Diosmanta willakuyqa kanan karqa?

⁵ Kay tiempopiqa Diosmanta willakuyninchikta imamantapas puntapi churanapaqmi astawan kallpanchakunanchik. Jesusqa ñam willakurqaña wañukusqan qipamanqa astawanraq Diosmanta willakuy kananmanta (Juan 14:12). Jesus wañukuptinqa wakin qatiqninkunaqa kaqmantam kutikurqaku challwa hapiypi llamkayninkuman. Jesusqa kawsariramuspanmi paykunata yanaparqa achka-achka challwakunata hapinankupaq. Chaypitaqmi nirqa Diosmanta willakuy ima ruwaymantapas aswan allin kasqanta (Juan 21:15-17). Jesusqa hanaq pachaman manaraq ripukuchkaspanmi qatiqninkunata nirqa Diosmanta willakuyqa kay pachapa cantonkama kananmanta (qaway Hechos 1:6-8). Watakuna qipamanmi Jesusqa apostol Juanman musquyninpi hina qawachirqa “señorpa punchawninpi” * ima pasakunanmanta. Chaypim rikurqa angelkunapa yanapakuyninwan Diosmanta sumaq willakuy ‘llapallan nacionkunaman, kastakunaman, tukuy rikchaq rimayniyuqkunaman hinaspa lliw llaqtakunaman’ willakusqa kasqanta (Apoc. 1:10; 14:6). Chaywanmá sutillata qawanchik Jehova Diosqa tukuy sunqunchikwan paymanta willakunanchik munasqanta.

6. ¿Imataq yanapawasun Diosmanta willakuyninchikta imamantapas puntapi churanapaq?

⁶ Yanapawananchikpaq tukuyta Jehova Dios ruwasqanpi piensayninchikmi yanapawasun Diosmanta astawan willakunapaq. Jehova Diosqa payman sunqu kanapaqmi quwanchik qillqakunata, uyarinapaq kaqkunata, sapa killa lluqsimuq videokunata hinaspa hukkunata. Internetpi jw.org nisqapipas  waranqa masnin rimaykunapim sumaq yachachikuykuna kachkan (Mat. 24:45-47). Tukuy mana allinkunapa chawpinpi kaspanchikpas Jehova Diospa serviqninkunaqa enteron allpa pachapim huk sunqulla kanchik. Chayraykum qayna wata Jesuspa wañukusqanta yuyarinapaq punchawpi, tempranon videota qawarqanchik enteron allpa pachapi. Chay watataqmi Jesuspa wañukusqanta yuyarirqanchik 20.919.041 runakuna. ¿Manachu tukuy kaykunaqa ruwakun Jehova Diospa yanapakuynillanwan? Tukuy chaykunapi yuyaymanaymi yanapawasun Diosmanta willakuyta imamantapas puntapi churanapaq.

7. ¿Imaynatam Jesusta qatipakuchwan?

⁷ Jesusta qatipakuypas yanapawasuntaqmi Diosmanta willakuyninchikta puntapi churanapaqqa. Payqa manam imawanpas harkachikurqachu Diosmanta willakuynintaqa (Juan 18:37). Jesusqa manam satanastapas kasurqachu ‘kay pachapi gobiernokunatawan sumaq kayninkunata’ qawachiptinpas. Kamachiqninku kananpaq runakuna churaruyta munaptinpas ayqikurqam (Mat. 4:8, 9; Juan 6:15). Payqa manataqmi tukuy imapas kapuqniyuq kaytaqa munapayarqachu, nitaqmi hukmanyarqachu runakuna chiqniptinkupas (Luc. 9:58; Juan 8:59). Jesusta qatipakuspaqa imaña-haykaña kaptinpas mana hukmanyaspam Diosmanta hinalla willakusunchik (Heb. 12:3).

8. ¿Imapaqmi pacienciakuq kayqa yanapawasun?

⁸ Pacienciakuq kaspaqa imapas mana allinkuna tukunantam hinaspa unayña suyasqanchik chayamunantam mana amiruspa suyasun. Ñawpaq tiempopi Diosmanta willakuq Habacucmi Juda nacionpi tukuy mana allinkuna tukunanta munarqa (Hab. 1:2). Jesuspa qatiqninkunañataqmi piensarqaku Diospa munaychakuynin chaylla rikuriramuspan Roma nacionpa munaychakusqan kasqankumanta librananta (Luc. 19:11). Ñuqanchikpas suyachkanchik tukuy mana allinkunata Jehova Dios chinkachiptin allin runakunallaña kawsakunankutam (2 Ped. 3:13). Ichaqa Jehova Diospa tantiasqan punchaw chayamunankamam mana amiruspa suyananchik. Qatiqninpiyá yachaykusun pacienciakuq kanapaq imakuna yanapawananchikmanta.

9. ¿Imaynatam yachanchik Jehova Diosqa pacienciakuq kasqanta?

⁹ Jehova Diosmi pimantapas aswan pacienciakuqqa, paytam qatipakunanchik. Jehova Diosqa sinchi parata chayachimunanpaqmi mana amiruspan suyarqa Noey buqueta ruwananta hinaspa runamasinkunaman paymanta willakunanta (2 Ped. 2:5; 1 Ped. 3:20). Chaymantapas, Sodoma hinaspa Gomorra llaqtapi runakunata chinkachinanpaq tantiasqanmanta serviqnin Abrahan tapupayaptinmi mana piñakuspan sumaqta uyariykurqa (Gen. 18:20-33). Pachaknintin watataqmi Jehova Diosqa mana kasukuq Israel runakunawanpas pacienciakuq karqa (Neh. 9:30, 31). Kunanpas Jehova Diosqa pacienciakuq kasqanraykum llapallan runakuna huchankumanta wanakuspanku payman asuykunankuta mana amiruspan suyachkan (Juan 6:44; 1 Tim. 2:3, 4; 2 Ped. 3:9). Jehova Diosta qatipakuspaqa hinallam mana amiruspa paymanta willakusun hinaspa yachachisun. Bibliapi rikchanachiykunawanpas yachachwanmi pacienciakuq kaytaqa. Chaymantayá qawaykusun.

10. Santiago 5:7, 8 nisqanman hinaqa, ¿imatam yachachwan chakrapi llamkaqmanta?

¹⁰ (Qaway Santiago 5:7, 8). Chakrapi llamkaq runamanta bibliapa nisqanmi yachachiwanchik pacienciakuq kanapaq. Yaqa lliw kawsaykunam mana kamasllachu rurun, unaytaraqmi suyananchik. Ñawpaq tiempopi Israel  runakunaqa suqta killam suyananku karqa imapas tarpusqankuta cosechanankupaqqa (Mar. 4:28). Chakrapi llamkaq runa hinam ñuqanchikpas pacienciakuq kananchik. Chayna kayqa sasamá kanqa wakinpiqa.

11. ¿Imaynatam pacienciakuq kayqa yanapawasun Diosmanta willakuyninchikpi?

¹¹ Chakrapi llamkaqqa manamá tarpuruspanchu saqirun, aswanqa wiñaruptinmi tiempochakunan hallmananpaq hinaspa qurananpaq. Chaynataqmi ñuqanchikpas bibliamanta yachachisqanchik runamasinchikkunata mana amispa yanapananchik mana allinkunata saqinankupaq. Diosmanta willakusqanchikta runakuna mana chaskikuptinkupas pacienciakuq kasqanchikmi yanapawasun mana hukmanyarunapaq. Willakusqanchikta uyariq runakunawanpas pacienciakuqtaqmi kananchik. Manam iskay-kimsa punchawllamantachu Diosman sunqu kaytaqa atinqaku. Jesuspa qatiqninkunapas manamá chayllachu imapas yachachisqantaqa entiendeqku (Juan 14:9). Amayá qunqasunchu, ñuqanchik tarpuptinchikpas utaq parquptinchikpas Diosmi wiñachinqa (1 Cor. 3:6).

12. ¿Imaynatam pacienciakuq kasqanchikta qawachichwan ayllunchikkunaman Diosmanta willaspanchik?

¹² Pacienciakuqtaqmi kananchik ayllunchikkunaman Jehova Diosmanta willaspanchikpas. Chaypaqmi yanapawasun Eclesiastes 3:1, 7 nisqan. Chaypim nin: ‘Kanmi tiempo upallanapaq, kantaqmi rimanapaqpas’, nispa. Imayna kawsakusqanchikwan Diospa serviqninkuna kasqanchikta yachaptinkupas listollam kananchik paykunaman Diosmanta haykapi willanapaqpas (1 Ped. 3:1, 2). Jehova Diosmanta tukuy sunqunchikwan runamasinchikkunaman yachachispanchikpas llapallankuwanmi pacienciakuq kananchik, astawanraqmi ayllunchikkunawanqa.

13, 14. ¿Pikunapa pacienciakuq kasqantam qatipakuchwan?

¹³ Rimarisun Diospa serviqninkuna ñawpaq  tiempopi hinaspa kunan tiempopi pacienciakuq kasqankumanta. Habacucmi tukuy mana allinkuna chinkanantaña munarqa. Ichaqa kaynatam nirqa: “Llaqta waqaychaq hinam uyan-uyanlla maymi kasqaypi suyallasaq”, nispa (Hab. 2:1). Apostol Pablopas Diosmanta willakuynintam tukuytaña munarqa. Chaywanpas mana amispanmi “sumaq willakuykunata” hinalla willakurqa (Hech. 20:24).

¹⁴ Rimarisun galaad escuelaman riq casarasqa iñiqmasinchikkunamanta. Paykunatam nirqaku huk nacionpi Diosmanta willakunankupaq. Chay nacionpi runakunaqa Diosmanta mana yachay munaqkunam kanku. Chaymi iñiqmasinchikkunaqa bibliamanta yachay munaq runakunata huk-iskayllata tarirurqaku. Galaad escuelaman riqmasinkunañataqmi huk nacionkunapi Diosmanta willakurqaku. Paykunam chay casarasqa iñiqmasinchikkunaman willarqaku achka runakunataña bautizakunankupaq yanapasqankumanta. Chaywanpas iñiqmasinchikkunaqa mana amispankum hinalla Diosmanta willakurqaku. Chayna kallpanchakusqankuraykum pusaq watamanta bibliamanta yachachisqanku huknin runa bautizakururqa. Chaynaqa, ñawpaq tiempopi hinaspa kunan tiempopi Diospa serviqninkunapas mana amiruspankum hinalla willakurqaku. Chayraykuyá ‘iñiywan hinaspa pacienciawan promesakuna chaskiqkunapa ruwasqankuta qatipakusun’ (Heb. 6:10-12).

15. ¿Imanasqam munanchik runamasinchikkuna Diosmanta yachanankuta?

¹⁵ Hamuq tiempopaq Diospa niwasqanchikkunamanta mana iskayrayasqanchikraykum munanchik runamasinchikkunapas chaymanta yachaykunankuta. Manamá iskayrayanchikchu bibliapa nisqankunamantaqa (Sal. 119:42; Is. 40:8). Bibliapa nisqanman hinataqmi qawachkanchik kay tukupay punchawkunapi imakuna pasakusqantapas. Qawanchiktaqmi bibliapa nisqanta kasukuspanku runamasinchikkunapa allin kawsakusqankutapas. Chayraykum astawanraq munanchik runamasinchikkuna Diosmanta yachaykunankuta.

16. (1) Salmos 46:1-3 nisqanman hinaqa, ¿imaynatam Jehova Diospi hapipakuyqa yanapawanchik hinalla paymanta willakunapaq? (2) ¿Imaynatam Jesuspi hapipakuypas yanapawanchik?

¹⁶ Chaymantapas, Jehova Diospi hinaspa paypa churasqan kamachiq Jesuspi hapipakusqanchikmi yanapawasun hinalla Diosmanta willakunapaq (Juan 14:1). Imaña-haykaña kaptinpas Jehova Diosninchikqa pakaykuwasunmi, hinaspapas kallpanchaykuwasunmi (qaway Salmos 46:1-3). Chaymantapas, manapunim iskayrayanchikchu Diosmanta willakuptinchik hanaq pachamanta Jesus yanapamuwasqanchiktaqa (Mat. 28:18-20).

17. ¿Imanasqataq hinalla Diosmanta willakunanchik? Rimarimuy huk sipasmanta.

¹⁷ Taytanchik Jehovapi hapipakusqanchikraykum mana iskayrayanchikchu paymanta willakusqanchikpi yanapawananchikmantaqa (Ecl. 11:6). ¿Yaqachu runakuna asuykamuwanchik achka runakunapa kasqanpi Diosmanta willakuptinchik? ¡Arí! Chayna kasqantam willawanchik 2014 watapa noviembre killanpi lluqsimuq Nuestro Ministerio del Reino sutiyuq qillqanchik. Chaypim willawanchik Jehova Diospa testigonkunamanta huk sipas yachay munasqanmanta. Ichaqa manam tarirqachu maypi huñunakusqanchikta. Huk kutipim chay sipasqa iñiqmasinchikkunawan tuparurqa, chay iñiqmasinchikkunaqa achka runakunapa kasqanpim Diosmanta willakuchkarqaku. Chaymanta qipamanmi bibliamanta yacharuspan bautizakururqa. Kunanqa qanchis chunka horatam Diosmanta  willakun. Kaymi yachachiwanchik Diosmanta yachay munaqkunaqa achkaraq kasqankumanta. Chaymi kallpanchakunanchik hinalla Diosmanta willakunapaq.

18. ¿Imanasqataq mana iskayrayanchikchu Jehova Diosmanta willakuyqa tantiasqan punchawpi tukunanmanta?

¹⁸ Manamá iskayrayanchikchu Jehova Diosmanta willakuy paypa tantiasqan punchawpi tukunanmantaqa. Rimarisun Noeypa tiemponmanta. Chay tiempopipas Jehova Diosqa tantiasqan punchawpi imapas nisqan ruwakusqantam qawachirqa. Payqa pachak iskay chunkan wata ñawpaqtaraqmi tantiarurqaña sinchi para haykapi chayamunanmanta. Chay tantiasqanmanta chunkantin watakuna qipatam Noeyta kamachirqa buqueta ruwananpaq. Chaymi Noeyqa yaqa tawa chunka utaq pichqa chunka wata mana samaykuspan ruwarqa. Noeyqa runakuna mana uyariptinkupas hinallam sinchi para chayamunanmantaqa willakurqa buqueman animalkunata yaykuchinan punchawkama. Chaymantam Jehova Diosqa tantiasqanman hina sinchi para chayamunanpaq buquepa punkunta wichqarurqa (Gen. 6:3; 7:1, 2, 16).

19. ¿Imaynam hamuq tiempopi kawsakusunchik Jehova Diosmanta hinalla willakuspaqa?

¹⁹ Ñamá Jehova Diosqa paymanta willakuytaqa tukuchinqaña. Chaymantapas, satanaspa munaychakusqan tukuy mana allinkunata chinkarachiptinmi allin ruwaq runakunallaña hawka hinaspa kusisqa kawsakusunchik. Chay punchaw chayamunankamaqa Noeyta, Habacucta hinaspa Diospa wakin serviqninkunata qatipakuspayá hinalla paymanta willakusun. Chaypaqqa Diosmanta willakuytam imamantapas puntapi churananchik, pacienciakuqmi kananchik hinaspapas Jehova Diospim hapipakunanchik. Manataqmi imapas nisqankunamantaqa iskayrayananchikchu.